1. A Ãdem ne a Awa sẽn kɩɩs a Zeova wã poore, bõe la a vẽneg n togs bɛ wã zugu?

D YAAB a Ãdem ra mii vẽeneg tɩ waaf pa gomd ye. Dẽnd tõe t’a Awa sẽn wa n yeel-a tɩ waaf n gom ne yẽ wã, a bãngame tɩ yaa malɛk la sẽn gom ne-a wã, n maan tɩ yaa wa waafã. (Sɩng. 3:1-6) A Ãdem ne a Awa ra pa mi malɛkã ye. Baasgo, a Ãdem sak n kɩɩsa a saasẽ Ba wã sẽn nong-a wã, n tũ malɛkã a sẽn da pa mi wã raabo. (1 Tɩm. 2:14) Tao-tao bala, a Zeova vẽnega yɛl kẽer malɛg-kãngã sẽn yaa bɛ wã zugu, la a wilg tɩ wakat n wat tɩ b na n sãam-a fasɩ. La a Zeova togsa vẽeneg tɩ nananda, malɛg-kãngã na n namsa neb nins fãa sẽn nong Wẽnnaamã.—Sɩng. 3:15.

2, 3. Wõnda yaa bõe yĩng la a Zeova sẽn pa kɩt tɩ b gom a Sʋɩtãan yell wʋsg nand tɩ Mesi wã wa wã?

² Zĩig baa a ye, a Zeova pa togs malɛk ning sẽn lebg kɩɩsdã yʋʋrã meng-meng ye. * A Ãdem ne a Awa sẽn kɩɩsã, yaa na maan yʋʋm 2500 poor la a Zeova yaool n togs malɛg-tõatã sẽn yaa a soaba. (Zoob 1:6) B boond-a lame t’a Sʋɩtãana, sẽn  dat n yeel tɩ “kɩɩsda.” Biiblã babg ning b sẽn da gʋls ne ebre wã pʋgẽ, yaa sɛb a tãab bal pʋgẽ la b pʋd yʋ-kãnga. Bõe yĩng tɩ b pa gom a Sʋɩtãan yell wʋsg nand tɩ Mesi wã wa wã?

³ Wõnda a Zeova sẽn pa kɩt tɩ b gom a Sʋɩtãan ne a tʋʋm-tʋmdɩ wã yell wʋsg Biiblã babg ning b sẽn da gʋls ne ebre wã pʋgẽ wã, yaa a sẽn da pa rat tɩ wa kɩt t’a Sʋɩtãan yʋʋrã yi wã yĩnga. A sẽn kɩt tɩ b gʋls Biiblã bab-kãngã, bũmb la a ra rat n tɩ yɩɩda. Yaa sõng Israyɛll nebã tɩ b tõog n bãng Mesi wã n bake, la b bãng n tũ-a. (Luk 24:44; Gal. 3:24) Mesi wã sẽn wa wã, a Zeova tũnuga ne yẽ la a karen-biisã n vẽneg n togs bũmb wʋsg tõnd sẽn mi a Sʋɩtãan ne a malɛgsã zug masã wã. * Woto zemsame, bala yaa ne a Zeezi la kiris-neb nins sẽn paam vʋʋsem sõng zaeebã maasem la a Zeova na n sãam a Sʋɩtãan ne a poorẽ dãmbã.—Rom. 16:20; Vẽn. 17:14; 20:10.

4. Bõe yĩng tɩ d pa segd n zoe a Sʋɩtãan tɩ loog nugu?

⁴ Tʋm-tʋmd a Pɩyɛɛr goma a Sʋɩtãan yelle, n yeel t’a “gõodame n kelemd wa gɩgemde.” A Zã me bool-a lame tɩ ‘wag-bɛ-kãseng’ la ‘wag-kʋdre.’ (1 Pɩy. 5:8; Vẽn. 12:9) La d pa segd n zoe a Sʋɩtãan tɩ loog nug ye. A tõogã tara koaka. (Karm-y Zak 4:7.) A Zeova ne a Zeezi la malɛg-sõma wã bee tõnd poorẽ. Ne bãmb sõngre, tõnd tõeeme t’a Sʋɩtãan ra tõog-d ye. La sogsg a tãab leoor la d segd n bao n bãnge: Bõe la a Sʋɩtãan tõog n maane? Bõe la a maand n paamdẽ tɩ nebã tũud a raabã? La bõe la a pa tõe? Sogs-kãensã la d na n leoke, la d ges rẽ sẽn sõngd tõnd tɩ d bãng bũmb ninsã.

