Ezekɩyɛll sebre 35:1-15
-
Bãngr-goam Seyɩɩr tãensã wɛɛngẽ (1-15)
35 A Zeova le goma ne maam n yeele:
2 “Ninsaal biiga, wẽnemd f neng n tees Seyɩɩr soolmã sẽn yaa tãensã,+ n togs bãngr-gomd n ning-a taale.+
3 Yeel-a yaa: ‘Ad a Zeova sẽn yaa Zu-soab sẽn ka to wã sẽn yeele: “Foom a Seyɩɩr soolem sẽn yaa tãense, mam na n zaba ne foo. Mam na n tẽega m nug n zab ne foo, n kɩt tɩ f lebg zĩ-vɩʋʋgo.+
4 Mam na n kɩtame tɩ f tẽnsã lebg raboodo, la m kɩt tɩ f lebg zĩ-vɩʋʋgo.+ Woto, fo na n bãngame tɩ mam yaa a Zeova.
5 Bala fo beemã talla pãnga,+ tɩ fo yõg Israyɛll nebã n kõ tɩ b kʋ ne sʋʋs b yel-beedã wakate, b yaoolem sɩbgrã wakate.”’+
6 “A Zeova sẽn yaa Zu-soab sẽn ka to wã yeelame: ‘Mam wẽenda ne m meng tɩ mam na n segla foo zɩɩm daagr yĩnga. Zɩɩm daagr n na n dig foo.+ Fo sẽn kisg zɩɩmã yĩnga, zɩɩm daagr n na n dig foo.+
7 Mam na n kɩtame tɩ Seyɩɩr soolmã sẽn yaa tãensã lebg zĩ-vɩʋʋgo.+ Mam na n kʋʋ ned ning fãa sẽn pɩʋʋgd be.
8 Mam na n kɩtame t’a tãensã pid ne neb b sẽn kʋ. Neb nins b sẽn kʋ ne sʋʋsã na n lʋɩɩ fo kunkubã zutu, f londẽ wã, la f kʋɩlsã fãa pʋsẽ.
9 Mam na n kɩtame tɩ fo lebg raboog wakat fãa yĩnga. Ned pa na n le zĩnd fo tẽnsã pʋsẽ ye.+ Woto, fo na n bãngame tɩ mam yaa a Zeova.’
10 “Fo yeelame: ‘Buud a yiibã ne soolem a yiibã na n lebga mam dẽnda. Tõnd na n sooga b yiibã fãa,’+ t’a Zeova mengã yaool n be be.
11 ‘Woto yĩnga, mam wẽenda ne m meng tɩ mam na n sɩbga foo wa sẽn zems sũ-puugr la sũ-kiir ning fo sẽn tall ne-ba, fo sẽn kis-bã yĩngã.+ Mam sã n wa na n kao fo bʋʋdo, m na n kɩtame tɩ b bãng maam bãmb sʋka.’ Yaa a Zeova sẽn yaa Zu-soab sẽn ka to wã n yeele.
12 ‘Woto, fo na n bãngame tɩ maam a Zeova wʋma paoogr goam nins fãa fo sẽn gom Israyɛll tãensã wɛɛngẽ, n yeel yaa: “B lebga zĩ-vɩɩdo. Tõnd paama weer n na n sãam-ba.”
13 Yãmb goma maam wẽng ne wuk-m-menga. Yãmb tʋʋ maam wʋsgo.+ Mam wʋma fãa.’
14 “Ad a Zeova sẽn yaa Zu-soab sẽn ka to wã sẽn yeele: ‘Mam sã n wa kɩt tɩ fo lebg raboogo, dũniyã tõr na n kɩdma sũ-noogo.
15 Fo sẽn kɩdem sũ-noog Israyɛll buudã pʋɩɩrã sẽn wa n lebg raboogã yĩngã, yaa woto la mam na n maan fo-me.+ Foom a Seyɩɩr soolmã sẽn yaa tãense, rat n yeel tɩ Edom tõrã, fo na n lebga raboog zãnga.+ Woto, nebã na n bãngame tɩ mam yaa a Zeova.’”
