1-2. a) Bõe la tẽn-tẽnsã na n moon ka la bilfu? b) Sogs-bʋs leoor la d segd n bãnge?

MAMS-Y y yamẽ tɩ yaa tẽn-tẽnsã sẽn nan moon bal tɩ “laafɩ la bãanã” b sẽn da sɩng n gũudẽ wã waame. Tõe tɩ b na n wukda b mense, n yetẽ tɩ laafɩ la bãan a woto buud zɩ n zĩnd ye. Tẽn-tẽnsã na n datame tɩ d tags tɩ b tõogame tɩ zu-loeesã fãa sa. Mik yell b sẽn pa na n tõog n gɩdg n wate. Bõe yĩng tɩ d yet woto? Bala wa Biiblã sẽn pĩnd n togsã, “sãoong na n ling-b lame n wa b zut zĩig pʋgẽ, . . . la b pa na n põs a bada.”—1 Tes. 5:3.

² Sogsg kẽer leoor la d segd n bãnge. Wala makre, bõe n na n maan “to-kãsengã” sasa? Bõe la a Zeova na n dat tɩ d maan wakat kãnga? Bõe la d tõe n maan n segl d mens masã menga, tɩ sõng-d tɩ d ra wa bas a Zeova to-kãsengã sasa?—Mat. 24:21.

3. Sẽn zems ne Vẽnegr 17:5, 15-18 wã, ãnd dãmb la Wẽnnaam na n kɩt tɩ b sãam “Babilon-kãsengã”?

³ Karm-y Vẽnegr 17:5, 15-18. “Babilon-kãsengã” sãoong na n yɩɩ to-kãsengã sasa! Wa d sẽn zoe n togsã, tẽn-tẽnsã pa na n tõog n gɩdg yel-kãngã sẽn watã ye. Bõe yĩnga? Bala Wẽnnaam na n “ninga b sũyẽ wã tɩ b pids Wẽnnaam daabã.” Daab-kãng yaa bõe?  Yaa kiris-neb ne yʋʋrã la tũudum nins fãa sẽn yaa ziri wã sãoongo. Wẽnnaam na n ninga a raabã “we-rũng sẽn yaa miuugu,” n tar “yɩɩl piigã” sũurẽ. A yɩɩl piigã makda goosneema-rãmb nins fãa sẽn teend “we-rũngã.” We-rũngã makda Nasiõzĩni wã. (Vẽn. 17:3, 11-13; 18:8) Goosneema-kãens sã n wa na n zab ne tũudum nins fãa sẽn yaa ziri wã, rẽ n na n yɩ to-kãsengã sɩngre. Na n yɩɩ yell sẽn pak dũniyã nebã fãa, n sɩd sek yɛɛsgo.

4. a) Tõe tɩ yaa bõe la tẽn-tẽnsã na n tik n sãam Babilon-kãsengã? b) Wõnda tũudum toor-toorã neb na n maana bõe?

⁴ D pa mi bũmb ning tẽn-tẽnsã sẽn na n tik n sãam Babilon-kãsengã ye. Tõe tɩ b yeel tɩ yaa tũudum toor-toorã n kɩt tɩ laafɩ la bãan kae, la tɩ b kẽesda b toog politikã pʋgẽ. Tõe me tɩ b yeel tɩ tũudum toor-toorã kãaga ligd la arzɛgs a taab n zame. (Vẽn. 18:3, 7) La wõnda tũudmã sãoongã pa rat n yeel t’a nebã fãa la b na n sãam ye. Tog n yaa tũudmã meng la tẽn-tẽnsã na n tolg n kɩt tɩ menem. Tũudum toor-toorã sã n wa ka le beẽ, a nebã na n bãngame tɩ b belg-b-la zaalem. Wõnda rẽ na n kɩtame tɩ b bao n na n lak b mens fasɩ ne b tũudmã, wa b ra ka mi b tiir ye.

