1, 2. a) Bõe n noom a Zeova nin-buiidã rũndã-rũndã? b) Wãn-wãn la roagdbã ne kãsem-dãmbã tõe n sõng kom-bɩɩsã tɩ b bãng lisgã reegr sẽn dat n yɛɛlga?

KÃSEM-SOAB n da sõsd ne yʋʋm 12 biig yʋʋr sẽn boond t’a Kiristofɛɛre, n wa yeel-a woto: “Mam bãnga foo hal f peelmẽ. M sũur yaa noog m sẽn wʋm tɩ fo rat n deega lisgã, la m dat n sok-f-la bũmbu. Bõe yĩng la fo sẽn dat n deeg lisgã?” Kãsem-soabã sẽn sok woto wã, a bee bʋʋm. Yaa sɩd tɩ d sã n ne kom-bɩɩs tusa sẽn deegd lisg yʋʋmd fãa wã, d sũur noomame. (Koɛ. 12:1) La bi-bɩɩg sã n yãk yam n dat n deeg lisgu, a roagdbã ne kãsem-dãmbã tʋll n bãnga sã n sɩd yaa yẽ mengã raabo, la a sã n sɩd wʋmda lisgã reegr sẽn dat n yɛɛlga.

 ² Biiblã wilgame tɩ ned sã n wa rɩk a meng n kõ Wẽnnaam a Zeova la a reeg lisgu, a sɩnga vɩɩm buud sẽn na n kɩt t’a paam a Zeova barka, la t’a Sʋɩtãan na n maka a soabã sãoong me. (Yel. 10:22; 1 Pɩy. 5:8) Yaa rẽ yĩng la kiris-nebã sẽn maagd b yĩng n sõng b kambã tɩ b bãng lebg Kirisã karen-biig sẽn dat n yɛɛlga. Kom-bɩɩs sã n be tiging pʋgẽ tɩ b roagdbã pa kiris-neba, kãsem-dãmbã sõngd-b lame tɩ b bãng rɩk f meng n kõ Wẽnnaamã la lisgã reegr sẽn dat n yɛɛlga. (Karm-y Luk 14:27-30.) Ned sã n dat n me roogo, a segd n deng n zĩnd n magame n ges a sã n na n tõogame. Woto me, ned sã n dat n n tũ a Zeova ne a sũur fãa hal tɩ saabã “wakat ta,” rẽnda a segl a meng sõma. (Mat. 24:13) La bõe n tõe n sõng kom-bɩɩsã tɩ b segl n wa tõog n tũ a Zeova wakat sẽn kõn sa? D na n goma rẽ yelle.

3. a) Bõe la a Zeezi ne a Pɩyɛɛr yeel tɩ wilgdẽ tɩ lisgã reegr yõod waoogame? (Mat. 28:19, 20; 1 Pɩy. 3:21) b) Sogs-bʋs la d na n leoke, la bõe yĩnga?

³ Fo yaa bi-bɩɩg n dat n wa reeg lisg bɩ? Sã n yaa rẽ, f seka pẽgre! Bala, ned sã n paam n deeg lisg n lebg a Zeova Kaset soaba, sɩd yaa zu-zẽkr bũmbu. Sẽn paase, sẽn dat n yɩ-a kiris-ned hakɩɩk fãa segd n deega lisgu. Lisgã leb n yaa tɩlɛ ne neb nins fãa sẽn dat n wa paam n põs to-kãsengã sasa wã. (Mat. 28:19, 20; 1 Pɩy. 3:21) La f sẽn dat tɩ f lisgã poor bɩ f pids f sẽn pʋlem a Zeova bũmb ningã, f segd n deng n segla f meng neere. Woto yĩnga, yɩta sõma tɩ f sok f meng sogsg a tãab sẽn na n sõng-f tɩ f bãng f sã n sɩd tõe n deega lisg masã. Sogs-kãens la woto: 1) Mam tẽebã bɩɩme n sek lisg reegr bɩ? 2) Mam sẽn dat n deeg lisgã, yaa mam mengã raab bɩ? La 3) mam mii rɩk-m-meng n kõ a Zeova wã sẽn dat  n yɛɛlg bɩ? Bɩ d ges sogs-kãensã sẽn tõe n sõng-f to-to.

