1, 2. Bõe la a Sʋɩtãan maan-yã, tɩ wãad ãdem-biisã n yɩɩd bũmb fãa?

BŨMB kẽer bãngdbã sẽn yiis manega ninsaalbã vɩɩm. Wala makre, telefõnnã, ãmpull-rãmbã, mobilsã, firgo-rãmbã, la bũmb a taaba. La bũmb kẽer me wãada nebã. Wala makre, bug-raadã, bõmb-dãmbã, sɩgaarã. La bũmb a ye n sɩng n be hal sẽn kaoose, t’a sẽn wãad ãdem-biisã to-to wã yɩɩd bũmb fãa. Bõe la rẽ? Yaa ziri wã! B sã n yeel tɩ ned yaga ziri, rat n yeelame t’a yeela bũmb a sẽn mi tɩ pa sɩda, n na n belg a to. Ãnd n yɩ pipi n yag ziri? Yaa a Sʋɩtãana. A Zeezi Kirist bool-a lame tɩ “zĩrẽ wã ba.” (Karm-y Zã 8:44.) A sɩnga ziri wã wakat bʋgo?

² Yaa yʋʋm tusa masã. Yɩɩ Edɛn zẽedã zĩigẽ. A Zeova ra naana d yaab a Ãdem ne a Awa, n ning-b zẽedã zĩigẽ, tɩ b vɩɩmã ra be yamleoogo. Wẽnnaam da yeel-b lame tɩ b sã n yãk “tɩɩg ning sẽn kɩtd tɩ ned bãng wẽnga, ne sõmb n bakã biis” n dɩ, b na n kiime. Baa ne a Sʋɩtãan sẽn da mi rẽ wã, a tũnuga ne waaf n yeel a Awa yaa: “Yãmb ka na n tol n ki ye!” Pipi ziri wã la woto. Rẽ poore, a paasame yaa: “Wẽnnaam miime, tɩ yãmb sã n dɩ tɩɩgã bil daare, yãmb yamã na n wekame tɩ yãmb lebg wa Wẽnnaam n mi sõama ne wẽng n bake.”—Sɩng. 2:15-17; 3:1-5.

3. Bõe yĩng tɩ d yetẽ t’a Sʋɩtãan sẽn yag ziri wã yaa sẽn na n wã a Awa?

³ A Sʋɩtãan sẽn yag ziri wã yaa sẽn na n wã a Awa. Bala, a ra  miime t’a sã n tẽ yẽ ziri wã n dɩ tɩɩgã bilã, a na n kiime. Baasa wãna? A Ãdem ne a Awa kɩɩsa a Zeova noorã, n wa baas n ki. (Sɩng. 3:6; 5:5) Sẽn yaa wẽng n yɩɩd menga, yel-wẽndã kɩtame “tɩ nebã fãa kiidẽ.” Sɩd me, kũumã lebga wa naaba, n so hal ‘baa neb nins sẽn ka beeg a Ãdem beegrã buudã.’ (Rom. 5:12, 14) Rẽ n so tɩ tõnd yaa neb sẽn pa zems zãnga, n pa tõe n vɩɩmd wakat sẽn kõn sa wa Wẽnnaam sẽn da ratã ye. Tõnd “yʋʋmã sõor ka yɩɩd pis-yopoe ye. La yĩns kelem sã n beẽ, a tata pis-nii.” Rẽ me, yaa “namsg la nimbãaneg bala.” (Yɩɩn. 90:10) Woto fãa yaa a Sʋɩtãan ziri wã yĩnga!

4. a) Sogs-bʋs leoor la d segd n bao n bãnge? b) Yɩɩn-sõamyã 15:1, 2 wã wilgdame tɩ yaa nin-bʋg buud n tõe n yɩ a Zeova zoa?

⁴ A Zeezi ra yeelame t’a Sʋɩtãan ‘ka pa sɩd pʋgẽ, sɩd sẽn ka be yẽnda pʋgẽ wã yĩnga.’ Hal ne rũndã, sɩd ka be a Sʋɩtãan pʋgẽ ye. Bala, a ket n yaa a “soab ning sẽn belgd tẽngã zĩig ning fãa neb sẽn be wã nebã.” (Vẽn. 12:9) La tõnd pa rat t’a Sʋɩtãan tõog n belg-d ye. Rẽ n so tɩ d segd n bao n bãng sogsg a tãab leoore: Wãn to la a Sʋɩtãan maand n belgd nebã? Bõe yĩng tɩ nebã nong n yagd ziri? Bõe la d tõe n maan n yɩ sɩd rãmb wakat fãa, n da wa kong a Zeova zoodã wa a Ãdem ne a Awa?—Karm-y Yɩɩn-sõamyã 15:1, 2.

