Yãmb karma Gũusg Gasg nins b sẽn yiis yaoolmã sõma bɩ?

Bɩ y ges y sã n tõe n leoka sogs-kãensã:

Togs-y bũmb a naas d sẽn tõe n maane, tɩ d sẽn yɩɩnd to-to wã yɩ sõma n paase.

D tog yalsa tɩrga, n zẽk d yɩɩlã sebre. D segd n vʋʋsda pemsem tɩ sekdẽ. D sã n yaagd d noorã sõma, la d zẽkd d koɛɛgã, d yɩɩlã na n yita sõma.—w17.11, s.n. a 5.

D sã n tags soondg tẽnsã sẽn da be zĩis nins Israyɛllã, la b soayã yelle, bõe la d tõe n yeele?

Soondg tẽns a yoob la b ra yãk soolmã zĩis toor-toore, tɩ soay nins sẽn dabd be wã ra maneg sõma. Kɩtame tɩ ned ra tõe n zoe n kẽng be nana-nana.—w17.11, s.n. 14.

Wãn to la Yɩɩn-sõamyã 118:22 ra pĩnd n gom a Zeezi vʋʋgrã yelle?

B zãgsa a Zeezi sẽn yaa Mesi wã, n kʋ-a. Sẽn na yɩl t’a lebg “roogã pãng zĩigẽ kugri,” ra yaa tɩlɛ t’a vʋʋge.—w17.12, s.n. a 9-10.

Yɩl tɩ Israyɛll ned paam n naag Mesi wã yaab-rãmbã, ra yaa tɩlɛ t’a yɩ a ba wã bi-kãseng bɩ?

A Zeezi yaab-rãmb wʋsg ra yaa b ba wã bi-kãsenga, la pa b fãa ye. Wala makre, a Davɩɩd ra pa a ba a Zese bi-kãseng ye. Baasgo, Mesi wã yɩɩ a Davɩɩd roogã neda.—w17.12, s.n. 14-15.

Togs-y Biiblã sagls kẽer sẽn sõngd bãasã tɩbsg wɛɛngẽ.

Tõogã ra sõdga bãas kẽere, n wilg tɩ b tog n welga sẽn bẽed-b bã-kãensa wã kɛɛnga. Ned sã n da sɩɩs kũum, a segd n soo koom. Ned sã n da rat n maan we-kɛɛnga, a ra segd n tuu boko, t’a sã n sa bɩ a busi. Yaa biig rog tɩ rasem a nii la b ra segd n kẽes-a bãongo, bala sã n pa ta rẽ, zɩɩmã pa yõkd tao-tao ye.—wp18.1, s.n. a 7.

Kiris-ned sã n nong a meng n zemse, pa wẽng ye. Bõe yĩnga?

Bala, d segd n nonga d taabã wa d mense. (Mark 12:31) Rapã “tog n nonga b pagbã wa b sẽn nong b mens yĩngã.” (Efɛ. 5:28) La d sã n pa gũusi, d tõe n wa nonga d mengã tɩ looge.—w18.01, s.n. 23.

Bõe la d tõe n maan n paas d tẽebã pãnga?

D segd n zãmsda Biiblã sõma, n bʋgsd d sẽn karemdã zugu, la d tũud bũmb nins d sẽn bãngã. D segd n sakdame me tɩ vʋʋsem sõngã wilgd-d sore. D tog n sakda d taabã sõngr me, la d wilgd tɩ d sũur nooma ne rẽ.—w18.02, s.n. 26.

Bõe yĩng tɩ d pa segd n tũ ne astorolozi wã la bagrã n na n bao n bãng sẽn wat beoogo?

Bʋʋmã waoogame. La sẽn yɩɩd fãa, yaa tɩ Biiblã gɩdga astorolozi wã ne bagrã fãa.—wp18.2, s.n. a 4-5.

Ned sã n bool tõnd tɩ d wa tɩ d naag taab n dɩ, d manesem segd n yɩɩ wãna?

D sã n yeel a soab tɩ d na n waame, d segd n maana d sẽn tõe fãa n pids d pʋlengã. (Yɩɩn. 15:4) D pa segd n toeem yam bʋʋm-faad yĩng ye. Tõe tɩ sẽn bool-a tõndã zoe n seglame n na n deeg-do.—w18.03, s.n. 18.

Yam-bʋg la kãsem-dãmbã la kãsem-sõngdbã tõe n dɩk a Tɩmote kibarã pʋgẽ?

A Tɩmote ra geta nebã yell neere, la a ra lʋɩɩsd tũudmã tʋʋm taoore. A ra tʋmda tũudmã tʋʋm ne a sũur fãa, la a ra tũud bũmb nins a sẽn bãngã. A ra maood n paasda a minimã, la a baood a Zeova vʋʋsem sõngã sõngre. Kãsem-dãmbã la kãsem-sõngdbã tõe n dɩka yam a mak-sõngã pʋgẽ.—w18.04, s.n. 13-14.