1-2. Bõe yĩng tɩ kiris-nebã fãa segd n bao n bãng sẽn na n kẽng-b saasẽ wã vʋʋgrã sẽn na n yɩ to-to wã sõma?

NEB wʋsg sẽn tũud a Zeova rũndã-rũndã saagdame n na n wa vɩɩmd wakat sẽn kõn sa tẽngã zugu. Kiris-neb nins sẽn paam vʋʋsem sõngã zaeeb n ket tẽngã zugã saagdame n na n wa tɩ vɩɩmd saasẽ. Nin-kãensã rata ne b sũy fãa n bãng b vɩɩmã sẽn na n wa yɩ to-to. La yaa wãn to yẽ ne neb nins sẽn saagd n na n wa vɩɩmd tẽngã zugã? Wa d sẽn na n yã wã, sẽn na n kẽng-b saasẽ wã vʋʋgrã na n kɩtame me, tɩ neb nins sẽn saagd n na n wa vɩɩmd wakat sẽn kõn sa tẽngã zugã paam barka. D saagdame n na n tɩ vɩɩmd saasẽ tɩ yaa tẽng zug ka me, d segd n bao n bãnga sẽn na n kẽng-b saasẽ wã vʋʋgrã sẽn na n yɩ to-to wã sõma.

² Pipi kiris-nebã wakatẽ, Wẽnnaam vẽnega a Zeezi karen-biis kẽer tɩ b gom sẽn na n kẽng-b saasẽ wã vʋʋgrã yelle. Tʋm-tʋmd a Zã yeelame: “M nin-nongdse, tõnd yaa Wẽnnaam kamb masã, la b nan pa kɩt tɩ tõnd sẽn na n yɩ bũmb ningã lebg vẽeneg ye. La tõnd miime tɩ bãmb sã n wa vẽneg b menga, tõnd na n yɩɩ wa bãmba.” (1 Zã 3:2) Dẽnd sẽn paam-b vʋʋsem sõngã zaeebã pa mi sẽn na n yɩ to-to, b sã n wa vʋʋg n lebg malɛgs n tɩ be saasẽ ye. La b na n yãa a Zeova ne b nifu, b sã n wa paam b keoorã. Biiblã pa wilgd sẽn na n kẽng-b saasẽ wã vʋʋgrã sẽn na n yɩ to-to takɩ ye. La tʋm-tʋmd a Poll goma rẽ yell bilfu. Sẽn paam-b zaeebã na n zĩnda ne a Zeezi, a sã n wa na n kɩt “tɩ soolem-dãmbã fãa, naam la pãng fãa lebg zaalem.”  Kũumã b sẽn bool tɩ “yaoolem bɛ” wã me naagame. Sẽn na n baase, a Zeezi ne a na-rɩt-n-taasã na n lebsa bũmb fãa a Zeova nugẽ, la b sulg b mens n sak-a. (1 Kor. 15:24-28) Ad sɩd na n yɩɩ sũ-noog wakate! *

3. Wa 1 Korẽnt rãmb 15:30-32 sẽn wilgdã, a Poll sẽn da tẽed kũum vʋʋgrã yĩnga, sõng-a lame t’a maan bõe?

³ A Poll sẽn da tẽed kũum vʋʋgrã yĩnga, sõng-a lame t’a tõog n mao ne zu-loees toɛy-toɛya. (Karm-y 1 Korẽnt rãmb 15:30-32.) A yeela Korẽnt kiris-nebã yaa: “Daar fãa, mam segda yɛl sẽn tõe n tũ ne m yõore.” A leb n yeelame: “Mam zaba ne we-rũms Efɛɛze.” Tõe t’a ra gomda we-rũms sɩd-sɩd yell a sẽn zab ne Efɛɛz tẽngã reemã zakẽ. (2 Kor. 1:8; 4:10; 11:23) Bɩ tõe t’a ra gomda zʋɩf-rãmbã la neb a taab sẽn da tar manesem sẽn yaa wa “we-rũms” manesmã yelle. (Tʋʋ. 19:26-34; 1 Kor. 16:9) Yaa vẽeneg t’a Poll paama zu-loees sẽn da tõe n tũ ne a yõore, la a kell n talla saagr tɩ manegr n wate.—2 Kor. 4:16-18.

