1, 2. Bõe yĩng tɩ naong pa tõe n sa dũni-kãngã pʋgẽ?

RŨNDÃ-RŨNDÃ, ligdã baoob wɛɛngẽ, nebã maanda zãmbo, n pa kʋmd taab nimbãaneg ye. Kom-bɩɩsã baooda tʋʋm n pa tõe n paam ye. Kẽer gẽnegda b yõy sẽn na yɩl n paam n kẽng tẽns nins sẽn yidg laogã wɛɛngẽ wã. Baa tẽn-kãens pʋgẽ, naong rãmbã yaa wʋsgo. Sẽn tar-bã paoong tara paasg bala, tɩ naongã rãmb far me tar paasgo. Sẽn nan pa kaoose, b maana gɛɛla, n mik tɩ b sã n pʋɩ dũniyã neb zĩis koabga, sull a ye paoong n zem sẽn ket-bã fãa paoong sẽn naag taaba. Ned kae n na n kɩɩs tɩ neb kẽer n tar arzɛk hal tɩ b yagens yagen-tʋbrakẽes na n wa ket n dɩt b paoongã, tɩ neb milyaar-dãmb yaool n be naong pʋgẽ, n pa tar b sẽn maand ye. A Zeezi meng ra yeelame yaa: “Naong rãmb na n kell n bee ne yãmb wakat fãa.” (Mark 14:7) Bõe yĩng tɩ vɩɩmã yaa woto?

² A Zeezi ra miime tɩ sã n pa Wẽnnaam Rĩungã n wa, wẽgb la zãmb pa tõe n sa ye. Biiblã wilgda vẽeneg tɩ dũni-kãngã politikã sigls ne tũudmã sigls la ligdã baoob siglsã fãa bee a Sʋɩtãan nugẽ. Vẽnegr sebrã pʋgẽ, b boola ligdã baoob siglsã tɩ ‘dũni lɛɛbdba.’ (Vẽn. 18:3) Tõnd sẽn yaa Wẽnnaam nin-buiidã, d lakda d mens fasɩ ne politikã la tũudmã siglsi. La d wʋsg pa tõe n pa kẽes d meng baa yaa bilf ligdã baoob pʋgẽ ye.

3. Sogs-bʋs la d na n leoke?

 ³ Segdame tɩ kiris-ned fãa fees a meng n ges a manesem sẽn yaa to-to ligdã baoob wɛɛngẽ. D sok d meng yaa: ‘Bõe la m tõe n maan ne m paoongã, tɩ wilg tɩ m maanda sɩd ne Wẽnnaam? Bõe n na n sõng-m tɩ m da kẽes m meng wʋsg ligdã baoob pʋgẽ? Kiba-bʋs n wilgd tɩ Wẽnnaam nin-buiidã teeg-a-la zãng-zãnga?’ Sogs-kãensã la d na n leoke.

4, 5. a) A Zeezi yel-bũndã pʋgẽ, a yeelame tɩ bõe n paam tʋʋmdã taoor soabã? b) A Zeezi sagla kiris-nebã tɩ b maan bõe?

⁴ Karm-y Luk 16:1-9. Yel-bũndã a Zeezi sẽn wẽ wã sõngda tõnd fãa tɩ d tags neere. A yeelame tɩ b sẽn wa n togs arzɛkã soab t’a tʋʋmã taoor soabã sãamda a paoongã, a yãka yam n na n yiis-a tʋʋma. * La tʋʋmdã taoor soab ‘maana yam.’ A sẽn wʋm t’a zu-soabã na n yiis-a-la tʋʋmã, a yõga zood ne neb sẽn tõe n wa sõng-a tʋʋmdã sãoong poore. A Zeezi sẽn wẽ yel-bũndã pa sẽn na n sagl a karen-biisã tɩ b tʋm pʋ-lik n paam b noorã rɩɩb ye. A pʋd n wilgame tɩ yaa ‘dũni-kãngã nebã’ n maand woto. A wẽ yel-bũndã n na n sõng a karen-biisã tɩ b bãng bũmb sẽn tar yõod wʋsgo.

