1, 2. Yʋʋmd 2018 wã, bõe la d na n tigim taab n maan dũniyã gill zugu, tɩ d tõe n yeel t’a buud kae? (Ges-y fotã sẽn be yĩngrã.)

YƲƲMD 2018 tʋʋlg kiuug rasem 31 wã, dũniyã gill zugu, neb milyõ-rãmb n na n tigim taab n maan bũmb b sẽn maand yʋʋmd-yʋʋmde. Baraar wĩndgã kõom poore, a Zeova Kaset rãmb la neb a taab n na n naag taab n tẽeg a Zeezi kũumã. Neb ka tɛk sẽn naagd taab yʋʋmd fãa n tẽegd Kiristã kũumã yaa bũmb sẽn be yamleoog wʋsgo. A buud kae ye!

² A Zeova ne a Zeezi sã n get neb ka tɛkã sẽn tigimd taab tẽns toor-toor dũniyã gill zug Soaalã zaabr dɩɩbã yĩngã, tɩ yaa bãmb dãmb sa tɩ bãmb dãmb nan sɩngdẽ wã, yaa vẽeneg tɩ b sũy yaa noog wʋsgo. Biiblã goma “neb kʋʋng ned sẽn ka tõe n sõd n sɛ” yelle, n yeel tɩ b ‘yii soolem dãmbã fãa pʋsẽ, buud toay-toayã fãa pʋsẽ, tẽms toay-toayã fãa pʋsẽ, la b gomd goam buud toay-toaya.’ Biiblã paasame tɩ b zẽkda b koees n yetẽ yaa:  “Fãagrã bee ne tõnd Wẽnnaam sẽn zao geerã zugã, la ne pe-bilã.” (Vẽn. 7:9, 10) Neb kʋʋng sẽn tigimd yʋʋmd fãa n tẽegd Kiristã kũumã, tɩ waoogd a Zeova ne a Zeezi wã yaa bõn-sõng tɛkẽ!

3. Sogs-bʋs la d na n leok sõs-kãnga pʋgẽ?

³ Sõs-kãnga pʋgẽ, sogsg a naas la d na n leoke: 1) Bõe la d tõe n maan n segl d mens a Zeezi kũumã tẽegr yĩnga, n paam tɩ sɩd naf-do? 2) Wãn to la tẽegrã sõngd Wẽnnaam nin-buiidã tɩ b tũud-a yam a ye? 3) Bõe la ned kam fãa tõe n maan tɩ sõng tɩ d zems-n-taarã ket n paasdẽ? 4) Daar n wat tɩ d pa na n le maan a Zeezi kũumã tẽegr bɩ? Na n yɩɩ da-bʋre?

4. Bõe yĩng tɩ tar yõod wʋsg tɩ d naag n maan a Zeezi kũumã tẽegre?

⁴ Bõe yĩng tɩ tar yõod wʋsg tɩ d naag n maan a Zeezi kũumã tẽegre? D tẽeg tɩ d tigissã fãa yaa a Zeova waoogr yĩnga. Tẽegrã sẽn yaa vugr yʋʋmd pʋgẽ wã yõod yɩɩda tigiss a taabã fãa. Dẽnd d tõe n kɩsa sɩd t’a Zeova ne a Zeezi sũur nooma ne ned sẽn maand a sẽn tõe fãa n na n kẽng tigs-kãnga. Tõnd rat n maana d sẽn tõe fãa n kẽnge. D sã n wa pa tõog me, d ratame t’a Zeova ne a Zeezi neẽ tɩ yaa d sẽn sɩd pa tõe. Tõnd yel-manesmã sã n wilgdẽ tɩ d miime tɩ tigissã yõod waoogame, a Zeova na n neeme tɩ d rata ne d sũur fãa t’a gʋls d yʋʋrã ‘tẽegr sebrã’ b sẽn boond me tɩ “vɩɩm sebrã” pʋgẽ. Yaa neb nins sẽn na n wa paam vɩɩm sẽn kõn sa wã yʋy la a Zeova gʋlsd be.—Mal. 3:16; Vẽn. 20:15.

