1, 2. A Pɩyɛɛr dãmb sẽn lob zĩmã yʋngã tõr n pa paamã, bõe la a Zeezi maan-yã? Sõnga a Pɩyɛɛr t’a bãng bõe?

A ZEEZI vʋʋgrã yɩ tɩ rasem a wãna, a karen-biis a yopoe n kẽng n na n tɩ yõg zĩm Galɩle mogrẽ wã ne yʋngo. Yʋngã tõre, b pa yõk zĩnf baa a ye. Zĩigã sẽn wa n yẽegã, b yãa a Zeezi t’a yas mogrã noor n get-ba. A yeel-b lame tɩ b ‘lob zĩm-gãmbrã koglgã rɩtgo, tɩ b na n paamame.’ Karen-biisã “loba zĩm-gãmbrã, la b dag n ka leb n tõe n tak-a ye, zĩmã waooglem yĩnga.”—Zã 21:1-6.

² Rẽ poore, a Zeezi kõ-b-la zĩm la bur tɩ b wãbe. B sẽn dɩ n sa, a soka a Pɩyɛɛr yaa: “Simo, Zã biiga, fo nonga maam n yɩɩd bãmba bɩ?” (Sebr Sõngo) A Zeezi ra miime t’a Pɩyɛɛr nonga zĩmã yõgbo. Rẽnd wõnda a rat n bãnga a Pɩyɛɛr sã n nonga yẽ n yɩɩd zĩmã yõg n koosã. A Pɩyɛɛr leokame: “N-yẽe, Zu-soaba! Yãmb miime tɩ mam nonga yãmba.” (Zã 21:15) A Pɩyɛɛr sẽn maan bũmb nins rẽ tɛka wilgame t’a sɩd nonga a Zeezi. Sɩd me, a wɩnga ne koɛɛgã moonego, hal n tall tʋʋm wʋsg pipi kiris-nebã sʋka.

3. Kiris-ned fãa segd n gũusa ne bõe?

 ³ A Zeezi sẽn yeel a Pɩyɛɛr bũmb ningã wilgda tõnd bõe? Wilgdame tɩ d segd n gũusame tɩ bũmb da wa kɩt tɩ d sẽn nong a Zeezi to-to wã booge, tɩ pa le yaa Rĩungã tʋʋmã n pak-d ye. A Zeezi ra miime tɩ vɩɩmã na n yɩɩ toogo, n pid ne zu-loeese, tɩ yaa yɩɩre. A yel-bũnd ning pʋgẽ a sẽn gom ka-koaad yellã, a yeelame tɩ neb kẽer na n kelga “Wẽnnaam soolem koɛɛgã,” n sak n sɩng tũubu, la tɩ ‘dũniyã yɩɩr la arzegs belgr’ na n ‘wulumda koɛɛgã t’a ka wom biis ye.’ (Mat. 13:19-22; Mark 4:19) D sã n pa gũusi, vɩɩmã yɛl la yɩɩrã tõe n kɩtame tɩ d pa le tũud a Zeova ne d sũur fãa ye. Rẽ n so t’a Zeezi keoog a karen-biisã, n yeel-b yaa: “Gũus-y y mens tɩ rɩ-n-tɩk wall rã-tɩgre, la vɩɩmã yɛl yɩɩr da wa n zɩsg yãmb sũyã ye.”—Luk 21:34.

4. D maanda wãn n bãng d sã n nonga Kiristã ne d sũur fãa? (Ges-y sõsgã sɩngrẽ fotã.)

⁴ Tõnd me sã n lʋɩɩs koɛɛgã mooneg taoor wa a Pɩyɛɛre, d wilgdame tɩ d nonga Kiristã. D maanda wãn n bãng d sã n ket n maanda woto? D mi n sok d meng n ges yaa bõe n noom tõnd n tɩ yɩɩda. Yaa a Zeova tʋʋmã bɩ, bɩ yaa bũmb a to? Sõs-kãnga pʋgẽ, d na n goma bao-n-ko-noorã yelle, reemã bɩ pemsmã kokre, n paas ligdã la teedã baoob yelle. D sã n pa gũusi, bõn-kãensã a tãabã tõe n wa kɩtame tɩ d sẽn nong a Zeezi to-to wã booge, tɩ pa le yaa Wẽnnaam tʋʋmã n pak-d ye.