5, 6. Bõe yĩng tɩ ninsaalbã goosneema baa a ye pa tõe tɩ ãdem-biisã paam b zu-loeesã tɩɩm?

⁵ Malɛgs wʋsg me wa n lebga toatba, n naag a Sʋɩtãan a kɩɩsgã pʋgẽ. Sẽn deng sa-kãsengã, a Sʋɩtãan belg-b lame tɩ b sig n dɩgs ninsaalb kom-pugli n maan b pagba. Biiblã bilga rẽ, n yeel tɩ wag-bɛ-kãsengã kãaga ãdsã sẽn be yĩngrã, a yembr bãmb b tãab fãa sʋk n lob tẽng zugu. (Sɩng. 6:1-4; Ziid 6; Vẽn. 12:3, 4) Malɛg-kãensã sẽn bas Wẽnnaam, n pa le naag a zakã rãmbã, b lebga zĩn-dãmba, n yaa a Sʋɩtãan poorẽ dãmba. La d ra tags tɩ b tʋmda yaar ye. A Sʋɩtãan sigla zĩn-dãmbã, tɩ b yaa rĩungu, wa Wẽnnaam me sẽn lugl a Rĩungã. Yẽ la rĩmã, n yãk zĩn-dãmbã tɩ b yaa nanambs la a pãens rãmba, n so naam tẽngã zugu.—Efɛ. 6:12.

⁶ A Sʋɩtãan sẽn sigl zĩn-dãmbã woto wã kɩtame t’a tar pãng ninsaalbã goosneem-rãmbã fãa zugu. A sẽn wilg a Zeezi “dũniyã soolem dãmbã,” n bas n yeel-a bũmb ningã wilgda rẽ vẽenega. Ad a sẽn yeelã: “Mam na n kõo yãmb dũni naamã fãa, ne soolem kãensã ziirã, bala, b kõ-a-la maam, la mam kõt-a-la m sẽn dat a soaba.” (Luk 4:5, 6) La baa ne sẽn yaa a Sʋɩtãan n so goosneema-rãmbã, nanambs wʋsg maooda ne b sũur fãa b nin-buiidã sõngr yĩnga. La ninsaalbã goosneema baa a ye pa tõe tɩ ãdem-biisã paam b zu-loeesã tɩɩm wa b sẽn datã ye.—Yɩɩn. 146:3, 4; Vẽn. 12:12.

7. Wãn to me la a Sʋɩtãan tũnugd ne tũudum nins sẽn pa sɩdã, la ligdã baoob siglsã n belgd nebã? (Ges-y sõsgã sɩngrẽ fotã.)

⁷ A Sʋɩtãan ne zĩn-dãmbã leb n tũnugda ne tũudum nins sẽn pa sɩdã, la ligdã baoob siglsã n belgd ‘tẽngã zĩig fãa’ nebã. (Vẽn. 12:9) Ne tũudum-yoodã maasem, a Sʋɩtãan yelgda ziri buud toor-toor a Zeova zugu. A pʋd n maanda a sẽn tõe fãa n dat  tɩ nebã ra bãng Wẽnnaam yʋʋrã la b pʋt-a ye. (Zer. 23:26, 27) Woto fãa kɩtame tɩ neb wʋsg sẽn yaa pʋ-peelem dãmb maand zĩn-dãmbã raabo, n tagsdẽ tɩ yaa Wẽnnaam la b tũuda. (1 Kor. 10:20; 2 Kor. 11:13-15) Ne ligdã baoob siglsã maasem me, a Sʋɩtãan kɩtame tɩ nebã tẽed bũmb kẽer sẽn pa sɩda. Wala makre, b kɩtame tɩ nebã tẽed tɩ yaa ligdã la teedã n kõt sũ-noogo. (Yel. 18:11) Sẽn tẽed-b woto wã basa Wẽnnaam baoobo, tɩ lebg ligdã baoob n pak-b n yɩɩd b vɩɩmã pʋgẽ. (Mat. 6:24) Baa b sã n da nonga Wẽnnaam, ligdã la teedã nonglem wat n paama pãnga, hal tɩ b pa le nong Wẽnnaam ye.—Mat. 13:22; 1 Zã 2:15, 16.

