1, 2. Tõnd ned kam fãa segd n kɩsa sɩd ne bõe? (Ges-y fotã sẽn be yĩngrã.)

SÕSG ning sẽn loogã pʋgẽ, d yãame t’a Sʋɩtãan yeelame tɩ pa zems t’a Zeova yɩ yĩngr la tẽng naaba, la t’a sẽn dɩt a naamã to-to wã pa zems ye. D yãame me t’a yeelame tɩ ninsaalbã sã n soog b mense, n dɩt naam b toore, rẽ la b vɩɩmã na n yɩ noog n yɩɩda. La a Sʋɩtãan bee bʋʋm bɩ? Yaa sɩd tɩ ninsaalbã so b mens n dɩt naam. La rẽ yĩnga, b sã n da tõe n vɩ me n pa kiidẽ, b vɩɩmã ra na n yɩɩ noog n yɩɩd b sẽn na n sak Wẽnnaam naamã bɩ? Yãmb sã n da tõe n vɩɩmd wakat sẽn kõn sa, n so y meng n maand y sẽn dat fãa tɩ Wẽnnaam pa wilgd-y baa fʋɩ, y tagsdame tɩ rẽ la y vɩɩmã na n yɩɩ noog n yɩɩd bɩ?

² Ned baa a ye pa tõe n leok sogs-kãensã n kõ yãmb ye. Yaa ned kam fãa n segd n maag a yĩng n tags n gese. Woto, a na n kɩsa sɩd t’a Zeova n segd n yɩ yĩngr la tẽng naaba, la tɩ d segd n teela a naamã ne d sũur fãa. Sõs-kãnga pʋgẽ, d na n yãa bũmb kẽer Biiblã sẽn yeel tɩ wilgdẽ t’a Zeova bal n segd n yɩ yĩngr la tẽng naaba, la t’a naamã sõmblem ka to ye.

3. Bõe yĩng tɩ yaa a Zeova bal n segd n yɩ yĩngr la tẽng naaba?

³ A Zeova n segd n yɩ yĩngr la tẽng naaba, bala yẽ la Pãng-sẽn-ka-to soaba la Naanda. (1 Kib. 29:11; Tʋʋ. 4:24) Bõn-makr pʋgẽ, tʋm-tʋmd a Zã yãa a Zeezi na-rɩt-n-taas 144000 sẽn gomd ne a Zeova n yetẽ yaa: “Tõnd Zu-soab la d Wẽnnaam, yãmb n zems tɩ reeg ziiri, la waoogre, la pãnga. Bala, yãmb n naan bũmb fãa, la yaa yãmb daab yĩng la y naan-b tɩ b beẽ.” (Vẽn. 4:11) Sẽn yaa a Zeova n naan bũmb fãa wã, yaa vẽeneg tɩ yaa yẽ n segd n soog malɛgsã la ninsaalbã, n yɩ b naaba.

4. Bõe yĩng tɩ d sẽn tõe n yãk d toorẽ yamã pa kõt-d sor tɩ d kɩɩs a Zeova?

⁴ A Sʋɩtãan pa naan baa fʋɩ. Rẽnd a pa tar sor n na n yɩ yĩngr la tẽng naab ye. Yẽ ne d yaab a Ãdem la a Awa sẽn kɩɩs a Zeova, n pa sak a naamã yaa bũmb sẽn pa segde. (Yel. 20:24) Yaa sɩd t’a Zeova naana malɛgsã ne ninsaalbã tɩ b tõe n yãk b toorẽ yam. La rẽ pa kõt-b sor tɩ b zãgs a naamã ye. D sẽn tõe n yãk d toorẽ yamã kɩtame tɩ d yãkd sẽn noom tõndo, la d sẽn dat n maanega, la pa kõt-d sor tɩ d kɩɩs d naandã ye. Hakɩɩka, ned sã n kɩɩs a Zeova, a yãka a toorẽ yam, la pa zems ye. Yaa tɩlɛ tɩ d sak t’a Zeova yɩ d naaba, n wilgd-d sore.

