Zeremi sebre 3:1-25
3 Neb n sokd yaa: “Rao sã n bas a pag t’a loog n tɩ lebg ned a to paga, raoã segd n le tɩ peeg-a lame n maan a pag yɛs bɩ?”
Soolmã pa rẽgem zãng sɩda?+
“Fo sẽn yo ne rap wʋsgã,+fo segd n le waa mam nengẽ sɩda?” Yaa a Zeova n yeele.
2 “Zẽk f neng n ges kunkub nins baa fʋɩ sẽn pa yitẽ wã.
Yɛ la b pa yõg foo?
Fo ra zĩi soayã noy n gũud-ba,wa ned sẽn yeebd* sẽn zĩ we-raoogẽ.
Fo kell n talla soolmã sãoongne f yoobã la f wẽnemã.+
3 Woto yĩnga, b gɩdga saagã t’a ra ni ye.+Yaoolem saag pa le niid ye.
Fo sẽn get to-to wã wilgdame tɩ f pa zoet yãnde, wa pag sẽn yoode.Fo zãgsame tɩ f kõn zoe yãnd ye.+
4 La masã, fo boonda maam n yetẽ:‘M Ba, yãmb yaa mam tũud-n-taag hal m bi-bɩɩlem wakatẽ!+
5 Ned segd n puuga a sũur wakat fãa yĩnga,wall a tall sũ-kẽk wakat fãa bɩ?’
Fo yeta woto,la f yaool n ket n maanda wẽng ning fãa f sẽn tõe n maane.”+
6 Rĩm a Zoziyas wakatẽ wã,+ a Zeova yeela maam yaa: “‘Fo yãa Israyɛll sẽn yaa tõatã sẽn maanã bɩ? A tɩ rʋʋ tãn-lug-lug fãa, la a kẽng tɩ-bedr sẽn tar vãad wʋsg fãa tẽngr n tɩ yo.+
7 Baa a sẽn maan bõn-kãensã fãa wã poore, mam da yet-a lame t’a lebg n wa mam nengẽ,+ la a pa lebg n wa ye. La Zida ra geta a tãoã sẽn yaa zãmb soabã.+
8 Mam sẽn yã rẽ wã, mam kõo Israyɛll sẽn yaa tõatã basg sebr+ n kɩt t’a looge, a yoobã yĩnga.+ La a tão a Zida sẽn yaa zãmb soabã pa yɛɛs ye. Yẽ me yi n yoome.+
9 A pa ges t’a yoobã yaa wẽng ye. A ra ket n dẽgemda soolmã, la a yood ne kug la tɩɩse.+
10 Baa ne rẽ fãa, a tão a Zida sẽn yaa zãmb soabã pa lebg n wa mam nengẽ ne a sũur fãa ye. Yɩɩ ne noor bala.’ Yaa a Zeova n yeele.”
11 Rẽ poore, a Zeova yeela maam yaa: “Israyɛll sẽn yaa tõatã wilgame t’a* yaa tɩrg n yɩɩd Zida sẽn yaa zãmb soabã.+
12 Kẽng n tɩ moon rɩtg soolmẽ wã+ n yeel yaa:
“‘“Israyɛll sẽn pa maand sɩda, lebg n wa.” Yaa a Zeova n yeele.’+ ‘“Mam pa na n sulg n ges foo ne sũ-yikr ye.+ Bala mam yaa sɩd soaba.” Yaa a Zeova n yeele.’ “‘Mam sũurã pa na n kell n puud wakat fãa yĩng ye.
13 Sak n deeg bal tɩ f tara taale, bala fo kɩɩsa f Wẽnnaam a Zeova. Fo kell n yoo ne sãamb* tɩ-bedr sẽn tar vãad wʋsg fãa tẽngre, n pa kelg mam koɛɛgã ye.” Yaa a Zeova n yeele.’”
