1-2. Tẽn-digimdg-bʋg buud yell la no-rɛɛs a Aaze pĩnd n togs tɩ na n zĩnda tõnd wakatã?

YƲƲMD 2015 wã, tẽn-digimdg n zĩnd Nepall soolmẽ wã. Ad neb kẽer sẽn põs tẽn-digimdgã sasa sẽn yeele: “Minit a wãn pʋgẽ bala, butik-bɛdã la etaas-kʋdã sɩnga siigri.” “Zĩig fãa, nebã ra maanda rabeem. Neb wʋsg yeelame tɩ tẽn-digimdgã pa yɩɩg minit a yiib ye. La sã n yaa ne maam, yaa wa kaoosa wʋsgo.” Yell a woto buud sã n zoe n paama yãmba, yaa vẽeneg tɩ y kõn tol n yĩm a yell ye.

² Rũndã-rũndã menga, tẽn-digimdg buud n maande. Yaa tẽn-digimdg sẽn maand dũniyã zĩig fãa. A Zeova digimdeda dũniyã tẽnsã fãa, la yaa yʋʋm wʋsg la woto a sẽn sɩng n maand rẽ. No-rɛɛs a Aaze pĩnd n goma tẽn-digimdg-kãng yell n yeel yaa: “Maam a Saasẽ-Pãng-Soabã yetame: ‘Keta bilfu, keta bilf bala, tɩ mam kɩt tɩ saasẽ la tẽng rigimdi, la m kɩt tɩ ko-kãsengã ne tẽn-gãongã rigimdi.’”—Aaze 2:6.

3. Wãn to la tẽn-digimdg ning sẽn maand rũndã-rũndã wã yaa toor ne tẽn-digimdg sɩd-sɩda?

³ A Aaze sẽn gom tẽn-digimdg ning yellã pa tẽn-digimdg sɩd-sɩd sẽn sãamd tẽng ye. Pʋd n yaa tẽn-digimdg sẽn nafd neba. A Zeova mengã yeta tõnd yaa: ‘Mam na n kɩtame tɩ tẽnsã fãa rigimdi. B na n wʋka laog nins fãa sẽn tar yõodã n wa, la mam na n kɩtame tɩ ro-kãngã pid ne ziiri.’ (Aaze 2:7) Bãngr-gom-kãngã võor da yaa bõe ne a Aaze wakatẽ nebã? La a võorã yaa bõe ne tõnd rũndã-rũndã? D na n paama sogs-kãensã leoore. Sẽn paase, d na n yãa d sẽn tõe n maan bũmb ning n sõng n digim dũniyã tẽns fãa rũndã-rũndã.

4. Bõe yĩng t’a Zeova tʋm no-rɛɛs a Aaze a nin-buiidã nengẽ?

⁴ A Zeova kõo no-rɛɛs a Aaze tʋʋmd sẽn tar yõod wʋsgo. D ges bũmb ning sẽn maane, nand t’a Zeova kõ a Aaze tʋʋmdã. A Aaze naaga neb nins sẽn yi Babilon yʋʋmd 537 sẽn deng a Zeezi rogmã n leb Zerizalɛmmã. Wẽn-sakdb-kãensã sẽn ta Zerizalɛmmã, pa yã n kaoos la b sɩng a Zeova roogã bɩ wẽnd-doogã yẽbgr ye. (Ɛsd. 3:8, 10) La bũmb n maane, n koms b raoodo. Neb nins sẽn da be be wã sẽn da namsd wẽn-sakdbã yĩnga, b komsa raood n bas roogã meebo. (Ɛsd. 4:4; Aaze 1:1, 2) Rẽ n so tɩ yʋʋmd 520 sẽn deng a Zeezi rogmã, a Zeova yeel a Aaze t’a keng nin-kãensã raoodo, tɩ b paam yẽesem n le kẽng taoor ne tʋʋmdã. *—Ɛsd. 6:14, 15.

