1. Bõe yĩng t’a Zeova Kaset rãmbã yaa nin-buiid sẽn tar sũ-noogo? (Ges-y fotã sẽn be yĩngrã.)

A ZEOVA KASET RÃMBÃ yaa nin-buiid sẽn tar sũ-noogo. B sã n tigim taaba, yaa b tigissã bɩ b tigis-kãsemsã zĩigẽ, wall yaa sẽn na n maan sũ-noogo, yaa sõsg la laad bala. Bõe yĩng tɩ b tar sũ-noog woto? Sẽn yɩɩd fãa, yaa b sẽn mi a Zeova, Wẽnnaam ning sẽn yaa “sũ-noog buud fãa yẽgrã,” n tũud-a la b modgd n dɩkd a togs-n-taarã. (1 Tɩm. 1:11, Sebr Sõngo; Yɩɩn. 16:11) Sẽn mik t’a Zeova yaa “sũ-noog buud fãa yẽgrã,” a ratame tɩ tõnd me tall sũ-noogo. Rẽ n so t’a maand bũmb ka tɛk sẽn kɩt tɩ d tõe n paam sũ-noogo.—Tõo. 12:7; Koɛ. 3:12, 13.

2, 3. a) B sã n yeel tɩ ned tara sũ-noogo, rat n yeelame tɩ bõe? b) Bõe yĩng tɩ yɩl n tall sũ-noog rũndã-rũndã pa nana?

² La yãmb mengã yẽ? Y tara sũ-noog bɩ? Y tõeeme tɩ y sũ-noogã paas bɩ? Ned sẽn tar sũ-noog yaa ned sũur sẽn noom ne a mengã, ne a vɩɩmã, t’a sũ-noogã me yaa wakat fãa yĩnga. Biiblã wilgdame tɩ yaa sẽn tar-b zood sõma ne a Zeova, t’a ningd-b barkã bal n tõe n paam sũ-noog hakɩɩkã. La vɩɩmã sẽn yaa to-to rũndã-rũndã wã kɩtame tɩ yɩl n tall sũ-noog pa nana ye. Bõe yĩng tɩ d yet woto?

 ³ Bũmb wʋsg n wat ne yɩɩre, n tõe n kɩt tɩ lebg toog tɩ d kell n tall sũ-noogo. Wala makre, ned d sẽn nong wʋsg sã n maan kaalem, b sã n yiis d ned tigingã pʋgẽ, d kãadem sã n sãame, d tʋʋm sã n sãame, d zakã pʋgẽ sã n yaa zab wakat fãa, d tʋmd-n-taasã bɩ d karen-bi-taasã sã n tar-d n yaandẽ, b sã n namsd tõnd wall b pʋd n kẽes-d bãens-roog d tũudmã yĩnga. D yĩnsã keelem sã n boogdẽ, d sã n bẽed bãag sẽn pa sate, pa rẽ bɩ deprɛsɩyõ, rẽ me kɩtdame tɩ yaa toog tɩ d tall sũ-noogo. La d tẽeg t’a Zeezi Kirist sẽn yaa bark bɩ sũ-noog soaba, n yaa a “yembr tãa n so naamã” nonga nebã belsgo, la a rat n sõng-b tɩ b paam sũ-noogo. (1 Tɩm. 6:15; Mat. 11:28-30) A sẽn na n sõs ne nebã tãngã zugã, a sõdga zʋg-sõma sẽn tõe n sõng-d tɩ d tall sũ-noogo, baa ne d sẽn vɩ a Sʋɩtãan dũniyã pʋgẽ wã.

4, 5. D sã n dat n paam sũ-noogo, la d kell n yɩ sũ-noog soaba, bõe n yaa tɩlɛ?