5. Wãn to la a Sʋɩtãan maand rũndã-rũndã n belgd nebã?

⁵ Tʋm-tʋmd a Poll ra miime tɩ tõnd tõeeme tɩ ‘Sʋɩtãanã ra wa tõog tõndo, bala, tõnd mii a Sʋɩtãan sɩlmã.’ (2 Kor. 2:11) Tõnd miime tɩ dũniyã zãnga, rat n yeel tɩ tũudum nins sẽn pa togsd sɩdã, politikã sẽn pid ne pʋ-likã, la ligdã baoob siglsã sẽn yaa rat-wʋsg rãmbã fãa bee a Sʋɩtãan nugẽ. (1 Zã 5:19) Rẽ n so t’a Sʋɩtãan ne a zĩn-dãmbã sẽn pirsd dũniyã nin-bɛdã tɩ b nong ziri la zãmbã pa lingd tõnd ye. (1 Tɩm. 4:1, 2) Wala makre, ligd-baoodbã kẽer yagda ziri b piblisite-rãmbã pʋgẽ, n na n paam n koos teed b sẽn mi tɩ tõe n maana ned yelle, wall b sẽn dat n belg nebã n dees b ligdã yĩnga.

6, 7. a) Bõe yĩng tɩ d yetẽ tɩ tũudmã taoor dãmb ziri wã n tolg n yaa yell n yɩɩda? b) Togs-y bũmb y sẽn wʋm tɩ tũudmã taoor dãmb zãmsd nebã, tɩ yaool n yaa ziri.

⁶ Tũudmã taoor dãmb ziri wã n tolg n yaa yell n yɩɩda, bala tõe n kɩtame tɩ sẽn tẽed-b bãmb goamã wa kong vɩɩm sẽn ka sɛtã. Ned sã n tẽ bũmb b sẽn zãms-a tɩ yaool n yaa ziri, n maan Wẽnnaam sẽn kisi, tõe n kɩtame t’a pa paam vɩɩm sẽn kõn sa wã ye. (Ooze 4:9) A Zeezi ra miime t’a wakatẽ tũudmã taoor dãmb ra belgda nebã. A yeel-b-la vẽeneg yaa: “Yãmba, tõog karen-saam-dãmba, la Fariizẽ-dãmb sẽn yaa zãmb dãmba, yãmb na paam toogo!” A wilga b sẽn na n paam toogã võore. A yeelame tɩ b ‘saagda ko-kãsengã ne tẽngã fãa n baood ned sẽn na sak bãmb kaorengã,’ la tɩ b sã n paam neda, b kɩtdame t’a lebg “wẽng n yɩɩd bãmb naoor a yiibu,” n tog ne sãoong wakat sẽn kõn sa yĩnga. (Mat. 23:15) A Zeezi pʋd n yeela a wakatẽ tũudmã taoor dãmb tɩ b yaa wa b ba a Sʋɩtãan sẽn yaa ‘nin-kʋʋdã.’—Zã 8:44.

⁷ Tũudmã taoor dãmb yaa ka tɛk rũndã-rũndã, tɩ b yʋyã me yaa ka tɛka. Prɛtr-dãmba, pastɛɛr-dãmba, la yʋy a taaba. Wa fariziẽ-rãmbã, bãmb me yagda ziri, n belgd nebã. B “teka Wẽnnaam yellã sẽn yaa sɩdã ne zĩrẽ.” (Rom. 1:18, 25) Ad bũmb kẽer b sẽn zãmsd nebã tɩ yaool n yaa ziri: Sẽn tẽed-a a Zeezi zoe n paama fãagre, ninsaal tara sɩɩg sẽn pa kiidi, Wẽnnaam  sɩbgda nebã bug-tẽnga, rao ne rao wall pag ne pag sã n kẽed ne taaba, wall b tolg n kẽ kãadem ne taaba, pa wẽng Wẽnnaam nifẽ ye.

