YƲƲMD 1910 sẽnese, mam doagdbã yika Tibilisi sẽn yaa Zorzi na-tẽngã, n kẽng Kanada. B ra tɩ bee koob la gʋʋlg zĩig sẽn pẽ Peli, Saskatsewan sẽn be Kanada wĩndg sẽn lʋɩtẽ babgã. Mam doga yʋʋmd 1928. Tõnd da yaa d yoobe. Maam n yaa nugẽ biiga. M baaba kaalem kiis a yoob poor la mam dog-yã. M sẽn wa n zems yʋʋmde, m ma me maana kaalem. Rẽ poor bilfu, a Lucy sẽn yaa d kẽem-bi-puglã me maana kaalem. A ra tara yʋʋm 17. Tõnd yasb a ye yʋʋr sẽn boond t’a Nick n deeg maam ne ma-biisã. Yaa tõnd ma wã yao.

Daar a ye, mam gãda tõnd wed-moaag a ye zʋʋr n tatẽ, tɩ tõnd zakã rãmb yã. B ra yɛɛsda wed-moaagã na n tão-ma. B tãsa maam, la m pa wʋme, m pa yã. Mam nengã ra pa tees-b ye. Zu-noogo, bũmb pa maan-m ye. Yɩɩ daar-n-kãng la tõnd zakã rãmb bãng tɩ mam yaa muka. Rẽ tɩ m zemsa yʋʋm a yiibu.

Tõnd zakã rãmb miting a ye n yeel tɩ b kẽes maam mugsã lekolle. M yasb a Nick tɩ gʋlsa maam mugsã lekoll a ye sẽn be Saskatun, Saskatsewan soolmẽ wã, n tall-m n tɩ bas beenẽ. Ra zãra ne tõnd zakã, tɩ mam yaool n da tar yʋʋm a nu bala. Kɩtame tɩ m da yɛɛsdẽ. Yaa kõnze-rãmbã la vakãas-rãmbã sasa bal la m da tõe n lebg n kul zakẽ. M zãmsa mugsã goam, n da tõe deem ne lekollã kamb a taaba.

Yʋʋmd 1939 wã, m kẽem-bi-pugl a Marion kẽe kãadem ne rao yʋʋr sẽn boond t’a Bill Danylchuck. Yẽ ne a sɩdã reega maam ne m kẽem-bi-pugl a Frances. Tõnd zakã neb sʋka, bãmb n yɩ pipi n sɩng Biiblã zãmsg ne a Zeova Kaset rãmbã. Vakãas-rãmbã sasa, b ra modgda wa b sẽn tõe tɛka, n na n sõng maam tɩ m bãng bũmb nins bãmb sẽn zãmsd  Biiblã pʋgẽ wã. Ra yaa toog tɩ d sõs ne taaba, bala b ra pa mi mugsã goam ye. La b ra neeme tɩ m nonga bũmb nins m sẽn zãmsd a Zeova zugã. Mam da getame tɩ b sẽn maandã tog n yaa Biiblã sẽn yetã. Kɩtame tɩ mam da tũud-b n moond koɛɛgã. Pa yã n kaoos la m yeel tɩ m dat n deega lisg ye. Yʋʋmd 1941 bõn-bɩʋʋng kiuug rasem a 5 wã, a Bill lisa maam barik pʋgẽ. Yaa bulg koom la b pids barikã. Ra yaa maasg kĩninnn!

Yʋʋmd 1946, mam sẽn kul vakãas-rãmbã sasa wã, tõnd kẽnga tigis-kãseng sẽn zĩnd Klevlãnd, Owayo, Etazĩni. Tigsgã pipi daarã, mam tãopã ra gʋlsda sebr zug tɩ mam karemdẽ. La rasem a yiib-n-soabã, b togsa maam tɩ b yãka zĩig mugsã yĩnga, tɩ ned be be n lebgd sõssã. Mam sẽn bãng woto wã, sɩd yɩ-m-la noog wʋsgo! M da tõe n wʋma tigsgã sõssã võor sõma masã. Ra yaa bõn-sõng tɛkẽ! M na n yaa n paam n bãnga Biiblã sẽn yetã vẽenega!

