1. Bõe la sẽn tũud-b Wẽnnaamã fãa rat n maane, la bõe yĩnga? (Ges-y sebrã pipi neng fotã.)

A ZEEZI KIRIST yeela a karen-biisã tɩ b ‘kẽng n tɩ sõng buud fãa neb tɩ b lebg yẽ karen-biisi.’ (Mat. 28:19) Sẽn tũud-b Wẽnnaam ne b sũur fãa wã ratame n bao n bãng b sẽn tõe n maan to-to, n tʋm tʋʋmdã a sẽn kõ-bã “sõma.” (2 Tɩm. 4:5) Sɩd me, yaa tʋʋmd yõod sẽn ka to, tʋʋm-sõng meng-menga, n leb n yaa tʋʋm-yãgdem n yɩɩd tʋʋmd buudã fãa. La yɩl n paam sẽk wʋsg n tʋm tʋʋmdã wa d sẽn dat to-to wã tõe n yɩɩ toogo.

2. Zu-loe-bʋs n tõe n kɩt tɩ yɩl n tʋm Wẽnnaam tʋʋmdã pa nana ne-do?

² Tʋʋm a taab me n yaa tɩlɛ, tɩ yɩl n yã sẽk la pãng rẽ fãa yĩngã pa nana ye. Wala makre, kẽer tog n tʋma lɛɛr-dãmb wʋsg daar fãa sẽn na yɩl n ges b meng yelle, la b zakã rãmb yelle. Bũmb a taab me la d segd n maan d zakã rãmb yell gesgã wɛɛngẽ, tɩ mi n pa nana ye. Tõe me tɩ d maooda ne bãas wall sũ-sãamse, pa rẽ bɩ kʋʋlem. D maanda wãn n tõog n tʋm Wẽnnaam tʋʋmdã sõma, baa ne yel-kãensã?

3. Bõe la a Zeezi goam nins sẽn be Matiye 13:23 wilgda?

³ Tõnd yɛlã sẽn yaa to-to wã sã n kɩt tɩ sẽk ning d sẽn tõe n kẽes Wẽnnaam tʋʋmdã pʋgẽ wã pa waooge, d pa segd n koms raood ye. A Zeezi ra miime tɩ tõnd ned kam fãa sẽn na n tõog tɩ Rĩungã bõn-buudã wom biis to-to wã pa na n yɩ yembr ye. (Karm-y Matiye 13:23.) A Zeova sũur nooma wʋsg ne d sẽn maandã fãa, sã n mik tɩ yaa d sẽn tõe wã fãa la d maanda. (Ebre. 6:10-12) La tõe me tɩ d getame tɩ d yɛlã sẽn yaa to-to wã kɩtame tɩ d tõe n tʋm Wẽnnaam tʋʋmdã n paase. Sõs-kãnga pʋgẽ, d na n bao n bãnga d sẽn tõe n maan to-to n lʋɩɩs Wẽnnaam tʋʋmdã taoore, la d mao tɩ d  vɩɩmã ra gĩd ne sẽn ka yõod wʋsgã, la d nang pãng n paas d minimã, koɛɛgã mooneg la nebã zãmsgã pʋgẽ. La nananda, tʋm Wẽnnaam tʋʋmdã sõma wã rat n yeelame tɩ bõe?

4. Tʋm Wẽnnaam tʋʋmdã sõma wã rat n yeelame tɩ bõe?

⁴ Tʋm Wẽnnaam tʋʋmdã sõma wã rat n yeelame tɩ d maooda wa d sẽn tõe fãa, n moond koɛɛgã la d zãmsd nebã Biiblã. La pa sẽk ning d sẽn kẽesd tʋʋmdã pʋgẽ wã bal la d tog n ges ye. A Zeova geta bũmb ning me sẽn kɩt tɩ d tʋmd tʋʋmdã. Yaa tõnd sẽn nong a Zeova la d taabã yĩng la d sẽn tʋmd tʋʋmdã ne d sũur fãa wã. * (Mark 12:30, 31; Kol. 3:23) Tũ Wẽnnaam ne d sũur fãa rat n yeelame tɩ d kẽes d sẽkã la d pãngã wa d sẽn tõe fãa a tũudmã tʋʋm pʋgẽ. D sã n getẽ tɩ d sẽn paam n moond koe-noogã yaa d zu-zẽkre, d na n maoo wa d sẽn tõe tɛk tɩ koɛɛgã ta neb wʋsgo.

