Ezekɩyɛll sebre 16:1-63
-
Wẽnnaam nonga Zerizalɛm (1-63)
16 A Zeova le goma ne maam n yeele:
2 “Ninsaal biiga, kɩt tɩ Zerizalɛm bãng a tʋʋm-wẽnsã.+
3 Fo segd n yeelame yaa: ‘Ad a Zeova sẽn yaa Zu-soab sẽn ka to wã sẽn yet Zerizalɛm wɛɛngẽ: “Fo yita Kanaã nebã soolmẽ. Yaa be la f rog-yã. Fo ba wã ra yaa Amoor neda,+ tɩ f ma wã ra yaa Hɛt neda.+
4 Fo rogmã daare, b pa wãag fo yũugã ye. B pa so foo koom sẽn na yɩl tɩ f yɩ yɩlemd ye. B pa sõ foo yamsem, la b pa vil foo pɛɛl me ye.
5 Ned baa a ye pa zoe fo nimbãaneg tɩ sek a na maan bõn-kãensã baa a yembr ye. Ned baa a ye pa kʋm foo ye. B pʋd n loba foo weoogẽ, bala b kisga foo* f rogmã daare.
6 “‘“Mam sẽn wa n loogd fo sɛɛgẽ wã, mam yãame tɩ fo tẽbd f zɩɩmã pʋgẽ. Fo sẽn da gãe f zɩɩmã pʋgẽ wã, mam yeelame: ‘Kell n vɩɩmde!’ N-ye. Mam yeela foo, f sẽn wa n gãe f zɩɩmã pʋgẽ wã yaa: ‘Kell n vɩɩmde!’
7 Mam kɩtame tɩ fo nebã lebg wʋsg wa tɩɩsã sẽn tobd weoogẽ wã. Fo bɩɩme n koge, n da ningd fan-teed sẽn yaa neeb wʋsgo. Fo bĩisã pusame, tɩ f zoobdã yi wʋsgo. La fo ra ket n yaa a zaal zãng fasɩ.”’
8 “‘Mam sẽn wa loogd fo sɛɛgẽ n yã foomã, mam mikame tɩ fo bɩɩme n ta baoobo. Dẽ, mam tẽega m fuugã n pil foo,+ n lud f yãndã. Mam maana kaool ne foo n wẽene, tɩ fo lebg mam soolem.’ Yaa a Zeova sẽn yaa Zu-soab sẽn ka to wã n yeele.
9 ‘Sẽn paase, mam soo foo koom, n yiis f zɩɩmã la m zɛ-f kaam.+
10 Rẽ poore, mam yeelga foo fuug sẽn gʋle, la m kõ-f neooda sẽn maan ne gãong sẽn yaa sõma wʋsgo. Mam pila foo ne lẽ gĩs-bãanes fuugu, la m yeelg foo fut ligd sẽn yaa toogo.
11 Mam ninga foo fan-teedo, n pid f nusã zũya, la m pid f kokorã yãndo.
12 Sẽn paase, mam ninga f yõorã nugbĩnga, n ning f tʋbã tʋb-londo, la m fõgen f zugã maanf sẽn yaa neer wʋsgo.
13 Fo ra nagsda f meng ne sãnem la wanzuri, tɩ f futã ra yaa lẽ gĩs-bãanes futu. Fo ra yera fuug ligd sẽn yaa toog la sẽn gʋle. Fo rɩɩb ra yaa zom-bãanega, sɩɩd la kaam. Fo wa n lebga neer wʋsgo,+ n tog ne yɩ na-poaka.’”*
14 “‘Fo yʋʋrã ra yita buud toɛy-toɛyã sʋka,+ fo neermã yĩnga. Bala fo neermã ra zemsa zãnga, mam ziirã m sẽn ning fo zugã yĩnga.’+ Yaa a Zeova sẽn yaa Zu-soab sẽn ka to wã n yeele.”
15 “‘La fo wa n yik n teega f neermã,+ n lebg pʋg-yoodr f yʋʋrã sẽn yi wã yĩnga.+ Fo ra yooda yaar ne so-loaadbã fãa,+ n dɩkd f meng n kõt-ba.
16 “Fo rɩka f fut nins sẽn yaa kõbg toor-toorã kẽer n nags f zĩ-zãntsã, fo sẽn yood zĩis ninsã.+ Yaa bũmb sẽn da pa segd n maan ye. Bõn-kãens pa segd n le maan ye.
