1. A Zeova basa ned kam fãa t’a tõe n maan bõe?

A ZEOVA basame tɩ d tõe n yãk d sẽn na n maaneg d vɩɩmã pʋgẽ. A wilgda tõnd d sẽn tõe n maan to-to n yãkd yam-sõma, tɩ d sã n yãk yam n na n maan sẽn noom-a, bɩ a sõng-d tɩ d tõog tɩ pidsi. (Yɩɩn. 119:173) D sã n wɩngd n tũud Wẽnnaam Gomdã saglse, d wat n tõogd n yãkda yam-sõma.—Ebre. 5:14.

2. D sã n yãk yam n na n maan bũmbu, bõe n tõe n yɩ toog ne-do?

² Baa d sã n yãk yam n na n maan bũmb sẽn yaa sõma, d tõe n sɩngame, tɩ yɩl n baasã lebg toogo. Ad makr a wãna: Saam-biig sẽn yaa bi-bɩɩg n yãk yam n na n karem Biiblã tõre. A sɩd sɩngame, n maan semen a wãna, n wa base. Saam-bi-poak n yãk yam n na n lebg so-pakda, la wakat fãa a yetame t’a na n basame tɩ yɩ bilfu. Kãsem-dãmb sull n yãk yam n na n wɩngd ne tigingã neb kaagre, la maana kiis wʋsg tɩ b ket n nan pa sɩng ye. Makr a tãabã pa wõnd taab ye. La bũmb la b fãa pa tõog n maane. B pa tõog n baas b sẽn yãk yam n na n maanã ye. A buud paama pĩnd wẽndẽ Korẽnt tigingã neba. Yam-bʋg la d tõe n dɩk b kibarã pʋgẽ?

3. Bõe la Korẽnt kiris-nebã yãk yam n na n maane, la bõe n maane?

³ Yʋʋmd 55 wã sẽnese, Korẽnt kiris-nebã yãka yam n na n maan bũmb sẽn tar yõod wʋsgo. B wʋmame tɩ b tẽed-n-taasã sẽn be Zerizalɛm la Zide wã namsdame, n be far pʋgẽ, tɩ tigims kẽer tigsd ligd n na n sõng-ba. B sẽn dat n maan Korẽnt kiris-nebã neer la b yɩ kõtbã yĩnga, bãmb me  yãka yam n na n tigs ligd n kõ-ba. La b soka tʋm-tʋmd a Poll n na n bãng b sẽn tõe n maan to-to. A Poll kõo tigingã neb sagls rẽ wɛɛngẽ, la a yãk a Tɩt t’a na n sõng ne ligdã reesgo. (1 Kor. 16:1; 2 Kor. 8:6) La kiis a wãn poore, a Poll wʋmame tɩ Korẽnt kiris-nebã pa pids b sẽn yãk yam ningã ye. Wakat ning b sẽn tog n tool tigims a taabã sẽn tigs ligd ningã Zerizalɛmmã sã n ta, wõnda b pa na n paam bãmb dẽndã n naag ye.—2 Kor. 9:4, 5.

4. 2 Korẽnt rãmb 8:7, 10, 11 wã pʋgẽ, a Poll wilga Korẽnt kiris-nebã tɩ b segd n maana bõe?

⁴ Korẽnt kiris-nebã sẽn yãk yam ningã yaa sõma. A Poll pẽg-b-la b tẽebã sẽn tar pãngã yĩnga, la b sẽn modgd n na n yɩ kõatbã me yĩnga. La ra yaa tɩlɛ t’a wilg-b tɩ b segd n modg n baasa bũmb ning b sẽn sɩngã. (Karem 2 Korẽnt rãmb 8:7, 10, 11) Kiba-kãnga wilgdame tɩ baa kiris-ned hakɩɩk tõe n yãka yam n na n maan bũmb sẽn yaa sõma, tɩ wa lebg toog t’a tõog n pids a yam-yãkrã.

5. Sogs-bʋs la d na n leoke?

⁵ Wa sẽn yɩ to-to ne Korẽnt kiris-nebã, tõe n yɩɩ toog ne tõnd me tɩ d tõog n pids bũmb d sẽn yãk yam n na n maane. Bõe yĩnga? D sẽn pa zems zãngã, d mi n dat n basame tɩ nindaare. Yel-lingdem me tõe n wa kɩtame tɩ d pa le tõe n pids d yam-yãkr ye. (Koɛ. 9:11; Rom. 7:18) D sã n da yãk yam, tɩ wa lebg tɩlɛ tɩ d toeeme, d maanda wãna? Bõe n na n sõng-d tɩ d tõogd n baasd d sẽn sɩnge?