5. Biiblã yeelame tɩ zak-soben-dãmbã segd n maana bõe?

⁵ Zĩmã yõgb pa tʋʋmd a Pɩyɛɛr sẽn da nong woto bal ye. A ra teega rẽ n get a zakã rãmb yelle. Biiblã wilgame tɩ yaa zak-soben-dãmbã n segd n ges b zakã rãmb yelle. (1 Tɩm. 5:8) B segd n tʋma wʋsgo, sẽn na yɩl tɩ b zakã rãmb paam sẽn yaa tɩlɛ wã. La rũndã-rũndã sẽn yaa yaoolem wakatã, bao-n-ko-noorã mi n pa nana, hal tɩ yaa yɩɩre.

6. Bõe n wilgd tɩ bao-n-ko-noorã pa nana?

⁶ Tʋʋmã paoong sẽn pa nana wã kɩtame tɩ nebã wagsd taab tʋʋmã poorẽ. Tʋm-tʋmdb kẽer sakd n tʋmame n zʋʋg sigbã lɛɛre, baa yaoodã sã n pa waooge. Tʋʋmã rãmb rata yõod wʋsgo, n yaool n pa rat n dɩk tʋm-tʋmdb wʋsg ye. Rẽ n so tɩ b kɩtdẽ tɩ tʋm-tʋmdbã tʋmd n yɩɩgd b pãnga, tɩ wat ne yaams la yɩɩre, la bãas menga. Tʋm-tʋmdb wʋsg sakd n maanda taoor soabã sẽn yet fãa, b sẽn yɛɛsd a na n wa rig-b yĩnga.

7, 8. a) Ãnd la d segd n sakd n tɩ yɩɩda? b) Bõe la Taylãnd saam-biig bãng tʋʋmã wɛɛngẽ?

⁷ D sẽn yaa kiris-nebã, yaa a Zeova la d segd n sak n yɩɩda, pa d tʋʋmdã taoor soaba, wall ned a to ye. (Luk 10:27) Tʋʋmã sõngdame tɩ d paamd d noorã rɩɩb ne bũmb a taab sẽn yaa tɩlɛ, la sõngdẽ tɩ d tõe n teel koɛɛgã moonego. La d sã n pa gũusi, d tʋʋmã tõe n wa yãmba d sẽkã, tɩ d pa le tõe n tũ a Zeova sõma ye. A buud paama Taylãnd saam-biiga. A yeelame: “Mam da tʋmda ordinatɛɛr-dãmb manegr zĩigẽ. Tʋʋmdã ra nooma maam sõma, la ra rɩkda m sẽkã wʋsgo. Kɩtame tɩ m da pa le tar sẽk wʋsg n tʋmd tũudmã tʋʋm ye. M wa n bãngame tɩ sẽn na yɩl n lʋɩɩs Rĩungã tʋʋm taoore, rẽnda m toeem tʋʋma.” Bõe la a maan-yã?

⁸ Ad a sẽn yeele: “Mam kẽgsa ligd na maan yʋʋmde, la m bʋgsd n get tʋʋmd ning m sẽn tõe n tʋme. M  wa n yãka yam n na n gilgd n koosd kɛrɛm galaase. Sɩngrẽ wã, ligdã ra pa kẽed sõma, hal tɩ pa nana ye. Wa n komsa m raood menga. M sã n da seg m pĩnd tʋmd-n-taasã, b ra yaanda maam, n yetẽ yaa: ‘Fo tagsdame tɩ kɛrɛm galaase wã koosg n são fo sẽn da be roog sẽn tar klimatizɛɛr pʋgẽ, n manegd ordinatɛɛr-dãmbã bɩ?’ M da pʋʋsda a Zeova n kotẽ t’a sõng-m tɩ m kell n tõog toogo, n wa paam sẽk n tʋm a tʋʋmã wʋsg wa m sẽn datã. Pa yã n kaoos la yɛlã sɩng manegr ye. M wa n bãnga m raadensã sẽn nonge, la m paam tʋʋmdã minim n paase. Rẽ tɛka, mam kɛrɛmã ra pa sekd ye. Mam sẽn da paamd ligd ningã yɩɩda m sẽn da manegd ordinatɛɛr-dãmbã n paamdẽ wã. Mam sũ-noogã ra yɩɩda pĩndã, bala m tʋʋmdã ra pa kõt-m yɩɩr wa m pĩnd tʋʋmdã ye. La sẽn tar yõod n yɩɩda, m neeme tɩ maam ne a Zeova zoodã pãng paasame.”—Karm-y Matye 5:6; Luk 11:28.