⁵ A Zeezi ra miime tɩ wa yellã sẽn tiig n paam tʋʋmdã taoor soabã, dũni-kãngã sẽn pid ne wẽgbã yĩnga, kiris-neb wʋsg me nengẽ, bao-n-kõ-noorã pa na n yɩ nana ye. Rẽ n so t’a sagl-b tɩ b “rɩk dũni paoongã n bao zo-rãmba,” rat n yeel t’a Zeova ne a Zeezi zoodo. Bõe yĩnga? Sẽn na yɩl tɩ paoongã sã n wa sɛ bɩ a Zeova ne a Zeezi reeg-b “yiy sẽn paad wakat sẽn kõn sa wã pʋgẽ.” Yam-bʋg la d tõe n dɩk a saglgã pʋgẽ?

6. Bõe n wilgd tɩ Wẽnnaam da pa rat tɩ nebã leebd n baood yõod n samdẽ?

⁶ Biiblã wilgda vẽeneg tɩ Wẽnnaam da pa rat tɩ nebã leebd n baood yõod n samdẽ ye. A Ãdem ne a Awa sẽn wa n be Edɛn zẽedã zĩigẽ wã, a Zeova ra kõ-b-la bũmb nins fãa sẽn yaa tɩlɛ ne-bã tɩ seke. (Sɩng. 2:15, 16) Biiblã wilgame tɩ pipi kiris-nebã sẽn paam vʋʋsem sõngã zaeebã poore, b “ned ba a yembr dag n ka yet tɩ bũmb nins yẽ sẽn so wã yaa a meng rẽnd ye.” Biiblã paasame tɩ b “paoongã fãa rag n yaa bãmb fãa n so.” (Tʋʋ. 4:32) No-rɛɛs a Ezayi ra pĩnd n togsame tɩ wakat n wat tɩ ninsaalbã fãa na n paam n dɩ tẽngã laogã yõodo. (Eza. 25:6-9; 65:21, 22) La nand tɩ wakat kãng ta, yaa tɩlɛ tɩ kiris-nebã ‘maan yam’ n paam dũni-kãnga paoongã bilfu, n tõog n paamd b noorã rɩɩbo, la b ket n modgdẽ me sẽn na yɩl n ta Wẽnnaam yam.

7. Sagl-bʋg la a Zeezi kõ Luk 16:10-13?

⁷ Karm-y Luk 16:10-13. A Zeezi yel-bũndã pʋgẽ, tʋʋmdã taoor soab sẽn bao zo-rãmbã yaa a meng nafr yĩnga. La a Zeezi sẽn sagl kiris-nebã tɩ b bao zo-rãmb saasẽ wã pa b mens nafr yĩng ye. A ra ratame tɩ d bãng tɩ d sẽn maand bũmb nins ne d paoongã wilgda d sã n maanda sɩd ne Wẽnnaam. Wãn to?

8, 9. Bõe la d tẽed-n-taas maan ne b paoongã, tɩ wilgdẽ tɩ b maanda sɩd ne a Zeova?

⁸ Bũmb a ye d sẽn tõe n maan ne d paoongã, tɩ wilg tɩ d maanda sɩd ne a Zeova, yaa d sẽn na n kõt ligd sẽn na yɩl n sõng tɩ b moon koɛɛgã dũniyã gill zug wa a Zeezi sẽn da pĩnd n togsã. (Matye 24:14) Ẽnd bi-pugl a ye sẽn yaa bilf n bao  konkong n poog n bĩngd ligd bilf-bilfu. A ra basame meng n pa le raad reem-teed ye. Konkongã sẽn wa n pidã, a rɩka ligdã fãa n kɩs sẽn na yɩl n teel koɛɛgã moonego. Ẽnd saam-biig a ye me n tar kaok pʋʋgo. A yãkd n kõta siglgã sɛbã lebr biru a ye sẽn be be. A yeelame tɩ sẽn mik tɩ biru wã mi n tɩ raa kaokã, yẽ tagsdame t’a sã n kõt-b kaokã, rẽ sãoo yẽ sẽn na n kõ-b ligd-vẽenega. A sẽn maandã sɩd yaa yam. Gɛrɛs sam-biis me n maand a buudu. B kõta beenẽ Betɛllã zak rãmb oliiv kaam, formaaze, la bũmb a taaba.