5. Tẽegrã sã n wa kolgdẽ, bõe la d tõe n maane, n ‘fees d mens n ges d sã n bee tẽebã pʋgẽ’?

⁵ Tẽegrã sã n wa kolgdẽ bɩ d bao sẽka, n mi n pʋʋs a Zeova la d bʋgs neer n ges tõnd ne yẽ zoodã pãng sẽn yaa to-to. (Karm-y 2 Korẽnt-rãmb 13:5.) Tʋm-tʋmd a Poll sagla kiris-nebã tɩ b ‘fees b mens b toore, n ges b sã n bee tẽebã pʋgẽ.’ D maanda wãn n fees d menga? D sok d meng yaa: ‘Mam yaa a Zeova Kaset soaba, la rẽ yĩnga, m kɩsa sɩd tɩ yaa tõnd siglgã n tat a Zeova yam, la tɩ yaa tõnd la a yãk tɩ d maand a raabã bɩ? M maooda m pãng tɛk n moond Rĩungã koe-noogã la m zãmsd nebã Biiblã bɩ? Mam tʋʋm-tʋmdɩ wã wilgdame tɩ m miime tɩ masã yaa yaoolem wakatã, la t’a Sʋɩtãan dũniyã sãoong ta n saame bɩ? Mam sẽn kɩs a Zeova ne a Zeezi sɩd to-to wã ket n yaa wa sasa ning m sẽn dɩk m meng n kõ a Zeova wã bɩ?’ (Mat. 24:14; 2 Tɩm. 3:1; Ebre. 3:14) Ned kam fãa sã n leok sogs-kãensã, la a bʋgs neere, na n sõng-a lame t’a bãng a tẽebã sã n tara pãnga.

6. a) Bõe la ned tog n maane, n wa paam vɩɩm sẽn kõn sa wã? b) Yʋʋmd fãa, bõe la kãsem-soab a ye maanda, n segend a meng tẽegrã yĩnga? Wãn to la y tõe n dɩk a togs-n-taare?

⁶ D sã n lebg n karem siglgã sɛb sẽn wilgd a Zeezi kũumã tẽegr yõodo, na n sõngame tɩ d segl d meng rẽ yĩnga. (Karm-y Zã 3:16; 17:3.) Ned pa tõe n paam vɩɩm sẽn kõn sa wã, t’a pa reng n bao n “bãng” a Zeova, la a wilg t’a ‘tẽeda’ a Biig a Zeezi ye. Sẽn na yɩl n segl d menga, d tõe n baoo siglgã sɛb sẽn tõe n sõng-d tɩ d maneg n nong a Zeova ne a Zeezi n paase, n karem la d bʋgs sõma. Yaa woto la saam-biig a ye sẽn yaa kãsem-soab hal sẽn kaoos maanda. Na maan yʋʋm wʋsgo, a tigsa Gũusg Gasg kẽer sẽn gomd tẽegrã yelle, la a Zeova ne a Zeezi sẽn nong tõnd to-to wã me yell n bĩngi. Tẽegrã sã n wa ket semen a wãna, a lebgd n karm-b lame, la a bʋgs tẽegrã yõod zugu. Gũusg Gasg sẽn gomd tẽegrã yell sã n yi, a mi n dɩka rẽ n paas a sẽn da bĩng-b rãmbã. A leb n karemda Biiblã zĩig nins b sẽn yãk tɩ d segd n karem tẽegrã yĩngã. A yeelame tɩ woto fãa sõngda yẽ t’a bãngd bõn-paal yʋʋmd fãa. La sẽn yɩɩda, a neeme tɩ kɩtdame tɩ yẽ sẽn nong a Zeova ne a Zeezi to-to wã paasdẽ. Yãmb me sã n maand woto, y na n nonga a Zeova ne a Zeezi n paase.  Rẽ me, y sũur na n maneg n yɩɩ noog ne b sẽn maan n kõ-dã, tɩ y rat n pʋʋs-b barka. Woto tõe n kɩtame t’a Zeezi kũumã tẽegr naf yãmb sõma.