6. Bõe n tõe n wa kɩt tɩ d segd n toeem d yam-yãkre?

⁶ Yam-yãkr kẽer la d pa tol n dat n toeeme. Wala makre, d sẽn yãk yam n na n tũ a Zeova wã, d rata ne d sũur fãa n kell n tall yam-kãnga. D sã n kẽe kãadem me, d maoodame n na n kell n maan sɩd ne d pagã wall d sɩdã. (Mat. 16:24; 19:6) La yam-yãkr kẽer yẽ la d mi n segd n toeeme. Bõe yĩnga? Bala yɛlã toeemdame. Sã n wa lebg tɩlɛ tɩ d toeem d yam-yãkre, bõe n na n sõng-d tɩ d tõog n yãk yam-sõngo?

7. D segd n pʋʋsd n kota bõe, la bõe yĩnga?

⁷ Pʋʋs-y n kos-y yam. A Zeova ra vẽnega karen-biig a Zak t’a yeel yaa: ‘Ned sã n be yãmb sʋkã tɩ yam paoog-a bɩ a kell n kos Wẽnnaam tɩ b na n kõ-a lame. Bala b kõta nebã fãa ne yamleoogo.’ (Zak 1:5) D tõe n yeelame tɩ ned kae tɩ yam pa mi n paoog-a yell ning pʋgẽ ye. Rẽ n so tɩ d teegd a Zeova d sã n wa rat n yãk yam, la d sã n wa segd n toeem d yam-yãkr me. A na n sõng-d lame tɩ d bãng n yãk d sẽn na n maanega.

8. D sã n dat n bãng n yãk yam, bõe la d segd n maan tɩ sõng-do?

⁸ Maan-y vaeesg sõma. Bao-y sagls Biiblã pʋgẽ, karem-y bũmb nins a Zeova siglgã sẽn yiis tɩ tõe n sõng-yã, la y gom ne ned y sẽn kɩs sɩda. (Yel. 20:18) Yaa tɩlɛ tɩ y maan woto, yam-yãkrã sã n yaa wa tʋʋmd toeeng wɛɛngẽ, zĩig toeengo, pa rẽ bɩ kareng y sẽn na n yãk n wa tõog n get y meng yell la y tʋmd Wẽnnaam tʋʋmdã.

9. D sã n yãk yam, bõe yĩng tɩ d segd n tags neer n bãng bũmb ning sẽn kɩt tɩ d yãk yam-kãngã?

⁹ Bʋgs-y-yã, n bãng y yam-yãkrã võore. A Zeova geta rẽ, bala a mii sẽn be sũurẽ. (1 Sãm. 16:7) Y sã n fees y menga, y na n bãnga y yam-yãkrã võore. La yaa tɩlɛ tɩ y tags neer n ges sã n sɩd yaa y sũurã raabo, wall sã n yaa bũmb a to. Sã n mik tɩ yaa y sũurã raabo, y maanda pʋ-peelem. La y yam-yãkrã sã n tika bũmb a to, zu-loees sã n wa beẽ, na n yɩɩ toog tɩ y baas y sẽn sɩngã. Wala makre, saam-biig sẽn yaa bi-bɩɩg tõe n yãka yam n na n yɩ so-pakda. La kiis a wãn poor bala, lebga toog ne-a t’a paam a lɛɛr-dãmbã,  tɩ tʋʋmdã pa le kõt-a sũ-noog woto ye. Bõe yĩnga? Tõe t’a tẽedame tɩ yaa a sẽn dat n ta a Zeova yamã la a sẽn yãk yam n na n lebg so-pakdã. Mik yaa a sẽn dat t’a roagdbã wall a tẽed-n-taag sũur yɩ noog ne-a.

10. Bõe n kõt ned pãng la raood t’a toeeme?

¹⁰ D rɩk makr ne Biibl karen-biig sẽn maood n na n bas sɩgaare. Sɩngrẽ wã, a na n maooda sõma. Semen bɩ semen a yiib poore, a tõe n wa konga pãng n le yũ. La tarẽ-n-tarẽ, a wat n tõogame! Bõe yĩnga? A sẽn nong a Zeova, n dat n ta a yamã na n sõng-a lame t’a paam raood n bas a minim-wẽngã.—Kol. 1:10; 3:23.

