Ezekɩyɛll sebre 37:1-28
37 A Zeova nugã zĩnda mam zugu. A Zeova rɩka maam ne a vʋʋsmã pãnga, n tɩ sik tẽn-nabrã tẽn-sʋka.+ Tẽn-nabrã ra pida ne kõaba.
2 A kɩtame tɩ mam kẽn n gilg b fãa. Mam yãame tɩ kõabã yaa wʋsg n dʋr tẽn-nabrẽ wã, la tɩ b ra kʋɩɩ wʋsgo.+
3 A soka maam yaa: “Ninsaal biiga, kõb-kãensã tõe n le vɩɩmdame bɩ?” Tɩ mam leok yaa: “Zu-soab sẽn ka to a Zeova, yaa yãmb n mi.”+
4 Dẽ, a yeela maam yaa: “Togs bãngr-gomd kõb-kãensã wɛɛngẽ, n yeel-b yaa: ‘Yãmb a kõb-koeemse, kelg-y-yã a Zeova goama:
5 “‘Ad a Zeova sẽn yaa Zu-soab sẽn ka to wã sẽn yet kõb-kãensã: “Mam na n kɩtame tɩ vʋʋsem kẽ yãmba, tɩ y le vɩɩmde.+
6 Mam na n ninga gĩin la yĩn-nems yãmb zutu. Mam na n kɩtame tɩ yĩn-gãong lud-yã, la m ning-y vʋʋsem, tɩ y le vɩɩmde. Woto, yãmb na n bãngame tɩ mam yaa a Zeova.”’”
7 Dẽ, mam togsa bãngr-gomd wa a sẽn yeel maamã. Mam sẽn sɩng bãngr-gomdã togsgã bala, bʋrg n da yita. Yaa kõabã sẽn yẽrsdã rãamde. Kõabã sɩngame n kolgd taaba, kõbr ne a to.
8 Rẽ poore, mam yãa gĩin la yĩn-nems sẽn wa b zutu, tɩ yĩn-gãong wa lud-ba. La vʋʋsem ra ket n kae b pʋsẽ ye.
9 A yeela maam yaa: “Togs sobgã bãngr-gomde. Ninsaal biiga, togs bãngr-gomd n yeel sobgã yaa: ‘Ad a Zeova sẽn yaa Zu-soab sẽn ka to wã sẽn yeele: “Foom a sobgo,* yi ween-vɩɩs a naasã* n wa fug nin-kãensã b sẽn kʋ wã zutu, sẽn na yɩl tɩ b le vɩɩmde.”’”
10 Woto, mam togsa bãngr-gomd wa a sẽn yeel maamã, tɩ vʋʋsem wa kẽ-ba. B vʋʋgame n yik n yas b nao zutu.+ Ra yaa tãb-bi-kʋʋngo.
11 A yeela maam yaa: “Ninsaal biiga, kõb-kãensã yaa Israyɛll buudã tõre.+ B yetame yaa: ‘Tõnd kõabã kʋɩɩme. Tõnd pa le tar saagr ye.+ B sãama tõnd zãnga.’
12 Woto wã, togs bãngr-gomd n yeel-b yaa: ‘Ad a Zeova sẽn yaa Zu-soab sẽn ka to wã sẽn yeele: “Mam neba, mam na n pagsa y yaadã,+ n yiis yãmb y yaadã pʋsẽ n tall-y n kẽng Israyɛll soolmẽ wã.+
13 Mam neba, mam sã n wa pags y yaadã, n yiis yãmb b pʋsẽ, y na n bãngame tɩ mam yaa a Zeova.”’+
14 ‘M na n ning-y-la m vʋʋsmã tɩ y le vɩɩmde.+ Mam na n tɩ zĩndga yãmb y soolmẽ wã. Yãmb na n bãngame tɩ yaa maam a Zeova meng n gome, la m kɩt tɩ rẽ yɩ.’ Yaa a Zeova n yeele.”