⁴ A Zeezi sẽn deng n sõdg bũmb ning pipi wã tara yõod hal wʋsgo. A yeelame yaa: “Sũ-noog rãmb la neb nins sẽn mi tɩ b segd n baoa Wẽnnaamã, bala saasẽ Rĩungã yaa bãmb n so.” (Mat. 5:3, MN) La bõe n na n wilg tɩ d miime tɩ d segd n baoo Wẽnnaam? Yaa d sẽn na n modgd n na n bãng Wẽnnaam sõma, la d sak n deeg tɩ bũmb fãa pʋgẽ, yaa tɩlɛ tɩ d paam t’a sõng-d la a wilg-d sore. Dẽnd yaa d sẽn na n zãmsd Biiblã, n tũud Wẽnnaam sẽn yetã, la d lʋɩɩsd tũudmã yɛl taoore. Woto, d sũ-noogã na n paasdame. D na n maneg n kɩsa sɩd zãng tɩ bũmb nins Wẽnnaam sẽn pʋlmã na n pidsa ka la bilfu. Pʋlem-nood nins fãa sẽn be Biiblã pʋgẽ tɩ d “gũud” ne sũ-noogã na n kengda d raoodo, tɩ d tõogd toog baa ne zu-loeesã.—Tit 2:13.

⁵ D sã n dat sũ-noog sẽn pa sate, yaa tɩlɛ tɩ d modg tɩ tõnd ne a Zeova zoodã tar paasgo. Tʋm-tʋmd a Poll ra yeelame: “Maan-y sũ-noog daar fãa Zu-soabã tũudum pʋgẽ. Mam leb n yetame, maan-y sũ-noogo.” (Fili. 4:4) Sẽn na yɩl tɩ tõnd ne a Zeova zoodã paasdẽ, d segd n paama yam ning sẽn yit yẽ nengẽ wã. Ad Biiblã sẽn yete: “Bark bee ned ning sẽn tar-a yamã zugu. Bark bee ned ning sẽn paam-a bãngr zugu. Yam yaa vɩɩm tɩɩg ned ning sẽn tar-a wã yĩnga, la ned sã n tar yam, a tara sũ-noogo.”—Yel. 3:13, 18.

6. D sã n dat n paam sũ-noog hakɩɩka, bõe me n yaa tɩlɛ?

⁶ La d sã n dat n kell n tall sũ-noog wakat fãa, d segd n ket n tũuda bũmb nins d sẽn bãngd Biiblã zãmsg pʋgẽ wã. A Zeezi yeela bũmb sẽn wilgd tɩ tũubã tara yõod wʋsgo. A yeelame yaa: “Yãmb sã n mi rẽnda, yãmb yaa sũ-noog rãmba, yãmb sã n maand a woto.” (Zã 13:17; karm-y Zak 1:25.) Woto yaa tɩlɛ, sã n pa rẽ d pa tõe n paam zood sõma ne Wẽnnaam, la sũ-noog hakɩɩk ye. La sẽn mik tɩ bũmb ka tɛk n tõe n kɩt tɩ d sũ-noogã sa wã, d maanda a wãna? Bɩ d lebg n tẽeg bũmb nins a Zeezi sẽn sõdg n paase, a sẽn wa n sõsd ne nebã tãngã zugã.

7. Wãn to la neb nins sẽn kẽnd ne sũ-sãams tõe n yɩ sũ-noog rãmba?

⁷ A Zeezi yeelame yaa: “Sũ-noog rãmb la neb nins sẽn kẽnd ne sũ-sãamsã, bala b na n paama belsgo.” (Mat. 5:4, MN) La tõe tɩ d sok tɩ ned sẽn kẽnd ne sũ-sãams na n maana wãn n le yaa sũ-noog soaba? Pa ned buud fãa sẽn kẽnd ne sũ-sãams la a Zeezi sẽn gomdã ye. Nin-wẽnsã meng kẽnda ne sũ-sãamse, d sẽn vɩ ‘yaoolem wakate,’ tɩ vɩɩmã pid ne “tood” buud toor-toorã yĩnga. (2 Tɩm. 3:1) La baa b sũ-sãamsã pʋgẽ, yaa b mens yell bal la b tagsda, n pa tagsd n na n bao zood ne a Zeova ye. Rẽ kɩtame tɩ b pa tõe n yɩ sũ-noog rãmb ye. Dẽnd neb nins yell a Zeezi sẽn gomdã yaa sẽn mi-b tɩ b segd n baoo  Wẽnnaamã. B sẽn kẽnd ne sũ-sãamsã, yaa b sẽn ne tɩ neb wʋsg toog kae ne Wẽnnaam la a raabã. Sẽn paase, b tagsda bãmb mensã sẽn kongdã yelle, la yel-wẽnã sẽn wat ne yel-beed nins dũniyã zugã yelle. A Zeova nee nin-bãmba sẽn kẽnd ne sũ-sãams woto wã, n belsd-b ne a Gomdã maasem, la a sõngd-b tɩ b paamd sũ-noogo, la a na n wa kõ-b vɩɩm sẽn kõn sa wã me.—Karm-y Ezekɩyɛll 5:11; 9:4.