5. Bõe yĩng t’a Aaze sẽn taas koɛɛg ningã keng Wẽnnaam nin-buiidã raoodo?

⁵ Koɛɛg ning a Aaze sẽn taasã ra yaa sẽn na n sõng zʋɩf-rãmbã tɩ b maneg n tẽ a Zeova. No-rɛɛs a Aaze talla raood n yeel zʋɩf-rãmbã sũy sẽn da sãamã yaa: “Yãmb a tẽngã gill fãa nebã, paam-y raoodo! Yaa maam a Sẽn-Ka-Saab n yeele. Tʋm-y-yã! Bala, mam bee ne yãmba, yaa maam a Saasẽ-Pãng-Soabã n yeele.” (Aaze 2:4) A sẽn yeel-b tɩ “Saasẽ-Pãng-Soabã” ra na n kɩtame tɩ b bas b yam. A Zeova tara malɛgs tus ka tɛk sẽn yaa a tãb-biis sẽn sakd a noyã. Rẽ wã, zʋɩf-rãmbã ra segd n teega a Zeova, sẽn na yɩl n tõog tʋʋmdã.

6. Tẽn-digimdg ning yell a Aaze sẽn gomã ra na n waa ne nafa bʋse?

⁶ A Zeova kɩtame t’a Aaze taas koɛɛga, n wilg t’a na n digimda tẽnsã fãa. A sẽn taas koɛɛg ningã sõnga zʋɩf-rãmbã sẽn da koms raood n bas wẽnd-doogã meebã tɩ b le paam raoodo. Kɩtame me tɩ b bãng t’a Zeova na n digimda Pɛrs soolmã sẽn da yaa dũni gill pãn-soaad wakat-kãnga. Rẽ nafa wã ra na n yɩɩ bõe? Pipi, Wẽnnaam nin-buiidã ra na n tõog n baasa wẽnd-doogã meebo. Rẽ poore, baa neb sẽn pa zʋɩf-rãmb ra na n wa naaga zʋɩf-rãmbã n tũ a Zeova, wẽnd-doogã b sẽn lebs n me wã pʋgẽ. Koɛɛgã a Aaze sẽn taasã ra segd n kenga Wẽnnaam nin-buiidã raood hal sõma.—Zaka. 8:9.

7. Tʋʋm-bʋg sẽn digimded dũniyã gill la tõnd me naag n tʋmd rũndã-rũndã? Wilg-y y leoorã võore.

⁷ A Aaze bãngr-gomdã võor yaa bõe ne tõnd rũndã-rũndã? A Zeova le digimdeda dũniyã tẽnsã fãa. La so-kãnga wã, tõnd me kẽesda d toogo. Tags-y n ges-y: Yʋʋmd 1914, a Zeova yãka a Zeezi Kirist t’a na n yɩ a saasẽ Rĩungã Rĩma. (Yɩɩn. 2:6) A Zeova sẽn lugl Rĩungã ra yaa koe-beed ne dũniyã nanambsã. Woto rat n yeelame tɩ bu-zẽmsã wakatã b sẽn yãkã, rat n yeel tɩ wakat ning rĩm baa a ye sẽn da pa le rɩt naam a Zeova yʋʋr yĩngã taa a tɛka. (Luk 21:24) A Zeova nin-buiidã sẽn mi rẽ wã, kɩtame tɩ b moond n wilgdẽ tɩ Wẽnnaam Rĩungã bal la ãdem-biisã zu-loeesã tɩɩm, sẽn yɩɩd fãa, yʋʋmd 1919 wã tɛka. Wẽnnaam Rĩungã koe-noogã d sẽn moondã digimdeda dũniyã gilli.—Mat. 24:14.