4. Wãn to la kiris-nebã sẽn tẽed kũum vʋʋgrã kengd b raood rũndã-rũndã? (Ges-y sebrã pipi neng fotã.)

⁴ Tõnd vɩɩ sasa sẽn yaa wẽng wʋsgo. D tẽed-n-taas kẽer la bi-bees nams-yã, bɩ n namsdẽ. Kẽer bee zĩig zab sẽn beẽ, tɩ yaa toog tɩ b kogl b yõyã. A taab bee tẽns b sẽn gɩdg d tũudmã, la baa ne rẽ, b ket n gẽnegda b yõy n tũud a Zeova. D tẽed-n-ta-kãensã fãa modgdame n ket n tũud a Zeova, tɩ yaa mak-sõng n kõ tõndo. B pa yɛɛsde, bala b miime tɩ baa b sã n ki masã menga, a Zeova na n wa kõ-b-la keoor sẽn ka to.

5. Tags-kɛgr bʋg n tõe n koms tẽeb ning d sẽn tar kũum vʋʋgrã wɛɛngẽ wã?

⁵ A Poll keooga a tẽed-n-taasã ne tagsa neb kẽer sẽn da tar tɩ pa sõma. B ra yetame yaa: “Kũum sã n pa na n vʋʋge, ‘bɩ d rɩ la d yũ, tɩ bala beoogo d na n kiime.’ ” Baa sẽn deng a Poll wakatã, neb kẽer n da tagsd woto. Tõe tɩ yaa Ezayi 22:13 sẽn da gomd Israyɛll nebã yel-manesmã yellã la a Poll lebg n tẽege. B ra segd n baoo zood sõma ne a Zeova, la b ra basa rẽ tɩ yaa yõ-noogrã yell n pak-ba. Israyɛll nebã tagsg ra yaa “noog f yõor tɩ vɩɩmã pa zɛɛd ye.” Neb wʋsg me yeta woto rũndã-rũndã. La Biiblã wilgda yell ning sẽn paam Israyɛll nebã, b sẽn da tagsd woto wã yĩnga.—2 Kib. 36:15-20.

6. D sẽn mi t’a Zeova na n wa vʋʋga sẽn ki-bã, segd n kɩtame tɩ d maan bõe d zo-rãmbã yãkr wɛɛngẽ?

⁶ D sẽn mi t’a Zeova na n wa vʋʋga sẽn ki-bã segd n kɩtame tɩ d bãng n yãk d zo-rãmbã. Korẽnt kiris-nebã ra segd n laka b mens ne neb nins sẽn pa sak n deeg tɩ kũum na n vʋʋgame wã. Yam-bʋg la d tõe n dɩk rẽ pʋgẽ? D zo-rãmbã sã n yaa neb sẽn pa tagsd beoog yelle, tɩ yaa yõ-noogrã bal n pak-ba, tõe n wã-d lame. Kiris-ned sã n nong n be ne nin-kãensã, tõe n kɩtame t’a wa tar tagsa sẽn pa sõma, la sãam a minim-sõamyã. Pʋd n tõe n kɩtame t’a wa maan bũmb Wẽnnaam sẽn kisi. Rẽ n so t’a Poll keoog-d yaa: “Puk-y y nin n maan sẽn yaa tɩrg la y ra maan yel-wẽnd ye.”—1 Kor. 15:33, 34.