4, 5. a) Bõe yĩng tɩ pa kãsembã bal n tõe n deeg lisgu? b) Bõe n wilgd tɩ ned tẽeb bɩɩme?

⁴ Biiblã pa yeel tɩ yaa neb nins yʋʋm sẽn vẽsgã bal n segd n deeg lisg ye. A pa wilg yʋʋm sõor takɩ me ned sẽn segd n paam n yaool n deeg lisg ye. Yel-bũn 20:11 yeta woto: “Yaa biig tʋʋmdẽ la b tõe n bãng a yel-manesmã sã n na n yɩɩ sõama la tɩrga.” Rẽnd baa kambã tõe n bãnga sẽn yaa sõma la tɩrg n bake, la rɩk f meng n kõ f Naandã me sẽn dat n yɛɛlga. Woto yĩnga, baa lisgã sẽn pa reem bũmbã, biig tẽeb sã n bɩ t’a rɩk a meng n kõ a Zeova, zemsame t’a reeg lisgu.—Yel. 20:7.

⁵ La bõe la b get n bãng ned tẽeb sã n bɩɩme? Pa a soabã zug woglem, wall a yʋʋm ye. Biiblã yeelame tɩ neb nins sẽn bɩ wã yaa “neb nins sẽn mao n mi sõama ne wẽng n bakã.” (Ebre. 5:14) Rẽnd ned tẽeb sẽn bɩ yaa ned sẽn mi bũmb ning sẽn yaa sõma a Zeova nifẽ, la a rat n maan dẽ ne a sũur fãa. B pa tõe n kɩt tɩ ned a woto maan bũmb sẽn pa sõma faag-faag ye. Nin-kãens buudã pa baood me tɩ ned a to wilg-b sẽn segd tɩ b yaool maan ye. Vẽenega, bi-bɩɩg sã n wa reeg lisgu, segd n mikame tɩ d tõe n basa d yam masã tɩ baa a sã n wa zãag ne a roagdbã wall kãsembã, a na n ket n maanda sẽn yaa tɩrga.—Ges-y Filip-rãmb 2:12.

6, 7. a) A Dãniyɛll sẽn wa n be Babilondã, bõe n kɩt tɩ pa yɩ nana ne-a? b) Bõe la a Dãniyɛll maan n wilg t’a tẽebã bɩɩme?

⁶ Bi-bɩɩg sɩd tõe n wilgame t’a tẽebã bɩɩme bɩ? D tẽeg a Dãniyɛll kibarã sẽn be Biiblã pʋgẽ wã. Wõnda Babilond nebã sẽn wa n yõk-a n loog n bas a roagdbã t’a ket n yaa bi-bɩɩga. A Dãniyɛll tiig n tɩ bee neb sẽn pa mi sõma ne wẽng n bak sʋka. La bũmb a to me n kɩt tɩ pa yɩ nana ne a Dãniyɛll ye. A sẽn ta Babilondã, rĩmã kɩtame tɩ b yãk yẽ ne kom-bɩɩs a taab tɩ b na n tʋm na-yirã. (Dãn. 1:3-5, 13) Wõnda a Dãniyɛll paama zu-zẽkr buud a sẽn da pa na n tol n paam Israyɛlle.

⁷ La bi-bɩɩg a Dãniyɛll manesem yɩɩ wãna? A basame tɩ Babilond nebã kɩt t’a toeeme, wall b koms a tẽebã bɩ? Ayo! Biiblã yeelame t’a Dãniyɛll ‘yãka yam t’a ka na n dẽgem a meng’ ne bũmb baa a ye Wẽnnaam sẽn gɩdg ye. (Dãn. 1:8) A wilgame t’a tẽebã sɩd bɩɩme!

