Ad bũmb kẽer yell d sẽn na n gom sõs-kãngã pʋgẽ

•  Ba tʋʋmd yaa bõe?

•  Bõe n kɩt tɩ ba wã tʋʋmd tar yõod wʋsgo?

•  Ba-rãmbã manesem sẽn segd n yɩ to-to ne b kom-pugli wã

•  Sagls ba-rãmbã yĩnga

•   Sẽn deng biigã rogem. Y manesem sẽn yaa to-to rũndã-rũndã wã wilgda y sẽn na n yɩ ba ning buud beoogo. Sebr a yembr (Do Fathers Matter?) pʋgẽ, b yeelame yaa:

   “Rao sã n sõngd a pag sẽn tʋte, n yãagd-a tɩ b kẽnd n daad teedo, n yãagd-a logtor yiri, n paamd n get bi-pɛɛlgã sẽn be a pʋgẽ wã ne masĩn maasem, wall a kelgd a sũurã sẽn wẽed to-to wã, naoor wʋsgo, sõngd-a lame t’a wa tõog n sõng a pagã tɩ b ges bi-pɛɛlgã yell a rogmã poore.”

   “M da pa rat tɩ m pagã wa tagsdẽ tɩ m bas-a lame t’a maood ne zu-loees nins pʋgã sẽn wat ne wã a yembr ye. Rẽ n so tɩ m da sõngd-a wa m sẽn tõe tɛka. Tõnd naaga taab n segl bi-pɛɛlgã roogã menga. Wakat ning d sẽn da segend d mens n gũud biigã rogmã yɩɩ noog wʋsg ne tõnd d yiibã fãa.”—A James.

   Biiblã saglga: “Ra bao-y y mens nafr bal ye. Bao-y y taabã nafr me.”—Filip rãmbã 2:4.

•   Biigã rogem poore. Yãmb sã n deemd ne y biigã la y rɩkd-a y nusẽ, tõe n kɩtame tɩ y nong y biigã, tɩ y biigã me nong yãmba. Sõngd-y y pagã n get biigã yell me. Yãmb sõngrã nafda biigã wʋsg a bɩʋʋngã wɛɛngẽ. Yãmb sẽn maand woto wã wilgdame tɩ y biigã tara yõod wʋsg y nifẽ.

   “Maan-y wa y yaa y biigã to. Reemd-y ne-a. Maand-y laado. Ra bao-y n maan-y bũmb fãa tɩ zems kɛpɩ ye. Tẽeg-y tɩ yãmb a roagdbã manesmã la biigã na n ges n bãng nonglem sẽn yaa soaba.”—A Richard.

   Biiblã saglga: “Kamb yaa kũun a Zeova sẽn kõte. Kamb f sẽn dog yaa keoor b sẽn kõ.”—Yɩɩn-sõamyã 127:3, notã.

•   Biigã sã n wa bitẽ. Bãngdbã maana vaeesg n mik tɩ kamb nins sẽn noom ne b ba-rãmbã tʋmda sõma lekollẽ wã n yɩɩda, tɩ b tara sũ-noogo, la tɩ b pa tʋll n yũ dorg wall b tʋm bi-be-tʋʋm ye. Baood-y sẽk n maand bũmb nins sẽn na n kɩt tɩ yãmb ne y biigã noom ne taabã.

   “Mam bi-rɩblã yeela maam t’a sã n wa yi zakẽ wã, bũmb ning sẽn na n sãam a sũur n yɩɩda, yaa d sẽn pa na n le paamd n sõsd ne taab so-wok wall rɩɩb sasa wã. Tõnd sõss nins sẽn tall yõod wʋsgã sʋka, kẽer yɩɩ sasa m sẽn da pa tẽede. Yɩɩ d sẽn zĩnd ne taab n kaoos poor la d sõs sõs-kãense.”—A Dennis.

   Biiblã saglga: “Bɩ y kell n gũus neer ne yãmb sẽn kẽnd to-to wã tɩ ra yɩ wa neb sẽn ka yam ye. Bɩ y yɩ wa yam dãmba. Ra sãam-y y sẽkã ye.”—Efɛɛz rãmbã 5:15, 16.

 Neb wʋsg yamẽ, ba-rãmbã tʋʋmd yaa sõng tɩ zakã rãmb paam bũmb nins sẽn yaa tɩlɛ wã, la b koglg-ba, tɩ ma-rãmbã tʋʋmd yaa sõng tɩ zakã rãmb paam sũ-noogo. (Tõodo 1:31; Ezayi 49:15) La zags kẽer pʋsẽ, ba-rãmbã maanda bũmb kẽer ma-rãmbã sẽn segd n maane, tɩ ma-rãmbã me maand bũmb kẽer ba-rãmbã sẽn segd n maane. Baa ne rẽ, bãngdbã wilgame tɩ ba wã ne ma wã fãa tʋʋmd tara yõod wʋsg kambã wubr wɛɛngẽ. a

 Bãngd a yembr yʋʋr sẽn boond t’a Judith Wallerstein togsa yẽ mengã kibar sẽn wilgd rẽ. A yeelame yaa: “Daar a yembre, mobil n fão m yʋʋm piig la yiib bi-puglã. Badaare, a sẽn da rat yaa a ba wã naag-a n kẽ ãmbilãnsã pʋgẽ, bala a ra kɩsa sɩd t’a ba wã n tõe n ges a yell yel-kãngã sasa n tɩ yɩɩda. A sẽn wa n ta logtor yirã, a sẽn da rat yaa mam zĩnd a sɛɛgẽ daarã tõre, sẽn na yɩl n bels-a.” b

 “Rao tõe n sõnga a zakã rãmb tɩ b yamã gãand bãan la b paam koglgo, n yɩɩd pag sẽn na n bao n maan dẽ a yembre. La pag sã n kelgd a kambã neer la a wilgdẽ t’a kʋmd-b lame, a sõngd-b lame tɩ b neẽ tɩ b roagdbã nong-b lame, la tɩ b wʋmda b yɛlã võore. B yiibã fãa naagda taab n tʋmdẽ.”—A Daniel.

 Biiblã saglga: “M biiga, kelg f ba wã kiblgu, la f ra bas f ma wã sẽn zãms foo bũmb ningã me ye.”—Yel-bũnã 1:8.

 Bi-pugl geta a ba wã manesem sẽn yaa to-to wã, n bãngd rapã manesem sẽn segd n yɩ a soab ne-a. A bãngda rẽ ne bũmb a yiib maasem:

•   A geta yãmb manesem sẽn yaa to-to ne a ma wã. Yãmb sã n nong y pagã la y nand-a, y bi-puglã na n bãnga zʋg-sõma nins a sẽn segd n bao ned ning a sẽn na n kẽ kãadem ne-a wã nengẽ.—1 Pɩyɛɛr 3:7.

•   A geta yãmb manesem sẽn yaa to-to ne-a wã. Yãmb sã n nand y bi-puglã, y wilgd-a lame t’a segd n nanda a menga. Sẽn paase, a bãngdame tɩ rap a taabã me segd n talla manesem a woto ne-a.

   La b sã n wae n sãbsd bi-pugla, kɩtdame t’a wa pa le nand a menga, la tõe n kɩt me t’a baood n na n ta rap a taab yam, baa rap toog sẽn kãe ne-a.

   “Bi-pugl ba sã n nong-a la a teend-a, a pa na n wa nong rao sẽn pa tar zʋg-sõma nana-nana ye.”—A Wayne.