8. Wãn to la sũ-maasem sõngd ned t’a paam sũ-noogo?

⁸ A Zeezi leb n yeelame yaa: “Sũ-noog rãmb la neb nins sẽn yaa sũ-maasem dãmbã, bala b na n sooga tẽngã.” (Mat. 5:5, MN) Wãn to la sũ-maasem sõngd ned t’a paam sũ-noogo? Neb wʋsg ra yaa nin-toose, mo-be-neba, n nong zaba. La b sẽn wa n zãms Biiblã n bãng sɩdã, b toeemame, n yelg “yalẽ paalgã.” Masã, b tara ‘nimbãan-zoeer meng-menga, la sõmblem, la sik-m-menga, la sũ-bʋgsem, la sũ-mare.’ (Kol. 3:9-12) Woto kɩtame tɩ b tar sũur pʋgẽ bãane, tɩ zems-n-taar be bãmb ne b taabã sʋka, tɩ b lebg sũ-noog rãmba. Sẽn paase, Wẽnnaam Gomdã wilgame tɩ b na n wa “sooga tẽngã.”—Yɩɩn. 37:8-10, 29.

9. a) B sẽn yeel tɩ sũ-maasem dãmbã na n “sooga tẽngã,” rat n yeelame tɩ bõe? b) Wãn to la “neb nins tɩrlem kom la a ko-yũud sẽn tarã” na n yɩ sũ-noog rãmba?

⁹ A Zeezi sẽn yeel tɩ sũ-maasem dãmbã na n “sooga tẽngã” rat n yeelame tɩ bõe? Kiris-neb nins sẽn paam vʋʋsem sõng zaeebã sã n wa kẽng saasẽ, n tɩ lebg rĩm-dãmb la maan-kʋʋdba, n dɩt naam tẽngã zugu, wakat kãnga, b soo tẽngã. (Vẽn. 20:6) La kiris-neb milyõ-rãmbã yẽ sẽn pa na n kẽng saasẽ wã? Bãmb me sã n wa paam n lebg neb sẽn zems zãnga, n na n vɩɩmd tẽngã zug ne laafɩ la sũ-noog wakat sẽn kõn sa, d tõe n yeelame tɩ b soo tẽngã. Yaa nin-kãens yell me la a Zeezi sẽn gome, n yeel tɩ “sũ-noog rãmb la neb nins tɩrlem kom la a ko-yũud sẽn tarã.” (Mat. 5:6, MN) Yaa dũni-paalgã pʋgẽ la b tɩrlmã kom la a ko-yũudã na n sa fasɩ. (2 Pɩy. 3:13) Wẽnnaam na n kɩtame tɩ wẽnem buud fãa sa wakat kãnga. Wẽn-kɩɩsg la yel-kɛg sẽn pa na n le beẽ wã, nin-tɩrsã na n vɩɩmda ne sũ-noogo, n pa le maand sũ-sãams ye.—Yɩɩn. 37:17.

10. B sã n yeel tɩ ned yaa nimbãan-zoɛta, rat n yeelame tɩ bõe?

¹⁰ A Zeezi yeelame me yaa: “Sũ-noog rãmb la nimbãan-zoɛtbã, bala b na n zoee bãmb nimbãanega.” (Mat. 5:7, MN) Nimbãan-zoɛt yaa ned sẽn nong a taabã, n bʋkd a meng ne-ba, la a kʋmd sẽn namsd-bã nimbãanega. La pa nimbãan-zoeer sẽn be sũurẽ bal ye. Biiblã wilgdame tɩ yaa nimbãan-zoeer sẽn kɩtd tɩ f maan bũmb n sõnge.