5. To-kãsengã wɛɛngẽ, bõe la a Zeova pʋlem t’a na n maaname, la yaa bõe yĩnga?

⁵ Biiblã pa togs Babilon-kãsengã sãoong sẽn na n kaoos to-to ye. La d miime tɩ pa na n dɩk sẽk wʋsg ye. (Vẽn. 18:10, 21) A Zeova pʋlmame t’a na n “booga” to-kãsengã rayã sõore, sẽn na yɩl tɩ b ra sãam a “nin-tũusdsã” ne tũudum hakɩɩkã ye. (Mark 13:19, 20) To-kãsengã sã n wa sɩnge, bõe la a Zeova na n dat tɩ d maan nand tɩ Armagedõ zabrã ta?

6. Bõe yĩng tɩ yi n bas tũudum nins sẽn yaa ziri wã bal pa seke?

⁶ Wa d sẽn yã sõsg ning sẽn loogã pʋgẽ wã, a Zeova ratame tɩ sẽn tũud-b yẽ wã lak b mens fasɩ ne Babilon-kãsengã. La yi n bas tũudum nins sẽn yaa ziri wã bal pa sek ye. D segd n yãka yam n na n tũ a Zeova ne d sũur fãa, la d teel a tũudmã. Wãn to? D gom bũmb a yiib yelle.

7. a) Wãn to la d wilgd tɩ d gãda noy nins a Zeova sẽn gãnegã kãn-kãe? b) Wãn to la Ebre-rãmb 10:24, 25 wilgd tɩ d segd n tigimda taaba, sẽn yɩɩd fãa, masã menga?

⁷ Pipi, d segd n kell n gãda noy nins a Zeova sẽn gãnegã kãn-kãe. D pa segd n sak dũniyã nebã tagsa wã, la b manesem-yoodã ye. Rẽ n so tɩ d kis yoob buud fãa, wala makre, rao ne rao la pag ne pag sẽn kẽed kãadem ne taabã, la yel-manesem buud fãa sẽn teend rẽ. (Mat. 19:4, 5; Rom. 1:26, 27) Yiibu, d segd n ket n tigimda ne d tẽed-n-taasã n waoogd a Zeova. Yaa Rĩungã roogẽ tɩ yaa d tẽed-n-taag zakẽ wall yaa solgre, d na n ket n tigimda ne d tẽed-n-taasã. Sẽn wa n yaa a soab fãa, d pa na n tol n bas tigissã ye. D pʋd n segd n wɩnga ne tigissã kẽnde, “d sẽn ne tɩ daarã kolgdame wã yĩnga.”—Karm-y Ebre-rãmb 10:24, 25.

8. Wõnda koɛɛg ning d sẽn moond rũndã-rũndã wã na n toeemame n lebg bõe koɛɛga?

⁸ To-kãsengã sã n wa sɩnge, wõnda koɛɛg ning d sẽn moondã na n toeemame. Rũndã-rũndã, yaa Rĩungã koe-noogã la d moonda, la d modgd n na n sõng nebã tɩ b lebg a Zeezi karen-biisi. La wakat kãnga, tõe tɩ d na n moona koɛɛg sẽn zabd nebã, wa sapɩlem sẽn pãbd-ba. (Vẽn. 16:21) Tõe tɩ d na n yetã nebã vẽeneg tɩ ka ne ka bala, b na n sãama a Sʋɩtãan dũniyã fasɩ. D na n wa bãnga koɛɛg ning takɩ d sẽn na n moonã, la d sẽn na n moon rẽ to-to wã. D na n kell n moonda wa d sẽn sɩng n maand na maan yʋʋm koabg la zakã bɩ? Bɩ na n toeemame? Rẽnda d gũ n gese. La sẽn wa n yaa a soab fãa, wõnda d na n paamame t’a Zeova kɩt tɩ d moon ne raood n wilg t’a na n sãama dũni-kãngã.—Eze. 2:3-5.

9. Wõnda koɛɛgã d sẽn na n wa moonã na n kɩtame tɩ dũniyã nanambsã maan bõe, la d tõe n basa d yam ne bõe?

⁹ Wõnda koɛɛgã d sẽn na n wa moonã na n kɩtame tɩ dũniyã nanambsã sũy yiki, tɩ b bao n na n kɩt tɩ d bas moonegã fasɩ. Wakat kãngã, d na n kell n teega a Zeova, wa d sẽn teeg-a rũndã-rũndã n moond koɛɛgã. D tõe n basa d yam t’a Zeova na n kõ-d-la pãng tɩ d maan a raabã.—Mii. 3:8.

