Zeremi sebre 34:1-22
34 A Zeova goma ne a Zeremi, wakat ning Babilon rĩm a Nebukadnezaar* ne a tãb-biisã fãa, tẽngã soolem nins fãa a sẽn so wã la buud toɛy-toɛyã fãa sẽn wa n zabd ne Zerizalɛm la tẽns nins fãa a sẽn so wã,+ n yeele:
2 “Ad Israyɛll Wẽnnaam a Zeova sẽn yeele: ‘Kẽng n tɩ gom ne Zida rĩm a Sedesiyaas+ n yeel-a yaa: “Ad a Zeova sẽn yeele: ‘Mam na n dɩka tẽn-kãngã n ning Babilon rĩmã nugẽ. A na n yõog-a-la bugum.+
3 Fo pa na n tõog n põs-a ye. Bala sãmbg sẽn kae, b na n yõka foo n ning a nugẽ.+ Fo na n yãa Babilon rĩmã mengã, t’a gom ne foo neng ne nenga. Fo na n kẽnga Babilonne.’+
4 Foom a Zida rĩm a Sedesiyaase, kelg a Zeova goamã: ‘Ad a Zeova sẽn gom fo yell n yeele: “B pa na n kʋ foo ne sʋʋg ye.
5 Fo na n kii ne bãane.+ B na n yõoga wisd fo mumbã wakat wa b sẽn maan to-to ne f yaab-rãmbã, rĩm-dãmb nins sẽn deng foomã. B na n yãba fo kʋʋr n yeele: ‘Kayto! M zu-soaba!’ Bala ‘yaa woto la mam yeel-yã.’ Yaa a Zeova n yeele.”’”’”
6 Dẽ, no-rɛɛs a Zeremi taasa Zida rĩm a Sedesiyaas gom-kãensã fãa Zerizalɛm,
7 Babilon rĩmã tãb-biisã sẽn wa n zabd ne Zerizalɛm la ne Zida tẽns nins fãa sẽn da ketã,+ rat n yeel tɩ Lakiis+ la Azeka+ wã. Bala Zida tẽns nins sẽn da gũbg ne lalsã sʋka, yaa tẽn-kãens bal n da kete.
8 A Zeova goma ne a Zeremi, rĩm a Sedesiyaas sẽn maan kaool ne Zerizalɛm nebã fãa wã poore. A maana kaool ne-ba, tɩ b na n moon lohorem b fãa yĩnga,+
9 n wilg tɩ ned kam fãa segd n basa a yembs nins sẽn yaa Ebre-rãmbã, pagb la rapa, sẽn na yɩl tɩ ned ra le soog a Zʋɩf-taag t’a yɩ a yamb ye.
10 Nanambsã fãa la nin-buiidã fãa sakame. B saka kaoolã sẽn wilg tɩ ned kam fãa segd n basa a yem-daad la a yem-pogse, n da le soog-b tɩ b yɩ a yembs yɛsã. B sakame n bas-b tɩ b looge.
11 La kaoosg zugẽ, b tɩ talla b yem-daadã la b yem-pogsã b sẽn da basã n wa. B le modg-b lame n kẽes yembdo.
12 Dẽ, a Zeova goma ne a Zeremi. A Zeova yeelame:
13 “Ad Israyɛll Wẽnnaam a Zeova sẽn yeele: ‘Mam maana kaool ne yãmb yaab-rãmbã+ daar ning mam sẽn yiis-b Ezɩpt soolmẽ wã, tẽng ning pʋgẽ b sẽn da yaa yembsã,+ n yeele:
14 “Yʋʋm a yopoe fãa baasgẽ, yãmb ned kam fãa segd n basa a saam-biig sẽn yaa Ebre b sẽn koos ne-a, la sẽn tʋm n kõ-a yʋʋm a yoobe. Yãmb segd n bas-a lame t’a looge.”+ La yãmb yaab-rãmbã pa kelg ye. B pa kɩll b tʋb n kelg maam ye.
15 Sẽn nan pa kaoose,* yãmb toeema yam n maan sẽn yaa tɩrg mam nifẽ. Yãmb moona lohorem y Zʋɩf-taasã yĩnga, la y maan kaool mam taoore, roog ning zug mam yʋʋrã sẽn be wã pʋgẽ.
16 La yãmb le wa n toeema yam n sãam mam yʋʋrã,+ n tɩ tall y yem-daadã la y yem-pogsã yãmb sẽn da bas tɩ b kẽng b sẽn datẽ wã n wa. Yãmb le modg-b lame n kẽes yembdo.’
17 “Woto wã, ad a Zeova sẽn yeele: ‘Yãmb pa sak maam n moon lohorem, tɩ ned kam fãa bas a saam-biig la a Zʋɩf-taag t’a loog ye.+ Woto yĩnga, mam na n moona lohorem yãmb yĩnga, m na n kõ-y-la lohorem tɩ zabr la bã-loangdg* ne kom kʋ-yã.’+ Yaa a Zeova n yeele. ‘Mam na n kɩtame tɩ y lebg bũmb sẽn kẽesd rabeem tẽngã soolem toɛy-toɛyã fãa nifẽ.+
18 Ad bũmb ning sẽn na n paam neb nins sẽn kɩɩs mam kaoolã, n pa tũ kaool ning b sẽn maan mam taoorã goamã. Yaa kaool ning b sẽn maan b sẽn wa n pasg nag-bilã zĩis a yiibu, n tũ boag a yiibã sʋk+ n loogã,
19 rat n yeel tɩ Zida la Zerizalɛm nanambsã, na-yirã tʋm-tʋmdbã, maan-kʋʋdbã la soolmã nebã fãa sẽn tũ nag-bilã boag a yiibã sʋk n loogã:
20 Mam na n dɩk-b lame n ning b bɛɛbã nusẽ, la neb nins sẽn baood n yãk b yõyã* nusẽ. B kũ-rãmbã na n yɩɩ bõn-yɩgdɩ wã sẽn yɩgd yĩngrã ne tẽngã we-rũmsã rɩɩbo.+
21 Mam na n dɩka Zida rĩm a Sedesiyaas ne a nanambsã n ning b bɛɛbã nusẽ, neb nins sẽn baood n yãk b yõyã* nusẽ, la Babilon rĩmã tãb-biisã sẽn bas yãmb n lebg n loogdẽ wã nusẽ.’+
22 “A Zeova yeelame: ‘Mam na n yiisa noor n kɩt tɩ b lebg n wa tẽn-kãngã. B na n zaba ne-a n deege, n yõog-a bugum.+ Mam na n kɩtame tɩ Zida tẽnsã lebg zĩ-vɩɩd tɩ ned pa le be b pʋsẽ ye.’”+
Vẽnegr toor-toore
^ Ebre, “Nebukadrezaar.” Yaa yʋʋrã boolg a to.
^ Ebre, “Rũndã.”
^ Bɩ, “bãag.”
^ Bɩ, “sẽn baood b sɩɩgã.”
^ Bɩ, “sẽn baood b sɩɩgã.”