7. Wa b sẽn togs 1 Korẽnt rãmb 15:35-38 wã, tõe tɩ neb kẽer ra sokda b mens bõe, kũum vʋʋgrã wɛɛngẽ?

⁷ Karm-y 1 Korẽnt rãmb 15:35-38. Ned sẽn dat tɩ neb a taab maan sãmbs  kũum vʋʋgrã wɛɛngẽ tõe n sokame yaa: “Wãn to la sẽn ki-bã tõe n vʋʋge?” D segd n bao n bãnga a Poll sẽn leok sok-kãngã to-to wã, bala rũndã-rũndã, neb wʋsg tara b tagsg ne bũmb ning sẽn maand ned a kũum poorã. La bõe la Biiblã yeta?

8. Makr bʋg n tõe n sõng-d tɩ d wʋm sẽn na n kẽng-b saasẽ wã vʋʋgrã sẽn na n yɩ to-to wã võor sõma?

⁸ Ned sã n ki, a yĩngã põogdame. La sẽn naan-a yĩngr la tẽngã tõe n vʋʋga nin-kãnga, n kõ-a yĩng sẽn zems ne-a. (Sɩng. 1:1; 2:7) A Poll rɩka makr n wilg tɩ pa tɩlɛ tɩ Wẽnnaam vʋʋg ned ne yĩng ning a sẽn da tar pĩndã ye. Tags-y “bõn-buud” bɩ ka-beell yelle. B sã n bʋd ka-beelle, a bundame n yi, n wa bɩ n lebg kaafo. A sẽn bul n yi wã ne a sẽn da ket n yaa bõn-buud sẽn yaa kɩdgã pa yembr ye. A Poll rɩka makr a woto n na n wilg tɩ d Naandã tõe n kɩtame tɩ ned paam yĩnga, n ‘lebg wa Wẽnnaam sẽn datã.’

9. Bõe la 1 Korẽnt rãmb 15:39-41 wã yet yĩns toor-toorã wɛɛngẽ?

⁹ Karm-y 1 Korẽnt rãmb 15:39-41. A Poll wilgame tɩ Wẽnnaam naana bõn-vɩɩsã tɩ b yĩnsã yaa toor-toore. Wala makre, niisã, liuuli wã la zĩmã yĩns yaa toor-toore. A Poll wilgame tɩ d sã n ges yĩngrã, wĩntoogã ne kiuugã pa yembr ye. A yeelame tɩ “ãdg ziir yaa toor ne ãdg a to.” Togs sɩda, baa ne d sẽn pa tõe n bãng ãdsã n bakã, siãnsã bãngdb wilgame tɩ ãds n be n yaa bɛda, kɩdse, miidu, pɛɛl la rõodo. A Poll paasame me tɩ “saasẽ bõn-naands beeme, tɩ tẽng zug bõn-naands me beẽ.” A gomdã võor yaa bõe? Rat n yeelame tɩ yĩn-nems n be tẽngã zugu, la saasẽ wã yaa yĩns wa malɛgsã rẽndã n be beenẽ.

10. Sẽn na n vʋʋg-b n kẽng saasẽ wã na n paama yĩn-bʋg buudu?

¹⁰ Ges-y a Poll sẽn yeel bũmb ning rẽ poorã. A yeelame: “B mumda yĩng sẽn tõe n põoge, la yaa yĩng sẽn pa tõe n põog  n vʋʋgde.” Sɩd me, ned sã n ki, a yĩngã põogdame n leb tẽngã tomẽ. (Sɩng. 3:19) Woto wã, wãn to la ned tõe n vʋʋg ne “yĩng sẽn pa tõe n põoge”? A Poll ra pa gomd ned sẽn vʋʋg tẽngã zug yelle, wala neb nins a Eli, a Eliize, la a Zeezi sẽn da vʋʋgã ye. A ra gomda ned sẽn na n vʋʋg ne yĩng sẽn tõe n zĩnd saasẽ, rat n yeel tɩ ne “yĩng sẽn pa yĩn-nemse.”—1 Kor. 15:42-44.