7. a) Zaabr ning a Zeezi sẽn wilg b sẽn tog n tẽegd a kũumã yell to-to wã, bõe la a pʋʋs n kose? b) Bõe n wilgd t’a Zeova reega a kosgã?

⁷ Zaabr ning a Zeezi sẽn wilg b sẽn tog n tẽegd a kũumã yell to-to wã, a pʋʋsa a Ba wã n kos-a t’a sõng a karen-biisã fãa tɩ b yɩ yembr wa yẽ ne a Ba wã sẽn yaa yembrã. (Karm-y Zã 17:20, 21.) A Zeova reega a Bi-nongrã kosgã. Rũndã-rũndã, neb milyõ-rãmb sẽn tigimd taab yʋʋmd fãa n tẽegd a Zeezi kũumã yaa kaset t’a Zeova nin-buiidã naaga taab yam a ye n tũud-a. Dũniyã gilli, b tigimda taab zĩis toɛy-toɛy baraarã. Yaa neb sẽn be tẽns toor-toore, tɩ b yĩn-kõbgã me pa yembr ye. Zĩis kẽere, b pa wae n yãt neb sẽn yaa yĩn-kõbg toor-toor sẽn tigimd taab tũudum yĩng ye. Baa a buud sã n mi n maane, sãnda getame tɩ pa zems ye. La tõnd sẽn naag taab yam a ye woto wã nooma a Zeova ne a Zeezi hal wʋsgo!

8. A Zeova ra pĩnd n vẽnega no-rɛɛs a Ezekɩyɛll t’a wilg bõe?

⁸ Tõnd sẽn yaa a Zeova nin-buiid sẽn tũud-a yam a yembrã pa lingd tõnd ye. A Zeova ra pĩnd n vẽnega no-rɛɛs a Ezekɩyɛll t’a wilg tɩ na n yɩɩ woto. A ra yeela a Ezekɩyɛll t’a rɩk raad a yiib n kolg taaba, tɩ lebg wa raoog a ye. Raoog a ye wã yaa a “Zʋʋda” buudã yĩnga, t’a to wã yaa a “Zozɛf” buudã yĩnga. (Karm-y Ezekɩyɛll 37:15-17.) B goma rẽ yell “Karemdbã sogsg” sẽn be yʋʋmd 2016 sẽoog kiuug Gũusg Gasgã pʋgẽ wã. B yeelame: “A Zeova kɩtame tɩ no-rɛɛs a Ezekɩyɛll pĩnd n togs tɩ Israyɛll nebã na n le leba Kãabg tẽngẽ wã, la tɩ b na n le naaga taaba, n lebg buud a yembre. A goamã wilgdame me tɩ Wẽnnaam nin-buiidã na n naaga taab yam a ye n tũ-a yaoolem wakatã.”

