Ezekɩyɛll sebre 11:1-25
11 Vʋʋsem* n zẽk maam n tall n kẽng a Zeova roogã yaang rignoorẽ wã, rignoor ning sẽn tees yaangã.+ Mam yãa rap pisi la a nu sẽn be rignoorẽ wã, t’a Azʋʋr biig a Yaazaniya ne a Benaya biig a Pelatiya sẽn yaa nin-buiidã nanambsã be b sʋka.+
2 Rẽ poore, Wẽnnaam yeela maam yaa: “Ninsaal biiga, yaa nin-kãensã la sẽn magd mag-wẽns la sẽn kõt sagl-yood tẽn-kãngã pʋgẽ wã.
3 B yetame: ‘Pa rot meeb wakat sɩda?+ Tẽngã* yaa rʋko,*+ tɩ tõnd yaa nemdo.’
4 “Woto wã, togs bãngr-goam b wɛɛngẽ. Ninsaal biiga, togs bãngr-goama.”+
5 Dẽ, a Zeova vʋʋsmã waa mam zugu.+ A yeela maam yaa: “Yeel yaa: ‘Ad a Zeova sẽn yeele: “Yãmb a Israyɛll buudã neba, yãmb sẽn yeelã yaa sɩda. Mam mii yãmb sẽn tagsd bũmb ning yellã.*
6 Yãmb kɩtame tɩ neb wʋsg ki tẽn-kãngã pʋgẽ. Yãmb pidsa a soayã ne kũ-rãmba.”’”+
7 “Woto wã, ad a Zeova sẽn yaa Zu-soab sẽn ka to wã sẽn yeele: ‘Yaa kũ-rãmb nins yãmb sẽn lob zĩig fãa tẽngã pʋgẽ wã n yaa nemdo, tɩ tẽngã yaa rʋko.+ La b na n yiisa yãmb mensã tẽngã pʋgẽ.’”
8 “A Zeova sẽn yaa Zu-soab sẽn ka to wã yeelame: ‘Yãmb zoee sʋʋga,+ la mam na n kɩtame tɩ b kʋ yãmb ne sʋʋse.
9 Mam na n yiisa yãmb tẽngã pʋgẽ n ning-y sãamb nusẽ, la m sɩbg-yã.+
10 Sʋʋg n na n kʋ yãmba.+ M na n kaoo yãmb bʋʋd Israyɛll toadgẽ wã.+ Woto, yãmb na n bãngame tɩ mam yaa a Zeova.+
11 Tẽngã pa na n yɩ rʋk yãmb yĩng ye. Yãmb me pa na n yɩ nemd a pʋgẽ ye. Mam na n kaoo yãmb bʋʋd Israyɛll toadgẽ wã.
12 Woto, yãmb na n bãngame tɩ mam yaa a Zeova. Bala yãmb pa tũ mam noyã la y sak mam tõodã ye.+ Yãmb maana wa sẽn zems buud toɛy-toɛyã sẽn karg n gũbg yãmbã tõodã.’”+
13 Mam sẽn togs bãngr-gomdã bala, a Benaya biig a Pelatiya kiime. Mam lʋɩɩme n fõgen m neng tẽng n zẽk m koɛɛgã wʋsg n yeele: “Kayto! Zu-soab sẽn ka to a Zeova! Yãmb na n sãama Israyɛll neb nins sẽn ketã fãa la?”+
14 A Zeova le goma ne maam n yeel yaa:
15 “Ninsaal biiga, Zerizalɛm nebã yeela fo ba-biisã, fo ba-biis nins sẽn tar sor n tõe n lebs n da zĩig fo sẽn koosã, ne Israyɛll buudã fãa yaa: ‘Ra pẽneg-y-yã a Zeova ye. Soolmã yaa tõnd dẽnda. B kõ-a-la tõnd tɩ d sooge.’
16 Woto wã, yeel yaa: ‘Ad a Zeova sẽn yaa Zu-soab sẽn ka to wã sẽn yeele: “Baa mam sẽn kɩt tɩ b zãag n tɩ be buud toɛy-toɛyã sʋka, la m sẽn sãeeg-b soolem toor-toorã pʋsẽ wã,+ wakat bilf pʋgẽ, mam na n lebga wẽnd-doog b yĩng soolem nins pʋsẽ b sẽn kẽngã.”’+
17 “Woto wã, yeel yaa: ‘Ad a Zeova sẽn yaa Zu-soab sẽn ka to wã sẽn yeele: “Mam na n yiisa yãmb buud toɛy-toɛyã sʋka, la soolem nins pʋsẽ yãmb sẽn sãeegã n tigmi. Mam na n kõo yãmb Israyɛll soolmã.+
18 Yãmb na n lebg n kẽnga be, n yiis a bõn-yoodã la a tʋʋm-wẽnsã fãa a pʋgẽ.+
19 Mam na n kõo yãmb sũur a yembre,+ la m kõ-y yam-paalga.+ Mam na n yãka y sũyã sẽn yaa kãn-kãe wa kugã y yĩnsẽ wã,+ la m kõ-y sũy sẽn yaa bʋgsgo,*+
20 sẽn na yɩl tɩ y kẽn wa sẽn zems mam noyã, n sak mam tõodã la y tũ-ba. Woto, yãmb na n yɩɩ mam nin-buiidu, tɩ mam yɩ y Wẽnnaam.”’
21 “‘“La sã n yaa ne neb nins sũy sẽn ket n dat tɩ b maand bõn-yoodã la b tʋmd tʋʋm-wẽnsã, mam na n kɩtame tɩ b manesmã biis wẽneg n sig b zutu.” Yaa a Zeova sẽn yaa Zu-soab sẽn ka to wã n yeele.’”
22 Rẽ poore, seribẽ-rãmbã zẽka b pɩgsã. Ruzãnt-rãmbã ra bee b sɛɛgẽ,+ tɩ Israyɛll Wẽnnaamã ziirã be b zugẽ.+
23 A Zeova ziirã+ zẽkame n yi tẽngẽ wã, n tɩ yaas tãng ning sẽn be tẽngã yaangã zugu.+
24 Vʋʋsem* n zẽk maam n tall n kẽng neb nins sẽn be yembd Kalde wã nengẽ. Tũu ne Wẽnnaam vʋʋsmã vẽnegr maasem. Rẽ poore, vẽnegrã mam sẽn yã wã loog n basa maam.
25 Mam sɩngame n togsd sẽn be-b yembdã bũmb nins fãa a Zeova sẽn kɩt tɩ m yã wã.
Vẽnegr toor-toore
^ Ebre wã pʋgẽ, gom-bilã tõe n gomda Wẽnnaam vʋʋsmã yelle, wall malɛk yelle.
^ Ebre, “A,” rat n yeel tɩ Zerizalɛm tẽngã, Zʋɩf-rãmbã sẽn da tẽed tɩ b na n paama koglg a pʋgẽ wã.
^ Bɩ, “rʋk b sẽn tar n segendẽ t’a noorã yaa yalenga.”
^ Bɩ, “bũmb ning sẽn wat y yamẽ wã.”
^ Rat n yeel tɩ sũur Wẽnnaam goamã sẽn kẽed nana-nana.
^ Ebre wã pʋgẽ, gom-bilã tõe n gomda Wẽnnaam vʋʋsmã yelle, wall malɛk yelle.
