A ZEOVA KASET RÃMB nins sẽn tɩ sõngd n moond koɛɛgã zĩis koe-moondb sẽn pa waoogã wʋsg yaa saam-bi-pogs sẽn pa kẽ kãadem. Kẽer sẽn be tẽn-zẽng n moond koɛɛgã kaoosa wʋsgo. Bõe n sõng-b tɩ b wa tõog n yik n tɩ be tẽn-zẽnga? Bõe la b bãng b sẽn beẽ wã? Bark bʋs la b paam-yã? Tõnd sõsa ne bãmb b wãna. D kɩsa sɩd tɩ b sẽn yeelã na n sõnga saam-bi-pogs nins sẽn nan pa kẽ kãadem, n dat ne b sũy fãa n paam sũ-noog koe-moonegã pʋgẽ n paasã. La Wẽnnaam nin-buiidã fãa tõe n dɩka yam b mak-sõngã pʋgẽ.

Y sã n nan pa kẽ kãadem, tõe tɩ y sokda y meng y sã n na n tõogame n tɩ yɩ so-pakd tẽn-zẽnga. A Anita sẽn tar yʋʋm 75 wã ra tagsdame t’a pa na n tõog ye. A sẽn wa n tar yʋʋm 18, a sɩnga so-pakrã tʋʋmd Ãngeletɛɛr soolmẽ wã. A yeelame: “Mam da nong n sõngda nebã tɩ b bãngd a Zeova, la m da zɩ n tags tɩ m na n tõog n tɩ moona koɛɛgã tẽn-zẽng ye. Mam da zɩ n zãms buud-gomd a to ye. M da kɩsa sɩd me tɩ m pʋd n pa tõe n zãms ye. Rẽ n so tɩ b sẽn wa n bool maam Gileyaad lekollẽ wã, mam pɛlengã yɩkame. B sẽn bool ned sẽn pa zem baa fʋɩ wa maam lekollẽ wã, sɩd ling-m lame. La mam yeela m meng yaa: ‘A Zeova sã n yet tɩ m tõeeme, m na mak n ges wɛ.’ Yʋʋm 50 la zak la woto rũndã. Hal ne masã, mam yaa misioneer Zapõ soolmẽ wã.” A Anita paasame: “Ne sũ-noogo, mam mi n yeta saam-bi-pogs nins sẽn nan yaa kom-bɩɩsã yaa: ‘Wʋk-y y teedo, n wa naag maam tʋʋmd ning sẽn tar yõod n yɩɩdã pʋgẽ.’ Mam sũur noomame, bala wʋsg maana woto.”

Saam-bi-pogs nins sẽn tɩ moond koɛɛgã tẽn-zẽmsã wʋsg ra zoeta rabeem sɩngrẽ wã, n pa rat n kẽng ye. Bõe n sõng-b tɩ b paam raoodo?

A Maureen sẽn tar yʋʋm 64 yeelame: “Mam nengã sẽn wa n pukã, m da rata ne m sũur fãa n yɩ ned sẽn sõngd a taaba, tɩ m vɩɩmã tall barka.” A sẽn wa n ta yʋʋm 20, a yikame n kẽng Kebɛk, Kanada soolmẽ wã, bala b ra rata so-pakdb wʋsg beenẽ. A Maureen paasame: “B wa n boola maam Gileyaad lekollẽ wã. La m da yɛɛsda b na n wa tʋm maam zĩig m sẽn pa mi, tɩ m tɩ be be tɩ m zo-rãmbã ka be yambẽ wã. Sẽn paase, m baaba ra pa keeme, tɩ mam da pa rat n loog tɩ m ma yõd n ges a yell a yembr ye. Yʋnd wʋsgo,  mam pʋʋsa a Zeova yel-kãensã poorẽ ne nintãm. Mam sẽn wa n togs m doagdbã yɛl nins poorẽ m sẽn maand yɩɩrã, b sagla maam tɩ m sak n kẽng lekollã. Mam leb n da neeme tɩ tõnd tigingã neb sõngda m doagdbã wʋsgo. Mam da getame tɩ woto fãa yaa a Zeova nugu. Kɩtame tɩ mam bas m yam t’a na n gesa ma-me yelle. Rẽ fãa kenga m daoodo, tɩ m sak n na n kẽnge.” Yʋʋmd 1979 wã, a Maureen lebga misioneere, n zĩnd Afirikdeluwɛst yʋʋm 30 la zaka. Rũndã-rũndã, a bee Kanada n get a ma wã yelle, la a yaa zall so-pakda. A lebg n tẽega yẽ sẽn zĩnd sãand n moon koɛɛgã, n yeele: “Wakat fãa, a Zeova gesame tɩ m paam sẽn yaa tɩlɛ wã, n kõ-m bũmb fãa tɩ zems a wakate.”