8, 9. a) A Ãdem ne a Awa kibarã, la malɛgs nins sẽn lebg tõatbã kibar wilgda tõnd bũmb a yiibu. Bõe ne bõe? b) D sẽn paam n bãng a Sʋɩtãan sẽn tõog n maanã, wãn to la nafd tõndo?

⁸ A Ãdem ne a Awa kibarã, la malɛgs nins sẽn lebg tõatbã kibar wilgda tõnd bũmb a yiib sẽn tar yõod wʋsgo. Pipi, sõngda tõnd tɩ d bãng tɩ d sã n pa be ne Wẽnnaam, d bee ne a Sʋɩtãana. Yaa soay a yiib bala, tɩ yaa tɩlɛ tɩ ned fãa yãk a sẽn beẽ. (Mat. 7:13) Yiib-n-soaba, sõngda tõnd tɩ d bãng tɩ baa sẽn be-b a Sʋɩtãan poorẽ wã sã n nafdame, pa wakat fãa yĩng ye. A Ãdem ne a Awa kɩɩsgã poore, b paama sor n da tõe n gãneg b toorẽ noy sõma ne wẽngã wɛɛngẽ. Zĩn-dãmbã me paam n soo ninsaalbã goosneema-rãmbã, n dɩt naam. (Sɩng. 3:22) La sɩd-sɩdã, sẽn yãk-a yam n na n zĩnd a Sʋɩtãan poorẽ, baa sã n wõnd manegd-a lame, wakat fãa wat n baasa wẽnga.—Zoob 21:7-17; Gal. 6:7, 8.

⁹ D sẽn paam n bãng a Sʋɩtãan sẽn tõog n maanã, wãn to la nafd tõndo? Sõngda tõnd tɩ d tall tagsg sẽn zems ninsaalbã goosneema-rãmbã zugu, la kõt-d raood tɩ d wɩngd ne koe-noogã moonego. D miime t’a Zeova ratame tɩ d waoog goosneema-rãmbã. (1 Pɩy. 2:17) A ratame tɩ goosneema noor sã n pa kɩɩsd yẽ noor bɩ tõnd sak n tũ. (Rom. 13:1-4) D leb n miime tɩ d pa segd n kẽes d toog politikã yɛlẽ, wall n yãk politik sull n teendẽ ye. (Zã 17:15, 16; 18:36) D sẽn mi t’a Sʋɩtãan sãamda a Zeova yʋʋre, la a pʋd n baood n na n kɩt tɩ nebã ra bãng yʋʋrã, d rata ne d sũur fãa n sõng d taabã tɩ b bãng sɩdã Wẽnnaam zugu. D sẽn paam n yaa a Zeova Kaset rãmb la d pʋt a yʋʋrã noom-d-la wʋsgo. Kɩtame tɩ d miẽ tɩ d sã n nong a Zeova, rẽ bark yɩɩda ligdã la teedã nonglmã hal zĩig sẽn zãre.—Eza. 43:10; 1 Tɩm. 6:6-10.

10-12. a) A Sʋɩtãan sẽn wa n na n belg malɛgs kẽerã, tõe tɩ bẽdgã yɩɩ bõe? b) Bõe la yel-kãngã wilgd tõndo?

¹⁰ A Sʋɩtãan maanda sɩlem buud toor-toore, n paamd n belgd nebã. Wala makre, a tũnugda ne bũmb kẽer n bẽt nebã, n paamdẽ tɩ b maand a sẽn datã. Wakat ning me, a bugsda nebã sẽn na yɩl tɩ b maan a raabã.

¹¹ Tẽeg-y-yã a sẽn tũnug ne bũmb ning n bẽd malɛgs kẽerã. Wõnda a maaga a yĩng n gũus-b n kaoose, hal n wa bãng bũmb ning sẽn tõe n kʋɩɩb-bã. A tõogame tɩ b sig n kẽ ne pagb n dog kamba, tɩ b kambã ra yaa nin-wobd sẽn nong nen-kɛglem, n maand neb a taabã pãnga. (Sɩng. 6:1-4) Tõe tɩ bẽdgã pa yɩ b sẽn na n paam n kẽ ne ninsaalbã kom-pugli wã bal ye. Wõnda a Sʋɩtãan togs-b lame me t’a na n kõ-b-la naam, tɩ b soog ãdem-biisã. A Sʋɩtãan tog n da maanda a sẽn tõe fãa sẽn na yɩl t’a Zeova sẽn pʋlem tɩ “pagã yageng” n watã ra pids ye. (Sɩng. 3:15) Sẽn yaa a soab fãa, a Zeova pa sak t’a Sʋɩtãan raabã tõog ye. A kɩtame tɩ sa-kãsengã ni, t’a Sʋɩtãan ne a zĩn-dãmbã magbã fãa vaale.