5-6. Rɩk-y makre, n wilg ned sẽn pa tar sẽk wʋsg sẽn tõe n maan to-to, n lʋɩɩs Wẽnnaam tʋʋmdã taoore.

⁵ D rɩk makr ne bi-bɩɩg sẽn nong gitaar wẽebo. A sã n paam weer fãa, a wẽeda gitaarã. A wa n paamame tɩ b rɩk-a tʋʋm rɛstorã pʋgẽ, t’a wẽed gitaarã sibr ne hat fãa beenẽ. La yaoodã ra pa sekd a na tõog n get a meng yell ye. Rẽ n so t’a tɩ tʋmd butik-bedr a ye pʋgẽ, n sõngd ne teedã koosgo. A tʋmda be tẽne n tãag arzũma. La baa ne rẽ, yaa gitaarã wẽeb n noom-a n yɩɩda. A sẽn dat ne a sũur fãa yaa a paasd a minimã, n wa paam n lebg mizisiyẽ-kãsenga. La nananda, a sã n paam weer fãa, baa yaa wakat bilf bala, a rɩkda a gitaarã n wẽedẽ.

⁶ Woto me, tõe tɩ sẽk ning y sẽn tõe n kẽes koe-moonegã tʋʋmd pʋgẽ wã pa waoog ye. La yaool n yaa tʋʋm-kãng la y nong n yɩɩda. Y maanda y sẽn tõe fãa n na n paasd y minimã sẽn na yɩl tɩ koɛɛgã y sẽn taasdã kẽed nebã. La tʋʋm a taabã me sẽn dɩkd y sẽkã yĩnga, tõe tɩ y sokda y meng y sẽn na n maan to-to, tɩ yɩ koe-moonegã tʋʋmd la y lʋɩɩsd taoore.

7-8. Wẽnnaam tʋʋmdã wɛɛngẽ, wãn to la d tõe n dɩk a Zeezi togs-n-taare?

⁷ A Zeezi manesem sẽn da yaa to-to ne Wẽnnaam tʋʋmdã yaa mak-sõng tɛkẽ. Yaa Wẽnnaam Rĩungã koɛɛgã mooneg n da pak-a n tɩ yɩɩda. (Zã 4:34, 35) A kẽna kilo kobs ne nao, n na n paam n taas neb wʋsg koɛɛgã. A sã n da paam segb fãa, yaa zak pʋgẽ tɩ yaa zãma sʋka, a taasda nebã koe-noogã. A Zeezi vɩɩmã tõre, Wẽnnaam tʋʋmdã la a ra lʋɩɩsd taoore.

⁸ Tõnd me tõe n maana wa Kiristã. Sẽn wa n yaa zĩig ning la wakat ning fãa, d tũnugd ne segb toor-toor n taasd nebã koe-noogã. D sakdame n wõr d mens sẽn na yɩl n moon koe-noogã. (Mark 6:31-34; 1 Pɩy. 2:21) Tigimsã pʋsẽ, neb kẽer yaa zall so-pakdb bɩ wakat fãa so-pakdba, tɩ sãnda mi n yaa sõngr so-pakdba. Kẽer me zãmsa buud-gom-zẽng n na n paam n moon koɛɛgã, wall b pʋd n yik n kẽng zĩig koe-moondbã sẽn pa waooge. La d tẽed-n-taas wʋsg pa tõe n maan woto ye. B moonda koɛɛgã wa b sẽn tõe tɛka. Sẽn yaa a soab fãa, a Zeova pa kot tõnd tɩ d maan tɩ yɩɩg d pãng ye. A sẽn yaa “Wẽnnaam sẽn yaa sũ-noog soabã,” a ratame tɩ d fãa sã n moond “koe-noog ning sẽn tar ziirã” bɩ yɩ ne sũ-noogo.—1 Tɩm. 1:11; Tõo. 30:11.