17 Sẽn paase, fo rɩka f fan-te-neebã* sẽn maan ne sãnemã la wanzuri wã mam sẽn kõ foomã, n maan bõn-naands sẽn yaa rapa, n da yood ne-ba.+
18 Fo rɩka fo fut nins sẽn gʋlã n pil-ba,* la f rɩk mam kaamã ne m wisdã n kõ-ba.+
19 Burã sẽn maan ne zom-bãanega, kaam la sɩɩdã mam sẽn da kõ foo tɩ f wãbã, fo rɩka rẽ me n kõ-b tɩ yɩ kũun sẽn tar yũ-noogo.*+ Yɩɩ woto bal kɛpɩ.’ Yaa a Zeova sẽn yaa Zu-soab sẽn ka to wã n yeele.”
20 “‘Fo rɩka f kom-dibli wã la f kom-pugli wã fo sẽn dog n kõ maamã,+ n maan maand n kõ bõn-naandsã tɩ b rɩ.+ Rẽnd fo yoobã pa sek foo wɛ?
21 Fo kʋʋ mam kom-dibli wã, n dɩk n yõog bugum tɩ yɩ maando.+
22 Fo sẽn wa n tʋmd f tʋʋm-wẽnsã fãa la f yoodã, fo pa tẽeg f yãadem wakate, fo sẽn da yaa a zaal zãng fasɩ n tẽbd f zɩɩmã pʋgẽ wã ye.
23 Toog bee fo zugu! Toog bee fo zugu, fo sẽn maan bõn-wẽn-kãensã fãa wã yĩnga!’+ Yaa a Zeova sẽn yaa Zu-soab sẽn ka to wã n yeele.
24 ‘Zãma zĩig fãa pʋgẽ, fo maana kunkubr la zĩ-zãntga.
25 Fo maana f zĩ-zãntsã sotiis fãa zugu. Fo kɩtame tɩ f neermã lebg bũmb b sẽn kisi, fo sẽn dɩk f meng n kõ* so-loaad fãa wã yĩnga.+ Fo yoo wʋsgo.+
26 Fo yoo ne Ezɩpt kom-dibli wã+ sẽn yaa fo yags sẽn yaa ragã.* Fo yoo naoor ka tɛk n kɩt tɩ mam sũurã yiki.
27 Masã, mam na n tẽega m nug n sɩbg foo la m boog f rɩɩbã.+ Mam na n basa foo tɩ pagb nins sẽn kis foomã maan foo b sẽn date.+ Yaa Filisti nebã kom-pugli wã sũy sẽn sãam fo tʋʋm-dẽgdã yĩngã.+
28 “‘Yoobã sẽn da pa sekd foomã yĩnga, fo yoo ne Asiiri+ kom-dibli wã me. Fo sẽn yo ne bãmbã poore, kell n pa sek foo ye.
29 Woto, fo maneg n yoo ne toandbã soolem* neba, la ne Kalde nebã.+ La baa ne rẽ, kell n pa sek foo ye.
30 Fo sũurã ra pa tar laafɩ,* fo sẽn wa n maand bõn-kãensã fãa, n maand wa pʋg-yoodr sẽn pa zoet yãndã.’+ Yaa a Zeova sẽn yaa Zu-soab sẽn ka to wã n yeele.
31 ‘La fo sẽn wa n maan kunkubr sotiis fãa zugu, la f maan zĩ-zãntg zãma zĩig fãa pʋgẽ wã, fo ra pa wõnd pʋg-yoodr ye. Bala fo ra pa sakd n deeg yaood ye.
32 Fo yaa pʋg-yoodr sẽn basd a sɩdã, n kẽed ne sãamba!+
33 Mi n yaa nebã n kõt pʋg-yoaadbã kũuni.+ La yaa foo n kõt neb nins sẽn dat foo ne b sũy fãa wã kũuni.+ Fo yaood-b lame sẽn na yɩl tɩ b yi zĩig fãa n wa yo ne foo.+
34 Fo yaa toor ne pʋg-yoaadb a taabã. Ned baa a ye pa yood wa foo ye! Foo n yaood neb a taabã, tɩ bãmb pa yaood foo ye. Fo yoobã yaa toore.’
35 “Woto wã, foom a pʋg-yoodre,+ kelg a Zeova goamã.
