1-2. Sẽn zems ne 1 Tɩmote 6:20 wã, bõe la b kõ a Tɩmote?

D MI n dɩkda d bõn-sõma wã n gũnugd neb a taaba. Wala makre, d tõe n tɩ bĩnga d ligd bãnkẽ. Yaa d sẽn dat tɩ b ges d ligdã yell sõma tɩ ra meneme, bɩ wagda ra zu wã yĩnga. Dẽnd woto rat n yeelame tɩ f sã n dɩk f bũmb sẽn tar yõod wʋsg n gũnug neda, yaa f sẽn kɩs a soab sɩdã yĩnga.

² Karm-y 1 Tɩmote 6:20. Tʋm-tʋmd a Poll tẽega a Tɩmote tɩ b kõ-a-la bũmb sẽn tar yõod wʋsgo. Yaa a sẽn paam n bãng Wẽnnaam daabã ne ãdem-biisã sẽn yaa bũmb ningã. A Tɩmote paamame me t’a Zeova yeel-a t’a “moon koɛɛgã,” la a “tʋm koe-moond tʋʋmde.” (2 Tɩm. 4:2, 5) A Poll sagla a Tɩmote t’a gũ bũmb ning b sẽn kõ-a wã neere. Wala a Tɩmote, a Zeova sõnga tõnd me tɩ d bãng bũmb ka tɛk sẽn tar yõod wʋsgo. Yaa bõe ne bõe? La bõe yĩng tɩ d segd n kogl bõn-kãensã sẽn yaa wa paoongã sõma?

3-4. Bõe n wilgd tɩ Biiblã sẽn yet bũmb ningã sɩd yaa wa paoongo?

³ A Zeova maana tõnd neere, a sẽn sõng tõnd tɩ d bãng a Gomdã sẽn yet bũmb ning tɩ yaa wa paoongã. Biiblã sẽn yet bũmb ningã sɩd yaa wa paoongo, bala a sõngda tõnd tɩ d bãng d sẽn tõe n maan n paam zood sõma ne a Zeova, la d sẽn tõe n maan me n paam sũ-noog hakɩɩka. D sã n sak Biiblã sẽn yetã la d tũud rẽ, d paamda d mens ne zãmsg nins sẽn pa sɩdã, la ne yel-manesem nins fãa sẽn pa sõma wã.—1 Kor. 6:9-11.

⁴ Bũmb a to me n kɩt tɩ Biiblã sẽn yet bũmb ningã sɩd yaa wa paoongo. Bala yaa sik-m-mens rãmbã, rat n yeel tɩ  neb nins ‘sẽn tar yam ning sẽn zemsã’ bal la a Zeova vẽnegd tɩ b bãngd rẽ. (Tʋʋ. 13:48) Nin-kãensã sakda tʋm-tʋmd sẽn tũud sɩd la sẽn tar yamã a Zeova sẽn tũnugd ne rũndã-rũndã n get a nin-buiidã yellã. (Mat. 11:25; 24:45) D pa tõe n bãng Biiblã sẽn yet bũmb ningã d toor ye. La d sã n paam n bãng rẽ, a yõodã yɩɩda bũmb fãa.—Yel. 3:13, 15.

5. Bõe me la a Zeova kõ noor tɩ d maane?

⁵ D leb n paamame t’a Zeova kõ-d noor tɩ d sõng neb a taabã tɩ b bãng Biiblã sẽn yet bũmb ning yẽ mengã zugu, la a raabã. (Mat. 24:14) Koɛɛgã d sẽn moondã tara yõod wʋsgo, bala sõngda nebã tɩ b lebgd a Zeova zakã neba, la kɩtdẽ me tɩ b tõe n wa paam vɩɩm sẽn kõn sa. (1 Tɩm. 4:16) D moonda koɛɛgã wʋsg tɩ yaa bilf me, d tʋmda tʋʋmd sẽn tar yõod n yɩɩd tʋʋmd buudã fãa. (1 Tɩm. 2:3, 4) Dẽnd d sẽn paam n yaa Wẽnnaam tʋmd-n-taasã yaa zu-zẽkr tɛkẽ!—1 Kor. 3:9.

6. Bõe n wa n paam neb kẽer sẽn pa kell n tall b tẽebã kãn-kãe?

⁶ A Tɩmote tẽed-n-taas kẽer pa wilg tɩ b nanda b sẽn paam n yaa Wẽnnaam tʋmd-n-taasã ye. Wala makre, a Demas sẽn da nong dũni-kãngã wã yĩnga, a wa n basa a Poll tũubu. (2 Tɩm. 4:10) Wõnda a Fizɛll ne a Ɛrmozɛn wa n basa koɛɛgã moonego, b sẽn da yɛɛsd nebã na n wa nams-b wa b sẽn nams a Pollã yĩnga. (2 Tɩm. 1:15) A Imene ne a Alɛgsãndr la a Filɛt wa n lebga sɩdã kɩɩsdba, n bas a Zeova tũubu. (1 Tɩm. 1:19, 20; 2 Tɩm. 2:16-18) Wõnda nin-kãensã tẽebã ra tara pãnga, la b wa n pa le get tɩ bũmb nins b sẽn bãngã tara yõod wʋsg ye.