8. Bõe la politikã rãmb na n wa yeel ka la bilfu, tɩ yaool n yaa ziri, la d manesem segd n yɩɩ wãna?

⁸ Politikã rãmb me yagda ziri, n belgd nebã. Bũmb a ye b sẽn na n togs tɩ yaool n yaa ziri meng-menga, yaa b sẽn na n wa yeel ka la bilf tɩ b tõogame tɩ dũniyã zug lebg “laafɩ la bãanã.” La “wakat-kãng la sãoong na n ling bãmba.” D ra bas tɩ politikã rãmb belg-d tɩ d wa tẽed tɩ bũmba fãa yaa sõma, la tɩ yell kae ye. Tõnd “mii sõama tɩ Zu-soabã waoong na n yɩɩ wa wagdr sẽn wat yʋngo.”—1 Tes. 5:1-4.

9, 10. a) Bõe yĩng tɩ nebã nong n yagd ziri, la wata ne bõe? b) Bõe la d pa segd n yĩmi?

⁹ Bãngdbã sã n yiis te-paalle, tarẽ-n-tarẽ, a wat n bee zĩig zãnga. Woto me, ziri wã lebga nebã minung zĩig fãa. Pa nebã sẽn get-b rãmb wa nin-bɛdã bal n yagd ziri ye. Sebr a ye pʋgẽ, b wilgame tɩ neb wʋsg tagsdame tɩ ninsaal pa tõe n pa mi n yag ziri ye. Nebã nong n yagda ziri n na n gil yelle, wall n paam bũmb kẽere. Wala makre, b yagdame n na n solg b kongr bɩ bũmb b sẽn maan tɩ yaa wẽnga, pa rẽ bɩ n na n paam ligd bɩ bũmb a to. B wilga sebrã pʋgẽ me tɩ neb n be n yagd ziri nana-nana, yel-bõones la yel-bɛd pʋgẽ. B sã n gomd ne b zo-rãmba, b tʋmd-n-taase, b zakã rãmba, la neb b sẽn pa mi, ziri wã yagb pa toog ne-b ye.

¹⁰ Nebã sẽn nong n yagd ziri woto wã, wata ne bõe? Kɩtame tɩ nebã pa le kɩs taab sɩd ye. Sãamda zood la zems-n-taar me. D rɩk makr ne pag sẽn na n zãmb a sɩda, n bas n yag ziri n na n solg yellã. Tags-y n ges-y a sɩdã sũur sẽn na n sãam to-to, a sã n wa bãnge! Pa rẽ bɩ y tags n ges rao sẽn na n namsd a pagã ne a kambã, t’a sã n wa be neb sʋk bɩ a yaool n maand wa a yaa rao sẽn nong a zak rãmba. D ra yĩm tɩ neb a woto tõe n belga b taabã, la b pa tõe n belg a Zeova ye. Bala “bũmb fãa yaa vẽenes la bɛɛl” a Zeova taoore.—Ebre. 4:13.

11. A Ananias ne a Safɩra kibarã wilgda tõnd bõe? (Ges-y sõsgã sɩngrẽ fotã.)

¹¹ Pipi kiris-nebã wakate, rao a ye ne a pag n bas t’a Sʋɩtãan “soog” b sũurã hal tɩ b yag ziri n na n zãmb Wẽnnaam, tɩ b kibarã be Biiblã pʋgẽ. Yaa a Ananias ne a Safɩra. B bao n na n belga tʋm-tʋmdbã. B koosa b pʋʋgo, n yãk ligdã n kõ tʋm-tʋmdbã. La b sẽn da rat tɩ b tẽed-n-taasã pẽg-bã yĩnga, b yeela tʋm-tʋmdbã tɩ yaa pʋʋgã ligd fãa la b sẽn kõ wã. A Zeova yẽ ra miime tɩ b yaga ziri. A sɩbg-b-la rẽ yĩnga.—Tʋʋ. 5:1-10.

12. Bõe n na n paam ziri-n-be-neb nins sẽn pa rat n tek yamã, la bõe yĩnga?

¹² A Zeova tagsg yaa wãn ne ziri-n-beedo? A Sʋɩtãan ne neb nins fãa sẽn yagd ziri n na n wã b taabã, la b pa rat n tek yamã na n wa baasa ‘bugum mogrã’ pʋgẽ. (Vẽn. 20:10; 21:8; Yɩɩn. 5:7) Bõe yĩnga? Bala a Zeova sõdga ziri-n-be-nebã n naag “ninsaan-baasã,” rat n yeel tɩ neb nins tʋʋm sẽn yaa wẽns wʋsg a nifẽ wã.—Vẽn. 22:15.