36 Ad a Zeova sẽn yaa Zu-soab sẽn ka to wã sẽn yeele: ‘Fo sẽn wilg f raglmã wʋsgã yĩnga, b sẽn yã fo yãndã f sẽn wa n yood ne sẽn nong-b foomã, n paas fo bõn-naandsã sẽn yaa bõn-yood*+ la bõn-wẽns fo sẽn dɩk f kom-dibli wã zɩɩm meng n kõ tɩ yɩ maoongã yĩnga,+
37 mam na n tigma sẽn nong-b foomã fãa fo sẽn da kõt sũ-noogã, fo sẽn nong b rãmbã ne fo sẽn kis b rãmbã fãa. Mam na n tigm-b lame tɩ b yi zĩig fãa n wa zab ne foo, la m yees f futã n bas-f a zaala. B na n yãa foom a zaal zãng fasɩ.+
38 “‘Mam na n sɩbga foo ne sɩbgr ning pʋg-yoaadbã+ ne pagb nins sẽn daagd zɩɩmã+ sẽn segd ne wã. B na n daaga fo zɩɩmã ne sũ-puugr la sũ-kiiri.+
39 Mam na n dɩk-f lame n ning b nusẽ. B na n siiga f kunkubã la b tus f zĩ-zãntsã n lubi.+ B na n yeesa f futã+ la b rees f fan-te-neebã,*+ n bas-f a zaal zãng fasɩ.
40 B na n kɩtame tɩ kʋʋng wa zab ne foo.+ B na n loba foo kuga,+ la b kʋ foo ne b sʋʋsã.+
41 B na n yõoga fo rotã ne bugum,+ la b maan foo wa sẽn zems mam sẽn kao f bʋʋd n yeel tɩ f segda ne bũmb ningã, tɩ pagb wʋsg getẽ. Mam na n kɩtame tɩ f yoobã sa.+ Fo pa na n le yao ned ye.
42 Mam na n kɩtame tɩ mam sũurã sẽn da puug ne foomã sigi.+ Mam sũurã sẽn da yik ne foomã na n saame.+ Woto, mam na n paa sɩɩ, tɩ m sũurã pa le puudẽ ye.’
43 “‘Fo sẽn pa tẽeg f yãadmã wakat yellã,+ n maan bõn-kãensã fãa n kɩt tɩ mam sũurã yikã, mam na n kɩtame tɩ fo manesmã biis wẽneg n wa f zugu, tɩ f ra le tʋm f tʋʋm-dẽgdã ne f tʋʋm-wẽnsã ye.’ Yaa a Zeova sẽn yaa Zu-soab sẽn ka to wã n yeele.
44 “‘Kelge! Ned ning fãa sẽn wẽed yel-bũn na n wẽe yel-bũnd fo wɛɛngẽ n yeele: “Ma wã sẽn yaa to-to wã, bi-puglã me yaa woto!”+
45 Fo yaa f ma wã bi-pugla. A kisga a sɩdã ne a kambã. Fo yaa f ma-bi-pogsã ma-bi-poaka. B kisga b sɩdbã ne b kambã. Fo ma wã ra yaa Hɛt neda, tɩ f ba wã ra yaa Amoor neda.’”+
46 “‘Fo kẽem-bi-puglã yaa Samari+ sẽn be fo rɩtgã, ne a kom-pugli wã.*+ Fo yao-bi-puglã sẽn be fo goabgã yaa Sodom+ ne a kom-pugli wã.+
47 Fo pa rɩk b togs-n-taar la f tʋm b tʋʋm-wẽnsã bal ye. Wakat bilf pʋgẽ, fo manesmã fãa pʋd n lebga wẽns n yɩɩd-ba.’+
48 A Zeova sẽn yaa Zu-soab sẽn ka to wã yeelame yaa: ‘Mam wẽenda ne m meng tɩ Sodom sẽn yaa fo ma-bi-poakã ne a kom-pugli wã pa maan bũmb nins foo ne f kom-pugli wã sẽn maanã ye.
49 Ad Sodom sẽn yaa fo ma-bi-poakã kongrã: Yẽ ne a kom-pugli wã+ ra yaa wuk-m-mens rãmba,+ n da tar rɩɩb wʋsgo,+ la b ra zĩ ne bãan n pa maand yɩɩr ye.+ Baasgo, b pa sõng sẽn namsd-bã ne naong rãmbã ye.+
50 B kell n wuka b mense,+ n da tʋmd tʋʋm-wẽns mam nifẽ.+ Rẽ n so tɩ mam wa ges tɩ yaa tɩlɛ tɩ m menes-ba.+
51 “‘Samari+ me pa maan fo yel-wẽnã pʋɩ-sʋk meng ye. Fo ra paasda f tʋʋm-wẽnsã sõor n yɩɩd bãmba, tɩ lebg wa fo ma-bi-pogsã yaa tɩrse, fo tʋʋm-wẽnsã fãa yĩnga.+
52 Masã, fo segd n paama paoogre, fo sẽn maan tɩ lebg wa f ma-bi-pogsã manesmã yaa tɩrsã yĩnga.* Fo yel-wẽnã sẽn yaa wẽns n yɩɩd bãmbã yĩnga, b yaa tɩrs n yɩɩd foom. Masã, bɩ f paam yãnd la paoogre, fo sẽn kɩt tɩ lebg wa f ma-bi-pogsã yaa tɩrsã yĩnga.’