9. a) Baa sẽn wa n yaa tɩlɛ t’a Poll tʋm n bao ligd bilfã, wãn to la a maan-yã, n kell n lʋɩɩs koe-moonegã taoore? b) Tʋʋm 28:16, 30, 31 wã wilgdame t’a Poll manesem ra yaa wãn ne Wẽnnaam tʋʋmdã?

⁹ Tʋm-tʋmd a Poll me kõo mak-sõngo. Ra yaa Wẽnnaam tʋʋmdã n da pak-a n yɩɩda. A sẽn na n gilg tẽnsã naoor a yiib-n-soab n moon koɛɛgã, n wa ta Korẽnt tẽngã, a mikame tɩ ligd sẽn da ket a nugẽ pa waoog ye. Yɩɩ tɩlɛ t’a tʋm n bao ligd bilfu. A ra sẽta fu-roto. La a ra pa get tɩ fu-rotã sẽeb yaa a tʋʋm-mengr ye. Yaa tʋʋmd sẽn na n sõng-a t’a tõog n ges a meng yelle, n paam n wɩng ne Wẽnnaam tʋʋmdã, n taas Korẽnt nebã koe-noogã n pa reeg yaood ye. (2 Kor. 11:7) Baa ne a sẽn da tar nug-tʋʋmdã, a kell n lʋɩɩsa Wẽnnaam tʋʋmdã taoore, n da moond koɛɛgã vʋʋsg daar fãa. A yɛlã sẽn wa n toeemã, a paamame n da tõe n wɩng ne koɛɛgã mooneg n paase. A “sɩngame n moond koɛɛgã wʋsgo, n wilgd Zʋɩf-rãmbã t’a Zeezi la Kiristã.” (Tʋʋ. 18:3-5; 2 Kor. 11:9) A sẽn wa n be Rom tẽngã, na maan yʋʋm a yiibu, b kɩtame tɩ sodaas ra gũud-a a roogẽ wã t’a pa tõe n yi ye. La a taasa neb nins sẽn da wat n get-a wã koɛɛgã, la a gʋls lɛta-rãmba. (Karm-y Tʋʋm 28:16, 30, 31.) A Poll ra yãka yam n pa na n bas tɩ baa fʋɩ tiis Wẽnnaam tʋʋmdã a sẽn da tʋmdã ye. Ad a sẽn yeele: “Tõnd sẽn tar tʋʋm-kãngã, . . . d pa komsd raood n bas ye.” (2 Kor. 4:1) Wa a Polle, baa sã n yaa tɩlɛ tɩ d tʋm n paam n kõ noorã, d tõe n maana d sẽn tõe fãa tɩ yɩ Rĩungã tʋʋm la d lʋɩɩsd taoore.

10-11. Baa y sã n bẽedame, n pa le tõe n maan wa pĩndã, wãn to la y tõe tʋm Wẽnnaam tʋʋmdã sõma?

¹⁰ Bãag wall kʋʋlem sã n kɩt tɩ d pa le tõe n moon koɛɛgã zak-zak wa d sẽn datã, d tõe n baoo soay a taab n paam n taasd nebã koɛɛgã. Pipi kiris-nebã ra moonda koɛɛgã zĩig ning fãa neb sẽn beẽ. B sã n da paam segb fãa, b togsda nebã Biiblã sẽn yetã: Zak-zaka, zãma sʋka, la segb buud fãa sasa. (Tʋʋ. 17:17; 20:20) Kẽnã sã n yaa toog ne-do, d tõe n tɩ zĩnda zĩig nebã sẽn pɩʋʋgd wʋsg-wʋsgo, n paam n taas so-loaadbã koɛɛgã. D tõeeme me n tũnugd ne segb buud fãa n taasd koɛɛgã, wall d gʋlsd lɛta, pa rẽ bɩ d moond ne telefõnnã maasem. D tẽed-n-taas sẽn kʋʋl bɩ sẽn bẽed bã-kɛgems maanda woto, n paamd n moond koɛɛgã, hal tɩ kõt-b sũ-noogo.