8. Wa Yɩɩn-sõamyã 2:1-3 sẽn wilgdã, buud toɛy-toɛyã neb wʋsg manesem yaa wãn ne koɛɛgã d sẽn moondã?

⁸ Nebã manesem yaa wãn to ne koɛɛgã d sẽn taasdã? Wʋsg pa sakd n kelg ye. (Karm-y Yɩɩn-sõamyã 2:1-3.) Dũniyã  buud toɛy-toɛyã neb sũy puudame. B zãgsa rĩm ning a Zeova sẽn yãkã. B pa get Rĩungã koɛɛgã d sẽn moondã wa koe-noog ye. Goosneema kẽer pʋd n gɩdga koɛɛgã moonego. Baa ne nanambs wʋsg sẽn yet tɩ b tuuda Wẽnnaamã, b pa rat n bas b naamã ye. Rũndã-rũndã nanambsã me maanda wa a Zeezi wakatẽ nanambsã. B zabda ne a Zeezi karen-biisã, tɩ wilgdẽ tɩ b kisa rĩm ning a Zeova sẽn yãkã.—Tʋʋ. 4:25-28.

9. Bõe la a Zeova kõ buud toɛy-toɛyã weer tɩ b tõe n maane, baa ne b sẽn pa sakd n kelgd Rĩungã koɛɛgã?

⁹ A Zeova manesem yaa wãn ne buud toɛy-toɛyã neb sẽn pa sakd n kelgd koɛɛgã? Yɩɩn-sõamyã 2:10-12 leokdame: “Moasã, bɩ yãmb a rĩm-dãmbã paam yam! Dũni bʋ-kaoodba, bas-y tɩ b rems-yã! Tʋm-y n kõ-y Sẽn-Ka-Saab ne waoogre la y maan sũ-noog ne rigbu. Waoog-y biigã, tɩ b sũurã da wa yik tɩ b menes-y ye. Bala, bãmb sũurã tõe n yika zĩig pʋgẽ n dɩt wa bugum. La neb nins fãa sẽn paam zĩ-lilldg bãmb nengẽ wã na n paama sũ-noogo.” A Zeova sẽn yaa maan-neer soabã yĩnga, a kõo a bɛɛbã weer tɩ b tõe n yãk yam n maan sẽn yaa sõma. B ket n tõe n teka yam la b sak a Zeova Rĩungã. La wakatã sẽn ketã pa le waoog ye. D vɩɩ dũni-kãngã ‘yaoolem wakate.’ (2 Tɩm. 3:1; Eza. 61:2) Yaa masã meng la nebã segd n bao n bãng sɩdã, la b yãk yam n tũ a Zeova.

10. Aaze 2:7-9 wã wilgdame tɩ tẽn-digimdgã na n waa ne nafa bʋgo?

¹⁰ A Aaze sẽn pĩnd n gom tẽn-digimdg ning yellã nafda neb kẽere. A wilgame tɩ ne tẽn-digimdg-kãng maasem, “laog nins fãa sẽn tar yõodã,” rat n yeel tɩ sũ-tɩrs rãmbã na n wa tũu a Zeova. * (Karm-y Aaze 2:7-9.) A Ezayi ne a Miise me pĩnd n togsa bũmb a woto buud sẽn na n maan yaoolem wakatã.—Eza. 2:2-4; Mii. 4:1, 2.

11. Bõe la saam-biig a ye maan-yã, a sẽn wʋm Rĩungã koe-noogã pipi wã?

 ¹¹ D ges koɛɛgã mooneg sẽn digimded dũniyã gillã sẽn naf saam-biig a ye to-to. A yʋʋr la a Kɛn. A tʋmda siglgã biru-kãsengẽ wã. A ket n tẽra a sẽn wʋm Rĩungã koɛɛgã pipi, sẽn zems yʋʋm 40 la woto masã. A Kɛn yeelame: “Mam sẽn bãng sɩdã Wẽnnaam Gomdã pʋgẽ pipi wã, m sũur yɩɩ noog m sẽn bãng tɩ d vɩɩ dũni-kãngã yaoolem wakatã. M bãngame tɩ sẽn na n yɩl n ta Wẽnnaam yam n wa paam vɩɩm sẽn ka sɛtã, m segd n laka m meng ne dũni-wẽn-kãnga, la m yals kãn-kãe n maan a Zeova raabã. M pʋʋsa a Zeova, la m sɩd maan woto. M basa dũniyã pʋgbo, la m sak tɩ Wẽnnaam Rĩungã sẽn na n kell n pa wakat fãa wã kogl-ma.”