Wakat-kãng tɩ yaa dũni gill zabr a yiib-n-soabã sẽn nan sate, tɩ nebã wʋsg ra rat n wilg tɩ b nonga b tẽngã. Tigis-kãsengã poore, mam leba lekollẽ wã, n da rat ne m sũur fãa n kell n sak a Zeova. Rẽ n so tɩ mam yãk yam n pa na n le naag n pʋʋs darpo wã la m yɩɩl tãb-kaoorã ye. Mam yãka yam me n pa na n le naag n maan kibs-rãmbã la egiliizã yɛl kẽer b sẽn da maand lekollẽ wã ye. Pa yɩ lekollã taoor dãmb noog ye. B baoome n na n bugs maam sẽn na yɩl tɩ m toeem yam. Mam karen-bi-taasã wa bãnga yellã, tɩ rẽ kɩt tɩ m paam segb n taas-b koɛɛgã. Kẽer wa n lebga a Zeova Kaset rãmba, n ket n tũud-a hal ne rũndã. Wala makre, a Larry Androsoff, a Norman Dittrick la a Emil Schneider.

Mam sã n da kẽng tẽng a to fãa, m maanda m sẽn tõe sẽn na yɩl n paam mugs n taas-b koɛɛgã. Wala makre, mam sẽn wa n be Moreyallã, mam kẽnga zĩig mugsã sẽn nong n tigimd taaba. Be, m paam n sõsa ne bi-bɩɩg yʋʋr sẽn boond t’a Eddie Tager. A ra yaa mugs sull taoor soaba. A maana kaalem rɩẽ. A ra bee Kebɛk soolmẽ wã, Laval tiging a ye pʋgẽ b sẽn gomd mugsã goam. M paam n sõsa ne bi-bɩɩg a to yʋʋr sẽn boond t’a Juan Ardanez. A ra maanda vaeesg wa Beere nebã, n na n ges mam sẽn yet-a bũmb ninsã sã n sɩd yita Biiblã pʋgẽ. (Tʋʋ. 17:10, 11) Yẽ me wa n lebga a Zeova Kaset soaba. A zĩnda Ottawa tiging a ye pʋgẽ, Õntariyo soolmẽ wã. A yɩɩ kãsem-soab hal n tãag a kaalem.

Yʋʋmd 1950 wã, mam yik n kẽnga Vãnkuvɛɛr. Yaa sɩd tɩ yaa mugsã la m da nong n taasd koɛɛgã. La daar a ye, m taasa ned sẽn pa muk koɛɛgã. Yaa pag yʋʋr sẽn boond t’a Chris Spicer. Yɩɩ sor noore. A sakame tɩ mam gʋls a yʋʋre, tɩ b na n toond-a periodik-rãmbã kiuug fãa. A ra ratame me tɩ m pɩʋʋg zakẽ n sõs ne a sɩdã. A yʋʋr la a Gary. Mam  kẽnga b yirã, tɩ d sõs n kaoose. Sẽn na yɩl n wʋm taab goamã, ned fãa gʋlsda a sẽn dat n yeelã sebr zugu. Maana yʋʋm wʋsg tɩ d pa le yã taab ye. Tigis-kãseng a ye sasa la b wa n pʋʋs maam, tɩ ling-ma. Yɩɩ Torõnto, Õntariyo soolmẽ wã. Baraare, a Gary reega lisgu. Tẽega maam tɩ d segd n sɩd moonda koɛɛgã wakat fãa, bala d pa mi ned ning sẽn na n sak ye. M kõn tol n yĩm yel-kãngã ye.

Mam wa n yik n kẽnga Saskatun. Daar a ye, m sega paga, t’a kos maam tɩ m wat n zãmsd a kom-pugli a yiib sẽn yaa kinkirs Biiblã. A ye yʋʋr la a Jean, t’a to wã la a Joan. B sondeda Rothenberger, n da karemd mam sẽn zĩnd lekoll ningã. Pa kaoos la b sɩng n togsd b karen-bi-taasã bũmb nins b sẽn zãmsdã ye. B karen-bi-taas a nu n wa n lebg a Zeova Kaset rãmba. B nin-yɛng yʋʋr la a Eunice Colin. Mam da bãnga a Eunice lekollẽ wã, m karengã yaoolem yʋʋmdã. A kõo maam bõnbõ baraarã, la a sok maam n ges m sã n dat n yɩɩ yẽ zoa. A wa n lebga m zoa meng-menga, bala yẽ n lebg m paga!

A Eunice ma sẽn wa n bãng t’a zãmsda Biiblã, a tɩ yãa dirɛktɛɛrã n yeel-a t’a sagl a Eunice t’a base. Dirɛktɛɛrã tol n deesa sɛb nins a Eunice sẽn da tar n zãmsd Biiblã. Ne rẽ fãa, a Eunice pa bas a Zeova ye. A sẽn wa n dat n deeg lisgã, a roagdbã yeel-a lame yaa: “F sã n lebg a Zeova Kaset soaba, f na n yii zakẽ wã!” A Eunice wa n sɩd yii zakẽ wã, t’a Zeova Kaset rãmb deeg-a b zakẽ. Rẽ t’a tara yʋʋm 17. A kell n wɩnga ne Biiblã zãmsgo, hal n wa reeg lisgu. D kẽe kãadem yʋʋmd 1960. La a roagdbã pa tol n wa d yi-kãadmã ye. Sẽn wa n beẽ n beẽ, b sẽn da get d sẽn wubd d kambã to-to wã, la b neẽ tɩ d sẽn tẽed bũmb ninsã kɩtame tɩ d yaa toorã, b wa n pa le paoogd-d ye.