5. Bõe yĩng tɩ d tõe n kɩs sɩd t’a Zeova yam-yãkr fãa yaa tɩrga?

⁵ Bũmb a to me n kɩt tɩ yaa a Zeova n segd n yɩ yĩngr la tẽng naaba. A rɩta a naamã ne tɩrlem wakat fãa. A yeelame tɩ yẽ ‘tʋmda ne nonglem la tɩrlem ne zemsg dũniyã zugu,’ la tɩ ‘yaa bõn-kãens n noom yẽ.’ (Zer. 9:23) A Zeova pa teeg ninsaalbã sẽn yiis noy ninsã n na n bãng sẽn segd la sẽn pa segd n bak ye. A tɩrlmã sẽn ka to wã yĩnga, yẽ mengã n yiis noy sẽn segd la sẽn pa segdã wɛɛngẽ, tɩ ninsaalbã tog n tũ. Yɩɩn-gʋlsdã ra yeelame: “Yãmb naam geerã tilga tɩrlem ne zemsg zugu.” Rẽnd a Zeova noyã, a saglsã, la a yam-yãkr fãa yaa tɩrga. (Yɩɩn. 89:15; 119:128) A Sʋɩtãan yeelame t’a Zeova pa rɩt a naamã ne tɩrlem ye. La hal ne masã, yẽ mengã pa tõog tɩ tɩrlem zĩnd dũniyã zug ye.

6. Togs-y bũmb a ye sẽn kɩt tɩ yaa a Zeova n segd n yɩ yĩngr la tẽng naaba.

⁶ Bũmb a to yɛs n kɩt tɩ yaa a Zeova bal n segd n yɩ yĩngr la tẽng naaba. A tara yam la bãngr n tõe n ges ãndũniyã bũmba fãa yell sõma. Bũmb sẽn wilgd rẽ yaa a sẽn kõ a Biigã tõog t’a maag bãas logtoɛɛmbã meng sẽn pa tõog n tɩpã. (Mat. 4:23, 24; Mark 5:25-29) A Zeezi sẽn maanã yaa yel-soalem ne tõndo, la pa yel-soalem ne a Zeova ye. Bala, a mii ninsaal yĩngã wilã sẽn tʋmd to-to wã, tɩ bũmb sã n sãam bɩ a tõe n manege. A tõeeme tɩ ned sẽn maan kaalem vʋʋge. A tõe n gɩdga sabab-wẽns wala sob-kãsems la tẽn-digimdgu.

7. Bõe la dũniyã nebã pa tõe n maane, tɩ wilgdẽ tɩ b yamã pa kolg a Zeova?

⁷ Dũniyã sẽn yaa a Sʋɩtãan n so wã, a nebã baooda b sẽn na n maaneg tɩ zaba sa, tɩ laafɩ la bãan zĩnd tẽng fãa pʋgẽ, la tẽnsã ne taab sʋk n kongdẽ. A Zeova yamã ka to ye. Yẽ bal n tõe tɩ laafɩ zĩnd dũniyã gill zugu. (Eza. 2:3, 4; 54:13) Tõnd me tagsda wa tʋm-tʋmd a Polle. A ra goma a Zeova yell n yeel yaa: “B yamã ne b bãngrã zulma wʋsgo. Ned ka tõe n vees bãmb bʋʋdã soay n bãng ye, la ned ka tõe n wʋm bãmb so-tũudsã võor ye.”—Rom. 11:33.

8. A Zeova sẽn dɩt a naamã to-to wã wɛɛngẽ, bõe n noom yãmba?

⁸ Biiblã pa wilg bal tɩ yaa a Zeova n segd  n yɩ yĩngr la tẽng naab ye. A wilga bũmb ning sẽn kɩt t’a naamã sõmblem ka to wã. Wala makre, a Zeova rɩta a naamã ne nonglem. Sɩd me, a yaa “Wẽnnaam sẽn yaa nimbãan-zoɛta, la bark kõata,” a “sũur ka yikd tao-tao,” a yaa ‘nonglem soaba la a maand sɩda.’ (Yik. 34:6) D sã n tags woto fãa yelle, d sũur nooma wʋsg ne-a. Wẽnnaam nanda neb nins sẽn tũud-a wã, n waoogd-ba. A geta tõnd yell sõma, n yɩɩd tõnd sẽn get d mens yell to-to wã. A Zeova pa mongd sẽn sakd-b yẽ wã bõn-sõma wa a Sʋɩtãan sẽn da yeelã ye. A pʋd n tʋma a Bi-ribl sẽn ka to wã, t’a wa ki sẽn na yɩl tɩ d wa paam vɩɩm sẽn kõn sa.—Karm-y Yɩɩn-sõamyã 84:12; Rom-dãmb 8:32.

