TẼEB kõta pɛl-kɛgenga. Wala makre, a Sʋɩtãan rat n sãama tõnd ne a Zeova zoodã, la tẽebã sõngdame tɩ d kokd a “pɛɛmã fãa sẽn wit bugmã.” (Efɛ. 6:16) Tẽebã yĩnga, d maooda ne yɛl sẽn wõnd tãmse. A Zeezi ra yeela a karen-biisã yaa: “Yãmb sã n tar tẽeb sẽn zem mutard bila, y na n yeela tãn-kãngã, ‘Serg ka n leb ka,’ la a na serge.” (Mat. 17:20) Tẽebã sẽn paasd tõnd ne a Zeova zoodã, yɩta sõma tɩ d bãng bũmb wʋsg tẽebã wɛɛngẽ. Wala makre, bõe n wilgd tɩ ned tara tẽebo? Bõe yĩng tɩ ned tẽeb be ne a sũurã sẽn yaa to-to? Bõe la d tõe n maan tɩ d tẽebã pãng paase? La ãnd dãmb la d segd n tẽ?—Rom. 4:3.

Tẽeb pa tek f sẽn na n tẽed Biiblã sẽn yetã, n miẽ tɩ rẽ la sɩdã ye. Bala, baa “zĩn-dãmbã me tẽedame [tɩ Wẽnnaam beeme,] la b rigd rabeem.” (Zak 2:19) Woto wã, bõe n wilgd tɩ ned tara tẽebo?

Biiblã wilgdame tɩ tẽeb yaa buk a yiibu. Pipi, “tẽeb yaa f sẽn na n kɩs sɩd tɩ f sẽn saagd n na n wa paam bũmb ningã na n pidsame.” (Ebre. 11:1a) Y sã n tar tẽebo, y na n kɩsa sɩd zãng t’a Zeova sẽn yeel fãa yaa sɩda, la tɩ pidsdame. A Zeova ra yeela Israyɛll nebã yaa: “Ned sã n tõog n sãam kaool ning mam sẽn maan tɩ be wĩntoog ne yʋng sʋka, tɩ wĩntoog ne yʋng ka leb n beẽ, woto me, kaool ning mam sẽn maan ne m tʋmtʋmd a Davɩɩdã na n sãamame.” (Zer. 33:20, 21) Yãmb zoe n tagsame tɩ wĩndgã pa na n le pukdẽ la a lʋɩtẽ, tɩ wĩndg la yʋng pa le beẽ bɩ? Y sã n kɩsa sɩd tɩ wĩndg la yʋng na n bee wakat fãa, y tõe n tags tɩ sẽn naanã rẽ fãa wã gomd na vaal sɩda? A bada!—Eza. 55:10, 11; Mat. 5:18.

Yiib-n-soaba, tẽeb yaa “kaset sẽn yaa vẽeneg f sẽn tare, tɩ wilgdẽ tɩ bũmb f sẽn pa ne sɩd beeme.” (Ebre. 11:1b) Bõe yĩng tɩ Biiblã yet woto? D rɩk makr ne biig sẽn na n sok yãmb tɩ bõe n wilgd tɩ pemsem beeme? Y zɩ n yã pemsem, la y na n sõng-a-la ne kaset sẽn wilgd tɩ beeme. Y tõe n goma pemsmã d sẽn vʋʋsdã yelle, sebgã sẽn kɩtd tɩ bũmb kẽer miimdẽ wã, la bũmb a taaba. Kaset-kãens tõe n sõnga biigã t’a sak n deeg tɩ pemsem sɩd beeme, baa sẽn pa tõe n yã ne nifã. Woto me, yaa d sã n tar kaset sẽn yaa vẽeneg la d na n tall tẽebo.—Rom. 1:20.

Sẽn mik tɩ yaa d sã n tar kaset sẽn yaa vẽeneg la d na n tall tẽebã, ned sã n dat n paam tẽebo, yaa tɩlɛ t’a “paam bãngr hakɩɩk” bũmb nins sẽn yaa sɩdã zugu. (1 Tɩm. 2:4) La rẽ bal pa sek ye. A Poll yeelame: “Yaa sũur pʋgẽ la ned tẽeda.” (Rom. 10:10) A soab pa tog n tẽ sẽn yaa sɩdã bal ye. A tog n nonga sɩdã me. Yaa rẽ bal n na n kɩt t’a modg t’a sẽn vɩ to-to wã zems ne sɩdã a sẽn bãngã, tɩ wilgd a tẽebã. (Zak 2:20) Ned sũur sã n pa noom ne sɩdã, baa a sã n mi vẽeneg tɩ yaa sɩda, a pa na n tũ ye. A na n ket n maanda yẽ sẽn tagsde, wall a baood padems n na n paam n pids a yĩngã ratem. (2 Pɩy. 3:3, 4; Ziid 18) Rẽ  n so la pĩnd wẽndẽ neb kẽer sẽn maan kaset ne yel-soalma, n baas n pa tall tẽebã. (Sõd. 14:11; Zã 12:37) Yaa neb nins bal sẽn nong sɩdã ne b sũur fãa wã la Wẽnnaam vʋʋsem sõngã sõngd tɩ b bɩɩs tẽebo.—Gal. 5:22; 2 Tes. 2:10, 11.