8. A Dãniyɛll kibarã wilgda kom-bɩɩsã bõe?

⁸ A Dãniyɛll kibarã wilgda kom-bɩɩsã bõe? A kibarã wilgdame tɩ bi-bɩɩg tẽeb sẽn bɩ sã n wa be zu-loɛɛg taoore, a kelld n maana sẽn yaa tɩrga. A pa maand wa gomtɩʋʋg ye. Gomtɩʋʋg sẽn be zĩig ning fãa, a toeemdame n dɩk zĩigã kõbgo. Bi-bɩɩg tẽeb sẽn bɩ pa maand wa a yaa Wẽnnaam zoa Rĩungã roogẽ, t’a sã n wa tɩ be lekollẽ wã, bɩ a maand wa a nonga dũniyã ye. Baa a tẽebã sã n wa paam makre, a kelld n yalsa kãn-kãe.—Karm-y Efɛɛs-rãmb 4:14, 15.

9, 10. a) Bi-bɩɩg sã n bʋgs a manesem sẽn yɩ to-to makr a sẽn paam tɩ pa kaoos sasa, wãn to la tõe n naf-a? b) Bõe la lisgã wilgda?

⁹ Yaa sɩd tɩ ned ka be n zems zãng ye. Kom-bɩɩsã ne kãsembã fãa mi n kongame. (Koɛ. 7:20) La f sã n dat n wa reeg lisgu, yɩta sõma tɩ f fees f meng n ges f sã n sɩd rata ne f sũur fãa n tũ a Zeova noyã. Sẽn na yɩl n bãng rẽ, sok f meng woto: ‘Mam minim n tũuda Wẽnnaam noyã bɩ?’ F tẽebã  sã n paama makr sẽn nan pa kaoose, tẽeg f manesem sẽn yɩ to-to. F tõog n bãnga sẽn yaa tɩrg n tũ bɩ? Wala makre, dũniyã ned sã n makame n na n kɩt tɩ f sak n tũnug ne f minim wall f bãngr n bao f meng nafre, f manesem yɩɩ wãna? Baa f yam sã n da be a saglgã tũubu, f tõog n kell n maana ‘Zu-soabã sẽn datã’ bɩ?—Efɛ. 5:17.

¹⁰ Bõe yĩng tɩ yaa sõma tɩ f sok f meng sogs-kãensã? Yaa tɩ na n sõng-f lame tɩ f bãng tɩ lisgã pa reem bũmb ye. Wa d sẽn gom tɩ loogã, lisgã wilgdame tɩ f pʋlma a Zeova bũmbu. F pʋlm-a lame tɩ f na n nong-a-la ne f sũur fãa, la tɩ f na n maana a raabã wakat fãa. (Mark 12:30) Ned ning fãa sẽn deeg lisg segd n pidsa a sẽn pʋlmã.—Karm-y Koɛɛg soab 5:3, 4.

11, 12. a) Bõe la ned sẽn dat n deeg lisg segd n bao n bãnge? b) Bõe n tõe n sõng-f tɩ f tall tagsg sẽn zems lisgã zugu?

¹¹ Biiblã yeelame tɩ sẽn tũud-b a Zeova wã fãa, kãsembã la kom-bɩɩsã ‘na n dɩka b mens n kõ-a ne yamleoogo.’ (Yɩɩn. 110:3, Wẽnnaam Sebre, 1983) Woto yĩnga, bi-bɩɩg sã n dat n deeg lisgu, a segd n bao n bãnga sã n sɩd yaa yẽ mengã raabo. Rẽ baoodame tɩ f fees f meng neere, sẽn yɩɩd fãa, f sã n dogame n mik tɩ f roagdbã tũuda a Zeova.

¹² Tõe tɩ f nee neb wʋsg sẽn deegd lisg yʋʋmd fãa, tɩ f rog-taase, pa rẽ bɩ f yap wall f kẽem-dãmb be sʋka. La gũus n da wa tags tɩ f yʋʋmã sẽn paasdã, wall tɩ f taabã sẽn deegd lisgã, fo me segd n deega lisg ye. La bõe n tõe n sõng-f tɩ f tall tagsg sẽn zems lisgã zug wa a Zeova sẽn datã? Maag f yĩng n bao n bãng bũmb ning sẽn kɩt tɩ lisgã reegr pa reem bũmbã. Sõs-kãngã la sẽn pʋgd-a wã na n sõng-f lame.