11. Yam-bʋg la d tõe n dɩk yel-bũnd ning pʋgẽ a Zeezi sẽn gom Samari ned yellã?

¹¹ Karm-y Luk 10:30-37. A Zeezi yel-bũnd a ye n wilgd nimbãan-zoeer hakɩɩk sẽn yaa a soaba. Yaa yel-bũnd ning pʋgẽ a sẽn gom Samari ned yellã. Samari nedã sẽn yã raoã b sẽn poglã, a nimbãaneg kẽ-a lame t’a maan bũmb n sõng-a. A Zeezi sẽn togs yel-bũndã n sa wã, a yeela a sẽn da gomd ne-a soabã “t’a me kẽng n tɩ maan a woto.” Bɩ tõnd me sok d meng yaa: ‘Mam maanda wa Samari nedã bɩ? Ned sã n namsdẽ, m kʋmda a nimbãaneg bɩ? Nimbãan-zoeerã wɛɛngẽ, bõe la m tõe n maan n paase? Wala makre, m tõe n sõngda m tẽed-n-taas nins sẽn kʋʋlã, sẽn yaa-b pʋg-kõapã, la kamb nins roagdb sẽn pa tũud a Zeova wã bɩ? M tõeeme n mi n gom gomd sẽn na n ‘paas neb nins raood sẽn boogã raood’ bɩ?’—1 Tes. 5:14; Zak 1:27.

12. Bõe yĩng tɩ d sã n kʋmd d taabã nimbãaneg bɩ kõt-d sũ-noogo?

¹² Bõe yĩng tɩ ned sã n yaa nimbãan-zoɛt bɩ a yaa sũ-noog soaba? D sã n kʋmd nebã nimbãanega, n sõngd-ba, yaa wa d sẽn kõt-b kũuni. A Zeezi yaool n yeelame tɩ d sã n kõ d to bũmbu, d paamda sũ-noogo. Sẽn paas rẽ,  d miime t’a Zeova sũur nooma ne-do. (Tʋʋ. 20:35; karm-y Ebre-rãmb 13:16.) Rĩm a Davɩɩd yeelame t’a Zeova “na n gũu” sẽn tagsd-a pãn-komsem soab yelle, la a “kɩt t’a vɩɩmde,” la a paas t’a soab “na n paama sũ-noog dũniyã zugu.” (Yɩɩn. 41:2, 3) D sã n kʋmd d taabã nimbãaneg n sõngd-ba, tõnd me na n paamame t’a Zeova zoe d nimbãanega, tɩ rẽ na n wa kɩt tɩ d paam n vɩɩmd ne sũ-noog wakat sẽn kõn sa.—Zak 2:13.

13, 14. Bõe yĩng tɩ “pʋ-peelem dãmbã” yaa sũ-noog rãmba?

¹³ A Zeezi leb n yeelame: “Sũ-noog rãmb la neb nins sẽn yaa pʋ-peelem dãmbã, bala b na n yãa Wẽnnaam.” (Mat. 5:8, MN) Pʋ-peelem soab yaa ned sẽn modgd t’a tagsa wã ne a tʋlsem buud fãa yaa sõma. Ned fãa sã n dat t’a sẽn tũud a Zeova to-to wã ta a yam, yaa tɩlɛ t’a modg t’a tagsa wã yaa sõma.—Karm-y 2 Korẽnt-rãmb 4:2; 1 Tɩm. 1:5.

¹⁴ Yaa sẽn yaa-b pʋ-peelem dãmbã n tõe n paam zood sõma ne a Zeova. A Zeova meng yeelame tɩ bark bɩ sũ-noog bee ne “neb nins sẽn pegsd-b futu.” (Vẽn. 22:14) A sẽn yeel tɩ b ‘pegsda b futã’ võor yaa bõe? Sẽn paam-b vʋʋsem sõng zaeebã nengẽ, yaa b sẽn lebg neb sẽn pa tar yell a Zeova nifẽ wã. A kɩtame tɩ b na n tɩ vɩɩmd saasẽ ne sũ-noogo, wakat sẽn kõn sa, n pa tol n tõe n le ki ye. La kʋʋn-kãsengã sẽn saagd n na n wa vɩɩmd tẽngã zugã yẽ? Bãmb nengẽ wã, yaa a Zeova sẽn sak tɩ b lebg a zo-rãmba, n get-b wa nin-tɩrsã. Biiblã yetame tɩ “bãmb pegsa b fut pe-bilã zɩɩmẽ tɩ b lebg peelse.”—Vẽn. 7:9, 13, 14.

