A ZORDAN zãada taykɛryõ b sẽn maan tɩ wõnd batayo. Wõnda bũmb yõod sẽn pa waooge. A Zordan yaool n nong-a-la hal wʋsgo. Ad a sẽn yeele: “Yaa mam doagdbã zoa a Rusɛll n kõ maam m yãadmẽ. Wakat kãng t’a yaa nin-kẽema.” A Rusɛll kũumã poore, a Zordan wʋmame t’a sõnga yẽ yaab-raoogo, la a roagdbã hal wʋsgo, n keng b raood b sẽn da wa n tar zu-loeese. Ad a Zordan sẽn paase: “Mam sẽn wʋm bũmb ning a Rusɛll zug n paasã kɩtame tɩ bõn-kãngã fĩ-fĩi wã a sẽn kõ-mã maneg n tar yõod m nifẽ.”

A Zordan kibarã wilgdame tɩ kũun ning yõod tõe n paooda neb kẽer nifẽ, wall pʋd n ka yõod ye. La sẽn deeg-a kũunã tõe n getame tɩ kũunã tara yõodo, wall t’a yõodã pa tõe n sɩf ye. Biiblã goma kũun yõod sẽn pa tõe n bãng n bilg yelle, n yeele: “Wẽnnaam nonga dũniyã wʋsgo, hal tɩ b kõ b Bi-ribl yendã, tɩ ned ning fãa sẽn na tẽ bãmb kõn sãam ye, la a na paam vɩɩm sẽn kõn sa.”—Zã 3:16.

Yaa kũun sẽn tõe n kɩt tɩ ned ning sẽn na n sak n deeg-a wã paam vɩɩm sẽn kõn sa. Kũun yõod sẽn ta woto beeme sɩda? Sãnda tõeeme n pa rat n sak n deeg tɩ kũun-kãngã tara yõod ye. La kiris-neb hakɩɩkã yẽ miime t’a yõodã yaa wʋsgo. (Yɩɩn-sõamyã 49:9; 1 Pɩyɛɛre 1:18, 19) La bõe yĩng tɩ Wẽnnaam sak n dɩk a Bi-riblã vɩɩm n kõ ãdem-biisã yĩnga?

Tʋm-tʋmd a Poll wilga a võore. A yeelame: “Rao a yembr n wa ne yel-wẽnã dũniyã tɩ kũum wa yel-wẽnã yĩnga. Rẽ n kɩt tɩ kũum yõkd nebã fãa.” (Rom-dãmbã 5:12, Wẽnnaam Sebre, 1983) D yaab a Ãdem yãka yam n kɩɩs Wẽnnaam n maan yel-wẽnde, tɩ baas ne a kũum. A yel-wẽndã kɩtame t’a kambã la yagensã fãa lebg kiidba.

“Yel-wẽnã yaood yaa kũum, la kũun ning  Wẽnnaam sẽn kõt zaalmã yaa vɩɩm sẽn kõn sa, tõnd Zu-soab a Zeezi Kiris pʋgẽ.” (Rom-dãmbã 6:23) Wẽnnaam tʋma a Bi-ribl a Zeezi Kirist tẽngã zugu, t’a wa rɩk a vɩɩmã sẽn zems zãngã n maan maoong sẽn na yɩl tɩ ãdem-biisã paam b mens ne kũumã. Maoon-kãng maasem yĩnga, neb nins fãa sẽn na n tẽ a Zeezi wã na n wa paama vɩɩm sẽn kõn sa.—Rom-dãmbã 3:24.

Tʋm-tʋmd a Poll yeela bũmb sẽn wilgd t’a Zeezi Kirist maasem yĩnga, wẽn-sakdbã na n wa paama bark buud toor-toore. A yeelame: “Bark Wẽnnaam, bãmb kũunã noor sẽn ka tõe n togsã yĩnga.” (2 Korẽnt-rãmbã 9:15) Hakɩɩka, a Zeezi maoongã yõod yɩɩda noor toagsga. Bũmb nins fãa Wẽnnaam sẽn maan ãdem-biisã neer yĩnga sʋka, yaa a Zeezi maoongã yõod n yɩɩde. Bõe yĩnga? Bõe n kɩt tɩ yaa kũun sẽn pa wõnd Wẽnnaam kũun a taabã? * Bõe la d tõe n maan n wilg tɩ d sũur nooma ne rẽ? Karm-y sõss a yiibã sẽn pʋgdã, tɩ y na n yãa Biiblã sẽn leokd sogs-kãensã to-to.