9. Bõe la d tõe n maan tɩ ra wa lebg tõnd tʋʋmã n pak-d n tɩ yɩɩda?

⁹ D sã n tʋmd ne yẽesem, a Zeova sũur noomame. D paamda d tʋʋmdã nafa me. (Yel. 12:14) La d segd n gũusame tɩ ra wa lebg tõnd tʋʋmã n pak-d n yɩɩd a Zeova raabã maaneg ye. A Zeezi wilgame tɩ d sã n lʋɩɩs Rĩungã tʋʋm taoore, a Zeova na n gesame tɩ d paam bũmb nins sẽn yaa tɩlɛ ne d vɩɩmã. Ad a sẽn yeele: “Deng-y n bao-y Wẽnnaam soolmã ne bãmb tɩrlmã, la b na n kõo yãmb bõn-kãens fãa n paase.” (Mat. 6:33) Yɩl n bãng d sã n pa bas tɩ d tʋʋmã pak-d n yɩɩd a Zeova raabã maanego, d sokd d meng yaa: ‘Rẽ yĩnga mam nonga m tʋʋmã n yɩɩd bũmb nins m sẽn maand a Zeova tũudmã pʋgẽ wã bɩ?’ D sã n sok d meng woto, la d tags neere, na n sõng-d lame tɩ d bãng d sẽn nong n yɩɩdã.

10. Bõe la a Zeezi yeel-yã, tɩ wilgd bũmb ning sẽn segd n pak tõnd n tɩ yɩɩdã?

¹⁰ A Zeezi wilga bũmb ning sẽn segd n pak tõnd n tɩ yɩɩda. Daar a ye, a kẽnga a Maari ne a Mart rãmb yirã. Tao-tao bala, a Mart sɩnga rɩɩb seglgo. La a Maari yẽ tɩ zĩnda a Zeezi sɛɛgẽ, n kelgd-a. A Mart yeela a Zeezi t’a Maari sẽn pa sõngd yẽ wã pa zems ye. A Zeezi leok-a lame yaa: “A Maari yãka pʋɩ-sõng b sẽn kõn deeg n bas-a ye.” (Luk 10:38-42) A Zeezi sõnga a Mart t’a bãng bũmb sẽn tar yõod wʋsgo. Tõnd me sã n dat n wilg tɩ d nonga Kiristã, d pa tog n bas tɩ d tʋʋmã soog-d ye. D segd n yãka ‘pʋɩ-sõngã,’ rat n yeel tɩ yaa tõnd ne a Zeova zoodã n segd n pak-d n yɩɩda.

11. Bõe la Biiblã yeel tɩ wilgdẽ tɩ d sã n mi n kok pemsem la d vʋʋse, pa wẽnga?

¹¹ Tõnd sẽn tʋmd wʋsgã kɩtame tɩ d sã n mi n kok pemsem la d vʋʋse, d le paamda pãnga. Biiblã yeelame: “Bũmb ka be sẽn yaa noog ne ninsaal n yɩɩd a sẽn na n paam n dɩ la a yũ, n maan sũ-noog ne a tʋʋmd ye.” (Koɛ. 2:24) A Zeezi ra miime tɩ yaa tɩlɛ tɩ ninsaal mi n vʋʋse. Vugri, yẽ ne a karen-biisã gilg n moona koɛɛgã wʋsgo, hal tɩ yaamsã ra tar-ba. A Zeezi yeel-b lame yaa: “Wa-y tɩ d yi we-kɛɛnga, neb sẽn ka beẽ tɩ y tɩ vʋʋs bilfu.”—Mark 6:31, 32.

12. Reemã la yõ-noogrã wɛɛngẽ, d segd n gũusa ne bõe? Togs-y kibare.

¹² Yaa sɩd tɩ reemã la pemsmã kokr tõe n sõngame tɩ d vʋʋse, n le paam pãng bilfu. La d segd n gũusame tɩ ra wa lebg rẽ n pak tõnd n yɩɩd ye. Pipi kiris-nebã wakatẽ, neb wʋsg ra yetame: “Bɩ  d dɩ la d yũ. Bala, beoogo, d na n kiime.” (1 Kor. 15:32) Rũndã-rũndã me, neb wʋsg tagsda woto. Wala makre, bi-bɩɩg a ye n da sɩng tigissã kẽnd Erop soolmẽ wã. La a ra nonga reemã la yõ-noogrã, tɩ rẽ kɩt t’a bas n pa le kẽnd tigissã ye. A wa n bãngame t’a sẽn bas tɩ yaa reemã la yõ-noogrã n pak-a wã waa ne zu-loees bala. A le sɩnga Biiblã zãmsgo, n wa lebg koe-moonda. A lisgã poore, a yeelame: “Sẽn zabd maamã, yaa sẽn kaoos tɩ m yaool n na n bãng tɩ yaa a Zeova tũubã n kõt sũ-noog n yɩɩd f sẽn na n lʋɩɩs reemã la yõ-noogrã taoorã.”