13. Bõe n tõe n sõng-f tɩ f bãng f sẽn dat n deeg lisgã sã n sɩd yaa fo mengã yam-yãkre?

¹³ Bũmb toor-toor n tõe n sõng-f tɩ f bãng f sẽn dat n deeg lisgã sã n sɩd yaa fo mengã yam-yãkre. Wala makre, f sẽn pʋʋsd to-to wã tõe n wilga f sã n dat n tũ a Zeova ne f sũur fãa. F sẽn pʋʋsd n pẽdemd to-to wã, la bũmb nins f sẽn wae n kotẽ wã wilgda foo ne a Zeova zoodã pãng sẽn ta zĩig ninga. (Yɩɩn. 25:4) Naoor wʋsgo, a Zeova leokda tõnd pʋʋsgã ne Biiblã maasem. Woto yĩnga, d sẽn modgd to-to n zãmsd Biiblã me wilgdame tɩ d sɩd rata a Zeova zoodo, la tɩ d rat n tũ-a-la ne d sũur fãa. (Zoz. 1:8) Rẽ wã, sok f meng woto: ‘Bõe la m wae n pʋʋsd Wẽnnaam n kotẽ? Mam nonga Biiblã zãmsg bɩ?’ F roagdbã sã n yaa kiris-neba, n lugl zak pʋgẽ Biibl zãmsgã bɩ f sok f meng woto: ‘Mam naagda m doagdbã n zãmsd Biiblã ne yamleoog bɩ?’ F sẽn na n leok sogs-kãensã to-to wã tõe n sõng-f lame tɩ f bãng f sẽn dat n deeg lisgã sã n sɩd yaa fo meng yam-yãkre.

14. Wilg-y welgr ning sẽn be rɩk-m-meng n kõ a Zeova wã la lisgã sʋka.

¹⁴ Kom-bɩɩs kẽer tõeeme n pa mi welgr ning sẽn be rɩk-m-meng n kõ a Zeova wã ne lisgã sʋk ye. Bala, kom-bɩɩs sãnda yetame tɩ b rɩka b mens n kõ a Zeova, la b yaool n yetẽ tɩ b nan pa rat n deeg lisg ye. Rẽ tara võor sɩda? Ned sã n dɩk a meng n kõ a Zeova, rat n yeelame t’a pʋʋs-a lame n pʋlm-a t’a  na n maana a raabã wakat fãa. Ned sã n deeg lisgu, a wilga nebã taoor t’a zoe n dɩka a meng n kõ a Zeova. Woto yĩnga, nand tɩ f reeg lisgu, yaa tɩlɛ tɩ f bao n bãng rɩk f meng n kõ a Zeova sẽn dat n yɛɛlga.

15. Rɩk-m-meng n kõ a Zeova wã rat n yeelame tɩ bõe?

¹⁵ Ned sã n dɩk a meng n kõ a Zeova, a wilgame tɩ lebga a Zeova n so-a. A pʋlma a Zeova t’a na n kɩɩsa a mengã raabo, tɩ lebg a Zeova raabã n pak-a n yɩɩda. (Karm-y Matye 16:24.) Ned sã n pʋlem Wẽnnaam woto, sɩd pa reem bũmb ye! (Mat. 5:33) Rẽ wã, bõe la f tõe n maan n wilg tɩ f kɩɩsa f mengã raabo, la tɩ f lebga a Zeova rẽnda?—Rom. 14:8.

16, 17. a) Rɩk makr n wilg kɩɩs f meng raabã sẽn dat n yɛɛlga. b) Ned sã n dɩk a meng n kõ a Zeova, yaa wa a soab sẽn yeel tɩ bõe?