⁹ Sirlãnka saam-biig sẽn be tẽn-zẽng n dɩk a zĩig sẽn be a ba-yirã n kõ tɩ b maand tigissã la tigis-kãsemsã beenẽ. Roog me n be be, tɩ neb sẽn kẽes b mens zãng Wẽnnaam tʋʋmdã pʋgẽ gãe be. A ra tara a sẽn tõe n maan ne a roogã la a zĩigã n paam yõodo, la a basa rẽ sẽn na yɩl n sõng koe-moondbã nug sẽn pa zãadã. D tẽed-n-taas sẽn be tẽng a ye pʋgẽ d sẽn pa tar sor n na n tʋm d tũudmã tʋʋm kẽer sakame tɩ b maand tigissã bãmb zagsẽ wã. Woto sõngda so-pakdbã ne saam-biis nins nug sẽn pa zãadã tɩ b paam tigsg zĩiga, tɩ pa tũ ne ligd yiisg ye.

10. D sã n yaa kõtba, bark bʋs la d paamda?

¹⁰ Woto yaa kibay a wãn bal sẽn wilgd tɩ Wẽnnaam nin-buiidã ‘maanda sɩd bõn-bõoneg pʋsẽ.’ Sɩd me, d paoong toor-toorã yaa bõn-bõonego, d sã n mak rẽ ne bũmb nins sẽn yaa arzɛgs Wẽnnaam nifẽ wã. (Luk 16:10) Nin-kãensa sẽn yaa a Zeova zo-rãmbã tagsg yaa wãna, b sẽn mongd b mens woto wã? B miime tɩ ned sã n yaa kõta, a paamda ‘paoong sɩd-sɩda.’ (Luk 16:11) Saam-bi-poak a ye n nong n kõt kũun n teend Rĩungã tʋʋmã. A yeelame tɩ yʋʋm a wãnã a sẽn wɩngd ne kũunã, yẽ mengã toeemame, hal tɩ yaa wa bõn-sãanga. Ad a sẽn yeele: “Mam gũus n gesame tɩ m sẽn nong n kõt m sẽn tarã, kɩtame tɩ m manesmã ne m taabã toeeme. M sakdame n kõt sugr n yɩɩd pĩndã, m maanda sũ-mar ne m taabã n yɩɩd pĩndã. M leb n sakd n basda yɛl nins sẽn sãamd m sũurã. Ned sã n sagl-ma, m sakda nana masã.” Neb wʋsg gũus n gesame tɩ b sã n yaa kõtba, wẽneg n nafda bãmb mensã.—Yɩɩn. 112:5; Yel. 22:9.

11. a) Bõe yĩng tɩ d sẽn kõt d sẽn tarã wilgd tɩ d ‘maanda yam’? b) Bõe yĩng tɩ ned kam fãa sẽn kõt a sẽn tarã yaa sõma? (Ges-y sõsgã sɩngrẽ fotã.)