9. Bõe n wilgd tɩ tõnd ned kam fãa yembr-yembr yell paka a Zeova?

⁹ A Zeova nonga a nin-buiidã gilli, n get b yelle. La b ned kam fãa yembr-yembr yell pak-a lame. D tẽeg bũmb a sẽn maan pĩnd wẽndẽ wã tɩ wilgd rẽ. Na maan yʋʋm kobs-tã, a tũnuga ne bʋ-kaoodb n ges a nin-buiidã yell la a fãag-b b bɛɛbã nugẽ. La Wakat kãng me, a gesa pag a ye yʋʋr sẽn boond t’a Rut yelle. A Rut sak n basa a buudã la bũmb a taaba, n na n tɩ naag a Zeova nin-buiidã n tũ-a. A Zeova yãa a sẽn maanã, n ning-a barka, n sõng-a t’a paam sɩda la biiga. La pa rẽ bal ye. A Rut sã n wa vʋʋge, a na n bãngame tɩ Mesi wã yɩɩ yẽ yagenga. Mams-y n ges-y-yã a sũur sẽn na n yɩ noog to-to me, a sã n bãng t’a Zeova kɩtame tɩ b gʋls a kibarã tɩ be Biiblã pʋgẽ, n boond t’a Rut sebre!—Rut 4:13; Mat. 1:5, 16.

10. Bõe yĩng tɩ d tõe n yeel t’a Zeova pa na-toaaga?

¹⁰ A Zeova pa na-toaaga, a pa wẽgd neba. Neb nins sẽn sakd-a wã tara lohorem la sũ-noogo. (2 Kor. 3:17) Sɩd me, a Davɩɩd yeelame t’a Zeova “sẽn beẽ wã pida ne pãng la sũ-noogo.” (1 Kib. 16:7, 27) Yɩɩn-gʋlsd a Etan me yeelame: “Bark bee neb nins sẽn mi tɩ kaas n waoog yãmb a Sẽn-Ka-Saab zutu! Bãmb kẽnda yãmb a Sẽn-Ka-Saab vẽenemẽ wã. Bãmb tara sũ-noog daar fãa yãmb yʋʋrã yĩnga. Bãmb tõe n dooga b zug yãmb tɩrlmã yĩnga.”—Yɩɩn. 89:16, 17.

11. Bõe n tõe n sõng-d tɩ d maneg n kɩs sɩd t’a Zeova naamã sõmblem ka to?

¹¹ D sã n wae n bʋgsd a Zeova sẽn maand ninsaalbã neer to-to wã zugu, d na n maneg n kɩsa sɩd t’a naamã sõmblem ka to ye. D na n wa tagsda wa yɩɩn-gʋlsdã. A ra yeela a Zeova yaa: “Daar a yembr yãmb samandẽ wã, n são rasem tusr zĩig a to.” (Yɩɩn. 84:11) Woto pa lingd tõnd ye. Sẽn yaa a Zeova n naan tõndã, a mii sẽn yaa tɩlɛ ne-d sẽn na yɩl tɩ d paam sũ-noog hakɩɩka. A pa kõt tõnd sẽn yaa tɩlɛ wã bal ye. A kõtame tɩ zʋʋg rẽ. Bũmb nins fãa a sẽn yet tõnd tɩ d maanã yaa d neer yĩnga. Baa sã n wa yaa tɩlɛ tɩ d wõr d meng n tũ a sẽn yeele, d sã n tũ, d na n paama sũ-noogo.—Karm-y Ezayi 48:17.

12. Bõe n pʋd n kɩt tɩ d teend a Zeova naamã?

¹² Biiblã wilgame tɩ Kiristã naam sẽn na n kaoos yʋʋm tusrã poore, neb n na n kɩɩs a Zeova, n zãgs a naamã sẽn ka to wã. (Vẽn. 20:7, 8) Bõe n na n kɩt tɩ b maan woto? A Sʋɩtãan sã n yi bog-zulungã pʋgẽ, a na n le maka nebã belgr wa a sẽn minim n maandẽ wã. Tõe t’a na n datame tɩ b tẽ tɩ baa b sã n kɩɩs Wẽnnaam, b tõe n kell n vɩɩmda wakat sẽn kõn sa. La yaa ziri fasɩ. Bɩ d sok d meng yaa: ‘Mam na n tẽe a ziri wã bɩ?’ D sã n nong a Zeova ne d sũur fãa, n tũud-a d sẽn kɩs sɩd t’a rata d neere, la tɩ yaa yẽ bal n segd n yɩ yĩngr la tẽng naabã yĩnga, d pa na n tol n tẽ ziri a woto ye. D na n sakda yẽ a ye tãa naamã, bala a rɩta a naamã ne nonglem.