10. Wa b sẽn togs Luk 21:25-28 wã, bũmb ning sẽn na n maan to-kãsengã sasa wã na n kɩtame tɩ neb wʋsg manesem yɩ wãna?

¹⁰ Karm-y Luk 21:25-28. To-kãsengã sasa, nebã sã n wa yã tɩ bũmb nins fãa b sẽn da tagsd tɩ b tõe n teegame wã sãamdame, na n ling-b-la wʋsgo. Na n yɩɩ yel-beed ninsaalbã sẽn zɩ n yã. B na n maanda ‘yɩɩre,’ n yɛɛsdẽ tɩ na n tũu ne b yõore. (Sof. 1:14, 15) Wakat kãnga, wõnda vɩɩmã na n maneg n yɩɩ toogo, hal baa ne a Zeova nin-buiidã. D sẽn pa kẽesd d toog dũniyã yɛlẽ wã yĩnga, tõe tɩ bũmb kẽer paoong na n yɩɩ toog ne-do. Tõe tɩ bũmb kẽer sẽn yaa tɩlɛ meng la d pa na n le tarẽ.

11. a) Bõe yĩng tɩ dũniyã nanambs na n bao n na n sãam a Zeova nin-buiidã? b) Bõe yĩng tɩ d pa segd n maan rabeem to-kãsengã yĩnga?

 ¹¹ La tũudum nins b sẽn sãamã neb sũy na n wa yikame, b sẽn ne t’a Zeova Kaset rãmbã tũudmã ketame wã yĩnga. Tags-y n ges-y yel-kãngã sẽn tõe n yik b sũy to-to, la b sẽn na n kɩt tɩ kibayã rãmb yelgd rẽ to-to ne ẽntɛrnetã maasmã. Tẽn-tẽnsã ne a Sʋɩtãan sẽn yaa b naabã na n kisga tõndo, sẽn mik tɩ lebga tõnd tũudmã bal n ketã. Bala, b na n gesame tɩ b raabã sẽn yaa b menes tũudmã fãa dũniyã zugã pa pid ye. Dẽnd yaa tõnd masã la b na n bao n na n sãame. Yaa wakat kãng la tẽn-tẽnsã na n lebg b sẽn boond a soab t’a Goog sẽn be Magoog soolem pʋgã. * B na n tigma taab n wa na n sãam a Zeova nin-buiidã. (Eze. 38:2, 14-16) D sẽn pa mi yɛlã sẽn na n yɩ to-to takɩ to-kãsengã sasa wã, d tõe n wa maanda yɩɩre. La sẽn be bala, d pa segd n maan rabeem to-kãsengã yĩng ye. A Zeova na n kõ-d-la noy sẽn na n sõng-d tɩ d põse. (Yɩɩn. 34:20) D na n talla raood n ‘yik n yals la d nak n ges’ yĩngri, bala d na n bãnga vẽeneg tɩ d “fãagrã kolgdame.” *

12. Bõe la “tʋm-tʋmd sẽn tũud sɩd la sẽn tar yamã” maand n sõngd tõndo, tɩ d segend d mens to-kãsengã yĩnga?

¹² “Tʋm-tʋmd sẽn tũud sɩd la sẽn tar yamã” maanda bũmb toor-toor n sõngd tõndo, sẽn na yɩl tɩ d ra wa bas a Zeova to-kãsengã sasa ye. (Mat. 24:45) Wala makre, ne tigis-kãsemsã d sẽn maan yʋʋmd 2016 n tãag 2018 wã maasem, d paama sagls sẽn zems a wakate. Tigs-kãens sasa, b wilga zʋg-sõma nins d sẽn segd n bɩɩse, a Zeova daarã sẽn kolgã yĩnga. D gom zʋg-sõma-kãens yell bilfu.

