Tõod sebre 23:1-25
23 “Rao lan-biis sẽn bedse, bɩ raoolem sẽn fiuug pa segd n kẽ a Zeova nin-buiidã sʋk ye.+
2 “Tãmpĩir* pa segd n kẽ a Zeova nin-buiidã sʋk ye.+ Baa hal n tãag zãmaan piig soabã, a yageng baa a yembr pa tõe n kẽ a Zeova nin-buiidã sʋk ye.
3 “Amon ned wall Mowaab ned pa tõe n kẽ a Zeova nin-buiidã sʋk ye.+ Baa hal n tãag zãmaan piig soabã, b yageng baa a yembr pa tõe n kẽ a Zeova nin-buiidã sʋk ye.
4 Bala yãmb sẽn wa n yi Ezɩpt n loogdẽ wã,+ b pa kõ yãmb koom ne rɩɩb n na n sõng-y ye. Sẽn paase, b yaoo a Beoor sẽn yit Petoor sẽn be Mezopotami wã biig a Balaam, sẽn na yɩl t’a kãab yãmb wẽnga.+
5 La yãmb Wẽnnaam a Zeova zãgsame n pa kelg a Balaam ye.+ Yãmb Wẽnnaam a Zeova pʋd n kɩtame tɩ kãab-wẽngã lebg bark yãmb yĩnga,+ bala yãmb Wẽnnaam a Zeova nonga yãmba.+
6 Y vɩɩmã tõre, y pa segd n maan bũmb b neer yĩnga, wall b nafr yĩng ye.+
7 “Yãmb pa segd n kisg Edom neda, bala a yaa yãmb saam-biiga.+
“Yãmb pa segd n kisg Ezɩpt neda, bala yãmb da yaa sãamb a tẽngẽ wã.+
8 B yagensã zãmaan a tãab-n-soabã tõe n kẽe a Zeova nin-buiidã sʋka.
9 “Yãmb sã n wa tilg y sik-zĩig n na n zab ne y bɛɛba, yãmb segd n zãaga y mens ne bũmb ning fãa sẽn yaa wẽnga.*+
10 Rao sã n lebg rẽgd a rog-biis koom sẽn yi yʋng yĩnga,+ a segd n yii sik-zĩigẽ wã n da lebg n kẽ ye.
11 Wĩndgã sã n wa kolg kõom, a segd n soo koom. Rẽ poore, wĩndgã sã n wa kẽ, a tõe n lebg n kẽnga sik-zĩigẽ wã.+
12 Yãmb segd n yãka we-kɛɛng zĩig* sik-zĩigã kɩrenga. Yaa be la y segd n kẽnd n maand we-kɛɛnga.
13 Yãmb segd n tara kutoaag* y teedã sʋka. Yãmb sã n wa rat n yols y menga, y segd n tuu bok ne kutoaagã, tɩ rẽ poor bɩ y bus y bĩndã.
14 Bala yãmb Wẽnnaam a Zeova gilgda yãmb sik-zĩigẽ wã+ n na n fãag yãmb la a ning y bɛɛbã y nusẽ. Yãmb sik-zĩigã segd n yɩɩ yɩlemde,+ tɩ Wẽnnaam ra wa yã bũmb sẽn pa sõma yãmb nengẽ, n bas n pa le yãagd yãmb ye.
15 “Yamb sã n zoe n bas a zu-soab n wa y nengẽ, y pa segd n lebs-a a zu-soabã ye.
16 A tõe n zĩnda yãmb sʋka, tẽng ning fãa a sẽn na n yãk yãmb tẽnsã sʋka, rat n yeel tɩ zĩig ning fãa sẽn ta a yam. Y pa segd n nams-a ye.+
17 “Israyɛll bi-pugl baa a ye pa segd n lebg pʋg-yoodr wẽnd-doogẽ ye.+ Israyɛll bi-ribl baa a ye me pa segd n koos a meng wẽnd-doogẽ ye.+
18 Yãmb pa segd n tall ligd b sẽn yao pʋg-yoodr wall rao sẽn koosd a meng* n wa yãmb Wẽnnaam a Zeova roogẽ wã, n na n pids pʋleng y sẽn maan ye. Bala bãmb b yiibã fãa yaa neb yãmb Wẽnnaam a Zeova sẽn kisi.
19 “Yãmb sã n peng y saam-biig ligdi, rɩɩb wall bũmb a to, y pa segd n kɩt t’a yao n dogl yõod ye.+
20 Yãmb tõe n kɩtame tɩ sãan yao n dogl yõodo,+ la y pa segd n kɩt tɩ y saam-biig yao n dogl yõod ye.+ Woto, yãmb Wẽnnaam a Zeova na n ning-y-la bark bũmb nins fãa y sẽn maandã pʋgẽ, soolem ning yãmb sẽn na n soogã pʋgẽ.+
21 “Yãmb sã n pʋlem y Wẽnnaam a Zeova bũmbu,+ y segd n pidsame n da maan maas-maas ye.+ Bala yãmb Wẽnnaam a Zeova na n sok-y lame. Sã n pa rẽ, y na n paama yel-wẽnd taale.+
22 La yãmb sã n pa pʋlem Wẽnnaam bũmbu, yel-wẽnd taal pa na n zĩnd y zug ye.+
23 Yãmb segd n maana bũmb ning y sẽn yeel tɩ y na n maaname wã.+ Y segd n pidsa bũmb ning yãmb mengã noorã sẽn pʋlmã, tɩ yɩ yamleoog kũun yãmb Wẽnnaam a Zeova yĩnga.+
24 “Yãmb sã n kẽ y to viyn pʋʋgẽ, y tõe n dɩɩme tɩ sek-yã. La y pa segd n yãk baa fʋɩ n sui y korgẽ ye.+
25 “Yãmb sã n kẽ y to pʋʋgẽ tɩ koodã yasẽ, y tõe n yãka ka-zutã sẽn bɩ wã ne y nusi, la y pa segd n wʋr y to wã koodã ne goeoog ye.+
Vẽnegr toor-toore
^ Biig sẽn dog t’a ba ne a ma pa kẽ kãadem ye.
^ Bɩ, “sẽn dẽgemd neda.”
^ Rat n yeel tɩ bĩnd sãab zĩiga.
^ Ebre, “baaf.”
^ Ebre, “baag.”