13. Bõe yĩng tɩ d tõe n yeel tɩ d sã n dɩkd a Zeova togs-n-taare, d teenda a naamã?

¹³ Wa d sẽn yã wã, a Zeova bal n segd n yɩ yĩngr la tẽng naaba. Rẽ n so tɩ d segd n teel a naamã ne d sũur fãa. D sã n maand sɩd ne a Zeova la d rɩkd a togs-n-taare, d wilgdame tɩ d teenda a naamã. Bõe me la d tõe n maan n teel a Zeova naamã? Yaa d sã n modgd bũmb fãa pʋgẽ n maand wa a sẽn datã. Woto, d wilgdame tɩ d sũur nooma ne a sẽn dɩt a naamã to-to wã.—Karm-y Efɛɛs-rãmb 5:1, 2.

14. Bõe la zak-soben-dãmbã la kãsem-dãmbã tõe n maan n dɩk a Zeova togs-n-taare?

¹⁴ Biiblã sõngame tɩ d bãng tɩ baa a Zeova sẽn yaa Zu-soabã, a maanda bũmba fãa ne nonglem. Zak-soben-dãmb nins sẽn nong a Zeova naamã rɩkda a togs-n-taare, n pa weoogd b zakã rãmb bɩ n dat tɩ b maan bũmb fãa wa bãmb sẽn datã ye. Tigingã yell gesg pʋgẽ, kãsem-dãmbã me maanda woto. Tʋm-tʋmd a Poll maana a sẽn tõe fãa n dɩk Wẽnnaam ne a Biigã togs-n-taare. (1 Kor. 11:1) A sã n da rat t’a taabã maan bũmb b sẽn segd n maane, a ra pa modgd-b wall a paoog-b ye. A ra sagend-b-la ne bʋgsem, tɩ b sak ne yamleoogo. (Rom. 12:1; Efɛ. 4:1; Fɩl. 8-10) Yaa woto la a Zeova maanda. Neb nins fãa sẽn teend a Zeova naamã, tɩ b sũur noom ne a sẽn dɩt a naamã to-to wã rɩkda a togs-n-taare.

15. D sã n sakd neb nins a Zeova sẽn bobl zu-sobend zakã pʋgẽ, la a sẽn yãk-b rãmb tɩ b yaa yel-gɛtbã, wilgdame tɩ d teenda a naamã. Bõe yĩnga?

¹⁵ D sã n sakd neb nins a Zeova sẽn bobl zu-sobend zakã pʋgẽ, la a sẽn yãk-b rãmb tɩ b yaa yel-gɛtbã, wilgdame me tɩ d teenda a naamã. Baa b sã n wa rɩk sard tɩ d pa wʋmd a võor wall pa noom-do, d tũudame, bala wilgdame tɩ d sakda a Zeova sẽn sigl yɛlã to-to wã. Yaa sɩd tɩ pa woto la dũniyã neb maand ye. La sẽn  sakd-b a Zeova naamã manesem segd n yɩɩ woto. (Efɛ. 5:22, 23; 6:1-3; Ebre. 13:17) D sã n maand woto, nafd-d lame, bala a Zeova rata tõnd neere.

16. Bõe la d tõe n maane, tɩ d yam-yãkr fãa wilg tɩ d teenda Wẽnnaam naamã?

¹⁶ D yam-yãkr fãa pʋgẽ, d tõe n wilgame me tɩ d teenda Wẽnnaam naamã sẽn ka to wã. Pa bũmb fãa pʋgẽ la a Zeova kõ noy takɩ d sẽn segd n tũ ye. La a wilga tõnd a sẽn nonge, la a sẽn kisi, tɩ tõe n sõng-d tɩ d bãng d sẽn segd n maaneg bũmb fãa pʋgẽ. Wala makre, a pa sõdg fut nins sẽn segd la sẽn pa segd ne kiris-nedã ye. La a wilga Biiblã pʋgẽ t’a ratame tɩ d manegd d mens sõma, la ne sik-m-meng wa sẽn zems ne neb sẽn yaa a kaset rãmba. (1 Tɩm. 2:9, 10) A ratame me tɩ bũmb fãa pʋgẽ bɩ d reng n tags d yam-yãkrã sẽn tõe n maan d taabã bũmb ninga. (1 Kor. 10:31-33) Bũmb fãa pʋgẽ, d sã n modgd n maand a Zeova sẽn date, n pa maand sẽn noom tõndã bala, wilgdame tɩ d teenda a naamã, la tɩ d sũur nooma ne a sẽn dɩt a naamã to-to wã.