13. Bõe n na n sõng-d tɩ d nang pãng n maan sɩd ne a Zeova? Bõe yĩng tɩ yaa masã meng la d segd n maand sɩd ne a Zeova?

¹³ D maand sɩda: Yʋʋmd 2016 rasem a tãab tigis-kãsengã gom-zug yɩɩ: “Maan sɩd ne a Zeova.” Tigsgã sasa, b sõnga tõnd tɩ d bãng tɩ yaa d sã n tar zood sõma ne a Zeova la d na n maan sɩd ne-a. B tẽeg-d lame tɩ d sã n pelgd d pʋg n pʋʋsd a Zeova, la d zãmsd Biiblã sõma, rẽ la d paamd zood sõma ne a Zeova. D sã n maand woto, d paamda pãng n mao ne zu-loe-kɛgems menga. A Sʋɩtãan dũniyã sãoong sẽn kolgdã, d miime tɩ zu-loees nins sẽn tõe n kɩt tɩ yɩ toog tɩ d kell n maan sɩd ne Wẽnnaam, la d kell n teel a Rĩungã na n tara paasgo. Wõnda nebã na n ket n tara tõnd n yaandẽ. (2 Pɩy. 3:3, 4) Sẽn yɩɩd fãa, tõe tɩ na n yɩɩ d sẽn pa teend baa fʋɩ a Sʋɩtãan dũniyã pʋgẽ wã yĩnga. Yaa masã la d segd n nang pãng n maand sɩda, n wa tõog n kell n maan sɩd ne a Zeova to-kãsengã sasa.

14. a) A Zeova nin-buiidã yell gesgã wɛɛngẽ, bõe n na n toeem to-kãsengã sasa? b) Bõe yĩng tɩ yaa tɩlɛ tɩ d maan sɩd wakat kãnga?

¹⁴ To-kãsengã sasa, wakat n na n zĩnd tɩ pa le yaa saam-biis sẽn paam vʋʋsem sõngã zaeeb n lʋɩt taoore, n get a Zeova nin-buiidã yell tẽngã zug ye. Sẽn paam-b vʋʋsem sõng zaeeb n ket tẽngã zugã fãa na n wa looga saasẽ. Bala b segd n naag n zaba Armagedõ zabrã. (Mat. 24:31; Vẽn. 2:26, 27) Dẽnd wakat kãng tɩ Siglgã taoor lʋɩtb sull ka le  be ne tõnd tẽngã zug ye. La kʋʋn-kãsengã na n kell n yɩɩ nin-buiid sẽn sigl sõma. Saam-biis a taab sẽn tar minim, n na n lʋɩ taoor n ges d yelle. D segd n teela saam-bi-kãense, la d sakd sagls nins Wẽnnaam sẽn na n kɩt tɩ b kõ tõndã, tɩ wilg tɩ d maanda sɩd ne-a. Yaa d sã n maan rẽ la d na n paam n põse.

15. Bõe n na n sõng-d tɩ d maneg n tõogd toogo? Bõe yĩng tɩ yaa masã meng la d segd n tõogd toogo?

¹⁵ D tõog toogo: Yʋʋmd 2017 rasem a tãab tigis-kãsengã gom-zug yɩɩ: “Ra koms raood n bas ye.” Tigis-kãng sõnga tõnd tɩ d na n kell n modg n tõogd toogo. D bãngame tɩ d segd n tõoga toogo, la tɩ pa be ne yɛlã sẽn keng n ta zĩig ningã ye. Yaa d sã n teeg a Zeova la d na n paam pãng n tõogd toogo. (Rom. 12:12) D ra tol n yĩm t’a Zeezi yeelame tɩ yaa ‘ned ning sẽn na n tõog toog hal tɩ saabã ta, n na n paam fãagre.’ (Mat. 24:13) A Zeezi gomdã rat n yeelame tɩ sẽn wa n yaa zu-loɛɛg ning fãa, d pa segd n bas a Zeova ye. D sã n zoe n tõogd toog masã menga, to-kãsengã ne a na n sɩng tɩ d tẽebã tara pãng sõma.