11. Bõe yĩng tɩ yaa tɩlɛ tɩ d yãk d sẽn dat n maanã takɩ?

¹¹ Yãk-y y sẽn dat n maanã takɩ. Naoor wʋsgo, yaa y sã n yãk y sẽn dat n maanã takɩ la y na n tõog n sɩd maan n baase. D rɩk makr wa y sẽn na n yãk yam n na n karemd Biiblã daar fãa. Y sã n pa yãk sasa ning y sẽn na n karmã takɩ, yaa toog tɩ y tõoge. * Tiging kãsem-dãmb me tõe n yãka yam n na n kaagd tigingã nebã naoor wʋsg n yɩɩd pĩndã. La kiis a wãn poore, b wat n mikame tɩ b pa tõog tɩ pids ye. B sã n dat n pids b yam-yãkrã, b segd n soka b mens yaa: “Rẽ yĩnga, d yãka sẽn pʋd n yaa saam-biis la saam-bi-pogs nins la d rat n tɩ kaagã bɩ? D yãka wakat ning d sẽn na n tɩ kaag-bã takɩ bɩ?”

12. Wakat ninga, yaa tɩlɛ tɩ d maan bõe, la yaa bõe yĩnga?

¹² Da mag-y tɩ yɩɩg y pãng ye. Ned kae n tar pãng bɩ sẽk la tõog n maand a sẽn dat fãa ye. Rẽ wã, mag-y n zems-y y tõogo, la y ra yɩ dem-dem ye. Wakat ninga, y sã n wa mik tɩ y yam-yãkr ning yɩɩda y nugu, y tõe n toeemame. (Koɛ. 3:6) La y sã n toeem y yam-yãkre, n lebs n maneg tɩ zems y sẽn tõe n pidsã, bõe n na n sõng-y tɩ y sɩd tõog n baas y sẽn sɩngã? D na n yãa bũmb a nu sẽn tõe n sõng-yã.

13. D maanda wãn n paam pãng la tõogo, n baas d sẽn sɩnge?

¹³ Pʋʋs-y n kos-y pãnga, n pids y yam-yãkrã. Wẽnnaam tõe n kõo yãmb “tõog sẽn na yɩl tɩ y maan” y sẽn yãk yam n na n maanã. (Fili. 2:13) Rẽ wã, kos-y-yã a Zeova a vʋʋsem sõngã, n paam pãng la tõogo. Baa sã n wõnd kaoosdame bɩ y we n wɩng ne kosgo. A Zeezi yeelame tɩ d ‘ket n kot’ vʋʋsem sõngã, tɩ b ‘na kõ-do.’—Luk 11:9, 13.

14. Wãn to la saglg ning sẽn be Yel-bũn 21:5 wã tõe n sõng-d tɩ d baasd d sẽn sɩnge?

¹⁴ Yãk-y y sẽn na n tũ sor ning tɩ pidsã. (Karm-y Yel-bũn 21:5.) Sẽn yaa tʋʋmd ning fãa la y sɩng-yã, yɩl n tõog n baase, yaa tɩlɛ tɩ y mag n yãk sor y sẽn na n tũ tɩ tʋʋmdã tõogã. Rẽ poore, yaa tɩlɛ tɩ y tũ sor ning y sẽn yãkã. Woto me, y sã n yãk y sẽn dat n maane, bɩ y yãk sor ning y sẽn dat n tũ wã. Sã n yaa tʋʋm-kẽeng bɩ y ges y sẽn tõe n maan bilf-bilf to-to n wa tõog tɩ pidsi. Rẽ, y sẽn maand bilf-bilf n neẽ tɩ kẽngda taoor wakat fãa wã, y na n nee y modgrã. A Poll sagla Korẽnt kiris-nebã tɩ “semennã pipi daar fãa,” bɩ b ned kam fãa yãk ligd n bĩng kɛɛnga, la a ra gũ yẽ waoongã n na n bao ligd n kõ ye. (1 Kor. 16:2) Baa yaa tʋʋm-kẽenga, y sã n bãng y sẽn tõe n maan bilf-bilf to-to n wa tõog tɩ pidsi, sõngdame tɩ y ra yɛɛs tʋʋmdã ye.