17, 18. Bõe la sẽn kẽ-b kãadmã tõe n maane, tɩ wilg tɩ b teenda a Zeova naamã?

¹⁷ La sẽn kẽ-b kãadmã yẽ? Bõe la b tõe n maan tɩ wilg tɩ b teenda a Zeova naamã? Tõe tɩ kẽer kãadem pa wa b sẽn da magã ye. Sãnda meng tara zu-loees b zĩid-n-taarã pʋgẽ. Sã n yaa woto, yɩta sõma tɩ b bʋgs a Zeova manesem sẽn yɩ to-to ne Israyɛll buudã, n dɩk yam. A Zeova ra yeelame tɩ Israyɛll buudã yaa wa yẽ paga. (Eza. 54:5; 62:4) La b pa yɩ wa pag sẽn sakd a sɩd ye. Naoor wʋsgo, b sãama a Zeova sũuri. Baa ne rẽ, a Zeova pa yɩ tao-tao n bas-b ye. A kõ-b-la sugr naoor ka tɛka, n pa sãam kaool ning a sẽn da maan ne-bã ye. (Karm-y Yɩɩn-sõamyã 106:43-45.) A Zeova sẽn pa basd a sẽn nong-b rãmbã pa kɩt tɩ tõnd maneg n nong-a sɩda?

¹⁸ Kiris-neb nins sẽn kẽ kãadem, n nong a Zeova wã modgdame n dɩkd a togs-n-taare. Baa b sã n tar zu-loees b zĩid-n-taarã pʋgẽ, b pa na n kɩɩs Biiblã noyã, n bao soay n paam n kao b kãadmã ye. B tẽegdame t’a Zeova nifẽ, yi-kãadmã daar pʋlengã pa reem yelle, la t’a ratame tɩ pag ne a sɩd zĩnd ne taab b yõor tɛka. Biiblã wilgame tɩ yaa pag wall rao sã n yo la a to wã tõe n kao b kãadmã. Wakat kãnga, a tara sor me n na n kẽ kãadem ne ned a to. (Mat. 19:5, 6, 9) Sẽn tar-b zu-loees b kãadmã pʋgẽ wã sã n maand b sẽn tõe fãa sẽn na yɩl tɩ b zĩid-n-taarã yɩ noogo, wilgdame tɩ b teenda a Zeova naamã.

19. D sã n wa tudgi, bõe la d segd n maane?

¹⁹ D fãa sẽn yaa neb sẽn pa zems zãngã, d na n mi n maana bũmb tɩ sãam a Zeova sũuri. A Zeova sẽn mi rẽ la a nong tõndã, a kɩtame t’a Biigã wa ki tɩ yɩ maoong tõnd yĩnga. Woto wã, d sã n wa tudg bɩ d kos a Zeova t’a kõ-d sugri. (1 Zã 2:1, 2) Pa segd tɩ d ningd d meng taal n pa satẽ ye. Yɩta sõma tɩ d bao n dɩk yam d kongrã pʋgẽ. D sã n kell n maan sɩd ne a Zeova, a na n kõ-d-la sugr la a sõng-d tɩ d sũurã sigi, la a sõng-d me tɩ d sã n wa be yell a woto buud pʋgẽ nindaar bɩ d tõog n maan sẽn segde.—Yɩɩn. 103:3.

20. Bõe yĩng tɩ yaa masã meng la d segd n wilg tɩ d teenda a Zeova naamã?

²⁰ Dũni-paalgã pʋgẽ, nebã fãa na n saka a Zeova naamã la b zãms a noyã sẽn yaa tɩrsã. (Eza. 11:9) La masã menga, d zoe n bãngda bũmb wʋsg a Zeova zugu, a sẽn nong la a sẽn kisi. Ka la bilfu, a Zeova naamã poorẽ no-koeemdã na n welgame. Rẽnd yaa masã meng la d segd n sak a Zeova, n maan sɩd ne-a la d maan d sẽn tõe fãa n dɩk a togs-n-taar bũmb fãa pʋgẽ, tɩ wilg tɩ d teenda a naamã sẽn ka to wã.