15 A Zeova le goma ne maam n yeele:
16 “Ninsaal biiga, rɩk raoog n gʋls a zug yaa: ‘A Zida yĩnga, la Israyɛll buudã neb nins sẽn be ne-a wã yĩnga.’+ Rɩk raoog a to n gʋls a zug yaa: ‘A Zozɛf yĩnga, a Efrayim raoogo, la Israyɛll buudã neb nins fãa sẽn be ne-a wã yĩnga.’+
17 Rẽ poor bɩ f rɩk-b n kolg taaba, sẽn na yɩl tɩ b lebg raoog a yembr fo nugẽ.+
18 Fo buudã neb* sã n sok foo yaa: ‘Fo pa na n togs tõnd bõn-kãensã võor sɩda?’
19 Bɩ f leok-b yaa: ‘Ad a Zeova sẽn yaa Zu-soab sẽn ka to wã sẽn yeele: “Mam na n dɩka a Zozɛf ne Israyɛll buudã neb nins sẽn be ne-a wã raoogã sẽn be a Efrayim nugẽ wã, n naag a Zida raoogã. Mam na n kɩtame tɩ b lebg raoog a yembre.+ B na n lebga yembr mam nugẽ.”’
20 Raad nins zut fo sẽn gʋlsã segd n zĩnda fo nugẽ wã, sẽn na yɩl tɩ b neẽ.
21 “Yeel-b yaa: ‘Ad a Zeova sẽn yaa Zu-soab sẽn ka to wã sẽn yeele: “Mam na n yiisa Israyɛll nebã buud nins sʋk b sẽn kẽngã, la m tigm-b ween-vɩɩsã fãa n tall-b n wa b soolmẽ wã.+
22 Mam na n kɩtame tɩ b lebg bu-yɛng soolmã pʋgẽ,+ Israyɛll tãensã zutu. Rĩm-yɛng n na n dɩ naam b fãa zutu.+ B pa na n le yɩ buud a yiib ye. B pa na n le welg me n yɩ rĩung a yiib ye.+
23 B pa na n le rẽgem b mens ne b bõn-naandsã sẽn yaa bõn-yoodã,* ne b tʋʋm-wẽnsã, la ne b beegrã fãa ye.+ Mam na n kɩtame tɩ b paam b mens ne b yel-wẽnã fãa b sẽn maane, b sẽn da pa maand sɩd ne maamã yĩngã, la m yɩlg-ba. B na n yɩɩ mam nin-buiidu, tɩ mam mengã yɩ b Wẽnnaam.+
24 “‘“Mam tʋm-tʋmd a Davɩɩd n na n yɩ b rĩma.+ B fãa na n talla pe-kɩɩm-yɛnga.+ B na n tũu mam tõodã, la b sak mam noyã sõma.+
25 B na n zĩnda soolem ning mam sẽn kõ mam tʋm-tʋmd a Zakoobã pʋgẽ, zĩig ning yãmb yaab-rãmbã sẽn zĩndã.+ B na n zĩnda be wakat fãa yĩnga,+ bãmb ne b kambã* la b kambã kamba.+ Mam tʋm-tʋmd a Davɩɩd n na n yɩ b naab wakat fãa yĩnga.+
26 “‘“Mam na n maana laafɩ kaool ne-ba.+ Na n yɩɩ kaool sẽn paad wakat fãa yĩnga. M na n zĩnig-b-la soolmẽ wã, la m kɩt tɩ b lebg wʋsgo.+ M na n lugla m doogã b sʋk wakat fãa yĩnga.
27 Mam fu-roogã* na n zĩnda ne-ba.* M na n yɩɩ b Wẽnnaam, tɩ b yɩ mam nin-buiidu.+
28 Mam doogã sã n wa be Israyɛll nebã sʋk wakat fãa yĩnga, buud toɛy-toɛyã neb na n bãngame tɩ yaa maam a Zeova n kɩtd tɩ Israyɛll yaa sõngo.”’”+
Vẽnegr toor-toore
^ Bɩ, “vʋʋsem.”
^ Ebre, “sobd a naasã.”
^ Ebre, “Fo buudã kom-dibli.”
^ Ebre gom-bilã tõe n dat n bilga “bĩndu.” B wae n pʋta gom-bi-kãng n na n paoog bũmb ning yell b sẽn gomdã.
^ Ebre, “kom-dibli wã.”
^ Bɩ, “zakã.”
^ Bɩ, “b zutu.”
