Yãmb karma Gũusg Gasg nins b sẽn yiis yaoolmã sõma bɩ? Bɩ y ges y sã n tõe n leoka sogs-kãensã:

Bõe la Biiblã yeta, tɩ wilgdẽ tɩ Wẽnnaam kʋmda tõndo?

Pĩnd wẽndẽ wã, Israyɛll nebã sẽn wa n yaa yembs Ezipt tẽngã n namsd wʋsgã, Wẽnnaam yãa b namsgã fãa, tɩ ra sãamd a sũuri. (Yik. 3:7; Eza. 63:9) Wẽnnaam naana tõnd n wõneg a menga, tɩ d tõe n kʋm d taabã. A kʋmda tõndo, baa d sã n wa tagsdẽ tɩ d pa tog ne Wẽnnaam nimbãan-zoeerã.—wp18.3, s.n. a 8-9.

Wãn to la a Zeezi sẽn zãms nebã bũmb ninsã sõng-b tɩ b bas sãbs-taaba?

A Zeezi wakatẽ wã, zʋɩf-rãmb wʋsg ra tikda nebã buudã la bũmb a taab n sãbsd-ba. Kiristã wilga nebã tɩ yaa tɩlɛ tɩ b yɩ sik-m-mens rãmba, la tɩ b pa segd n nong b buudã tɩ loog ye. A yeela a karen-biisã tɩ b fãa yaa ba-biisi.—w18.06, s.n. a 9-10.

A Zeova sẽn pa sak t’a Moyiiz kẽ kãabg tẽngẽ wã wilgda tõnd bõe?

A Moyiiz ra tara zood sõma ne a Zeova. (Tõo. 34:10) Israyɛll nebã yeeba we-raoogẽ wã yʋʋm 40. B yeebgã sẽn wa n kolg sɛɛbã, b le yẽgma naoor a yiib-n-soaba, koom sẽn da ka be wã yĩnga. A Zeova yeela a Moyiiz t’a gom ne pĩigã. La a Moyiiz pa maan woto ye. A wẽe pĩigã. A Zeova sũurã puuga wʋsg ne-a. Tõe tɩ yaa a sẽn pa maan wa a Zeova sẽn yeelã, wall a sẽn maan tɩ nebã ra tõe n tags tɩ pa a Zeova n maan yel-solemdã yĩnga. (Sõd. 20:6-12) Woto wilgdame tɩ d segd n sakda a Zeova noyã, la d kɩtdẽ t’a paamd waoogre.—w18.07, s.n. 13-14.

D sã n tikd ninã sẽn ne wã n kaood bʋʋdo, bõe yĩng tɩ d tõe n tudg nana-nana?

Bũmb a tãab la nebã nong n tikd n kaood b taabã bʋʋdo: Yaa buudã, tarmã la yʋʋmã. D segd n maoome n dɩk a Zeova togs-n-taare, n pa bakd nebã ye! (Tʋʋ. 10:34, 35)—w18.08, s.n. a 8-12.

Bõe la saam-biis nins sẽn kʋʋlã tõe n maan n sõng neb a taabã?

Saam-biig sã n kʋʋl tɩ b kɩt t’a toeem tʋʋmde, Wẽnnaam ket n nong-a lame. A tõe n sõnga neb a taabã wʋsgo. Wala makre, a tõe n sõnga rao sẽn nan pa tũud a Zeova wa a paga, ned sẽn pa le wat tigissã, n zãms ned Biiblã, la a wɩng ne koɛɛgã moonego.—w18.09, s.n. a 8-11.

Tʋʋm-te-bʋs la kiris-nebã tar n moond koɛɛgã?

Yaa jw.org kart-rãmbã ne boollã seb-vãadã, la seb-vãad a nii sẽn maneg tɩ yaa sõma, n paas Gũusg Gasgã la Réveillez-vous ! wã. D leb n tara borsiir-dãmb a wãna, sɛb a yiib d sẽn tar n zãmsd nebã Biiblã, la video-rãmb a naas sẽn wilgd bũmb takɩ, wala makre, Bõe yĩng tɩ y tog n zãms Biiblã? video wã—w18.10, s.n. 16.

Wãn to la kiris-ned tõe n ‘bao sɩdã’ wa Yel-bũn 23:23 sẽn yetã?

Pa tɩlɛ tɩ d yao ligd n bãng sɩdã ye. La yɩl n bãng sɩdã baooda sẽk la modgre.—w18.11, s.n. a 4.

A Ooze sẽn tall manesem ning ne a pag a Gomeerã wilgda tõnd bõe?

A Gomeer yoo naoor wʋsgo, la a Ooze kõ-a-la sugr n pa kao b kãadmã ye. Kiris-ned sẽn kẽ kãadem sã n yo, a to wã tõe n yãka yam n kõ-a sugri. A sã n le sak n kẽ ne-a, Biiblã pa le kõt-a sor t’a na n kao b kãadmã ye.—w18.12, s.n. 13.