A Wendy sẽn tar yʋʋm 65 wã sɩnga so-pakrã tʋʋmd Ostrali soolmẽ wã t’a ra ket n yaa bi-bɩɩga. Ad a sẽn yeele: “Mam da yaa yãn-zoɛt meng-menga, tɩ yɩl n gom ne ned m sẽn pa mi pa nana ye. La so-pakrã sõnga maam tɩ m tõe n sõs ne neb buud toor-toore, tɩ rẽ paas m daoodã. Yãn-zoeerã wa n pa le yaa m zu-loɛɛg ye. Bilf-bilfã, so-pakrã sõnga maam tɩ m teegd a Zeova ne m sũur fãa, tɩ rẽ kɩt tɩ kẽng tẽn-zẽng n tɩ moon koɛɛgã ra pa le kẽesd-m rabeem ye. Saam-bi-poak a ye sẽn da pa kẽ kãadem n wa n yeel maam tɩ m wa tɩ d kẽng Zapõ n tɩ zĩnd be kiis a tãab n moon koɛɛgã. A ra yɩɩ misioneer Zapõ n maan yʋʋm 30 la zaka. Mam sẽn naag-a n moon koɛɛgã woto wã kɩtame tɩ m da rat ne m sũur fãa n kẽng tẽn-zẽng n tɩ moon koɛɛgã.” Yʋʋmd 1986, a Wendy yikame n kẽng Vanuatu sẽn yaa koom sʋk tẽngã. Be ne Ostrali yaa kɩlo 1770.

A Wendy keta Vanuatu, n tʋmd siglgã sɛb lebgr zĩigẽ. A yeelame: “Sẽn kõt maam sũ-noog n tɩ yɩɩd yaa m sẽn ne b sẽn lugund koe-moondb sula, la tigims tẽngã zĩis toɛy-toɛyã. M sẽn paam n naag n tʋm a Zeova tʋʋmã koom sʋk tẽn-kãensã pʋsẽ wã sɩd yaa zu-zẽkr sẽn pa tõe n bãng n sɩfe.”

A Kumiko sẽn tar yʋʋm 65 wã ra yaa wakat fãa so-pakd Zapõ soolmẽ wã. Saam-bi-poak ning sẽn da yaa a tũud-n-taag so-pakrã pʋgẽ wã wa n yeel-a lame t’a wa tɩ b kẽng Nepall n tɩ moon koɛɛgã. A Kumiko yeelame: “A talla maam pẽdgre, la wakat fãa m da zãgsdame. Nepall kẽndã sẽn da na n kɩt tɩ m zãms buud-gomd a to, la m mao n minim beenẽ vɩɩmã ra kẽesda maam rabeem. Yɩl n paam ligd so-toakã yĩng me ra yaa zu-loɛɛga. Mam sẽn wa n tagsd woto fãa yellã, m maana agsɩdã ne m montɛɛrã, tɩ yɩ tɩlɛ tɩ b tall maam n kẽng logtor yiri. Mam sẽn wa n be logtor yirã, mam soka m meng yaa: ‘Ãnd n mi sẽn na n paam maam yɛsa? M tõe n lʋɩɩ bã-kɛgenga, tɩ  kɩt tɩ m pa tõog n tɩ moon koɛɛgã tẽn-zẽng ye. La rẽ yĩnga, m pa tõe n kẽng baa yaa yʋʋmde?’ M pʋʋsa a Zeova ne m sũur fãa n kos-a t’a sõng-ma.” A Kumiko sẽn yi logtor yirã poore, a kẽnga Nepalle, n tɩ gilg n ges tẽngã. Rẽ zugẽ, yẽ ne a tũud-n-taagã wʋka b teed n kẽng be.