7. Bõe la a Sʋɩtãan maand n dat tɩ d bas a Zeova tũubu?

⁷ Bõe la a Sʋɩtãan maand sẽn na yɩl tɩ d bas bõn-sõmã nins a Zeova sẽn kõ tõndã? D gom a sɩlem kẽer yelle. A tũnugda ne reemã, pemsmã kokr la kibayã b sẽn yelgd ne televizɩõ wã la ne ẽntɛrnetã maasmã, n kɩtdẽ tɩ d sẽn nong bũmb ninsã, d sẽn tagsd bũmb nins yellã, la d yel-manesmã kɩt tɩ d wa pa le nong a Zeova, bɩ n tũud a noyã ye. A leb n tũnugda ne d taabã sẽn mi n pẽdgd tõnd n dat tɩ d kɩɩs a Zeova wã, bɩ namsgã, sẽn na yɩl tɩ d bas koɛɛgã moonego. A leb n belgda tõndo, n dat tɩ d kelg sɩdã-kɩɩsdbã “bãng-feedã,” tɩ kɩt tɩ d bas a Zeova tũubu.—1 Tɩm. 6:20, 21.

8. Saam-biig a Dãniyɛll kibarã wilgda tõnd bõe?

⁸ D sã n pa maand gũusgu, bilf-bilfã d  tõe n wa basa a Zeova tũubu. D gom saam-biig a ye yelle. A yʋʋr la a Dãniyɛlle. * A ra nonga ze-video-rãmbã tãoobo. A yeelame: “M sɩnga ze-video-rãmbã tãoob m sẽn wa n zems yʋʋm piiga. Sɩngrẽ wã, m da tãooda ze-video-rãmb sẽn pa tolg n yaa wẽnga. La bilf-bilfã, m wa n sɩng n tãooda ze-video-rãmb sẽn pid ne nen-kɛglem, la zĩn-dãmb yɛla.” Tarẽ-n-tarẽ, a wa n dɩkda sẽn ta lɛɛr 15 daar fãa, n tãood ze-video-rãmbã. A paasame: “Togs sɩdã, m da mii m sũurẽ tɩ m sẽn tãood ze-video ninsã, la rẽ sẽn dɩkd sẽk ningã kɩtame tɩ m zãagd ne a Zeova. La mam sũurã wa n diglmame, hal tɩ m tẽed tɩ m sẽn maandã pa kɩɩsd Biiblã noyã ye.” Rẽ wã, d sã n pa gũusi, reemã tõe n wa kɩtame tɩ d bas a Zeova tũubu. Sã n yɩ woto, d na n bõna bõn-sõma nins a Zeova sẽn kõ tõndã.

9. Sẽn zems ne 1 Tɩmote 1:18, 19 wã, a Poll maka a Tɩmote ne bõe?

⁹ Karm-y 1 Tɩmote 1:18, 19. A Poll maka a Tɩmote ne sodaaga, la a sagl-a t’a “kell n zab zab-sõngã.” A Poll ra pa gomd zabr sɩd-sɩd yell ye. Wãn to la kiris-nebã yaa wa sodaas sẽn be zabr pʋgẽ? D sẽn yaa Kiristã sodaasã, zʋg-sõma bʋs la d segd n bɩɩse? D ges bũmb a nu a Poll makrã sẽn sõngd tõnd tɩ d bãnge. Bõn-kãensã tõe n sõnga tõnd tɩ d kell n wɩng ne a Zeova tũubu.

10. Wẽn-zoeer yaa bõe, la bõe yĩng tɩ yaa tɩlɛ tɩ d bɩɩs zʋg-kãnga?

¹⁰ D bɩɩs wẽn-zoeere. Soda-sõng maanda sɩda. A na n sak n zaba ne a sũur fãa n kogl neb a sẽn nonge, wall bũmb a sẽn nand wʋsgo. A Poll sagla a Tɩmote t’a bɩɩs wẽn-zoeere, rat n yeel t’a sak Wẽnnaam ne a sũur fãa. (1 Tɩm. 4:7) Yaa d sã n nong Wẽnnaam sõma la d na n tʋll n kell n wɩng ne a tũubu.—1 Tɩm. 4:8-10; 6:6.