16. Bõe n wilgd tɩ ned tara raoodo? Bõe n na n sõng-d tɩ d tall raood masã menga?

¹⁶ D tall raoodo: Yʋʋmd 2018 rasem a tãab tigis-kãsengã gom-zug yɩɩ: “Tall-y raoodo!” Tigis-kãng sasa, b tẽeg-d lame tɩ pa ned pãn-tõod bɩ a minim n wilgd t’a tara raood ye. Wa d sẽn segd n teeg a Zeova n tõog toogã, d segd n teeg-a lame me n paam raoodo. Bõe n na n sõng-d tɩ d maneg n teeg a Zeova? Yaa d sã n karemd a Gomdã daar fãa, la d bʋgsd a sẽn fãag a nin-buiidã to-to pĩnd wẽndẽ wã. (Yɩɩn. 68:21; 2 Pɩy. 2:9) Tẽn-tẽnsã sã n wa na n zab ne-d to-kãsengã sasa, wakat kãng la d segd n tall raood la d maneg n teeg a Zeova. (Yɩɩn. 112:7, 8; Ebre. 13:6) D sã n teeg a Zeova masã menga, a Goog sã n wa na n zab ne-do, d na n talla raood hal sõma. *

17. Bõe yĩng tɩ d pa segd n zoe rabeem Armagedõ zabrã yĩnga? (Ges-y sebrã pipi neng fotã.)

¹⁷ Wa d sẽn togs sõsg ning sẽn loogã pʋgẽ wã, d fãa la bal rogame n  mik tɩ d bee dũniyã yaoolem wakatã. La d saagdame me tɩ d na n wa paam n põsa to-kãsengã sasa. Yaa Armagedõ zabrã sasa la b na n tolg n sãam dũni-kãngã n baase. La d pa segd n zoe rabeem ye. Bõe yĩnga? Bala yaa a Zeova zabre. (Yel. 1:33; Eze. 38:18-20; Zaka. 14:3) A Zeova sã n wa kõ noore, a Zeezi Kirist na n lʋɩɩ saasẽ tãb-biisã taoor tɩ b wa zabe. Sẽn paam-b vʋʋsem sõngã zaeeb n kẽng saasẽ wã, n paas malɛgs tus ka tɛk n na n naag-a n zabe. B na n zaba ne a Sʋɩtãana, ne a zĩn-dãmbã, la a poorẽ dãmbã sẽn be tẽng zugã.—Dãn. 12:1; Vẽn. 6:2; 17:14.

18. a) Bõe la a Zeova yeel-yã? b) Wãn to la goam nins sẽn be Vẽnegr 7:9, 13-17 wã kɩt tɩ d bas d yam t’a Zeova na n fãag-d lame?

¹⁸ A Zeova yeelame yaa: “Zab-teoog ning fãa b sẽn maan n na n zab ne foomã kõn tol n tõog n maan foom bũmb ye.” (Eza. 54:17) “Kʋʋn-kãseng” sẽn tũud a Zeova ne b sũy fãa n na n “põs to-kãsengã sasa.” Rẽ poore, b na n ket n maanda a raabã. (Karm-y Vẽnegr 7:9, 13-17.) Bũmb wʋsg la Biiblã yeta, tɩ kɩt tɩ d tõe n bas d yam t’a Zeova na n fãag-d lame. D miime t’a Zeova “gũuda neb nins sẽn pa basd bãmbã.” (Yɩɩn. 31:23, MN) Neb nins fãa sẽn nong a Zeova la b tũud-a wã na n kɩdma sũ-noogo, b sã n wa yã t’a kɩtame t’a yʋʋrã paam waoogre.—Eze. 38:23.

19. Bõe la d na n paam ka la bilfu, tɩ yaa bark meng-menga?

¹⁹ Tags-y n ges-y b sẽn da na n yeelẽ bũmb ning 2 Tɩmote 3:2-5 wã pʋgẽ, sã n da yaa neb sẽn be dũni-paalgã pʋgẽ yell la b gomda. Rẽ t’a Sʋɩtãan pa le be n na n kʋɩɩb nebã ye. (Ges-y zĩ-gũbrã: “ Nebã manesem sẽn na n yɩ a soab wakat kãngã.”) Saam-biig a George Gangas sẽn yɩ Siglgã taoor lʋɩtb sull nedã goma rẽ yelle, n yeele: “Tags-y n ges-y vɩɩmã sẽn na n yɩ noog to-to, sã n wa lebg neb sẽn tũud a Zeova bal n be tẽngã zugu!” A paasame yaa: “Ka la bilfu, d na n paam n vɩɩmda dũni-paalgã pʋgẽ. A Zeova sã n ket n beẽ fãa, yãmb me na n ket n beeme. D na n vɩɩmda wakat sẽn kõn sa.” Ad sɩd na n yɩɩ bark meng-menga!