¹⁶ Mams wa f zoa sẽn na n da mobill n kõ-fo. A kõo foo mobillã sɛba, n yeel-f woto: “Yaa fo rẽnda.” La a paase: “M na n talla kʋɩlen-biisã. Bala, pa foom n na n tar mobillã n kẽnd ye. Yaa maam.” F tagsg na n yɩɩ wãn ne kũunã, la kũunã soaba?

¹⁷ Ned sã n dɩk a meng n kõ Wẽnnaam a Zeova, yaa wa a sẽn yeel-a woto: “Mam dɩka m vɩɩmã n kõ foo. Mam yaa fo rẽnda.” A Zeova tara sor n na n yeel a soabã t’a pids a sẽn pʋlmã. La a soabã sã n wa yik n maand bũmb sẽn pa noom a Zeova yẽ? Wala makre, a tõe n wa soos n dooda ned sẽn pa tũud a Zeova, pa rẽ bɩ a tɩ bao tʋʋmd sẽn kɩt t’a pa le tar sẽk n moond koɛɛgã sõma, wall sẽn kɩt t’a vaand tigissã. Sẽn maand-a woto pa pidsd bũmb ning a sẽn pʋlem a Zeova wã ye. Yaa wa a sẽn da mobill n kõ neda, n yaool n pa kõ-a mobillã kʋɩlen-biis ye. D sã n dɩk d meng n kõ a Zeova, yaa wa d sẽn yeel-a woto: “Mam pa le so m vɩɩmã ye, yaa fo n so-a.” Rẽnd d na n maanda a Zeova sẽn datã wakat buud fãa, baa pa noom tõndo. A Zeezi maana woto. A yeelame: “Mam sẽn yi arzãn n sigã, ka tɩ maan m sẽn dat ye, la yaa tɩ maan sẽn tʋm-a maamã raabo.”—Zã 6:38.

18, 19. a) Bõe la a Rooz ne a Kiristofɛɛr yeel tɩ wilgdẽ tɩ lisgã reegr nafda neda? b) Yãmb tagsg yaa wãn ne lisgã reegre?

¹⁸ Vẽenega, lisgã reegr pa reem bũmb ye. Ned sã n paam n deeg lisg n lebg a Zeova Kaset soaba, yaa zu-zẽkr tɛkẽ. Kom-bɩɩs nins sẽn nong a Zeova la sẽn wʋmd rɩk f meng n kõ-a wã sẽn dat n yɛɛlgã pa zoet lisgã reegr ye. B lisgã poor me, b pa wat n maand b bãngẽ ye. A Rooz sẽn yaa bi-pugl sẽn deeg lisgã yeela woto: “Mam nonga a Zeova. Bũmb ka be sẽn kõt maam sũ-noog n yɩɩd a raabã maaneg me ye. Mam zɩ n yãk yam n maan bũmbu, n kɩs sɩd tɩ na n nafa maam n yɩɩd m sẽn deeg lisgã ye.”

¹⁹ La bi-bɩɩg a Kiristofɛɛr d sẽn gom a soab yell sõsgã sɩngrẽ wã yẽ? A reega lisg t’a tar yʋʋm 12. Rẽ yĩnga, a maanda a bãngẽ bɩ? A sã n mi n tags a sẽn dɩk a meng n kõ a Zeova n deeg lisgã yelle, a sũur yaa noogo. A sẽn wa n tar yʋʋm 17, a lebga wakat fãa so-pakda. Yʋʋmd poore, b yãk-a lame t’a lebg kãsem-sõngda. Rũndã-rũndã, a yaa Betɛllẽ tʋm-tʋmda. Ad a sẽn yeele: “Mam sẽn yãk yam n deeg lisgã, sɩd nafda maam. Mam tʋmda wʋsg a Zeova ne a siglgã yĩnga, hal tɩ kõt-m sũ-noogo.” La fo sã n dat n wa reega lisgu, wãn-wãn la f tõe n segl f menga? Sõsg ning sẽn pʋgdã na n leoka sok-kãngã.