Maam ne m pagã sẽn yaa mugsã, yɩl n wub d kom-dibli a yopoe wã sẽn pa mugsã pa yɩ nana ye. La tõnd modgame tɩ b zãms mugsã goam sẽn na yɩl tɩ d tõe n sõs ne taaba, la d tõog me n zãms-b Biiblã. D tigingã neb sõng-d-la wʋsgo. Wala makre, d tẽed-n-taag n gʋls lɛtr n togs-d tɩ d biig a ye n nong n gomd gom-yood Rĩungã roogẽ. Sõngame tɩ d tõog n kibl biigã tao-tao. D kom-dibli a naas ne b zak rãmb n tũud a Zeova. A James, a Jerry, a Nicholas, la a Steven. Bãmb b naasã fãa yaa kãsem-dãmba. A Nicholas ne a pag a Deborah bee Gãrãnd Bertayn Betɛllẽ wã, n sõngd ne sɛbã lebgr mugsã goam pʋgẽ, t’a Steven ne a pag a Shannan me be Etazĩni Betɛllẽ wã, n sõngd n lebgd sɛbã mugsã goam pʋgẽ.

Bʋko, tõnd kãadmã yʋʋm 40 ket tɩ kiuugu, a Eunice maana kaalem. Yaa kãnsɛɛrã n tõog-a. Baa bãagã sẽn pa yɩ nana wã, a kell n talla tẽeb kãn-kãe, n da kɩs sɩd tɩ sẽn ki-bã na n wa vʋʋgame. Mam datame tɩ wakat ning m sẽn na n le yã-a wã ta tao-tao.

Yʋʋmd 2012 wao-fugdg kiuugã pʋgẽ, mam lʋɩɩme tɩ m kɩʋʋlgã kao. M bãngame tɩ rẽnda m paam sõngre. Rẽ n so tɩ m yik n tɩ be ne m bi-ribl a ye ne a paga. D bee Kalgari tiging a ye pʋgẽ b sẽn gomd mugsã goam. M ket n yaa kãsem-soab beenẽ. Sã n pa woto, m da zɩ n zĩnd mugs goam tiging pʋgẽ ye. La m maana wãn tɩ maam ne a Zeova zoodã kell n tall pãnga, baa ne m sẽn zĩnd ãngilind tiging pʋgẽ yʋʋm wʋsg woto wã? Yaa a Zeova n sõng-ma, wa a sẽn pʋlem t’a na n gesa kɩɩbsã yellã. (Yɩɩn. 10:14) M pʋʋsda neb nins fãa sẽn sak n sõng-m wa b sẽn tõe wã barka: Sẽn da gʋlsd-b sõssã tɩ m karemdẽ wã, sẽn zãms-b mugsã goamã, la sẽn da lebgd-b sõssã.

Wakat ninga, m sã n da be neb sʋk tɩ b gomda, tɩ mam pa tõe n bãng b sẽn yetã baa bilfu, m sũurã sãamdame hal tɩ rat n koms m raoodo. M da mi n tagsame me tɩ ned pa baood n na n sõng sẽn yaa-b mugsã ye. Sã n wa yaa woto, m tẽegda a Pɩyɛɛr sẽn yeel a Zeezi bũmb ningã. A yeelame: “Zu-soaba, tõnd na n kẽnga ãnda soab nengẽ? Yãmb tara vɩɩm sẽn kõn sa wã goamã.” (Zã 6:66-68) Maam ne m tẽed-n-taas nins me sẽn yaa mugsi, n sɩng a Zeova tũub hal sẽn kaoosã bɩɩsa sũ-mare. M maaga m yĩng n gũ a Zeova ne a siglgã. Nafa wã yɩɩ wʋsgo! Masã wã, siglgã yiisda bũmb wʋsg mugsã yĩnga, tɩ m tõe n paame. B maanda tigissã la tigis-kãsemsã ne mugsã goam, tɩ m tõe n kẽnge. Hakɩɩka, tõnd Wẽnnaam a Zeova tũubã kɩtame tɩ m tar sũ-noogo, tɩ m vɩɩmã tar barka!