11-12. A Zeezi vʋʋgrã sasa, bõe n toeem a nengẽ? La yaa wãn to ne neb nins sẽn paam vʋʋsem sõngã zaeebã?

¹¹ A Zeezi sẽn da wa n be tẽngã zugã, a ra tara ninsaal yĩnga. La a sẽn wa n vʋʋgã, a “lebga sɩɩg sẽn kõt vɩɩm,” n kẽng saasẽ. Kiris-neb nins sẽn paam vʋʋsem sõngã zaeebã me na n vʋʋga ne yĩng sẽn tõe n vɩɩmd saasẽ. A Poll yeelame: “Tõnd na n yɩɩ soab ning sẽn be saasẽ wã me wõnego, wa tõnd sẽn yaa soab ning b sẽn naan ne tomã wõnegã.”—1 Kor. 15:45-49.

¹² Tara yõod tɩ d bãng t’a Zeezi pa vʋʋg ne ninsaal yĩng ye. A Poll togsa rẽ vẽenega, sẽn wa n ket bilf t’a baas a goamã kũum vʋʋgrã wɛɛngẽ wã. A yeela vẽeneg yaa: “Yĩn-nems ne zɩɩm pa tõe n kẽ Wẽnnaam Rĩungã pʋgẽ” ye. (1 Kor. 15:50) Tʋm-tʋmdbã ne neb a taab sẽn paam vʋʋsem sõngã zaeeb pa na n vʋʋg ne yĩn-nems la zɩɩm sẽn tõe n põogã n kẽng saasẽ ye. Wakat-bʋg la b na n vʋʋge? A Poll wilgame tɩ wakat-kãng ra nan pa ta, la tɩ pa na n yɩ b kũumã poor bal me ye. A sẽn wa n gʋlsd 1 Korẽnt rãmb sebrã tɩ karen-biis kẽer ra zoe n “maana kaalem,” wala makre, tʋm-tʋmd a Zake. (Tʋʋ. 12:1, 2) Tʋm-tʋmdb a taab ne neb kẽer sẽn paam vʋʋsem sõngã zaeeb me ra na n wa “maana kaalem.”—1 Kor. 15:6.

13. Yel-bʋs n da na n zĩndi, tɩ wilg tɩ d bee a Zeezi waoongã wakate?

¹³ A Zeezi ne a Poll fãa pĩnd n goma wakat sẽn yaa toor zall sẽn da na n wa  zĩnd yelle. Yaa a Zeezi waoongã wakate. B wilgame tɩ wakat-kãng sã n da ta, zaba, tẽn-digimdgu, bã-longds la yel-beed a taab n na n zĩnd dũniyã gill zugu. D yãa bãngr-gom-kãng sẽn sɩng pidsg yʋʋmd 1914 tɛka. Tʋʋmd sẽn tar yõod wʋsg me n da na n zĩnd wakat-kãngã. A Zeezi yeelame tɩ Wẽnnaam Rĩungã b sẽn luglã koe-noogã na n moona “dũniyã tɛk fãa tɩ yɩ kaset buud fãa yĩnga. Yaa rẽ poor la saabã na n ta.” (Mat. 24:3, 7-14) A Poll wilgame tɩ “Zu-soabã waoong wakatã” na n yɩɩ kiris-neb nins sẽn paam vʋʋsem sõngã zaeebã sẽn ki wã vʋʋgr wakat me.—1 Tes. 4:14-16; 1 Kor. 15:23.