13. Bõe la d mi a Zeova zugu, la kɩtame tɩ d modgd n maand bõe?

¹³ D miime t’a Zeova “ka ninsaal n yagd zĩrẽ ye.” A pʋd n “ka tõe n yag zĩrẽ” ye. (Sõd. 23:19; Ebre. 6:18) A Zeova kisa “zelemd sẽn gomd zĩrẽ goamã.” (Yel. 6:16, 17) D sã n dat n ta a yam, yaa tɩlɛ tɩ d togsd sɩd wakat fãa. Rẽ n so tɩ d pa ‘yagd taab zĩrẽ’ ye.—Kol. 3:9.

14. a) Bõe n kɩt tɩ kiris-neb hakɩɩkã yaa toor ne tũudum nins sẽn yaa ziri wã nebã? b) Wilg-y Luk 6:45 goamã võore.

¹⁴ Bũmb a ye sẽn kɩt tɩ kiris-neb hakɩɩkã yaa toor ne tũudum nins sẽn yaa ziri wã nebã, yaa d sẽn ‘gomd sɩd ne taabã.’ (Karm-y Zakari 8:16, 17.) A Poll ra yeelame tɩ “bũmb fãa pʋga tõnd wilgdame tɩ tõnd yaa Wẽnnaam tʋmtʋmdba,” n togsd “koɛɛg sẽn yaa sɩda.” (2 Kor. 6:4, 7) A Zeezi yeelame tɩ “yaa bũmb ning sẽn pid sũurã n yit noorẽ wã.” (Luk 6:45) Woto wilgdame tɩ nin-sõng sã n gomda, a togsda sɩd wakat fãa, bala yita a sũurẽ. A sã n gomd ne a zo-rãmba, a tʋmd-n-taase, a zakã rãmb la baa a sẽn pa mi-b rãmbã, a pa yagd ziri ye. A togsda sɩd yel-bɛd la yel-bõones pʋgẽ. Woto wã, bõe la d tõe n maan tɩ wilg tɩ d sɩd maoodame n na n yɩ sɩd rãmb bũmb fãa pʋgẽ? Bɩ d ges bũmb a wãna.

15. a) Ned sã n maand kuus-kuusi, n solgd n maand sẽn pa segde, bõe yĩng tɩ pa sõma? b) Bõe n tõe n sõng kom-bɩɩsã tɩ b ra wa tũ b rog-taasã raabo? (Ges-y vẽnegrã.)

¹⁵ La y sã n yaa bi-bɩɩga, n dat tɩ y rog-taasã nong y zĩigẽ? Gũus-y tɩ rẽ ra wa kɩt tɩ y lebg ned sẽn maand kuus-kuus wa kom-bɩɩs kẽere, n solgd n maand sẽn pa segd ye. B zakã rãmb la tigingã neb sʋka, b yaa wa neb sẽn pa tar yelle, tɩ b sã n yaool n wa be ne kom-bɩɩs sẽn pa tũud a Zeova, wall b be reezo sosiyo rãmbã zug bɩ b yaa toor fasɩ. B gomda gom-yoodo, n yelgd fu-yoodo, n kelgd mizik-yoodo, n yũud rãam n suuda, n yũud dorge, n soosd n baood pʋg-sadb wall rapa, pa rẽ bɩ n maand yɛl wẽnem sẽn yɩɩd rẽ. Woto wã, pa pʋ-peelem la b maand ne b roagdbã, ne b tẽed-n-taasã, la ne a Zeova ye. (Yɩɩn. 26:4, 5) D sã n waoogd a Zeova ne d “nobɩms bala,” tɩ d sũurã yaool n zãr ne-a, a miime. (Mark 7:6) D tũ saglg b sẽn kõ yel-bũn sebrã pʋgẽ tɩ rẽ n são. Ad b sẽn yeele: “Da maan sũ-kiir ne yel-wẽn-maandbã ye, la bɩ f zoe Sẽn-Ka-Saab daar fãa.”—Yel. 23:17. *