 ¹¹ Baa y sã n bẽedame, n pa le tõe n maan wa pĩndã, y tõe n tʋma Wẽnnaam tʋʋmdã sõma. D le gom tʋm-tʋmd a Poll yelle. A yeelame yaa: “Bũmb fãa pʋgẽ, mam tara pãnga, sẽn kõt-a maam pãngã maasem yĩnga.” (Fili. 4:13) Sɩd me, a Poll sẽn wa n gilgd tẽnsã n moond koɛɛgã, a wa n lʋɩ bãaga, tɩ yɩ tɩlɛ t’a paam tɩ Wẽnnaam kõ-a pãnga. Ad a sẽn yeel Galat kiris-nebã: “Yãmb miime tɩ mam sẽn na n paam weer n moon yãmb koe-noogã pipi wã, tũu ne bãag sababo.” (Gal. 4:13) Woto me, baa bãag sã n kɩt tɩ y pa le tõe n maan wa pĩndã, tõe n tũu ne bãagã sabab tɩ y paam segb n taas neb koɛɛgã. Wala makre, logtoɛɛmbã la sẽn sõngd-b n get bãad-rãmbã yellã. Sasa ning koe-moondbã sẽn moond zak-zakã, b wʋsgã bee b tʋʋmã zĩigẽ.

12. Nif sẽn “get bõn-yɛngã” rat n yeelame tɩ bõe?

¹² A Zeezi yeelame yaa: “Nifr yaa yĩngã fɩtla. Dẽnd, fo nifã sã n get bõn-yɛnga, [bɩ, fo “nif sã n yaa sõma,” notã] fo yĩngã tõr na n yɩɩ vẽenem.” (Mat. 6:22) A gomdã võor yaa bõe? A ra rat n yeelame tɩ bũmb a ye bal n segd n pak tõnd n yɩɩda, la tɩ d pa segd n baood bũmb wʋsgo, tɩ wa tiis-d ye. A Zeezi vɩɩmã tõre, yaa koɛɛgã mooneg la a ra lʋɩɩsd taoore, tɩ yaa mak-sõng n kõ tõndo. A wilga a karen-biisã me tɩ yaa a Zeova tũubã la a Rĩungã yell n segd n pak-b n yɩɩda. D sã n  lʋɩɩsd Wẽnnaam tʋʋmdã taoore, n dengd n baood a ‘Rĩungã ne a tɩrlmã,’ d rɩkda a Zeezi togs-n-taare.—Mat. 6:33.

13. Bõe la d tõe n maan tɩ sõng-d tɩ d lʋɩɩs Wẽnnaam tʋʋmdã taoore?

¹³ Bũmb a ye d sẽn tõe n maan tɩ sõng-d tɩ d lʋɩɩs Wẽnnaam tʋʋmdã taoore, yaa d sẽn na n bas bũmb kẽer maanego, n tõog n paam weer n sõngd d taabã sẽn na yɩl tɩ b bãng a Zeova sõma, n wa nong-a. * Wala makre, d ges d sã n pa tõe n toeem d tʋʋmã lɛɛr-dãmbã, n paam sẽk semennã pʋgẽ n paase, n tõog n moon koɛɛgã. D tõeeme me n boog sẽk ning d sẽn kẽesd reemã la pemsmã kokr pʋgẽ wã.

14. Bõe la pag ne a sɩd maan-yã, n paam sẽk n kẽes b meng Wẽnnaam tʋʋmdã pʋgẽ n yɩɩd pĩndã?

¹⁴ Yaa woto la kãsem-soab a ye ne a pag maan-yã. A yʋʋr la a Eliyaase. Ad a sẽn yeele: “D ra pa tõe n yɩ so-pakdb wakat kãng ye. La d ra tara d sẽn tõe n maan n paam n moond koɛɛgã n yɩɩd pĩndã. Rẽ n so tɩ d yãk yam n na n toeem bũmb kẽere, n tõog n paas d koe-moonegã. Wala makre, d booga d depãens-rãmbã, la d bas bũmb nins d sẽn da maand n kokd pemsem, tɩ yaool n da rɩt d sẽkã. Ned fãa me kosa a patrõ n na n toeem a tʋʋmã lɛɛr-dãmb bilfu. Woto sõngame tɩ d paam weere, n da yit koe-moonegã zaabr-zaabre. D paama Biibl karen-biis n yɩɩd pĩndã, la d tõog meng n da yit koe-moonegã tʋʋmã rayã, hal naoor a yiib kiuug fãa. Woto yɩɩ tõnd noog wʋsgo!”

