TŨUDUM kẽer gɩdgame tɩ b taoor dãmbã ra kẽ kãadem ye. Wala makre, katolik tũudmã, egiliiz ortodogsã, la budismã. La neb wʋsg tagsdame tɩ yaa tũudum sãnda sẽn gɩdg tɩ b taoor dãmbã ra kẽ kãadmã n kɩt tɩ yʋʋma noorã, b kẽer yik n tʋmd raglem, hal tɩ kiba-kɩtbã gomdã.

Rẽnd zemsame tɩ d sok d menga: ‘Biiblã yetame tɩ Kirist tũudmã taoor dãmb pa segd n kẽ kãadem bɩ?’ Yɩl n leok sok-kãngã, d na n yãa sẽn sɩng to-to tɩ tũudum taoor dãmb wa pa kẽed kãadmã, rẽ sẽn paam pãng to-to, la Wẽnnaam Gomdã sẽn yete.

Yʋʋmd 2006, pap Benowa 16 soabã yeela a sõsg pʋgẽ tɩ Kirist tũudmã taoor dãmb sẽn pa segd n kẽ kãadmã pa sɩng masã, la tɩ sɩnga hal a Zeezi tʋm-tʋmdbã kũum poor bilf bala.

La rakõtã yaool n pa bũmb sẽn da yaa tɩlɛ pipi kiris-nebã sʋk ye. Sɩd me, tʋm-tʋmd a Poll sẽn vɩɩmd pipi kiris-nebã wakatẽ wã keooga tẽedbã tɩ neb n da na n wa yik n tẽed ziri, la tɩ b na n gɩdga b taabã tɩ b ra kẽ kãadem ye.—1 Tɩmote 4:1-3.

Yaa yʋʋm koabg la zak a Zeezi rogmã poor la wa n lebg tɩlɛ egiliiz-rãmb wʋsg pʋgẽ tɩ b taoor dãmbã ra kẽ kãadem ye. Yaa egiliiz-kãens n wa n lebg katolik tũudmã. Sebr a yembr yeelame tɩ Rom soolmã tũudum kẽer n wa n yik n yetẽ tɩ ned sẽn tʋmd Wẽnnaam tʋʋm segd n zãaga a meng ne pag ne rao lagengã, tɩ katolik tũudmã rãmb kell n gãd rẽ n yãk yam tɩ bãmb me taoor dãmbã pa segd n kẽ kãadem ye.

Yʋʋm kobsã sẽn pʋglã pʋgẽ, egiliizã taoor dãmb tigiss toor-toorã sasa, b wilga vẽeneg tɩ bãmb pa segd n kẽ kãadem ye. Neb nins b sẽn boond tɩ egiliizã karen-saam-dãmbã me ra yeta woto. B ra  tagsdame tɩ pag ne rao lagengã rẽgemda neda, la tɩ pa zems ne tʋʋm nins egiliizã taoor dãmbã sẽn tʋmdã ye. La sebr a yembr yeelame tɩ hal n tãag yʋʋmd 900 wã, prɛtr-dãmb wʋsgo, la baa evɛk-rãmb kẽer ra tara pagba.

Katolik tũudmã taoor dãmb tigsg ning sẽn zĩnd yʋʋmd 1123 ne sẽn zĩnd-a yʋʋmd 1139 Rom tẽngã pʋgẽ wã sasa, b maneg n wilgame tɩ yaa tɩlɛ tɩ b taoor dãmbã ra kẽ kãadem ye. Hal n tãag rũndã, ket n yaa woto. Rẽ kɩtame tɩ katolik tũudmã tõog pa booge, tɩ prɛtr kaalem poor me bɩ a paoongã fãa lebg egiliizã rẽnda, bala a pa tar kamb sẽn na n deeg ye.

Biiblã yaa Wẽnnaam Gomde. A sõngda tõnd tɩ d bãng Wẽnnaam sẽn yet rakõtã wɛɛngẽ. Biiblã pʋgẽ, a Zeezi yeelame tɩ neb kẽer pa kẽ kãadem, la tɩ yaa ‘bãmb n tʋlg rẽ ne b yamleoogo,’ Wẽnnaam Rĩungã yĩnga. Yẽ mengã ra pa kẽ kãadem ye. (Matye 19:12, Sebr Sõngo) Tʋm-tʋmd a Poll me sagla kiris-neb nins sẽn pa kẽ kãadmã tɩ b rɩk yẽ togs-n-taar n kell n pa woto, “koe-noogã yĩnga.”—1 Korẽnt-rãmbã 7:8; 9:23.

