Zeremi sebre 42:1-22
42 Dẽ, tãb-biisã nanambs fãa, a Kareya biig a Zohananne,+ a Osaya biig a Zezaniya la nin-buiidã fãa, sẽn sɩng ne sẽn yaa-a bilf n yɩɩdã n tãag sẽn yaa-a kãseng n yɩɩdã kolgame
2 n yeel no-rɛɛs a Zeremi yaa: “D bõos tɩ f sak d kosgã, n pʋʋs fo Wẽnnaam a Zeova tõnd yĩnga, rat n yeel tɩ sẽn ket-bã fãa yĩnga. Bala tõnd sẽn da yaa wʋsgã, d lebga bilf+ wa fo sẽn ne wã.
3 Bɩ fo Wẽnnaam a Zeova wilg tõnd sor ning zug d sẽn segd n kẽne, la bũmb ning d sẽn segd n maane.”
4 No-rɛɛs a Zeremi leok-b lame yaa: “Mam wʋma yãmb goamã. Mam na n pʋʋsa yãmb Wẽnnaam a Zeova wa yãmb sẽn kosã. Bũmb ning fãa a Zeova sẽn na n leok yãmba, m na n togs-y lame. Mam pa na n solg yãmb gomd ye.”
5 B leoka a Zeremi yaa: “D sã n pa maan wa fo Wẽnnaam a Zeova sẽn na n kɩt tɩ fo togs tõnd bũmb ninsã kɛpɩ, bɩ a Zeova sẽn yaa kaset soab sẽn togsd sɩd la sẽn maand sɩdã sɩbg-do.
6 A sẽn na n yeel tõndã nooma tõnd tɩ pa noom tõnd me, yaa tõnd Wẽnnaam a Zeova sẽn yaa soab ning nengẽ tõnd sẽn tʋm foomã koɛɛg la d na n tũ, sẽn na yɩl tɩ bũmb fãa yɩ sõma ne tõndo, d sẽn na n sak d Wẽnnaam a Zeova koɛɛgã yĩnga.”
7 Rasem piig poore, a Zeova goma ne a Zeremi.
8 Dẽ, a Zeremi tʋmame tɩ b tɩ bool a Kareya biig a Zohanan ne tãb-biisã nanambs nins fãa sẽn da be ne-a wã, la nin-buiidã fãa, sẽn sɩng ne sẽn yaa-a bilf n yɩɩdã n tãag sẽn yaa-a kãseng n yɩɩdã.+
9 A yeel-b lame yaa: “Ad Israyɛll Wẽnnaam a Zeova, soab ning nengẽ yãmb sẽn tʋm maam tɩ m tɩ yõk sɛɛg yãmb yĩngã sẽn yeele:
10 ‘Yãmb sã n yãk yam n na n pa soolem-kãngã pʋgẽ, mam na n mee yãmba, m pa na n tus-y n lub ye. Mam na n sela yãmba, m pa na n võ-y ye. Bala mam na n maana m bãngẽ* yel-beed ning mam sẽn kɩt tɩ wa yãmb zutã yĩnga.+
11 Ra zoe-y rabeem Babilon rĩmã yãmb sẽn yɛɛsdã yĩng ye.’+
“‘Ra zoe-y rabeem a yĩng ye. Bala mam bee ne yãmba, n na n fãag-yã, la m yiis yãmb a nugẽ.’ Yaa a Zeova n yeele.
12 ‘Mam na n zoee yãmb nimbãanega.+ Rĩmã me na n zoee yãmb nimbãanega, n kɩt tɩ y lebg n wa y soolmẽ wã.
13 “‘La yãmb sã n yeel yaa: “Ayo. Tõnd pa na n pa soolem-kãngã pʋgẽ ye!” Yãmb sã n kɩɩs y Wẽnnaam a Zeova koɛɛgã
14 n yeele: “Ayo. Tõnd na n kẽnga Ezɩpt soolmẽ wã,+ zĩig ning d sẽn pa na n yã zabre, n wʋm baorg rãamde, tɩ kom me pa na n yõk-dã. Yaa be la d na n tɩ zĩndi.”
15 Yãmb a Zida neb nins sẽn ketã, yãmb sã n magd n na n maana woto, bɩ y kelg a Zeova goamã. Ad Israyɛll Wẽnnaam a Zeova sẽn yaa tãb-biis naabã sẽn yeele: “Yãmb sã n yãka yam ne y sũy fãa n na n kẽng Ezɩpti, n sɩd kẽng n tɩ zĩnd* be,
16 dẽ, zabrã yãmb sẽn yɛɛsdã na n paama yãmb be, Ezɩpt soolmẽ wã. Komã yãmb sẽn zoetã me na n pʋga yãmb n kẽng Ezɩpti. Y na n kii be.+
17 Zabre, kom la bã-loangdg* n na n kʋ neb nins fãa sẽn yãk yam n na n kẽng Ezɩpt n tɩ zĩnd be wã. B ned baa a ye pa na n põs yel-beed ning mam sẽn na n kɩt tɩ wa b zutã, wall a kell n vɩɩmd ye.”’
18 “Bala ad Israyɛll Wẽnnaam a Zeova sẽn yaa tãb-biis naabã sẽn yeele: ‘Yãmb sã n kẽng Ezɩpti, mam na n kiiga m sũ-puugrã yãmb zut wa mam sẽn kiig m sũ-yikrã ne m sũ-puugrã Zerizalɛm+ nebã zut to-to wã. Yãmb na n lebga bũmb nebã sẽn na n tar n kãabd wẽnga, bũmb sẽn kẽesd rabeem, la kãab-wẽnga. Nebã na n paoogda yãmba.+ Yãmb pa na n tol n le yã zĩ-kãngã ye.’
19 “Yãmb a Zida neb nins sẽn ketã, a Zeova goma ne yãmba. Ra kẽng-y Ezɩpt ye. Yãmb segd n bãnga vẽeneg tɩ mam keooga yãmb rũndã,
20 n wilg-y tɩ y kongrã na n tũu ne y yõore.* Bala yãmb tʋma maam yãmb Wẽnnaam a Zeova nengẽ n yeele: ‘Pʋʋs tõnd Wẽnnaam a Zeova tõnd yĩnga, la f togs tõnd bũmb ning fãa tõnd Wẽnnaam a Zeova sẽn na n yeele, tɩ d na n maaname.’+
21 Mam togsa yãmb Wẽnnaam sẽn yeel bũmb ningã rũndã, la yãmb pa na n sak y Wẽnnaam a Zeova koɛɛgã, wall y maan bũmb ning a sẽn tʋm maam tɩ m togs yãmbã ye.+
22 Woto wã, bãng-y vẽeneg tɩ zabre, kom la bã-loangdg n na n kʋ yãmb zĩig ning y sẽn dat n kẽng n tɩ zĩndã.”+
Vẽnegr toor-toore
^ Bɩ, “sũur na n sãama.”
^ Bɩ, “zĩnd wakat bilf pʋg.”
^ Bɩ, “bãag.”
^ Bɩ, “sɩɩga.”