15, 16. A Zeezi sẽn yeel tɩ pʋ-peelem dãmbã na n “yãa Wẽnnaamã” võor yaa bõe?

¹⁵ A Zeezi yeelame tɩ pʋ-peelem dãmbã na n “yãa Wẽnnaam.” A Zeova yaool n yeelame: “Ninsaal ka tõe n yãnd maam n ket n vɩ ye.” (Yik. 33:20) Woto wã, a Zeezi gomdã rat n yeelame tɩ bõe? Gɛrk gom-bil ning b sẽn lebg ne moorã tɩ “yã” wã võor tõe n yɩɩ “mams f yamẽ,” “wʋm bũmb võore,” bɩ “bãnge.” Dẽnd yaa ne b “pʋ-tẽer ninã” la b ne Wẽnnaam, rat n yeel tɩ b bãnga a sẽn yaa Wẽnnaam ning buudã, n nong a zʋgdã sẽn yaa sõma zãngã. (Efɛ. 1:18) A Zeezi rɩka Wẽnnaam togs-n-taar kɛpɩ. Rẽ n so t’a yeel yaa: “Sẽn yãnd-a maam yãnda m ba.”—Zã 14:7-9.

¹⁶ D sã n ne Wẽnnaam sẽn sõngd tõnd to-to d vɩɩmã pʋgẽ wã me, d tõe n yeelame tɩ d yãt-a lame. (Zoob 42:5) Sẽn paase, bõn-sõma wʋsg la Wẽnnaam pʋlem neb nins sẽn maood n na n kell n yɩ pʋ-peelem dãmb la b tũ-a n pa tol n bas-a wã. Sã n yaa bõn-kãens yell la d  tagsd n yɩɩda, n ne rẽ ne d “pʋ-tẽer ninã,” yaa wa d sẽn ne Wẽnnaam. La kiris-neb nins sẽn paam vʋʋsem sõngã zaeebã yẽ na n yãa Wẽnnaam ne b nifu, b sã n wa vʋʋg n kẽng saasẽ.—1 Zã 3:2.

17. Bõe yĩng tɩ sẽn nong-b laafɩ wã yaa sũ-noog rãmba?

¹⁷ A Zeezi leb n yeelame yaa: “Sũ-noog rãmb la neb nins sẽn nong laafɩ wã.” (Mat. 5:9, MN) D sã n yaa ned sẽn modgd wakat fãa n baood laafɩ, d na n yɩɩ sũ-noog soaba. Karen-biig a Zak ra yeelame yaa: “Tɩrlem bil bʋta laafɩ pʋgẽ, la yaa laafɩ baoodbã n bʋt-a.” (Zak 3:18) Sã n mik tɩ yãmb ne y zakã ned wall tigingã ned pa wʋmd taab hal tɩ zems-n-taarã yaa toogo, bɩ y yõk a Zeova sɛɛg t’a sõng-y tɩ y yɩ ned sẽn baood laafɩ. Rẽ, a Zeova na n kõ-y-la a vʋʋsem sõngã tɩ sõng-y tɩ y bɩɩs zʋg-sõma, tɩ y sũ-noogã me paase. A Zeezi yeela bũmb sẽn sɩd wilgd tɩ tara yõod wʋsg tɩ d reng n bao laafɩ. Ad a sẽn yeele: “Fo sã n wa ne f kũun tẽn-kugrã taoore, n zĩnd be n tẽeg tɩ f ba-biig n tar yell ne foom, bɩ f bas f kũunã tẽn-kugrã taoore, n deng n kẽng n tɩ maneg f yellã ne f ba-biigã, n yaool n wa kõ f kũunã.”—Mat. 5:23, 24.

18, 19. Bõe yĩng tɩ baa b sã n namsd kiris-nebã bɩ b maand sũ-noogo?