La a Zeezi ne a Poll goamã pa wilgd tɩ yaa tɩlɛ tɩ Kirist tũudmã taoor dãmb ra kẽ kãadem ye. A Zeezi yeelame tɩ yaa ‘b sẽn kõ b rãmb pãn-tõogã’ n tõe n pa kẽ kãadem. Rẽnd pa a karen-biisã fãa n da na n pa woto n pa kẽ kãadem ye. A Poll sẽn wa n gomd ‘sẽn nan pa kẽ-b kãadmã yellã,’ a yeela vẽenega: “Mam ka tar Zu-soabã noor ye; mam togsda m tagsgo.”—Matye 19:11; 1 Korẽnt-rãmbã 7:25, Wẽnnaam Sebre, 1983.

Biiblã wilgdame tɩ pipi kiris-nebã taoor dãmb wʋsg ra kẽe kãadem. Wala makre, tʋm-tʋmd a Pɩyɛɛre. (Matye 8:14; Mark 1:29-31; 1 Korẽnt-rãmbã 9:5) Yoobã sẽn da wae Rom soolmã pʋgẽ wã, tʋm-tʋmd a Poll pʋd n yeelame tɩ kiris-ned sẽn yaa yel-gɛt sã n kẽe kãadem, a segd n yɩɩ “pʋg-yend sɩda,” la a tõog t’a ‘kambã yɩ kom-sakdse.’—1 Tɩmote 3:2, 4.

Nin-kãensã ra pa neb sẽn kẽ kãadem woto bala, n pa lagemd ne b pagbã ye. Sɩd me, Biiblã yeela vẽeneg tɩ “sɩdã kɩs pagã bũmb ning a sẽn tog n kis-a wã, la tɩ pagã me maan a woto ne a sɩdã,” la a paas tɩ “ned fãa ra mong a to” lagengã wɛɛngẽ ye. (1 Korẽnt-rãmbã 7:3-5) Vẽenega, Wẽnnaam pa yeel tɩ sẽn tʋmd-b yẽ tʋʋmã pa segd n kẽ kãadem ye. Rakõtã leb n pa bũmb sẽn yaa tɩlɛ ne Kirist tũudmã taoor dãmb ye.

Sã n pa tɩlɛ tɩ sẽn tʋmd-b Wẽnnaam tʋʋmã ra kẽ kãadem, bõe yĩng t’a Zeezi ne a Poll gom n pẽg sẽn pa kẽ-b kãadmã? Ned sã n pa kẽ kãadem, a tõe n paama weer wʋsg n moon koe-noogã. Sẽn pa kẽ-b kãadmã tõe n tʋma Wẽnnaam tʋʋmã wʋsgo, bala b pa tar yɛl nins sẽn pak sẽn kẽ-b kãadmã ye.—1 Korẽnt-rãmbã 7:32-35.

D gom a Davɩɩd yelle. A ra bee Megsiko Siti n tar tʋʋmd sẽn yaood sõma. La a wa n yãka yam n bas a tʋʋmdã, n yik n kẽng Kostarika tẽn-bil a ye pʋgẽ n na n tɩ sõng a taabã tɩ b bãng Biiblã sẽn yetã. Rẽ yĩnga, a Davɩɩd getame tɩ yẽ sẽn da yaa rakõorã, sõng-a lame bɩ? Ad a sẽn yeele: “Sɩd sõngame. Yɩl n minim buud a to la tẽng a to pʋgẽ vɩɩm pa nana ye. La m sẽn da yaa m yembrã kɩtame tɩ pa maneg n yɩ toog ye.”

A Kolodiya yaa pag sẽn pa kẽ kãadem. A yik n kẽng n na n tɩ sõng n moona koɛɛgã zĩig koe-moondb sẽn pa waooge. Ad a sẽn yeele: “Mam sẽn paam n tʋmd Wẽnnaam tʋʋmdã noom-m-la wʋsgo. Mam sẽn ne a sẽn get m yell to-to wã, paasda maam ne a zoodã pãnga, la kengd m tẽebã.”

D sã n pa kẽ kãadem, d pa segd n ges rẽ wa yel-pakr ye. A Kolodiya paasame: “F kẽe kãadem tɩ f pa kẽ me, pa rẽ n tar yõod n yɩɩd ye. F sã n tʋmd Wẽnnaam a Zeova tʋʋmdã wa f sẽn tõe tɛka, f paamda sũ-noogo.”—Yɩɩn-sõamyã 119:1, 2.