13. a) Rɩk-y makre, n wilg tɩ d sã n nong reemã la yõ-noogrã tɩ loog noore, pa sõma ye? b) Bõe n na n sõng-d tɩ d ra wa maan tɩ loog noore?

¹³ Reemã la pemsmã kokr yaa sẽn na n sõng-d tɩ d le paam pãnga. La segdame tɩ rɩkd d sẽkã wʋsg bɩ? D rɩk makre. Neb wʋsg nonga gato la bõn-nood a taaba. La d miime tɩ sã n yaa gato wall bõnbõ la d rɩɩb wakat fãa, tõe n waa ne bãase. Woto me, sã n yaa reemã la yõ-noogrã n pak tõnd n yɩɩda, na n sãama tõnd ne a Zeova zoodã. A tɩɩmã yaa d sẽn na n wɩngd ne Rĩungã tʋʋmã. La d maanda wãn n bãng d sã n pa maand tɩ loog noor reemã la yõ-noogrã wɛɛngẽ? D tõe n magame n ges semen fãa, d sẽn kẽnd tigissã, n moond koɛɛgã, n zãmsd Biiblã la d tʋmd tũudmã tʋʋm a taabã, wakat a wãn la rɩkda. D mag sẽk ning me tõnd sẽn kẽesd reemã la yõ-noogrã pʋgẽ wã. Wala makre, yĩn-wɩsgrã, televiziõ wã gesgo, pa rẽ bɩ ze video wã tãoobo. Rẽ poor bɩ d ges yaa sẽk ning tõnd sẽn kẽesd tũudmã tʋʋm pʋgẽ wã n yɩɩd bɩ, bɩ yaa sẽk ning d sẽn kẽesd reemã la yõ-noogrã pʋgẽ wã? Woto, d na n bãnga d sã n segd n demsa bũmbu.—Karm-y Efɛɛs-rãmb 5:15, 16.

14. Bõe n tõe n sõng-d tɩ d bãng n yãk bũmb nins d sẽn na n maan n noog d yõorã?

¹⁴ A Zeova kõo ned kam fãa sor t’a tõe n yãk a sẽn na n maan bũmb nins n noog a yõore. Zak fãa pʋgẽ, zakã soab n tar sor n na n ges rẽ yelle. La a Zeova kõo sagls Biiblã pʋgẽ, tɩ tõe n sõng-d tɩ d bãng n yãke. * Biiblã wilgame tɩ yõ-noogr sẽn yaa sõma yaa “Wẽnnaam kũuni.” (Koɛ. 3:12, 13) Yaa sɩd tɩ reemã la pemsmã kokr wɛɛngẽ, ned fãa sẽn nongã pa yembr ye. (Gal. 6:4, 5) La sẽn yaa bũmb ning fãa la d maand n noogd d yõore, d segd n gũusame tɩ ra wa lebg rẽ n tar yõod n yɩɩd ye. Sɩd me, a Zeezi yeelame: “Fo paoong sẽn be zĩig ningã, fo sũur me na n zĩnda beenẽ.” (Mat. 6:21) D sẽn nong a Zeezi wã kɩtame tɩ d rat ne d sũur fãa n wilg d tagsa wã pʋgẽ, d no-goamã la d tʋm-tʋmdɩ wã pʋgẽ tɩ sẽn pak tõndã yaa Rĩungã tʋʋmã.—Fili. 1:9, 10.

15, 16. a) Bõe yĩng tɩ kiris-ned fãa segd n gũus ligdã la teedã baoob wɛɛngẽ? b) Sagl-bʋg la a Zeezi kõ-yã?