A Kumiko lebg n tẽega yẽ sẽn zĩnd Nepall na maan yʋʋm piigã, n yeele: “Mam sẽn da maand yɩɩr bũmb nins yĩngã fãa saame, wa mog-miuugã sẽn welg tɩ Israyɛll nebã paam n loogã. M sũur nooma m sẽn tɩ moond koɛɛgã zĩig koe-moondb sẽn pa waoogã. Zak a ye neb la m da zãmsd Biiblã, tɩ b yags a nu bɩ a yoob nong n wat n kelgdẽ. Baa kom-bõones n mi n kos maam seb-vãad sẽn gomd Biiblã yelle. Mam sẽn paam n moond koɛɛgã zĩig nebã sẽn kelgd sõma wã noom-m-la hal wʋsgo.”

Yaa vẽeneg tɩ saam-bi-pogs nins sẽn tɩ moon koɛɛgã tẽn-zẽmsã paama zu-loeese. Bõe n sõng-ba?

A Diane sẽn yit Kanada wã yeelame: “Bũmb sẽn da namsd maam sɩngrẽ wã, yaa m sẽn zãag ne m zakã rãmbã.” A tara yʋʋm 62. A yɩɩ misioneer Kodivoaar n maan yʋʋm 20. A paasame: “Mam kosa a Zeova t’a sõng-m tɩ m nong m sẽn be zĩig ningã neba. Saam-biig a Jack Redford sẽn yɩ tõnd karen-saamb Gileyaad lekollẽ wã ra yeela tõnd tɩ d sã n ta zĩig ning b sẽn na n tʋm-dã, sɩngrẽ wã, tõe tɩ bũmb toor-toor n na n ling-du, wall pʋd n sãam d sũuri, sẽn yɩɩd fãa, d sã n yã naongã sẽn namsd nebã to-to wã. La a paasame: ‘Ra ges-y nebã naongã ye. Sẽn tog n pak yãmbã yaa nebã. Get-y b nensã, n bãng koɛɛgã sẽn kẽed-b to-to wã.’ Mam tũu a saglgã. Sɩd sõng-m-la wʋsgo! Mam sã n moond Rĩungã koɛɛg sẽn kengd raoodã, la m get kɛlgdbã nense, m sɩd neeme tɩ kengda b pɛlga!” Bõe me n sõng a Diane t’a tõog n zĩnd tẽn-zẽng n moon koɛɛgã? Ad a sẽn yeele: “Mam yõga zood ne neb nins m sẽn da zãmsd Biiblã. Kɩtame tɩ m sã n ne kẽer sẽn modgd hal n wa lebg a Zeova Kaset rãmbã, yaa sũ-no-kãsenga. Zĩig ning b sẽn tʋm maam tɩ m tɩ moonã lebga wa m ba-yiri. Mam paama ma-rãmba, ba-rãmba, ba-bi-rap la ba-bi-pogse, wa a Zeezi sẽn yeelã.”—Mark 10:29, 30.

A Anne sẽn tar yʋʋm 46 bee Aazi soolmã tẽng a ye pʋgẽ. B gɩdga tõnd koe-moonegã beenẽ. A yeelame: “Yʋʋm nins fãa mam sẽn zĩnd zĩis toɛy-toɛy n moon koɛɛgã, m vɩɩmda ne saam-bi-pogs sẽn yaa buud a taab neba, tɩ b zʋgã la minimdã ne maam pa yembr ye. Rẽ kɩtame tɩ d moor mi n yõsge, wall nina mi n sãam a to sũuri. Sã n wa yaa woto, mam modgdame  n bao n bãng b buudã minimdã sõma. Mam maoome me n lebg wʋmd n paase, la m maneg n nong m taabã. Mam sũur yaa noogo, bala, m modgrã woma biisi. Kɩtame tɩ m paam zo-rãmb hakɩɩka, tɩ sõng-m tɩ m kell n wɩng ne koɛɛgã moonego.”