15-16. Wa sẽn zems ne 1 Tɩmote 4:13, 15 sẽn yetã, wãn to la koe-moond tõe n maan t’a minimã paasdẽ? (Ges-y zĩ-gũbrã gom sẽn yaa: “ M sẽn dat n maan tɩ sõng-ma, tɩ m tʋm Wẽnnaam tʋʋmdã sõma.”)

¹⁵ Bũmb a to me d sẽn tõe n maan n tõog n  tʋm Wẽnnaam tʋʋmdã sõma, yaa d sẽn na n mao n paam minim n paase, koɛɛgã mooneg la nebã zãmsgã pʋgẽ. Tʋʋm kẽer pʋgẽ, yaa tɩlɛ tɩ tʋm-tʋmdbã paamd zãmsg wakat fãa, sẽn na yɩl tɩ b bãngrã la b minimã paasdẽ. Yaa woto me ne koɛɛgã moonego. Yaa tɩlɛ tɩ wakat fãa bɩ d maood n paasd d minimã.—Yel. 1:5; karm-y 1 Tɩmote 4:13, 15.

¹⁶ Wãn to la d na n maan tɩ wakat fãa bɩ d paamd minim koɛɛgã mooneg pʋgẽ n paasdẽ? Kiris-nebã vɩɩm la b tʋʋma tigsg sasa bɩ d kelgd saglsã neere. Ne tigis-kãngã maasem, d paamda zãmsg la saglse, tɩ sõngd tõnd tɩ d koe-moonegã minim paasdẽ. Wala makre, tigsgã taoor lʋɩtã sã n wa sagend karen-biisã, d sã n kelg neere, d na n bãnga bũmb kẽer d sẽn tõe n maan tɩ sõng-d tɩ d maneg d sẽn moond to-to wã n paase. Rẽ, d sã n wa taasd ned koɛɛgã, d tõe n tũu sagls nins d sẽn wʋmã. D tõeeme me n kos d koe-moonegã sull yel-gɛtã saglse, wall d tũ-a n moon koɛɛgã. D tõe n tũu koe-moond a to me sẽn tar minim, pa rẽ bɩ so-pakd wall tigims sull yel-gɛtã. D minimã sã n tar paasgo, tɩ d wa tõe n tall koe-moonegã tʋʋm-teoog fãa n tʋm sõma, koɛɛgã mooneg la nebã zãmsgã na n maneg n noom-d lame.

17. Y sã n tʋmd Wẽnnaam tʋʋmdã sõma, bark bʋs la y paamda?

¹⁷ D sẽn paam t’a Zeova sak tɩ d yaa a ‘tʋmd-n-taasã’ yaa zu-zẽkr tɛkẽ! (1 Kor. 3:9) Y sã n “bãng bũmb nins sẽn tar yõod n yɩɩdã n bake,” n lʋɩɩs Wẽnnaam tʋʋmdã taoore, y na n tõog n tũu a Zeova “ne sũ-noogo.” (Fili. 1:10; Yɩɩn. 100:2) Yãmb sẽn yaa Wẽnnaam tʋm-tʋmdã, y tõe n kɩsa sɩd tɩ baa y zu-loeesã sẽn yaa to-to, wall y pãn-tõogã sẽn paood to-to fãa, a na n kõ-y-la pãng ning y sẽn dat sẽn na yɩl n tʋm a tʋʋmdã. (2 Kor. 4:1, 7; 6:4) Y sẽn tõe n moon koɛɛgã sã n yaa wʋsg tɩ yaa bilf me, y sẽn maandã sã n yaa ne y sũur fãa, y tõe n ‘paama bũmb y sẽn tõe n tik n maan sũ-noogo.’ (Gal. 6:4) Y sã n tʋmd Wẽnnaam tʋʋmdã sõma, wilgdame tɩ y nonga a Zeova la y taabã. Y sã n ‘maand woto, y na n fãaga y meng la y fãag neb nins sẽn kelgd yãmbã.’—1 Tɩm. 4:16.