¹¹ Bũmb a to me d sẽn tõe n maan tɩ wilg tɩ d ‘maanda yam,’ yaa d sẽn na n kõt d sẽn tarã n sõngd d taabã, koɛɛgã mooneg na kẽng taoor yĩnga. Baa d pa tõe n kẽes d meng zãng Wẽnnaam tʋʋmdã pʋgẽ, wall n tɩ sõng zĩig ning koe-moondb sẽn pa waoogẽ, d sẽn kõt d sẽn tarã sõngda koe-moondb a taaba. (Yel. 19:17) Ligd ning d sẽn kõtã sõngdame tɩ siglgã yiisd sɛba, la a tõogd n get koe-noogã mooneg yell tẽns nins pʋsẽ naongã sẽn yaa wʋsgã, tɩ beenẽ neb wʋsg sakd tũudum hakɩɩkã. Tẽns kẽer wala Kõngo, Madagaskaar la Ruwãnda, Biibl ligd ra yaa toogo. Wakat ninga, ra tata semen bɩ  kiuug tʋʋm yaoodo. Naoor wʋsgo, yɩɩ tɩlɛ tɩ d tẽed-n-taas mong b zakã rãmb dɩɩb n paam n da Biibl. La d fãa sẽn kõtã yĩnga, sẽn tar-bã kũunã lokda sẽn pa tar-bã, t’a Zeova siglgã tõe n lebg Biibl-dãmba, la b yiis tɩ zagsã rãmb ned kam fãa, la baa neb nins sẽn nan zãmsd Biiblã tõe n paame. (Karm-y 2 Korẽnt-rãmb 8:13-15.) Woto kɩtame tɩ sẽn kõt-bã ne sẽn deegd-bã fãa tõe n paam a Zeova zoodo.

12. Bõe la a Abrahaam maan-yã, tɩ wilgdẽ t’a ra teega Wẽnnaam?

¹² Bũmb me sẽn tõe n sõng-d tɩ d paam a Zeova zoodo, yaa d sẽn na n mao wa d sẽn tõe tɛk n bao paoong sɩd-sɩdã, la d ra kẽes d meng wʋsg laogã baoob pʋgẽ ye. Yaa woto la a Abrahaam maan-yã. A sẽn da rat a Zeova zoodã yĩnga, a saka a sẽn yeelã, n yi n bas Uur tẽngã sẽn da tar laog wʋsgã, n tɩ vɩɩmd fu-rot pʋsẽ. (Ebre. 11:8-10) A pa teeg paoong ye. A ra teega a Zeova wakat fãa, n miẽ tɩ yẽ n kõt arzɛk sɩd-sɩdã. (Sɩng. 14:22, 23) Tẽeb a woto buud la a Zeezi sẽn sagend tɩ d tallã. Daar a ye, a yeela bi-bɩɩg sẽn yaa rakãagr yaa: “Fo sã n dat n zems zãnga, kẽng n tɩ koos fo sẽn tarã, n dɩk ligdã n kõ naong rãmba, la fo na paam paoong arzãn pʋga. La f wa n tũ maam.” (Mat. 19:21) Bi-bɩɩgã ra pa tar a Abrahaam tẽebã buud ye. La neb a taab n zĩndi, n teeg Wẽnnaam wa a Abrahaam.

13. a) Bõe la a Poll yeel a Tɩmote? b) Wãn to la tõnd tõe n tũ a Poll saglgã?