¹⁵ Rũndã-rũndã, neb wʋsg tagsdame tɩ yaa tɩlɛ tɩ b paam te-paall sẽn yi fãa. Wala makre, fu-paala, telefõn wall ordinatɛɛr sẽn nan yi. Yaa ligdã la teedã baoob n pak-b n yɩɩd bũmb fãa. Rẽ n so tɩ kiris-ned fãa segd n mi n tags n ges sẽn yaa bũmb ning n pak-a n tɩ yɩɩda. D tõe n soka d meng yaa: ‘Mam dɩkda sẽk n baood n na n bãng mobil-paal wall fu-paal sẽn nan yi, hal tɩ yɩɩd sẽk ning m  sẽn dɩkd n segend tigissã bɩ? Yaa beoog fãa yɛlã n pak maam n tɩ yɩɩda, tɩ m pa tar sẽk n pʋʋsd a Zeova la m karemd Biiblã bɩ?’ D sã n mik tɩ ligdã la teedã baoob kɩtame tɩ d pa le nong Kiristã wa pĩndã, yɩta sõma tɩ d tẽeg gomd a sẽn da yeele. A ra yeelame: “Gũus-y y mens ne rat wʋsgã.” (Luk 12:15) Bõe yĩng t’a Zeezi keoog tõnd woto?

¹⁶ A Zeezi yeelame tɩ “ned ba a yembr ka tõe n sak zu-soben-dãmb a yiib ye.” A paasame: “Yãmb ka tõe n sak Wẽnnaam la y sak arzegs me ye.” Ned pa tõe n dat n tũ a Zeova ne a sũur fãa la a rat me n bao ligdã la teedã ne a sũur fãa ye. A Zeezi wilgame t’a soab “na n kisga a yembr la a nong a to wã, wala a loe a meng ne a yembr la a paoog a to wã.” (Mat. 6:24) D fãa sẽn yaa neb sẽn pa zems zãngã, d segd n ket n maooda sẽn na yɩl tɩ ligdã bɩ teedã la “yĩngã datem” a taabã ra soog-d ye.—Efɛ. 2:3.

17. a) Ligdã la teedã baoob wɛɛngẽ, bõe yĩng tɩ yaa toog ne neb kẽer tɩ b maan n zemse? b) Bõe n na n sõng-d tɩ d tõog tɩ ligdã la teedã ra soog-do?

¹⁷ Neb wʋsg basame tɩ yaa b yĩngã ratmã n so-ba. Kɩtame tɩ ligdã la teedã baoob wɛɛngẽ, yaa toog ne-b tɩ b maan n zemse. (Karm-y 1 Korẽnt-rãmb 2:14.) B sẽn pa mi Wẽnnaam daabã kɩtame tɩ yaa toog tɩ b tags n bãng sõma ne wẽng n bake. (Ebre. 5:11-14) Kɩtame tɩ b baood ligdã la teedã n samdẽ, tɩ baas n pa sekd-b ye. (Koɛ. 5:9) La bũmb n be n tõe n sõng-d tɩ d ra maan wa nin-kãensã ye. Yaa d sẽn na n karemd Wẽnnaam Gomdã daar fãa. (1 Pɩy. 2:2) A Zeezi ra wae n bʋgsda Wẽnnaam goamã zugu. Rẽ sõng-a lame t’a kɩɩs a Sʋɩtãan sẽn da rat t’a maan bũmb ninsã. Tõnd me sã n bʋgsd Biiblã saglsã zug la d tũudẽ, d na n tõogame tɩ ligdã la teedã baoob ra soog-d ye. (Mat. 4:8-10) Rẽ, d wilgdame tɩ Kiristã la d nong n yɩɩda.

18. Bõe la y rat ne y sũur fãa n maane?

¹⁸ D tẽeg a Zeezi sẽn da sok a Pɩyɛɛrã. A sok-a lame yaa: “Fo nonga maam n yɩɩd bãmba bɩ?” A Zeezi ra rat n sõng-a lame t’a bãng tɩ yaa a Zeova raabã maaneg n segd n pak-a n yɩɩd bũmb fãa. A Pɩyɛɛr yʋʋrã rat n yeelame tɩ “kugr” bɩ “pĩiga.” A sɩd saka a yʋʋre, bala a Zeova tũubã wɛɛngẽ, a yɩɩ wa pĩig sẽn pa vigsdã. (Tʋʋ. 4:5-20) Tõnd me rat n yɩɩ woto, n nong a Zeezi ne d sũur fãa. Rẽ n so tɩ bao-n-ko-noorã wɛɛngẽ, reemã la pemsmã kokre, n paas ligdã bɩ teedã baoob wɛɛngẽ, d modgdame n maand n zemsdẽ. Bɩ d mao tɩ d yam-yãkr fãa wilg tɩ d yaa wa a Pɩyɛɛre. Rẽ, na n yɩɩ wa tõnd me yeta a Zeezi yaa: “Zu-soaba! Yãmb miime tɩ mam nonga yãmba.”