Bũmb toor-toor n be Biiblã pʋgẽ n wilgdẽ tɩ Wẽnnaam sɩd beeme. A yetame tɩ d segd n talla d “yamã” la d ‘yam-vẽenemã’ n tẽ Wẽnnaam, la d ra tẽ nebã sẽn yet bũmb ning Wẽnnam zugã zond-yaar ye. (Rom dãmbã 12:1; 1 Zã 5:20) Bɩ d ges kaset buud toor-toor sẽn be Biiblã pʋgẽ n wilgdẽ tɩ Wẽnnaam sɩd beeme:

•   Ãndũniyã bũmb toor-toorã sẽn sigl sõma wã wilgdame tɩ naand n be. Biiblã yetame: “Sɩd me, roog fãa yaa ned n me, la sẽn naan-a bũmb fãa wã yaa Wẽnnaam.” (Ebre-rãmbã 3:4) Vɛrse wã sẽn yet bũmb ningã yaa vẽenega. Baa neb wʋsg sẽn karem n zãag sak n deegame tɩ gomdã yaa sɩda. a

•   Ninsaal buud fãa tʋll n bãnga vɩɩmã võore. Baa a sã n wa paam bũmb nins fãa sẽn yaa tɩlɛ ne a vɩɩmã, wala makre, rɩɩbo, futu, ro-gãaga, a ket n baood n bãnga vɩɩmã võore. Biiblã wilgdame tɩ ned sẽn maand woto, yaa ned sẽn wilgd t’a ‘segd n baoo Wẽnnaam,’ rat n yeel t’a tʋllame n bãng-a la a tũ-a. (Matiye 5:3; Vẽnegre 4:11) Ned a woto pa mi bal tɩ Wẽnnaam beeme ye. A miime tɩ yẽ la Naandã, t’a nong-d lame, n dat tɩ d bao n bãng-a la d tũ-a.—Matiye 4:4.

•   Bãngr-goam la b ra pĩnd n togs Biiblã pʋgẽ hal sẽn kaoose, tɩ pids kɛpɩ rũndã-rũndã. Biiblã goamã sẽn pidsd kɛpɩ wã wilgdame t’a pa yit ninsaal nengẽ ye.—2 Pɩyɛɛr 1:21.

•   Neb nins sẽn gʋls Biiblã ra tara bãngr siãnsã wɛɛngẽ n yɩɩd b wakatẽ nebã. Wala makre, pĩnd wẽndẽ wã, nebã ra tagsdame tɩ tẽngã roga rũng zugu, wala makre, wobgo, reoogo, bɩ loalga. Biiblã yaool n yeelame tɩ Wẽnnaam naana dũniyã t’a “yag vɩʋʋgẽ.” (Zoob 26:7) Biiblã leb n yeelame tɩ tẽngã yaa ‘gilga.’ (Ezayi 40:22) Woto kɩtame tɩ neb wʋsg sak n deeg tɩ yaa Wẽnnaam n vẽneg neb nins sẽn gʋls Biiblã.

•   D paamda sogs-kãsems leoor Biiblã pʋgẽ. F sã n pa paam sogs-kãensã leoore, f tõe n wa tagsdame tɩ Wẽnnaam kae ye. Wala makre, Wẽnnaam sã n yaa nonglem la pãng sẽn ka to soaba, bõe yĩng tɩ wẽnemã la namsgã be duniyã zugu? Bõe yĩng tɩ tũudum toor-toorã nong n tusd nebã tɩ b maand sẽn yaa wẽnga, la pa sẽn yaa sõma?—Tɩte 1:16.