53 “‘Mam na n tigma b neb nins sẽn be yembdã, rat n yeel tɩ Sodom ne a kom-pugli wã neb nins sẽn be yembdã, la Samari ne a kom-pugli wã neb nins sẽn be yembdã. Mam na n tigma fo neb nins sẽn be yembdã n naag-ba,+
54 sẽn na yɩl tɩ fo paam paoogre. Yãnd n na n yõk foo, fo sẽn bels-bã yĩnga.
55 Fo ma-bi-poak a Sodom ne a kom-pugli wã na n le lebga wa b sẽn da yaa to-to pĩndã, tɩ fo ma-bi-poak a Samari ne a kom-pugli wã me lebg wa b sẽn da yaa to-to pĩndã. Foo ne f kom-pugli wã me na n le lebga wa y sẽn da yaa to-to pĩndã.+
56 Fo wuk-m-mengã wakate, Sodom sẽn yaa fo ma-bi-poakã ra pa sek fo na gom a yell ye.
57 Yaa nand tɩ b puk fo wẽnemã.+ Masã, Siiri kom-pugli wã ne b yagsã tʋʋda foo, tɩ Filisti kom-pugli wã,+ rat n yeel tɩ sẽn gũbg-b foomã yaand foo.
58 Fo tʋʋm-dẽgdã ne f tʋʋm-wẽnsã biis na n wẽneg n waa fo zugu.’ Yaa a Zeova n yeele.”
59 “Bala ad a Zeova sẽn yaa Zu-soab sẽn ka to wã sẽn yeele: ‘Mam na n maana foo wa fo sẽn maanã,+ bala fo sãama mam kaoolã, n paoog wẽenegã.+
60 La mam mengã na n tẽega kaool ning mam sẽn maan ne foom f bi-bɩɩlem wakatẽ wã yelle. Mam na n maana kaool sẽn paad wakat fãa ne foo.+
61 Fo na n tẽega f manesmã yell tɩ yãnd yõk-fo,+ fo sã n wa beend f ma-bi-pogsã. Yaa sẽn yɩɩd-b foomã, ne sẽn pa ta-b foomã fãa. Mam na n dɩk-b lame n kõ foo wa kom-pugli, la pa fo kaoolã yĩng ye.’
62 “‘Maam m toor n na n maan kaool ne foo. Woto, fo na n bãngame tɩ mam yaa a Zeova.
63 Mam sã n wa kõ foo sugr* baa ne bũmb nins fãa fo sẽn maanã,+ fo na n tẽega rẽ yell tɩ yãnd wʋsg yõk-fo,+ tɩ f pa tõog n yaag f noorã, paoogrã yĩnga.’ Yaa a Zeova sẽn yaa Zu-soab sẽn ka to wã n yeele.”
Vẽnegr toor-toore
^ Bɩ, “fo sɩɩgã.”
^ Bɩ, “tog ne naam.”
^ Bɩ, “nag-te-neebã.”
^ Rat n yeel tɩ n pil bõn-naands nins sẽn yaa rapã.
^ Bɩ, “yũug sẽn sigsd sũuri.”
^ Ebre, “yaagd f gɛyã n kõt.”
^ Bɩ, “yags raoolem sẽn yaa bɛdã.”
^ Ebre, “Kanaã soolem.”
^ Bɩ, “pãnga.” Pa rẽ bɩ, “Mam pida ne sũ-puugr fo yĩnga.”
^ Ebre gom-bilã tõe n dat n bilga “bĩndu.” B wae n pʋta gom-bi-kãng n na n paoog bũmb ning yell b sẽn gomdã.
^ Bɩ, “nag-te-neebã.”
^ Tõe tɩ yaa tẽns nins a sẽn so wã.
^ Bɩ, “fo sẽn gom n sõng f ma-bi-pogsã yĩnga.”
^ Ebre, “maan paasg fo yĩng.”
