A Dɛlfin, pag ning yell d sẽn da gomã yeelame t’a zu-loeesã wa n kɩtame t’a tolg n dat bal n yũud rãamã tɩ loogdẽ. Biiblã pa gɩdg rãam yũubu, la a keoogda tõnd n yetẽ: “Ra tũ sẽn yũud-b rãam n tɩgdã . . . ye.” (Yel-bũnã 23:20) Rã-tɩgr wata ne bãase, sãamda zoodo, la zak neb zems-n-taare. Yʋʋmd fãa, rãamã kʋʋgda neb milyõ-rãmb yõya. Nebã sã n da tũud Biiblã sẽn yetã, b ra na n gila zu-loe-kãensã.

A Dɛlfin tũu Biiblã saglsã. A yeelame: “M wa n bãngame tɩ rãamã pa sõngd tɩ m yɩɩrã sa ye. M tũu saglg sẽn be Filip-rãmb 4:6, 7. Be, b yeelame: ‘Da maan-y yɩɩr ne bũmb baa fʋɩ ye. La bũmba fãa pʋga, pʋʋs-y Wẽnnaam n . . . wilg bũmb nins yãmb sẽn datã.’ Yʋng sã n ta, tɩ m tagsa wã lebg wʋsgo, tɩ yɩɩrã paamd pãnga, m yõkda a Zeova sɛɛga. M togsd-a-la sẽn be m sũurẽ wã fãa, rat n yeel tɩ sẽn yikd m sũurã, sẽn namsd-m n tɩ yɩɩdã, la yɛl nins sẽn wõnd ka tɩɩmã, n kos-a t’a sõng-m tɩ m tõog n bas tagsa nins sẽn pa manegd-mã. Beoogã sã n vẽege, m maanda m sẽn tõe fãa, n da le tags bõn-kãens yell ye. Wõnda m sẽn maand woto wã kɩtame tɩ m wae n tagsd m sẽn tarã yelle, n pa tagsd m sẽn pa tarã ye. M yãka yam n pa na n le yũ rãam ye. M paama bãan hakɩɩk m sũurã pʋgẽ, n pa rat n maan yaal-yaal n wa kong rẽ ye.”

Yoob yaa yel-wẽnd sẽn wat ne sũ-sãams la zu-loees wʋsgo. La Biiblã saglsã tõe n sõnga ned t’a bãng n gil bũmb nins sẽn tõe n wa kɩt tɩ ned yo. Wala makre, pornogarfi wã, la kẽer sẽn mi n maand wa b rooda ned n yaool n pa rat n kẽ kãadem ne-a wã. Bi-bɩɩg a ye yʋʋr sẽn boond t’a Sãmwɛll yeelame: “Tall rolsem manesem ne pag ra pa toog ne maam ye. M yamã ra tõeeme n pa kẽ nina, tɩ yaool n wõnd a nonga maam. Woto ra kɩtame tɩ m dat n maan wa ma-me nong-a lame.” A yeelame tɩ b rõda yẽ naoor wʋsg t’a rooda pagba, t’a yaool n da pa tags n tees be ye. Wa n kɩtame t’a tolg n yãk yam n na n sɩd maand wa a rood-b lame. La wa n sãamda a sũuri. Ad a sẽn yeele: “Pa sõma ye. Bala, lebgda f meng yell bal n pak-fo.”

Daar a ye, a Sãmwɛll kẽ jw.org pʋgẽ, n karem bũmb b sẽn ning be kom-bɩɩsã yĩnga. Kɩtame t’a tags Yel-bũn 20:11 wã yelle. Be, b yeelame tɩ “yaa biig tʋʋmdẽ la b tõe n bãng a yel-manesmã sã n na n yɩɩ sõama la tɩrga.” Wãn to la sõng-a? A bãngame t’a sẽn da maandã pa sõma, pa tɩrga. Ad a sẽn yeel masã: “M bãngame me tɩ bi-bɩɩg sã n maand woto, a bɩɩsda zʋg-wẽns sẽn na n wa kɩt t’a pa yɩ sɩd-sõng ye. M sɩngame n bʋgsd m sẽn na n wa kẽ kãadem, tɩ m pagã neẽ tɩ m maand wa m rooda pag a to, la rẽ sẽn na n sãam a sũurã to-to wã. Kɩtame tɩ m bãng tɩ yaa minung sẽn yaa wẽnga. Sẽn yaa nana wã pa rat n yeel tɩ yaa sõma ye.” A Sãmwɛll toeemame. A sẽn pa le maand wa a rooda pagbã sõng-a lame me t’a pa yo ye.

A Ãntoniyo yẽ ra tara minun-wẽng sẽn tõe tɩ ned yo nana-nana. A ra yaa pornogarfi wã yamba. A kẽe kãadem, n nong a pagã sõma. Baa ne rẽ, pornogarfi wã gesg wa n lebga a minungu, hal n da paamd pãnga. A yeelame t’a ra bʋgsda 1 Pɩyɛɛr 5:8 wã zugu, la tɩ rẽ sõng-a-la wʋsgo. Be, b yetame: “Yɩ-y neb sẽn tar yam! Gũus-y-yã! Yãmb bɛyã sẽn ya a Sʋtãan gõodame n kelemd wa gɩgemde, n baood a sẽn tõe n paam a soab n sãame.” A yeelame: “Dũni-kãngã pʋgẽ, pornogarfi wã fot-rãmbã pida zĩig fãa. Rẽ me, f sã n yã, paada f yamẽ wã. Vɛrse-kãngã sõnga maam tɩ m tags n bãng sẽn yaa a soab ning n bẽt nebã woto wã. M da segd n tẽegda tao-tao tɩ pornogarfi wã fot-rãmbã yaa a Sʋɩtãan tʋʋm-teedo. Masã, m bãngame tɩ yaa a Zeova bal n tõe n sõng-m tɩ m kell n yɩ ‘ned sẽn tar yam la sẽn gũusdi,’ n tõog n mao ne bõn-kãensã sẽn rẽgemd m sũurã, m yamã, la tõe n sãam m kãadmã.” A Ãntoniyo paama sõngr ning a sẽn da ratã. A wa n tõog n basa a minun-wẽngã. Kɩtame t’a gil zu-loe-bɛda.

Hakɩɩka, Biiblã saglsã tõe n sõnga tõnd tɩ d gil zu-loe-bɛda. La d zu-loɛɛg ning sã n zoe n paama pãnga, t’a welgr lebg toogo? Bɩ d ges Biiblã sẽn tõe n sõng-d to-to tɩ d welg zu-loees a woto buudã.