15. D sã n mag n yãk sor d sẽn na n tũ n pids d yam-yãkre, bõe me la d tõe n maan tɩ sõng-do?

¹⁵ Y sã n gʋls y sẽn magd n na n maanã ball-balle, tõe n sõngame tɩ y sɩd pids  y magbã. (1 Kor. 14:40) Wala makre, b sagenda kãsem-dãmbã tɩ b yãk b nin-yɛnga, tɩ wakat fãa bɩ yẽ gʋlsd b sẽn yãk yam n na n maanã, ned ning sẽn segd n ges tɩ pidsã, la b sẽn dat tɩ pids wakat ningã. Kãsem-dãmbã sull sã n tũud sagl-kãngã, b wae n pidsda b sẽn yãk yam n na n maanã. (1 Kor. 9:26) Yãmb me tõe n maanda woto y daar fãa tʋʋmã pʋgẽ. Y tõe n gʋlsa y sẽn tog n maan daarã pʋgẽ wã. La sɩng-y ne tʋʋm nins sẽn tar yõod n yɩɩdã. Rẽ na n sõngame tɩ y baasd y sẽn sɩng fãa, la sõng-y me tɩ y tʋm y tʋʋm wʋsgo.

16. Yɩl n tõog n baasd y sẽn sɩnge, bõe n yaa tɩlɛ, la wãn to la Rom dãmb 12:11 wã sɩd wilgd rẽ?

¹⁶ Nang-y pãnga. Yɩl n maan wa y sẽn magã, hal n wa pids y sẽn sɩngã, yaa tɩlɛ tɩ y nang pãnga. (Karm-y Rom dãmb 12:11) A Poll yeela a Tɩmote t’a “kell n wɩng” n bɩɩsd a tʋʋmã minim, la a ket n ‘wɩngd’ n na n yɩ karen-saamb-sõngo. D tõe n tũu sagl-kãngã a Zeova tʋʋmã fãa pʋgẽ.—1 Tɩm. 4:13, 16.

17. Wãn to la Efɛɛz rãmb 5:15, 16 sõngd tõnd tɩ d pids bũmb d sẽn yãk yam n na n maane?

¹⁷ Gũus-y tɩ sekã ra sãam ye. (Karm-y Efɛɛz rãmb 5:15, 16) Yãk-y y sẽn dat n maanã sẽn segd n kaoos to-to wã takɩ, la y modg n sɩd tũ rẽ. Sɩng-y la y ra yet tɩ y na n gũu sasa sẽn zems kɛpɩ, bala tõe tɩ sasa kãng kõn tol n zĩnd ye. (Koɛ. 11:4) Gũus-y tɩ bũmb kẽer yõod sẽn pa waoog ra rɩ y sẽkã la y pãngã, tɩ y pa le tõe n maan sẽn tar yõod n yɩɩdã ye. (Fili. 1:10) Sã n tõe bɩ y yãk wakat neb a taabã bɩ bũmb a to sẽn pa na n tiis-yã. Togs-y nebã tɩ y pa rat tiisg wakat kãng ye. Y tõe n kiisa y portaablã, la y yõk y meng hal n sa, n yaool n ges y mesaaz-rãmbã. *

18-19. D sã n yãk yam n na n maan bũmb sẽn yaa sõma, baa zu-loees wa n beẽ, bõe n na n sõng-d tɩ d ra koms raood n base?

¹⁸ Tagsd-y y sẽn na n baas y sẽn sɩngã yell n yɩɩda. Y sã n nan pidsd y yam-yãkre, yaa wa y sẽn togd sore, n maood n na n ta y sẽn datẽ wã. Y sã n sɩd rat ne y sũur fãa n ta, baa y wa n mik tɩ sorã pagame, tɩ yaa tɩlɛ tɩ y toeem sore, y na n saka rẽ. Woto me, sã n yaa y na baas y sẽn sɩngã yell la y tagsd n yɩɩda, baa zu-loees wa n beẽ me, y pa na n yɩ tao-tao n koms raood n bas ye.—Gal. 6:9.

¹⁹ Yɩl n bãng n yãk yam pa nana, la tõog n baas d yam-yãkr me tõe n yɩɩ toogo. La ne a Zeova sõngre, y tõe n paama yam, la y paam pãng la raood n baas bũmb ning fãa y sẽn sɩnge.