11. Bõe yĩng tɩ mong-m-meng yaa tɩlɛ?

¹¹ D bɩɩs mong-m-menga. Sodaag segd n mongda a meng bũmb kẽere, a sã n dat n ket n tʋmd a tʋʋmdã sõma. A Tɩmote kell n tõog n tʋma a tʋʋmdã sõma, bala a sak n tũu a Poll sẽn sagl-a t’a zãag a meng ne tʋls-wẽnse, t’a bɩɩs zʋg-sõma, la t’a tigimd ne a tẽed-n-taasã. (2 Tɩm. 2:22) Woto baooda mong-m-menga. D sã n dat n zab ne d yĩngã tʋls-wẽnsã n tõoge, mong-m-meng yaa tɩlɛ. (Rom. 7:21-25) Sẽn paase, d sã n dat n ket n yeegd nin-kʋdgã la d yeelgd nin-paalgã, yaa tɩlɛ tɩ d tall mong-m-menga. (Efɛ. 4:22, 24) Tigsg daare, d sã n tʋm daarã tõr n sig tɩ yaa yaamse, yaa tɩlɛ tɩ d wõr d meng n tõog n kẽng tigsgã.—Ebre. 10:24, 25.

12. Bõe la d tõe n maan n paam minim Biiblã tall-n-tʋmã wɛɛngẽ?

¹² Sodaag segd n zãmsda a sẽn tõe n tall a zab-teedã n zab sõma to-to. A sã n dat t’a minimã paasdẽ, a segd n maanda woto wakat fãa. Tõnd me segd n paama minim, n tõe n tʋm ne Wẽnnaam Gomdã sõma. (2 Tɩm. 2:15) Ne tigissã maasem, d paamda minim kẽer n tõe n maan rẽ. La d sã n dat n sõng nebã tɩ b sak n deeg tɩ Biiblã sẽn yetã sɩd tara yõod wʋsgo, d tog n zãmsda Biiblã d toor wakat fãa. D segd n talla Wẽnnaam Gomdã n bɩɩs d tẽebã. Rẽ wɛɛngẽ, Biiblã kareng bal pa sek ye. D segd n bʋgsda d sẽn karemdã zugu, la d maand vaeesg siglgã sɛb pʋsẽ, sẽn na yɩl n wʋm a võor sõma n tõog n bilg nebã. (1 Tɩm. 4:13- 15) Woto, d na n tõog n talla Wẽnnaam Gomdã n zãms neb a taabã. La woto pa rat n yeel tɩ d karemd Biiblã vɛrse bal tɩ nebã kelgdẽ ye. D segd n sõnga d kɛlgdbã tɩ b wʋm vɛrse wã võore, la b bãng b sẽn tõe n tũ rẽ to-to. D sã n zãmsd Biiblã d toor n pa vaandẽ, d na n tõog n paasa d minimã, n wa tõe n tall Wẽnnaam Gomdã a sẽn vẽneg tɩ b gʋlsã n zãms neb a taabã sõma.—2 Tɩm. 3:16, 17.

13. Wa Yel-bũn 22:3 sẽn wilgdã, bõe yĩng tɩ d segd n yɩ gũusdba?

¹³ D yɩ gũusdba. Sodaag segd n tõog n bãnga yell sẽn wate, la a gil-a. Tõnd me segd bãnga yɛl sẽn tõe n wa sãam d tẽebã, la d maan bũmb n gil-ba. (Karm-y Yel-bũn 22:3; Ebre. 5:14) Wala makre, d segd n maana gũusgu, filim-dãmbã la reemã yãkr wɛɛngẽ. Naoor wʋsgo, b wilgda yoob yɛl televiziõ wã pʋgẽ, la filim dãmb kẽer pʋsẽ. Woto yaa bũmb Wẽnnaam sẽn kisi. Ned sã n get bõn-kãensã, pa tõe n pa sãam a tẽebã ye. Rẽ n so tɩ d segd n zãag d meng ne reem la filim-dãmb nins sẽn tõe n kɩt tɩ bilf-bilfã, bɩ d wa pa le nong Wẽnnaamã.—Efɛ. 5:5, 6.

14. A Dãniyɛll sẽn maan gũusgã, wãn to la rẽ sõng-a?

¹⁴ A Dãniyɛlle, saam-biig ning yell d sẽn gomã, wa n gũus n gesame tɩ ze-video nins sẽn pid ne nen-kɛglem la zĩn-dãmb yɛlã, tõe n waa ne yelle. A maana vaeesg Watchtower Library wã pʋgẽ, n na n paam sagls sẽn na n sõng-a. Baasa wãna? A tõog n basa ze-video-kãensã tãoobo. A yãka a yʋʋrã a sẽn da ning ẽntɛrnetẽ wã n paamd n tõodẽ wã, la a bas n pa le tãood ne a sẽn da minim n tãood ne neb ninsã ye. A Dãniyɛll yeelame: “Wall tɩ m be roogẽ n tãood ze-video-rãmbã, m da yitame masã n kẽnd n sõsd la m reemd ne m zo-rãmbã sẽn be tigingã pʋgẽ wã.” Masã a Dãniyɛll lebga so-pakda, n yaa kãsem-soab me.