12. Wãn to la wẽnd-doog ning sẽn pa ninsaalb nus n me wã pid ne ziir yaoolem wakatã sasa?

¹² Sãmbg kae t’a Zeova sɩd ningda a nin-buiidã barka. Yaoolem wakatã sasa, d nee neb wʋsg sẽn wat n naagd a Zeova nin-buiidã n tũud-a. Yʋʋmd 1914, a Zeova nin-buiidã sõor da yaa neb tus a wãn bala. La masã, d sõorã yɩɩda milyõ a nii. Sẽn paase, neb milyõ-rãmb n naagd tõnd yʋʋmd fãa n maand a Zeezi kũumã tẽegre. Woto kɩtame tɩ wẽnd-doog ning sẽn pa ninsaalb nus n me wã samandã sẽn be tẽngã zugã pid ne “laog nins fãa sẽn tar yõodã.” Ro-kãng makda bũmb nins fãa Wẽnnaam sẽn maan tɩ d tõe n tũ-a wa a sẽn dat to-to wã. Nin-kãensã sẽn toeemd bũmb wʋsg b vɩɩmã pʋgẽ n yeelgd nin-paalgã, kɩtdame me t’a Zeova yʋʋrã paamd waoogre.—Efɛ. 4:22-24.

13. A Zeova nin-buiidã sẽn tar fɩɩgrã pidsa bãngr-gom-bʋs me? (Ges-y sebrã pipi neng fotã.)

¹³ A Zeova nin-buiidã sẽn tar fɩɩgrã kõta sũ-noogo, la pidsd bãngr-goam a taaba. Wala makre, bãngr-gomd ning sẽn be Ezayi sak 60 pʋgẽ wã. A vɛrse 22 yetame: “Ned ning sẽn yaa-a bilfã na n lebga neb tusri, la sẽn paood-a n yɩɩdã na n lebga buud sẽn tar pãnga. Maam a Sẽn-Ka-Saab na n kɩtame t’a wakatã sã n ta bɩ yɩ tao-tao.” Tũudum hakɩɩka nebã sõor sẽn tar paasgã yĩnga, bũmb sẽn yaa wa yel-solemd n maande. “Laog  nins fãa sẽn tar yõodã,” rat n yeel tɩ nebã, wata a Zeova siglgã pʋgẽ ne minim toor-toore, la b tʋll me n naag a Zeova nin-buiidã n moon Rĩungã koe-noogã. Woto wã, nin-kãensã minimã nafda a Zeova nin-buiidã. No-rɛɛs a Ezayi yeelame tɩ woto yaa wa b sẽn ‘yẽsemd buud a taab bĩisim.’ (Eza. 60:5, 16) Nin-kãensã sõngrã maasem yĩnga, d tõog n moonda koɛɛgã tẽns 240 pʋsẽ, la d yiisd sɛb buud-goam tusr la zak pʋsẽ.

14. Bõe la nebã segd n yãk yam n maan masã menga?

¹⁴ Dũni-kãngã saabã sẽn kolgã, dũniyã tẽnsã rigimdgã kɩtame tɩ lebg tɩlɛ tɩ nebã yãk b sẽn na n maanega. Rẽ yĩnga, b na n teela Wẽnnaam Rĩungã bɩ, bɩ yaa dũniyã goosneema-rãmbã la b na n teele? Yaa ned fãa n segd n yãk a sẽn na n maanega. Baa ne a Zeova nin-buiidã sẽn sakd b tẽngã goosneema-rãmbã noyã, b pa kẽesd b toog baa bilf dũni-kãngã politikã yɛlẽ ye. (Rom. 13:1-7) B miime tɩ yaa Wẽnnaam Rĩungã bal n na n wa ne ãdem-biisã zu-loeesã tɩɩm. Rĩung-kãng pa dũniyã rẽnd ye.—Zã 18:36, 37.