14 “Yãmb a kamb sẽn pa maand sɩda, lebg-y n wa-y-yã.” Yaa a Zeova n yeele. “Bala mam lebga yãmb zu-soab meng-menga.* Mam na n yãka yãmb ned a yembr tẽng fãa pʋgẽ, la neb a yiib buud fãa pʋgẽ, n tall n wa Siyõ.+
15 Mam na n kõo yãmb rũm-kɩɩmb sẽn maand sẽn zems mam daabo.*+ B na n dɩlga yãmb ne bãngr la yam-vẽenem.
16 Wakat kãnga, yãmb na n fɩɩg n lebga wʋsg soolmã pʋgẽ.” Yaa a Zeova n yeele.+ “B pa na n le yeel yaa: ‘A Zeova kaoolã koglgo!’ B pa na n tags a yell wall b tẽeg a yell ye. A yamleoog me pa na n le yõk-b ye. B pa na n ka a to me ye.
17 Wakat kãnga, b na n boola Zerizalɛm t’a Zeova naam geere.+ B na n talla buud toɛy-toɛyã fãa n wa Zerizalɛm sẽn na yɩl tɩ b pẽg a Zeova yʋʋrã.+ B pa na n le tũ b sũyã sẽn diglim la sẽn yaa wẽnsã raab ye.”
18 “Wakat kãnga, Zida nebã ne Israyɛll nebã na n naaga taab n kẽnda, n yɛgl taaba.+ B na n naaga taab n yi rɩtg soolmẽ wã, n kẽng soolem ning mam sẽn kõ y yaab-rãmbã tɩ yaa b pʋɩɩrã pʋgẽ.+
19 Mam tagsa m sũurẽ yaa: ‘Ad mam sũur yɩɩ noog wʋsg m sẽn wa n naagd yãmb m kom-dibli wã sʋka, n kõ yãmb tẽng sẽn be yamleoogo, pʋɩɩr ning sẽn yaa neer n yɩɩd buud toɛy-toɛyã sʋkã!’*+ Mam tagsame me tɩ yãmb na n boola maam tɩ ‘y Ba!’ la tɩ y pa na n bas mam tũub ye.
20 ‘Hakɩɩka, yãmb a Israyɛll neba, yãmb zãmba maam wa pag sẽn zãmb a sɩd* n loog n bas-a to-to wã.’+ Yaa a Zeova n yeele.”
21 Rãamd n yit kunkub nins baa fʋɩ sẽn pa yitẽ wã zutu.Yaa Israyɛll nebã yãbr la b se-yõkr dãamde,bala b golma b soayã.B yĩma b Wẽnnaam a Zeova yelle.+
22 “Yãmb a kamb sẽn pa maand sɩda, lebg-y n wa-y-yã.
M na n sõng-y lame tɩ y lebg neb sẽn maand sɩda.”+
Hakɩɩka, tõnd na n yeelame yaa: “Ad tõndo! Tõnd waa yãmb nengẽ,bala yãmb a Zeova n yaa tõnd Wẽnnaam.+
23 Sɩd-sɩda, kunkubã la tãensã zut zũnd-zãndã yaa zaalem.+
Sɩd-sɩda, Israyɛll fãagrã yita tõnd Wẽnnaam a Zeova nengẽ.+
24 La hal tõnd yãadmẽ, wẽn-faoogã sãama tõnd yaab-rãmbã tʋʋmã biisi,+rat n yeel tɩ b rũm-bõonegã la b rũm-bɛdã,b kom-dibli wã la b kom-pugli wã.
25 Bɩ d gãand d yãndã pʋgẽ,la bɩ d paoogrã lud tõndo,bala, hal tõnd yãadmẽ n tãag rũndã, tõnd beega tõnd Wẽnnaam a Zeova.+Yaa tõnd ne d ba-rãmbã.+Tõnd pa sak d Wẽnnaam a Zeova koɛɛgã ye.”
Vẽnegr toor-toore
^ Ebre, “Araab.”
^ Bɩ, “t’a sɩɩgã.”
^ Bɩ, “wẽn-sãams.”
^ Pa rẽ bɩ, “yãmb sɩda.”
^ Ebre, “sẽn zems mam sũuri.”
^ Ebre, “buud toɛy-toɛyã tab-biisã sʋkã.”
^ Ebre, “a tũud-n-taag.”