16. B sã n kõ-d sebr tɩ d na n gʋls n kos n kẽes d meng Wẽnnaam tʋʋmd ning pʋgẽ, bõe yĩng tɩ d segd n togs sɩda?

¹⁶ Y sã n dat n kos n lebg wakat fãa so-pakda, bɩ n kẽes y meng zãng-zãng Wẽnnaam tʋʋmdã pʋgẽ, wala makre, n lebg Betɛllẽ tʋm-tʋmda, sebr la b kõt-y tɩ y gʋlse. Segdame tɩ y sẽn na n gʋls bũmb  ninsã fãa yɩ sɩda. Y yĩnsã keelem wɛɛngẽ, reem nins y sẽn nongã wɛɛngẽ, la y sẽn zãad y meng to-to wã wɛɛngẽ. (Ebre. 13:18) La y sã n da maana bũmb a Zeova sẽn kisi, tɩ y sũur-kasetã ningd-y taale, tɩ y yaool n pa togs kãsem-dãmbã? Sã n yaa rẽ bɩ y kos b sõngre, n paam n tũ a Zeova ne sũur-kaset sẽn yaa sõma.—Rom. 9:1; Gal. 6:1.

17. Neb sẽn namsd tõnd d tũudmã yĩng sã n dat tɩ d togs-b yɛl kẽer d tẽed-n-taasã zugu, bõe la d segd n maane?

¹⁷ La yãmb tẽngã taoor dãmb sã n gɩdg a Zeova Kaset rãmbã tʋʋmdã, tɩ polɩɩs-rãmbã yõk yãmba, n dat tɩ y togs yɛl kẽer y tẽed-n-taasã zugu, y maanda wãna? Y na n togs-b-la y sẽn mi wã fãa bɩ? B sẽn yõk a Zeezi n kẽng guvɛrneerã taoore, tɩ guvɛrneerã sok-a sogsgã, a Zeezi manesem yɩɩ wãna? A tũu Biiblã sẽn wilg tɩ “sĩndim wakat beeme,” la tɩ “goam wakat me beeme” wã. Wakat ninga, a pa leok gomd baa a yembr ye. (Koɛ. 3:1, 7; Mat. 27:11-14) Yell a woto pʋgẽ, yaa tɩlɛ tɩ d tall yam la d maan gũusg wʋsgo, n da wa bao yell n kõ d tẽed-n-taasã ye.—Yel. 10:19; 11:12.

18. Kãsem-dãmbã sã n wa sok tõnd yɛl kẽer d tẽed-n-taag zugu, bõe la d segd n maane?

¹⁸ La tigingã ned sã n maan yel-wẽn-kãseng tɩ tõnd bãnge, d maanda wãna? Sẽn mik tɩ yaa kãsem-dãmbã n segd n gũus tɩ sẽn yaa wẽng ra wa maand tigingã pʋgẽ wã, b tõe n wa soka tõnd n na n paam vẽenem. Bõe la y na n maane, sẽn yɩɩd fãa yellã soab sã n yaa y zoa wall y zakã neda? Biiblã yetame tɩ “sẽn togsd-a sɩd kɩta tɩrlem kaseto.” (Yel. 12:17; 21:28) Rẽ n so tɩ y segd n togs sɩdã zãnga, n da togs n kelle, wall n golem yellã ye. Segdame tɩ kãsem-dãmbã bãng sɩdã yellã zugu, n tõog n ges b sẽn na n maan to-to n sõng a soabã sõma t’a lebs n maneg yẽ ne a Zeova zoodã. —Zak 5:14, 15.

19. Bõe yell la d na n gom sõsg ning sẽn pʋgdã pʋgẽ?

¹⁹ Yɩɩn-gʋlsd a Davɩɩd ra pʋʋsa a Zeova, n yeel yaa: “Bũmb ning sẽn noom yãmba, yaa sɩd sẽn be ninsaal sũ-zulungẽ.” (Yɩɩn. 51:8) A Davɩɩd ra miime tɩ d sã n dat n yɩ sɩd rãmba, d sũurẽ wã la sɩngda. Bũmb fãa pʋgẽ, kiris-neb hakɩɩkã ‘gomda sɩd ne taaba.’ D sã n togsd sɩdã koɛɛg sẽn be Biiblã pʋgẽ wã, rẽ me wilgdame tɩ d yaa Wẽnnaam tʋm-tʋmdba, n pa wõnd tũudum nins sẽn yaa ziri wã nebã ye. Sõsg ning sẽn pʋgdã pʋgẽ, d na n goma d sẽn tõe n maan rẽ to-to wã.