¹² Yam-bʋg la d tõe n dɩke? Yoobã la zẽk-m-mengã yaa bẽds meng-menga. Yaa yʋʋm kõn bãng n sõd la malɛgs nins sẽn lebg a Sʋɩtãan poorẽ dãmbã zĩnd saasẽ ne Wẽnnaam. Baa ne rẽ, b basame tɩ tʋls-wẽns kẽ b yamẽ, hal n wa paam pãnga. Sõngda tõnd tɩ d bãng tɩ baa tõnd tũ a Zeova n kaoos to-to, d sã n pa gũusi, tʋl-wẽns tõe n wa kẽe d sũurẽ wã. (1 Kor. 10:12) Rẽ n so tɩ wakat fãa bɩ ned kam fãa segd n bao n bãng sẽn be a sũurẽ wã, tɩ yoob tʋlsem bɩ wuk-m-meng sã n wa sɩngdẽ bɩ a yiis rẽ tao-tao tɩ ra paam pãng ye.—Gal. 5:26; karm-y Koloos-rãmb 3:5.

13. Bõe me la a Sʋɩtãan tũnugd ne n bẽt nebã, la bõe n na n sõng-d t’a ra paam-do?

¹³ A Sʋɩtãan sẽn mi me tɩ nebã nong n baood n na n bãnga yɛl sẽn wõnd yel-soalmã, a bẽta ne rẽ me n paamd nebã. Rũndã-rũndã wã, pa ne tũudum-yoodã maasem bal la a Sʋɩtãan belgd nebã tɩ b kẽed zĩn-dãmbã yɛlẽ ye. A tũnugda ne reem buud toor-toor me. Filim-dãmba, reem kẽer sẽn be portaabl-dãmb la ordinatɛɛr-dãmb pʋgẽ, la bũmb a taab nebã sẽn maand n noogd b yõor kɩtame tɩ b getẽ tɩ yɛl kẽer zĩn-dãmbã sẽn maand tara yamleoogo. Bõe n na n sõng-d tɩ bẽd-kãngã ra wa paam-do? D pa segd n dat t’a Zeova siglgã sõdg reem nins sẽn yaa sõma la sẽn pa sõma wã n  wilg tõnd ye. Yaa ned kam fãa n segd n zãms Wẽnnaam noyã neere, t’a sũur kasetã yɩ sõma. Woto, a tõogd n bãng n yãka reem sẽn yaa sõma. (Ebre. 5:14) Sẽn paase, d tũ tʋm-tʋmd a Poll sẽn sagl-d tɩ d modg tɩ d sẽn nong Wẽnnaam to-to wã ra naag ne ‘zãmbã.’ (Rom. 12:9) D sok d meng yaa: ‘Reem nins m sẽn yãkdã wilgdame tɩ m tũuda bũmb nins m sẽn zãmsd m taabã bɩ? Ned m sẽn zãmsd Biiblã sã n yã rẽ, na n yɩɩ vẽeneg a yamẽ tɩ m tũuda Biiblã goamã m sẽn taasd nebã bɩ?’ D sã n modg n tũud bũmb nins d sẽn zãmsd neb a taabã, d tõogd n gila a Sʋɩtãan bẽdsã nana-nana.—1 Zã 3:18.

14. Bõe la a Sʋɩtãan tõe n maan n bugs tõndo, la bõe n na n sõng-do?

¹⁴ Wakat ning me, a Sʋɩtãan bugsda tõndo, n dat tɩ rabeem yõk-d tɩ d kɩɩs a Zeova. Wala makre, a tõe n pirsa goosneema-rãmbã tɩ b yiis noor n gɩdg koɛɛgã moonego, pa rẽ bɩ a kɩt tɩ d karen-bi-taas wall d tʋmd-n-taas yaand tõndo, d sẽn tũud Biiblã saglsã yĩnga. (1 Pɩy. 4:4) A Sʋɩtãan tõeeme me n kɩt tɩ d zakã neb sẽn pa tũud a Zeova maand b sẽn tõe fãa sẽn na yɩl tɩ d ra le kẽnd tigissã, n tagsdẽ tɩ yaa d neer la b baooda. (Mat. 10:36) Bõe n na n sõng-d t’a ra tõog-do? Pipi, d ning d yamẽ t’a Sʋɩtãan sẽn zabd ne tõndã, a pa tõe n pa mi n bugs-d ye. (Vẽn. 2:10; 12:17) D tẽegdẽ me tɩ pa zaalem la a sẽn maand woto wã ye. A yeelame tɩ yaa yɛlã sã n yaa nana ne-d bal la d tũud a Zeova, la tɩ sã n wɩnge, d na n bas-a lame. (Zoob 1:9-11; 2:4, 5) Sẽn paase, wakat fãa bɩ d teeg a Zeova t’a kõ-d pãng tɩ d kell n sak-a. D tẽeg t’a Zeova pa na n tol n bas tõnd a bada!—Ebre. 13:5.