A Ute sẽn yit Alemayn wã tara yʋʋm 53. Yʋʋmd 1993, b tʋm-a-la Madagaskaar t’a na n tɩ yɩ misioneere. Ad a sẽn yeele: “Sɩngrẽ wã, tẽngã buud-gomd zãmsg pa yɩ nana ye. Sẽn paase, m da segd n maoo ne bãas rẽgdã sẽn wat ne, la pali wã. La m paama neb wʋsg sõngre. Saam-bi-pogs ne b kamba, n paas neb nins m sẽn zãmsd Biiblã sõnga maam tɩ m bãng buud-gomdã sõma. Mam wa n lʋɩɩ bãaga, tɩ m tũud-n-taagã ges m yell sõma. La yaa a Zeova n sõng maam n tɩ yɩɩda. Mam da pelgda m pʋg n pʋʋsd-a n togsd m zu-loeesã. Wakat ninga, maanda rasem a wãn wall kiisi, t’a yaool n deeg m kosgã, la m maanda sũ-mare. A Zeova welga mam zu-loees buud toor-toore.” Yʋʋm 23 la woto a Ute sẽn be Madagaskaare.

Wa d tẽed-n-taas a taab sẽn tɩ sõngd zĩis nins koe-moondbã sẽn pa waoogã, saam-bi-pogs nins sẽn tɩ be tẽn-zẽms n moond koɛɛgã wae n gomda bark nins b sẽn paamdã yelle. Kẽer la bʋse?

A Heidi sẽn yit Alemayn wã tara yʋʋm 73. Yʋʋmd 1968 wã tɛka, a yaa misioneer Kodivoaare. Ad a sẽn yeele: “Bũmb ning sẽn kõt maam sũ-noog n tɩ yɩɩda, yaa m sẽn ne tɩ neb nins m sẽn zãms Biiblã tɩ b lebg kiris-nebã ket n ‘kẽnda sɩdã pʋgẽ’ wã. Kẽer yaa so-pakdba, tɩ sãnda yaa kãsem-dãmba. Wʋsg boonda maam tɩ b ma wall b yaaba. A ye sẽn yaa kãsem-soaba, n paas a pagã la a kamb a tãabã geta maam wa b zakã neda. Rẽnd a Zeova kõo maam biiga, bi-paga, la yagense.”—3 Zã 4.

A Karen sẽn yit Kanada wã tara yʋʋm 72. A yɩɩ misioneer Afirikdeluwɛst n maan yʋʋm 20. A yeelame: “Misioneeremdã sõnga maam tɩ m bɩɩs mong-m-meng yam, nonglem la sũ-mare. Sẽn paase, m sẽn zĩnd ne tʋmd-n-taas sẽn yaa buud toɛy-toɛy nebã kɩtame tɩ m bãng bũmb wʋsgo. M bãngame tɩ neb tagsg tõe n yaa toor-toor bõn-yɛng maaneg pʋgẽ, tɩ fãa yaool n yaa sõma. M sẽn tar zo-rãmb hakɩɩk dũniyã gill zug masã wã me yaa bark tɛkẽ! D yɛlã toeemame. D pa le be zĩ-yɛng ne taab ye. Baa ne rẽ, d ket n yaa zoodo.”

A Margaret sẽn yit Ãngeletɛɛrã tara yʋʋm 79. A yɩɩ misioneer Lawos. Ad a sẽn yeele: “Mam sẽn tɩ moon koɛɛgã tẽn-zẽngã, kɩtame tɩ m maneg n bãng a Zeova sẽn sõngd buud toɛy-toɛyã neb to-to tɩ b wat a siglgã pʋgẽ. Woto kenga mam tẽebã hal wʋsgo. Kɩtame tɩ m kɩs sɩd ne m sũur fãa tɩ yaa a Zeova n wilgd a siglgã sore, la t’a raabã fãa na n pidsame.”

Hakɩɩka, saam-bi-pogs nins sẽn pa kẽ kãadem, n tɩ moond koɛɛgã tẽn-zẽmsã tʋmda wʋsgo. Segdame tɩ d pẽgd-ba. (Bʋ. 11:40) Sẽn paas menga, b sõorã tara paasgo. (Yɩɩn. 68:12) Yãmb tõe n toeema bũmb kẽer y vɩɩmã pʋgẽ, n tõog n dɩk b naoor bɩ? Y sã n maan woto, yaa vẽeneg tɩ y na n bãngame t’a Zeova “yaa noogo!”—Yɩɩn. 34:9.