¹³ A Tɩmote me yɩɩ ned sẽn tall tẽebo. A Poll bool-a lame t’a “Zeezi Kiris tãb-bi-sõngo,” la a yeel-a yaa: “Sodaag ka kẽesd a toog nin-zaals vɩɩm yɛl pʋgẽ, a sã n dat tɩ ned ning sẽn dɩk-a yẽ sodaarã sũur yɩ noog ne-a ye.” (2 Tɩm. 2:3, 4) Rũndã-rũndã, sẽn yɩɩd neb milyõ a ye n kẽes b mens zãng Wẽnnaam tʋʋmdã pʋgẽ, n yaa wa tãb-biisi. Bãmb ne b tẽed-n-taasã fãa maanda b sẽn tõe n tũud a Poll saglgã. B yõkda b mense, n pa basdẽ tɩ piblisite-rãmbã la dũniyã nebã manesmã kɩt tɩ b lebg rat-wʋsg rãmb ye. Wakat fãa, b tẽegdame tɩ Biiblã yeelame tɩ “ned sã n tɩ reeg samd ned a to nengẽ, a lebga a soabã yamba.” (Yel. 22:7) A Sʋɩtãan sẽn dat yaa tõnd rɩk d pãngã la d sẽkã fãa n baood ligdã, hal n lebg ligdã yembse. Neb n kẽed sam-bɛd sẽn na yɩl n da zaka, mobilli, n yao kareng bɩ n maan b yi-kãadem kibsa. Wat n lebga tɩlɛ tɩ b tʋm yʋʋm ka tɛk n yao. D sã n dat n wilg tɩ d maanda yam, segdame tɩ d mao n da gĩd d vɩɩmã, n da nong n kẽed sama, la d ra raad teed wʋsg ye. Rẽ, d na n sɩd yɩɩ Wẽnnaam yembse, n da yɩ ligdã yembs ye.—1 Tɩm. 6:10.

14. D rata ne d sũy fãa n maan bõe? Togs-y kibay a wãna.

¹⁴ D sã n lʋɩɩsd Wẽnnaam Rĩungã taoore, sõngdame tɩ d pa gĩt d vɩɩmã ye. Saam-biig a ye ne a pag n da pak tʋʋmd zĩiga, hal tɩ ligdã ra kẽed sõma. La b ra rata ne b sũur fãa n le lebg wakat fãa so-pakdba. Rẽ n so tɩ b koos b tʋʋmdã zĩiga, b batayo, la b teed a taaba, n kẽng n tɩ sõng n me tõnd biru-kãsengã sẽn be Warwik, Niuyorkã. B paam n naaga b bi-pugl ne a sɩd n tʋm Betɛllẽ wã. B paamame me n naag b bi-puglã sɩdã ba ne a ma n tʋm semen a wãna. Bala, bãmb me wa n sõng n mee Warwik biru-paallã. Ad sɩd yɩɩ bark tɛkẽ! Kolorado saam-bi-poak sẽn yaa so-pakd n da paam tʋʋmd bãnkẽ, la pa tʋmd sẽn dɩkd a sẽkã fãa ye. Tʋʋmdã taoor dãmb sũur yɩɩ noog ne a tʋʋmdã, tɩ b yeel-a t’a sã n sak n na n tʋm daar fãa, b na n paasa a yaoodã tɩ ta a sẽn dɩkdã naoor a tãabo. La rẽ sẽn na n kɩt t’a pa le  tõe n moon koɛɛgã wʋsgã, a zãgsame. Woto yaa kibay a wãn sẽn wilgd a Zeova Kaset rãmbã sẽn mongd b mens to-to n tʋmd Rĩungã tʋʋmã. D sẽn maand woto ne d sũur fãa, n lʋɩɩsd Rĩungã tʋʋm taoorã wilgdame tɩ yaa Wẽnnaam zoodã ne bũmb nins sẽn yaa arzɛk yẽ nifẽ wã la d nong n yɩɩd dũni-kãngã teedã la a ligdã.

15. Yaa paoong bʋg n kõt sũ-noog n tɩ yɩɩda?

¹⁵ Pa ned sẽn na n tar arzɛgs la wilgd tɩ Wẽnnaam ning-a-la bark ye. D sã n yaa “neb sẽn maand tʋʋm-sõamy wʋsgo,” rẽ la a Zeova ningd-d barka. (Karm-y 1 Tɩmote 6:17-19.) Saam-bi-poak a ye n da be Itali, n wa wʋm tɩ b rata koe-moondb sẽn na n sõng ne koɛɛgã mooneg Albani. A yʋʋr la a Lucia. * Yʋʋmd 1993, a yik n kẽnga be n na n tɩ sõnge. A sẽn ta be wã, a ra pa tar tʋmd ye. La a ra kɩsa sɩd t’a Zeova na n gesa a yelle. A zãmsa Albani buud-gomdã, n tõog n sõng sẽn yɩɩd neb 60 tɩ b reeg lisgu. Tõe tɩ tõnd pa na n paam n sõng neb wʋsg woto tõnd sẽn moond zĩig ningã ye. La sẽn yaa bũmb ning fãa la d maand n na n sõng nebã tɩ b bãng a Zeova la b lebg a zo-rãmba, yaa wa paoong d sẽn bĩngdi, tɩ na n naf tõnd ne bãmb fãa wakat sẽn kõn sa.—Mat. 6:20.