Neb n tall tẽeb sẽn tar pãnga, tɩ Biiblã gomd b yelle. Wala makre, rĩm a Davɩɩd. (Ebre. 11:32, 33) La pa a Davɩɩd ba-biisã fãa n tall a tẽebã buud ye. A Davɩɩd sẽn wa n yik a sũur a Golyat yellã poorẽ wã, a kẽem a Eliyaab zab-a lame, n yeel tɩ yaa yam-yoodo. Woto wilgdame t’a pa tall tẽeb ye. (1 Sãm. 17:26-28) Ned pa rogd ne tẽeb ye. Leb n pa a roagdb sẽn tar tẽeb yĩng la a na n tall tẽeb ye. Dẽnd yaa a Davɩɩd sẽn da tar zood sõma ne Wẽnnaamã la a sẽn tall tẽebã.

Yɩɩn-sõamyã 27 wã pʋgẽ, a Davɩɩd wilga sẽn sõng yẽ t’a tẽebã tall pãngã. (Vɛrse a 1) A bʋgsa bũmb kẽer a sẽn yã a vɩɩmã pʋgẽ, la a Zeova sẽn maan a bɛɛbã bũmb ningã. (Vɛrse a 2, 3) A sũur da nooma wʋsg ne sɛk-roogã sẽn yaa a Zeova waoogr zĩigã. (Vɛrse a 4) A ra kẽnda be n naagd a tẽed-n-taasã n waoogd Wẽnnaam. (Vɛrse a 6) A ra pelgda a pʋg n pʋʋsd a Zeova, n baood-a ne a sũur fãa. (Vɛrse a 7, 8) A ra ratame me tɩ Wẽnnaam zãms-a a noyã. (Vɛrse 11) A Davɩɩd nifẽ, tẽeb ra tara yõod wʋsgo, hal t’a sok tɩ yẽ yell yɩtẽ-la wãna, a sã n da pa tarẽ tẽebo?—Vɛrse 13, Traduction du monde nouveau.

Yãmb me sã n tall yam la minim-sõma nins yell a Davɩɩd sẽn gom Yɩɩn-sõamyã 27 pʋgẽ wã, y tõe n paama a tẽebã buudu. Sẽn yaa bãngr hakɩɩk n wat ne tẽebã, y sã n wɩngd ne Biiblã zãmsgo, la bũmb nins siglgã sẽn yiisd n wɛgsd Biiblã goamã me zãmsgo, na n yɩɩ nana tɩ y tall zʋg-sõng kãngã vʋʋsem sõngã sẽn sõngd ned t’a bɩɩsã. (Yɩɩn. 1:2, 3) Zãmsg fãa sasa bɩ y bʋgsdẽ. Ned pa tõe t’a sũur wa noom ne a Zeova sẽn yeele, a sã n pa bʋgs ye. Y sũurã sã n maneg n noom ne a Zeova, y na n dat n bɩɩsda y tẽebã. Rẽ na n kɩtame tɩ y tigimd ne y tẽed-n-taasã n waoogd-a, la y togsd neb a taabã bark nins y sẽn gũudã. (Ebre. 10:23-25) Bũmb sẽn wilgd me tɩ ned tara tẽebo, yaa a sẽn na n ‘pʋʋsd n pa basdẽ.’ (Luk 18:1-8) Rẽ wã, “pʋʋsd-y wakat fãa,” n kɩs sɩd t’a Zeova “geta yãmb yelle.” (1 Tes. 5:17; 1 Pɩy. 5:7) Tẽebã sõngdame tɩ d maand sẽn segde, tɩ sẽn segdã maaneg le paasd d tẽebã.—Zak 2:22.