9. Kiristã kũumã tẽegr sasa, bõe la d ne tɩ wilgdẽ t’a Ezekɩyɛll sẽn da pĩnd n togsã pidsdame?

⁹ Yʋʋmd 1919 wã tɛka, a Zeova reng n sõnga sẽn paam-b vʋʋsem sõng zaeebã bilf-bilf tɩ b maneg b tũudmã n sigl sõma, la b naag taab yam a ye. Raoog ning sẽn yaa “Zʋʋda” buudã yĩngã makda bãmba. Tarẽ-n-tarẽ, sẽn saagd-b tɩ b na n wa vɩɩmda wakat sẽn kõn sa tẽngã zugã wa n sɩngame n naagd sẽn paam-b vʋʋsem sõng zaeebã. Raoog ning sẽn yaa a “Zozɛf” buudã yĩngã makda nin-bãmba. Sul a yiibã fãa lebga “bãgr a yembre.” (Zã 10:16; Zaka. 8:23) Yaa a Zeova meng n pʋlem t’a na n kɩtame tɩ raad a yiibã lebg bũmb a yembr yẽ nugẽ. (Eze. 37:19) Rũndã-rũndã, sul a yiibã fãa naaga taab noor a ye n tũud a Zeova. A Zeezi Kirist la b fãa Rĩmã. Yẽ la b sẽn boond a Ezekɩyɛll bãngr-gomdã pʋgẽ tɩ Wẽnnaam ‘tʋm-tʋmd a Davɩɩdã.’ (Eze. 37:24, 25) Yʋʋmd fãa, d sã n tigim taab n na n tẽeg Kiristã kũumã, d nee vẽeneg tɩ sul a yiibã yaa yam a yembre, wa a Ezekɩyɛll sẽn da pĩnd n togsã. La bõe la ned kam fãa tõe n maan tɩ d zems-n-taarã ra sãame, la pʋd n paasdẽ?

10. Bõe la d tõe n maan tɩ sõng tɩ d zems-n-taarã ket n paasdẽ?

¹⁰ Bũmb a ye d sẽn tõe n maan tɩ sõng tɩ Wẽnnaam nin-buiidã zems-n-taarã paasdẽ yaa d sẽn na n mao n bɩɩsd sik-m-menga. A Zeezi sẽn wa n be tẽngã zugã, a yeela a karen-biisã tɩ b segd n yɩɩ sik-m-mens rãmba. (Mat. 23:12) Dũniyã nebã nong n tagsdame tɩ b são b taabã. La tõnd sã n yaa sik-m-mens rãmba, d pa na n tagsd woto ye. D na n sakda saam-biis nins sẽn lʋɩt taoor tigingã pʋgẽ wã, la d tũud b sẽn yetã. Rẽ n na n sõng tɩ zems-n-taar kell n zĩndi. La sẽn yɩɩd fãa, d sã n yaa sik-m-mens rãmba, d na n taa Wẽnnaam  yam. Sɩd me, Biiblã yeta vẽeneg tɩ Wẽnnaam “kɩɩsda wuk-m-mens rãmbã, la b ningd sik-m-mens rãmbã zut barka.”—1 Pɩy. 5:5.

11. D sã n bʋgs tẽegrã burã ne divẽ wã sẽn makd bũmb ninsã, wãn to la na n sõng-d tɩ d mao tɩ tõnd zems-n-taarã paasdẽ?

¹¹ Bũmb a yiib-n-soab d sẽn tõe n maane, yaa d sẽn na n maag d yĩng n bʋgs tẽegrã burã la divẽ wã sẽn dat n yɛɛlgã. Yɩta sõma tɩ d maan woto tẽegrã ket tɩ rasem a wãna, la sẽn yɩɩd fãa, tẽegrã raar zaabre. (1 Kor. 11:23-25) Burã makda a Zeezi yĩngã sẽn pa tar yel-wẽndã, a sẽn kõ tɩ yɩ maoongã, tɩ divẽ wã makd a zɩɩmã. La d sã n mi burã la divẽ wã sẽn makd bũmb ninsã, rẽ bal pa sek ye. Yaa tɩlɛ tɩ d tẽeg tɩ Kiristã maoongã wilgdame t’a Zeova nonga tõnd ne nonglem sẽn ka to. Yaa rẽ yĩng la a sẽn tʋm a Biigã t’a wa ki tõnd yĩngã. Leb n wilgdame t’a Zeezi me nonga tõnd hal wʋsgo. Yaa rẽ la a sẽn sak n na n wa ki tõnd yĩngã. D sã n bʋgs b sẽn wilg tõnd b nonglem to-to wã, na n kɩtame tɩ tõnd me rat n nong-b ne d sũy fãa. Tõnd ned kam fãa me sẽn nong a Zeova wã, na n kɩtame tɩ d maneg n nong taaba, tɩ d zems-n-taarã paasdẽ.