15. Vẽnegr sebrã pʋgẽ, b wilgame tɩ mak-toaag bʋg la Wẽnnaam nin-buiidã na n paam b tẽebã yĩnga?

¹⁵ Vẽnegr sebrã wilgdame tɩ yaoolem wakatã, Wẽnnaam nin-buiidã tẽebã na n paama makre. Makrã na n kɩtame tɩ namsgã d sẽn paamd d tũudmã yĩngã pãng paasdẽ. Dũniyã goosneema-rãmbã na n datame tɩ d bas a Zeova sakre, n sak bãmba. Sẽn paase, b na n namsa neb nins sẽn na n zãgs n pa maan b raabã. (Vẽn. 13:12, 15) B na n “modgda nebã fãa, nin-kãsems la nin-bõonego, rakãag-rãmb la naong rãmba, burkĩmb la yembse, sẽn na yɩl tɩ b ning nin-kãens rɩtg nugã wall b rĩirã bãnde.” (Vẽn. 13:16) Pĩnd wẽndẽ wã, b ra ningda yembsã bãnde, n na n wilg neb nins sẽn so-bã. Woto me, rũndã-rũndã, b na n wa ratame tɩ ned fãa reeg bãnd buud a nugẽ wã, wall a rĩirẽ wã. B na n wa ratame tɩ ned fãa wilg ne a tagsg la a tʋʋm-tʋmdɩ t’a teenda politikã siglsã.

16. Bõe yĩng tɩ yaa tɩlɛ tɩ d modg n maan sɩd ne a Zeova masã menga?

¹⁶ Rẽ yĩnga, d na n sakame tɩ b ning-d bãnde, la d teel goosneema-rãmbã bɩ? Neb nins sẽn pa na n sak n deeg bãndã na n paama namsgo. Vẽnegr sebrã pʋgẽ, b paasame yaa: “Tɩ ned baa a ye ra tõog n da wall a koos bũmbu, sã n pa ned sẽn tar bãndã.” (Vẽn. 13:17) La Wẽnnaam nin-buiidã mii Wẽnnaam sẽn na n maan neb nins sẽn tar bãndã bũmb ninga, bãnd ning yell b sẽn gom Vẽnegr 14:9, 10 pʋgẽ wã. Wẽnnaam nin-buiidã yẽ pa na n deeg bãndã ye. Na n yɩɩ wa b gʋlsa b nugẽ wã tɩ ‘mam yaa a Zeova rẽnda.’ (Eza. 44:5) Yaa masã la d segd n modg n maan sɩd ne a Zeova ne d sũy fãa. Woto, a Zeova sũur na n yɩɩ noog ne d sẽn yaa yẽ rẽndã.

17. A Zeova sũ-marã wɛɛngẽ, bõe la d pa segd n yĩmi?

¹⁷ A Zeova ket n maanda sũ-mar wʋsg yaoolem wakatã sasa. A pa rat tɩ ned baa a ye sãam ye. (2 Pɩy. 3:9) A kõo nebã fãa weer tɩ b tõe n tek yam, la b yãk yam n tũ-a. La a sũ-marã na n talla tɛka. Neb nins sẽn zãgs n pa na n teel Wẽnnaam Rĩungã me na n paama yell ning a Farawõ sẽn paame, a Moyiiz wakatẽ wã. A Zeova yeela a Farawõ yaa: “Mam sã n dag n kɩtẽ tɩ bã-wẽng yõk fo nebã, woto tɩ fo menemẽ-la dũniyã zugu. La mam basa foom tɩ f vɩɩmde, sẽn na n yɩlẽ tɩ fo yãnd  mam pãngã, la tɩ mam yʋʋr saag dũniyã fãa pʋgẽ.” (Yik. 9:15, 16) Dũniyã nebã fãa na n wa bãngame tɩ yaa a Zeova a ye la Wẽnnaam sɩd-sɩdã. (Eze. 38:23) Na n tũu ne bõe?