A Zeezi kũumã ket tɩ beoogã, a yeela a karen-biisã baraar yʋngã yaa: “Tẽ-y  Wẽnnaam, la y tẽ ma-me.” (Zã 14:1) Dẽnd pa a Zeova bal la d segd n tẽ ye. D tog n tẽe a Zeezi me. Bõe la y na n maan tɩ wilg tɩ y tẽeda a Zeezi? Ad bũmb a tãabo:

Pipi, ning-y y yamẽ tɩ Wẽnnaam sẽn kɩt t’a Zeezi wa ki wã, yaa yãmb mengã yĩnga. Tʋm-tʋmd a Poll ra yeelame yaa: “Mam vɩɩ mam sẽn tẽed Wẽnnaam Bi-riblã maasem yĩnga, soab ning sẽn nong maam n kõ b meng mam yĩngã.” (Gal. 2:20) Y sã n sɩd tẽed a Zeezi, y na n kɩsa sɩd t’a kũumã yaa yaood sẽn dol y yel-wẽnã tɩ y tõe n paam sugri, la y saagd n na n wa paam vɩɩm sẽn kõn sa wã, la tɩ rẽ n yaa bũmb ning sẽn wilgd n tɩ yɩɩd tɩ Wẽnnaam nonga yãmbã. (Rom. 8:32, 38, 39; Efɛ. 1:7) Rẽ, y paamda pɛl-kɛgenga, tɩ tags-kɛgã y sẽn mi n tar y mengã zugã pa le namsd-y ye.—2 Tes. 2:16, 17.

Yiib-n-soaba, a Zeezi maoongã maasem yĩnga, pʋʋsd-y-yã a Zeova, n baood-a ne y sũur fãa. A Zeezi sẽn ki n dol yel-wẽnã kɩtame tɩ d tõe n pʋʋs a Zeova ne ‘bas-m-yam, sẽn na yɩl n paam nimbãan-zoeer la bark sẽn na n sõng-do, d sẽn wat n dat sõngr wakate.’ (Ebre. 4:15, 16; 10:19-22) Pʋʋsgã sõngdame tɩ d maneg n dat n mao tɩ yel-wẽnã ra tõog-d ye.—Luk 22:40.

Tãab-n-soaba, sak-y-yã a Zeezi. Tʋm-tʋmd a Zã yeelame: “Ned ning sẽn tẽed Biigã tara vɩɩm sẽn ka sɛta. Ned ning sẽn kɩɩsd Biigã pa na n paam vɩɩm, la Wẽnnaam sũ-puugrã ket n bee yẽ soab zugu.” (Zã 3:36) A Zã goma neb buk a yiib yelle: Sẽn tẽed-b Biigã, la sẽn kɩɩsd-b Biigã. Dẽnd yaa d sã n pa kɩɩsd a Zeezi la d wilgd tɩ d tẽed-a lame. Sẽn sakd-a a Zeezi tũuda “Kiristã tõogã,” rat n yeel tɩ Kiristã sẽn zãms nebã bũmb ninsã, la noyã a sẽn kõ wã. (Gal. 6:2) Y sã n tũud bũmb nins me a Zeezi sẽn tũnugd ne ‘tʋm-tʋmd sẽn tũud sɩdã’ n wilgd tõndã, a Zeezi la y sakda. (Mat. 24:45) Y sã n sakd a Zeezi, y na n talla raood n tõog yɛl sẽn wõnd sa-kẽeng sẽn naag ne sebgo.—Mat. 7:24, 25.

Rao n da yeel a Zeezi yaa: “Mam tara tẽebo! Bɩ y paas m tẽebã pãnga!” (Mark 9:24) A ra tara tẽebo, la a sak n deegame tɩ rẽnda a paas a tẽebã. Wa raoã, yell ning tõe n wa kɩtame tɩ d rat tẽeb n paase. La ned fãa tõe n paasda a tẽebã masã menga. Wa d sẽn yã wã, d sã n zãmsd Biiblã la d bʋgsdẽ, d sũur na n maneg n nooma ne a Zeova, tɩ paasd d tẽebã pãnga. D sã n pʋʋsd n pa basdẽ, n naagd d tẽed-n-taasã n waoogd a Zeova la d moond bark nins d sẽn gũudã, rẽ me paasda d tẽebã. Sẽn n maanda woto fãa paamda keoor sẽn ka to. Sɩd me, Biiblã yetame: “M nin-nongdse, bɩ yãmb nang pãng ne tẽeb ning y sẽn tar tɩ yaa sõng wʋsgã, . . . n tõog n kell n pa Wẽnnaam nonglmã pʋgẽ.—Ziid 20, 21.