15. Bõe yĩng tɩ d yetẽ t’a Sʋɩtãan pa tõe n modg ned t’a maan a sẽn pa rate?

¹⁵ A Sʋɩtãan pa tõe n modg ned t’a maan a sẽn pa rat ye. (Zak 1:14) Zɩɩlmã kɩtame tɩ neb wʋsg maand a Sʋɩtãan daabo. La ned sã n wa paam n bãng a Zeova, a tog n yãka a sã n na n tũu a Zeova bɩ a na n teela a Sʋɩtãanã. (Tʋʋ. 3:17; 17:30) D sã n dat ne d sũur fãa n maan a Zeova raabã, bũmb kae a Sʋɩtãan sẽn tõe n maane, n tõog tɩ d bas a Zeova ye.—Zoob 2:3; 27:5.

16, 17. a) Wilg-y bũmb kẽer me a Sʋɩtãan ne zĩn-dãmbã sẽn pa tõe. b) Bõe yĩng tɩ d pa segd n yɛɛsd n pa rat n pʋʋs a Zeova tɩ yi?

¹⁶ Bũmb a taab me la a Sʋɩtãan ne zĩn-dãmbã pa tõe n maane. Wala makre, Biiblã zĩig baa a ye pa wilgd tɩ b tõe n bãnga sẽn be ned sũurẽ bɩ a yamẽ ye. A Zeova ne a Zeezi bal n tõe. (1 Sãm. 16:7; Mark 2:8) La rẽ yĩnga, d segd n yɛɛsdame tɩ d sã n pʋʋs tɩ yi, a Sʋɩtãan bɩ zĩn-dãmbã tõe n wʋmame, n bao n na n maan-d wẽng bɩ? Ayo! Bõe yĩnga? D rɩk makre. Rẽ yĩnga, d yɛɛsda a Sʋɩtãan na n wa yã tʋʋm-sõma nins d sẽn tʋmd a Zeova tũudmã yĩngã sɩda? Ayo! Dẽnd d pa segd n yɛɛsdẽ t’a na n wa wʋm d sẽn yet a Zeova d pʋʋsg pʋgẽ ye. Pĩnd wẽn-sakdb n pʋʋs a Zeova tɩ yi, tɩ Biiblã gomd rẽ yelle. La zĩig baa a ye, b pa wilg tɩ nin-kãensã ra yɛɛsda a Sʋɩtãan na n wa wʋm b pʋʋsgã ye. (1 Rĩm. 8:22, 23; Zã 11:41, 42; Tʋʋ. 4:23, 24) D sã n maand d sẽn tõe fãa tɩ d no-goamã la d tʋʋm-tʋmdɩ wã zemsd ne a Zeova raabã, d tõe n kɩsa sɩd t’a na n sõng-d lame, bala, a Sʋɩtãan pa tar a sẽn tõe n maan tõndo, t’a Zeova pa tar a tɩɩm ye.—Karm-y Yɩɩn-sõamyã 34:8.

¹⁷ Segdame tɩ d bãng d bɛ wã sõma, la pa segd tɩ d zoe-a tɩ loog noor ye. Baa d sẽn pa zems zãngã, ne a Zeova sõngre, d tõe n tõoga a Sʋɩtãana. (1 Zã 2:14) D sã n kɩɩs a Sʋɩtãana, a na n zoe n zãaga ne tõndo. (Zak 4:7; 1 Pɩy. 5:9) La wõnda yaa kom-bɩɩsã la a Sʋɩtãan baood rũndã-rũndã n yɩɩda. Bõe la b tõe n maan n tõog n kɩɩs-a? Sõsg ning sẽn pʋgdã na n goma rẽ yelle.