12. Bõe la a Zeezi yeel a yel-bũndã pʋgẽ, tɩ wilgd vẽeneg t’a Zeova ratame tɩ d sakd n kõt d taabã sugri?

¹² Bũmb a tãab-n-soab d sẽn tõe n maane, yaa d sẽn na n sakd n kõt d taabã sugri. D to sã n beeg-d tɩ d sak n kõ-a sugri, d wilgdame tɩ d sũur nooma ne a Zeova, a sẽn kɩt tɩ tõnd mengã tõe n paam d yel-wẽnã sugr Kiristã maoongã maasem yĩngã. Matye 18:23-34 pʋgẽ, a Zeezi wẽ yel-bũndi, n na n wilg d sẽn segd n kõt d taabã sugrã võore. Karm-y yel-bũndã la y sok y meng yaa: ‘Mam data ne m sũur fãa n tũ a Zeezi sẽn yeelã bɩ? M yaa wʋmda, la m maand sũ-mar ne m tẽed-n-taasã bɩ? Ned sã n beeg-ma, m sakd n kõ-a-la sugr bɩ?’ Yaa sɩd tɩ beegrã bee taab pʋsẽ. D sẽn pa zems zãngã, beegr ning tõe n zab-d lame, hal tɩ yɩl n kõ sugrã pa nana ye. La a Zeezi yel-bũndã wilgda a Zeova sẽn dat tɩ d maanã. (Karm-y Matye 18:35.) A Zeezi wilga  vẽeneg tɩ bʋʋm sã n be sẽn sek d na n kõ d to sugri, tɩ d yaool n zãgse, a Zeova me pa na n kõ-d sugr ye. Yɩta sõma tɩ d bʋgs rẽ zug neere. Sẽn na yɩl tɩ d zems-n-taarã ra sãame, d segd n tũu a Zeezi sẽn yeelã, n sakd n kõt d taabã sugri.

13. D sã n maood tɩ laafɩ be tõnd ne d taabã sʋka, wãn to la sõngd tɩ d zems-n-taarã paasdẽ?

¹³ D sã n sakd n kõt sugri, d wilgdame tɩ d ratame tɩ laafɩ zĩnd tõnd ne d tẽed-n-taasã sʋka. D tẽeg tɩ tʋm-tʋmd a Poll sagla kiris-nebã tɩ b ‘mao tɩ Sɩɩg-sõng lagem-n-taar zĩndi, laafɩ ning sẽn loe-a bãmb ne taabã yĩnga.’ (Efɛ. 4:3) Tẽegrã sã n wa kolgdẽ, la sẽn yɩɩd fãa, tẽegrã raar zaabre, yɩta sõma tɩ d maag d yĩng n tags n ges d yel-manesmã ne d taabã sẽn yaa to-to wã. D sok d meng yaa: ‘Rẽ yĩnga, yaa vẽeneg ne m taabã tɩ mam yaa sugr soaba, n pa bĩngd wẽng b sẽn maan-m m sũurẽ bɩ? B neeme tɩ m maooda sẽn na yɩl tɩ laafɩ la zems-n-taar kell n zĩnd d sʋk bɩ?’ Segdame tɩ d sɩd maag d yĩng n bʋgs sogs-kãensã zug neere.