15. Bõe yĩng tɩ sɩdã-kɩɩsdbã sẽn yelgd ziri ninsã tõe n wa ne yelle?

¹⁵ Wa a Tɩmote, tõnd me segd n bãnga sɩdã-kɩɩsdbã sẽn yelgd ziri ninsã sẽn tõe n wa ne yell ningã. (1 Tɩm. 4:1, 7; 2 Tɩm. 2:16) Wala makre, b tõe n yelga kibay sẽn pa sɩd d saam-biisã zugu, wall a Zeova siglgã zugu. Kiba-yood a woto  tõe n sãama d tẽebã. D pa segd n bas tɩ kibay a woto belg tõnd ye. Bõe-yĩnga? Bala, yaa “neb nins tagsa sẽn yaa wẽns zãngã, n yaa neb sẽn pa mi sɩdã” n yelgd kibay a woto buudu. B raabã yaa b wa ne ‘kɩɩsg la no-koɛɛma.’ (1 Tɩm. 6:4, 5) B ratame tɩ d tẽ b tẽn-kãnemã, n pa le kɩs d saam-biisã sɩd ye.

16. Bõe la d pa segd n bas tɩ tiis-du?

¹⁶ D da bas tɩ bũmb tiis-d ye. A Tɩmote sẽn da yaa “Kirist Zeezi soda-sõngã” yĩnga, a ra segd n kell n wɩnga ne koɛɛgã moonego, n da bas tɩ arzɛkã baoob tiis-a ye. (2 Tɩm. 2:3, 4) Wa a Tɩmote, d pa segd n tʋll n bao teed wʋsg ye. “Arzɛkã tʋlsem” tõe n kɩtame tɩ d sẽn nong a Zeova la a Gomdã to-to wã booge, la kɩt me tɩ d pa le tʋll n sõng nebã tɩ b bãng Wẽnnaam Gomdã sẽn yetã ye. (Mat. 13:22) D pa segd n gĩd d vɩɩmã ne bũmb wʋsg ye. D tog n talla d sẽkã la d pãngã n “rengd n baood Wẽnnaam Rĩungã.”—Mat. 6:22-25, 33.

17-18. Bõe la d tõe n maan n kogl d tẽebã?

¹⁷ D segl d meng n tõog n gil yell tao-tao. Sodaag segd n deng n bãnga a sẽn na n maan bũmb ning takɩ n kogl a meng yell sasa. D sã n dat n kogl bũmb nins a Zeova sẽn kõ-dã, d segd n maana bũmb tao-tao, d sã n wa bãng tɩ yell n yɛgd tõndo. Bõe n tõe n sõng-d tɩ tõog n maan woto? D segd n deng n bãnga d sẽn na n maan bũmb ning takɩ, yellã sã n wa wa.

¹⁸ Wala makre, ɛstaad-dãmbã la biis-rãmbã pʋsẽ, b mi n wilga zĩis nebã sẽn tõe n tũ n yi, sã n wa wɩnge. Bõe yĩnga? Bala yell sã n tiig n wa, nebã tõe n tũu be n paam n zoe tao-tao n yi. Woto me, d tõe n deng bao n bãnga d sẽn na n maan bũmb ning takɩ, d sã n wa kẽ ẽntɛrnetã pʋgẽ, bɩ n get tele wall filim tɩ yoob yɛla, nen-kɛglem tʋʋma, wall sɩdã-kɩɩsdb sõsg tiig n puki. D sã n deng n segl d menga, d na n tõog n maana bũmb tao-tao n kogl d tẽebã, la d kell n pa yɩlemd a Zeova nifẽ.—Yɩɩn. 101:3; 1 Tɩm. 4:12.

19. D sã n kell n tall bõn-sõma nins a Zeova sẽn kõ tõndã neere, bark bʋs la d na n paame?

¹⁹ D segd n kell n talla bũmb ning a Zeova sẽn kõ tõnd tɩ yaa wa paoongã neere. Rat n yeel t’a sẽn sõng tõnd tɩ d bãng Biiblã sẽn yet bũmb ningã, la a sẽn kõ-d noor tɩ d sõng neb a taabã tɩ bãmb me bãng rẽ wã. Tõnd sã n maand woto, d sũur-kasetã pa na n ning-d taale, d vɩɩmã na n talla võore, d leb n na n paama sũ-noogo, d sẽn sõngd nebã tɩ b bãngd a Zeova wã yĩnga. Ne a Zeova sõngre, d na n tõog n gũu bũmb ning b sẽn kõ tõndã neere.—1 Tɩm. 6:12, 19.