18. a) Aaze 2:6, 20-22 gomda tẽn-digimdg-bʋg yelle? b) Bõe n wilgd t’a Aaze gomdã na n le wa paama pidsgu?

¹⁸ No-rɛɛs a Aaze kũumã yʋʋm wʋsg loogr poore, Wẽnnaam vẽnega tʋm-tʋmd a Poll t’a wilg tɩ goam nins sẽn be Aaze 2:6, 20-22 na n le wa paama pidsgu. (Karm-y.) A Poll yeelame: “Masã b pʋlmame yaa: ‘Mam na n le kɩtame tɩ tẽngã rigimd yɛsa. La pa tẽngã bal ye. Na n yɩɩ saasã me.’ B sẽn yeel tɩ ‘yɛsã’ wilgdame tɩ b na n menesa bũmb nins b sẽn kɩt tɩ rigimdã, rat n yeel tɩ bũmb nins sẽn pa Wẽnnaam n maanã, sẽn na yɩl tɩ bũmb nins b sẽn pa kɩt tɩ rigimdã kell n pa.” (Ebre. 12:26, 27) Tẽn-digimdg-kãngã yaa toor ne tẽn-digimdg ning yell b sẽn gom Aaze 2:7 pʋgẽ wã. Tẽn-digimdg-kãngã na n kɩtame tɩ neb nins sẽn pa sak n deeg t’a Zeova n tar sor n dɩ naamã paam sãoong wakat fãa yĩnga, wa sẽn yɩ to-to ne a Farawõ wã.

19. Bõe n pa na n digimdi, la bõe n kɩt tɩ d mi rẽ?

¹⁹ Bõe n pa na n digimdi, bɩ n sãame? A Poll paasame: “Tõnd sẽn tog n paam Rĩung bũmb sẽn pa tõe n kɩt t’a rigimdã yĩnga, bɩ d ket n paamd Wẽnnaam barkã. Yaa ne bark-kãng maasem la d tõe n tʋm Wẽnnaam tʋʋmdã ne wẽn-zoeer la ne rabeem tɩ ta b yam.” (Ebre. 12:28) Yaoolem tẽn-digimdgã sã n wa sa, Wẽnnaam Rĩungã bal n na n ketẽ. A na n kell n yalsa kãn-kae a zĩigẽ.—Yɩɩn. 110:5, 6; Dãn. 2:44.

20. Nebã segd n yãka yam n maan bõe, la wãn to la d tõe n sõng-ba?

²⁰ Wakatã sẽn ketã pa le waoog ye. Nebã segd n yãka b sẽn na n maanega: B sã n yãk yam n kell n teel dũni-kãngã, b na n paama sãoongo. B sã n yãk yam n tũ a Zeova, la b maan b sẽn tõe n fãa n tek b vɩɩmã n maan a raabã, b na n wa paamã vɩɩm sẽn ka sɛta. (Ebre. 12:25) Ne koe-moonegã maasem, d tõe n sõnga nebã tɩ b bãng b sẽn na n maanega, yel-kãngã sẽn pa reem yellã wɛɛngẽ. Bɩ d modg n sõng neb wʋsgo, tɩ b sak n teel Wẽnnaam Rĩungã. Sẽn paase, d modg n da yĩm d Zu-soab a Zeezi sẽn yeel bũmb ningã ye. A yeelame: “Rĩungã koe-no-kãngã na n moona dũniyã tɛk fãa tɩ yɩ kaset buud fãa yĩnga. Yaa rẽ poor la saabã na n ta.”—Mat. 24:14.