14. Bõe la d tõe n maan tɩ wilgdẽ tɩ d ‘sakd n deegda taab ne nonglem’?

¹⁴ Bũmb a naas-n-soab d sẽn tõe n maane, yaa d sẽn na n dɩk a Zeova togs-n-taar nonglmã wɛɛngẽ. (1 Zã 4:8) D pa rat n wa tagsdẽ tɩ baa d segd n nong d tẽed-n-taasã, pa tɩlɛ tɩ d nong b zĩigẽ ye. D sã n wa tagsd woto, pa zems ye. Bala, a Poll sagla kiris-nebã tɩ b “sak n deeg taab ne nonglem.” (Efɛ. 4:2) A Poll pa yeel bal tɩ d “sak n deeg taab” ye. A paasame tɩ segd n yɩɩ ne “nonglem.” Võorã pa yembr ye. Neb buud toor-toor n be d tigimsã pʋsẽ, la yaa a Zeova n sõng b fãa tɩ b wa tũud-a. (Zã 6:44) Rẽ wã, sãmbg kae t’a yãa bũmb b ned kam fãa nengẽ sẽn kɩt t’a nong-a. A Zeova sã n nonga d tẽed-n-taasã fãa, tõnd na n yɩɩ wãn n yãk d tẽed-n-taag ninga, n tagsdẽ t’a pa segd ne tõnd nonglem? Yaa tɩlɛ tɩ d nong d tẽed-n-taasã fãa wa a Zeova sẽn datã.—1 Zã 4:20, 21.

15. Bõe n wilgd tɩ wakat n wat tɩ d pa na n le wa maand a Zeezi kũumã tẽegre?

¹⁵ Wakat n wat tɩ d pa na n le wa maand a Zeezi kũumã tẽegr ye. Bõe n wilgd rẽ? A Poll ra yeela Korẽnt kiris-nebã sẽn paam vʋʋsem sõngã zaeebã tɩ b sẽn tẽegd a Zeezi kũumã yʋʋmd fãa wã, b moonda a kũumã ‘hal t’a lebg n wa.’ (1 Kor. 11:26) A Zeezi sẽn wa n wilgd yɛl nins sẽn na n zĩnd dũniyã yaoolem wakatã, a goma yẽ waoongã yell me. A goma bũmb a ye sẽn na n maan to-kãsengã sasa, n yeel yaa: ‘Ninsaal Bi-riblã bãnd na yaool n puk saasẽ. Buud nins fãa sẽn be dũniyã zugã neb na n wiisame, la b na n yãnda Ninsaal Bi-riblã sẽn zao sawat n wat ne pãn-kãsenga la ne ziiri. Bãmb [a Zeezi] na n tʋma b malegs ne baor-kẽeng koe-kãsenga, tɩ b tigs bãmb nin-tũusdsã sẽn be kɩrems a naasã, hal yaang la nin-taoore.’ (Mat. 24:29-31) ‘Nin-tũusdsã tigsgã’ yaa sasa ning b sẽn na n tall sẽn paam-b vʋʋsem sõngã zaeeb n ket tẽngã zugã fãa n kẽng saasẽ wã. Na n yɩɩ to-kãsengã sɩngr poore, la nanand tɩ Armagedõ zabrã sɩnge. Rẽ zugẽ, sẽn paam-b vʋʋsem sõngã zaeebã bãmb 144000 fãa na n naaga a Zeezi n zab n tõog dũniyã nanambsã. (Vẽn. 17:12-14) A Zeezi kũumã tẽegr ning d sẽn na n maan nand t’a “wa” tall sẽn paam-b vʋʋsem sõngã zaeeb n kẽng saasẽ wã n na n yɩ yaoolem soaba.

16. Bõe yĩng tɩ y rat n maan y sẽn tõe fãa n kẽng a Zeezi kũumã tẽegre?

¹⁶ D modg n kẽng Kiristã kũumã tẽegr yʋʋmd 2018 tʋʋlg kiuug rasem 31 wã. Bɩ d ned kam fãa kos a Zeova t’a sõng-a t’a maand a sẽn tõe fãa sẽn na yɩl tɩ d ket n tũud-a yam a ye. (Karm-y Yɩɩn-sõamyã 133:1.) D tẽeg tɩ wakat n wat tɩ d pa na n le wa maand tẽegrã ye. La nananda, d wilgd tɩ d sẽn paam n naagd taab yam a ye yʋʋmd fãa n tẽegd a Zeezi kũumã noom-d-la wʋsgo.