Hat daar a ye zaabre, a Kenet ne a pag a Filomen sẽn be Kurasao tẽngã ra kẽngame n na n tɩ ges pag ne a sɩd sẽn zãmsd Biiblã ne-ba.

Ad a Kenet sẽn yeele: “Tõnd sẽn ta wã, d mikame tɩ roogã pagame, tɩ b mobillã me ka be ye. La waa mam yamẽ tɩ m bool pagã telefõnnẽ.”

Pagã rɩka telefõnnã n gom ne-ba, la a yeel t’a sɩdã looga tʋʋma. La a sẽn bãng tɩ yaa zakã pʋg la b yas n boondẽ wã, a wa n paka roogã tɩ b kẽ.

B bãnga zĩig pʋgẽ tɩ pagã ra yãbdame. B sẽn zĩnd n na n sɩng Biiblã zãmsgã t’a Kenet pʋʋs a Zeova wã, pagã le sɩnga yãbre. A Kenet ne a Filomen maaga b yĩng n sok pagã n na n bãng sẽn yaa yell ning n be.

Pagã yeel-b lame tɩ yẽ ra rat n kʋʋ a menga, la t’a ra gʋlsda sebr n na n bĩng t’a sɩdã wa karme, la a Kenet sẽn kell n boolã. A yeelame t’a bẽeda bãag sẽn kɩt t’a yamã ka a meng ye. A Kenet rãmb kɩtame tɩ b naag taab n karem Biiblã goam a wãna, tɩ bels-a. B sẽn keng a raood woto wã, b fãaga a yõorã.

A Kenet yeelame: “Tõnd pʋʋsda a Zeova barka, a sẽn tũnug ne-d n sõng pʋg-kãngã sẽn da be sũ-sãang kãseng pʋgẽ wã. La sẽn tɩ yɩɩda, a sẽn kɩt tɩ wa d yamẽ tɩ d bool pagã. Tõe tɩ yaa malɛk bɩ vʋʋsem sõngã la a tũnug ne n kɩt tɩ rẽ wa d yamẽ ye.” *

Rẽ yĩnga a Kenet ne a Filomen bee bʋʋm n na n tẽ tɩ yaa Wẽnnaam n tũnug ne malɛk wall ne a vʋʋsem sõngã n kɩt tɩ wa b yamẽ tɩ b bool pagã bɩ? Bɩ yɩɩ segb bala?

D pa tõe n bãng ye. La d miime tɩ Wẽnnaam tũnugda ne malɛgsã n sõngd neb sẽn na yɩl tɩ b bãng-a. Wala makre, Biiblã yeelame tɩ Wẽnnaam tʋma malɛk t’a tɩ yeel koe-moond a Filip t’a tɩ sõng Etiopi rao sẽn da rat sõngr sẽn na yɩl n wʋm Wẽnnaam gomd võore.—Tʋʋmã 8:26-31.

Tũudum wʋsg pʋgẽ, b yeta nebã tɩ bõn-naands n be d sẽn pa tõe n yã ne nifu, tɩ b pãngã yɩɩd ninsaalbã, la tɩ b kẽer tʋmda Wẽnnaam daabã pidsg yĩnga, wall b gũud ãdem-biig fãa, n kogend-a. Neb wʋsg yetame tɩ b tẽedame tɩ malɛgs n sɩd be, la tɩ malɛgsã tõe n sõng-b lame wall b maan-b wẽnga. Neb kẽer me pa tẽed tɩ malɛgs n be ye.

La rẽ yĩnga, malɛgsã sɩd beeme bɩ? B sã n beeme, sɩnga wãn tɩ b wa beẽ? Bõe la Biiblã yet malɛgsã zugu? B tõe n sõnga yãmb wall b maan-y wẽng bɩ? Sogs-kãensã la d na n leoke.