14. Neb nins sẽn paam vʋʋsem sõng zaeeb sẽn maand kaalem Kiristã waoongã wakatã, bõe n maande?

¹⁴ Rũndã-rũndã, ned sẽn paam vʋʋsem sõngã zaeeb sã n maan kaalem, a vʋʋgda zĩig pʋgẽ n kẽng saasẽ. A Poll goam nins sẽn be 1 Korẽnt rãmb 15:51, 52 wã wilgda rẽ vẽenega. A yeelame: “Tõnd fãa pa na n ki [bɩ n “gũs”] ye. La tõnd fãa na n toeema zĩig pʋgẽ, nif kamsg pʋgẽ, yaoolem baorgã peebg sasa.” A Poll gom-kãensã pidsda masã menga. Kiristã ba-biisã sã n vʋʋge, b na n paama sũ-no-kãsenga. B na n “paa ne Zu-soabã wakat fãa yĩnga.”—1 Tes. 4:17.

15. Tʋʋm-bʋg la neb nins sẽn na n toeem “nif kamsg pʋgẽ” wã na n tʋme?

¹⁵ Biiblã wilgda tʋʋmd ning neb nins sẽn na n toeem “nif kamsg pʋgẽ” wã sẽn na n tʋm saasẽ wã. A Zeezi yeel-b lame yaa: “Ned ning sẽn na n tõog la sẽn na n tũ bũmb ning mam sẽn yeelã n tãag saabã, mam na n kõ-a-la tõog t’a soog buud toor-toorã, tõog wa a soab ning mam sẽn deeg m Ba nengẽ wã. Nin- kãng na n kɩɩma nebã ne kut rasaare, hal tɩ b wã n lebg peds wa tãnd laas sẽn wãad to-to wã.” (Vẽn. 2:26, 27) B na n naaga a Zeezi, tʋʋmd ning a sẽn na n tʋmã pʋgẽ, rat n yeel tɩ n kɩɩm nebã ne kut rasaare.—Vẽn. 19:11-15.

16. Wãn to la neb wʋsg na n tõog kũumã?

¹⁶ Yaa vẽeneg tɩ sẽn paam-b vʋʋsem sõng zaeebã na n tõoga kũumã. (1 Kor. 15:54-57) B vʋʋgrã poore, b na n sõngame tɩ wẽnemã sa dũniyã gill zugu, Armagedõ zabrã sasa. Kiris-neb a taab bãmb milyõ-rãmb sẽn yaa pagb la rap n na n “põs to-kãsengã” n vɩɩmd dũni-paalgã pʋgẽ. (Vẽn. 7:14) Nin-kãensã sẽn na n põsã na n yãa neb milyõ-rãmb sẽn da maan kaalem sẽn na n vʋʋgã, tɩ yɩ kaset tɩ b tõoga kũumã. Tags-y n ges-y d sũ-noogã sẽn na n yɩ kãseng to-to wakat-kãngã. (Tʋʋ. 24:15) Neb nins fãa sẽn na n kell n maan sɩd ne a Zeova wã na n tõoga kũumã, d yaab a Ãdem beegrã sẽn wa ne wã. B na n tõog n vɩɩmda wakat sẽn kõn sa.

17. Bõe la 1 Korẽnt rãmb 15:58 sagend tõnd tɩ d maan masã menga?

¹⁷ Kiris-ned fãa sẽn vɩ rũndã-rũndã segd n wilgame, t’a sũur nooma ne goam nins a Poll sẽn taas Korẽnt kiris-nebã kũum vʋʋgrã wɛɛngẽ hal tɩ kengd raoodã. D tara bʋʋm n na n wilg tɩ d saka a Poll sẽn sagl tõnd tɩ d tall “tʋʋm wʋsg Zu-soabã tʋʋmdã pʋgẽ” wã. (Karm-y 1 Korẽnt rãmb 15:58.) D sã n kell n tʋm tʋʋm-kãng ne yẽesem la ne d sũur fãa, d na n wa paama sũ-noog wʋsgo. Wakat kãnga, d sũ-noogã na n yɩɩga bũmb ning fãa d sẽn tõe n mams d yamẽ wã. Na n yɩɩ vẽeneg tɩ d sẽn tʋm wʋsg Zu-soabã yĩngã pa yɩ zaalem ye.