A MATYE evãnzillã pʋgẽ, a yeelame t’a Zeezi kẽe wẽnd-doogã zakẽ n dig neb nins fãa sẽn da koosd la b raad wẽnd-doogã zakẽ wã, la a leeb ligd tekdbã taabl-dãmba la wal-koaasdbã goeelse, n bas n yeel-b yaa: “A gʋlsame tɩ b ‘na n boola mam roogã tɩ pʋʋsg roogo.’ La yãmba, yãmb maan-a lame t’a lebg wagda geongo.”—Mat. 21:12, 13.

Zʋɩf-rãmbã kʋdemd sɛb wilgame tɩ sẽn da koosd-b wẽnd doogẽ wã ra wẽgda b raadensã, bala b ra koosda toog wʋsgo. Wala makre, sebr a ye b sẽn boond tɩ Mishna (Karètot I, 7) togsame tɩ pipi kiris-nebã wakate, b ra koosda marwal a yiib sãnem denaar a ye. Yaa ligd sẽn ta rasem 25 tʋʋm yaoodo. Marwalã ligd ra lebga toog hal tɩ naong rãmbã ra pa le tõe n maan maoong ye. Yaool n da yaa sẽn na yɩl tɩ naong rãmbã me tõog n kõ Wẽnnaam maand la tõogã sẽn da wilg tɩ b tõe n kõo marwalã. (Maan. 1:14; 5:7; 12:6-8) Yel-kãnga yika zʋɩf-rãmbã karen-saamb a Simeon ben Gamaliel sũur wʋsgo, t’a boog maand nins sẽn da yaa tɩlɛ wã sõore. Rẽ kell n kɩtame tɩ marwal a yiib ligd sigi, n zems sãnem denaar a ye sẽn pʋɩ zĩis koabga.

Dẽnd d tõe n yeelame t’a Zeezi bee bʋʋm la a sẽn bool sẽn da koosd-b wẽnd-doogẽ wã tɩ wagda wã. Bala, rat-wʋsgã kɩtame tɩ b ra tolg n wẽgd b raadensã.