¹⁸ Ad a Zeezi sẽn leb n yeele: “Yãmb yaa sũ-noog rãmba, sã n mik tɩ b paoogda yãmb mam yĩnga, n namsd yãmb la b rõt yãmb ne wẽng buud fãa.” A gomdã võor yaa bõe? Ad a sẽn yeele: “Maan-y sũ-noog la y kɩdme, yãmb keoorã sẽn be Wẽnnaam nengẽ wã sẽn yaa kãsengã yĩnga. Bala yaa woto me la b nams no-rɛɛsdbã sẽn zĩnd pĩndã.” (Mat. 5:11, 12) Vugri, Zʋɩf-rãmbã bʋ-kaoodbã kɩtame tɩ b yõg a Zeezi tʋm-tʋmdbã n pãbe, la b yeel-b tɩ b ra le moon koe-noogã ye. La Biiblã yeelame tɩ tʋm-tʋmdbã “yii kaoreng yɛl-bʋ-bʋʋdbã taoor ne sũ-noogo.” Yaa vẽeneg tɩ pa b sẽn pãb-bã yĩng ye. Yaa “b sẽn ges tɩ bãmb zemsame tɩ paam namsg a Zeezi yʋʋrã yĩngã.”—Tʋʋ. 5:41.

¹⁹ Rũndã-rũndã me, b sã n namsd a Zeova nin-buiidã b sẽn tũud-a wã yĩnga, b tõogda toog ne sũ-noogo. (Karm-y Zak 1:2-4.) Yaa sɩd tɩ wa tʋm-tʋmdbã, d sũ-noogã pa b sẽn namsd tõndã yĩng ye. La d sã n kell n maan sɩd ne a Zeova baa ne namsgã, a na n kõ-d-la raood tɩ d tõog toogo, tɩ d sũ-noogã ra boog ye. Wala makre, yʋʋmd 1944 sa-sik kiuugã, b yõka a Henryk Dornik ne a kẽem n tɩ pag kã de kõnsãntrasiyõ. Ad neb nins sẽn da namsd-bã sẽn yeele: “Ned baa a ye pa tõe tɩ bãmba maan bũmb ye. B sẽn paamd namsgã kõt-b-la sũ-noogo.” Saam-biig a Dornik yeelame: “Baa ne namsgã sẽn da pa noom-mã, m sẽn da tõogd toog ne raoodo, la m miẽ tɩ m maanda sɩd ne Zeova wã ra kõt-m-la sũ-noogo. . . . M sẽn da pʋʋsd ne m sũur fãa wã me kɩtame tɩ maam ne a Zeova zoodã pãng paase. M da neeme me t’a sɩd sõngd-m lame.”

20. Bõe yĩng tɩ d sũy noom d sẽn paam n tũud a Zeova sẽn yaa “sũ-noog buud fãa yẽgrã”?

²⁰ D sã n mi t’a Zeova sẽn yaa “sũ-noog buud fãa yẽgrã” sũur yaa noog ne-do, d tara sũ-noogo, baa b namsd tõnd d tũudmã yĩnga, wall yaa d zakã rãmb n namsd tõndo, pa rẽ bɩ yaa bãag bɩ kʋʋlem n tar-d n namsdẽ. (1 Tɩm. 1:11, Sebr Sõngo) Bũmb a to me sẽn kɩt tɩ d yaa sũ-noog rãmba, yaa d sẽn kɩs sɩd zãng tɩ tõnd Wẽnnaamã “sẽn ya sɩd soabã” na n pidsa a kãab-noodã fãa wã. (Tit 1:2) A Zeova sẽn pʋlmã sẽn na n pids to-to wã na n kɩtame tɩ d pa le tẽeg rũndã-rũndã zu-loeesã la namsgã yell meng ye. Togs sɩdã, d pa tõe n bãng n mams arzãnã pʋgẽ vɩɩm sẽn na n yɩ noog to-to wã, la d sũ-noogã sẽn na n ta zĩig ningã me ye. Hakɩɩka, d na n “paama vɩ-bãane, ne sũ-noog meng-menga!”—Yɩɩn. 37:11.