16. a) Ka la bilfu, bõe n na n paam ligdã baoob siglsã? b) D sẽn mi rẽ wã segd n kɩtame tɩ d maan bõe?

¹⁶ A Zeezi yeela bũmb sẽn wilgd tɩ wakat n wat tɩ dũniyã paoongã na n sa. (Luk 16:9) Rũndã-rũndã, bãnk-rãmb n pagde. Tẽns kẽer me, ligdã zu-loees tara kengre. La ka la bilfu, yell wẽnem sẽn yɩɩd rẽ n wate. A Sʋɩtãan dũniyã siglsã fãa, rat n yeel tɩ politikã ne tũudmã la ligdã baoob siglsã fãa na n sãamame. A Ezekɩyɛll ne a Sofoni sẽn yɩ Wẽnnaam no-rɛɛsdbã pĩnd n togsame tɩ wakat kãngã, wanzuri wã ne sãnemã dũni-kãngã lɛɛbdbã sẽn nand wʋsgã na n lebga zaalem. (Eze. 7:19; Sof. 1:18) D sã n wa na n maan yõore, tɩ mik tɩ d basa arzɛk sɩd-sɩdã baoob n pʋg dũniyã paoongo, kõn yɩ sũ-sãams tɛkẽ sɩda? Yaa wa ned sẽn tʋm a yõor tɛk sẽn na yɩl n paam ligd wʋsgo, n wa reeg n mik tɩ yaa ligd-yooko. (Yel. 18:11) Hakɩɩka, dũni-kãngã paoongã na n wa saame. Bɩ d modg n dɩk d paoongã n bao zo-rãmb saasẽ. Sẽn yaa bũmb ning fãa la d maan Wẽnnaam Rĩungã tʋʋmd na kẽng taoor yĩnga, d paamda paoong sɩd-sɩda.

17, 18. Bark bʋs la Wẽnnaam zo-rãmbã na n wa paame?

¹⁷ Wẽnnaam Rĩungã sã n wa, ned baa a ye kõn le yao roogo, wall a kẽ sam ye. D fãa na n paama rɩɩb tɩ seke. D pa na n le kẽng logtor yiri, wall d ra tɩɩm ye. A Zeova zo-rãmbã na n vɩɩmda tẽngã zugu, n dɩ tẽngã paoongã fãa yõodo. Sãnemã, wanzuri wã la kug-neeb buud toor-toorã na n lebga nagsg teedo, pa na n le yɩ leebg bũmb ye. Raadã, kugã la kutã na n gãee zĩig fãa, tɩ d tar n met ro-neeba. D zo-rãmbã na n sõngd-d-la ne yamleoogo, pa yaood yĩng ye. Tẽngã paoongã na n yɩɩ tõnd fãa n so.

¹⁸ Sẽn baood-b a Zeova ne a Zeezi zoodã sẽn na n paam bark ninsã bilf bal la d sẽn sõdgã. Bũmb la a Zeezi na n yeel sẽn na n vɩɩmd-b tẽngã zugã, tɩ b kaas ne sũ-noogo. A na n yeel-b lame yaa: “Yãmb dãmb sẽn tar m ba wã barkã, wa-y-yã! Reeg-y soolmã sẽn dag n segl yãmb yĩng hal dũni naaneg wakatã tɩ yɩ y pʋɩɩre.”—Mat. 25:34.