1-2. Wa Yɩɩn-sõamyã 34:9 sẽn yetã, bõe la d tõe n maan n sɩd bãng t’a Zeova yaa sõma?

MAMS-Y n ges-y b sẽn na n kõ yãmb rɩɩbo, tɩ yaool n yaa rɩɩb y sẽn zɩ n lembe. Y tõe n bãnga bũmb wʋsg rɩɩbã zugu, y sã n ges-a sõma, n yũbs-a, n bao n bãng b sẽn segl-a ne bũmb ninsã, bɩ n sok neb a taabã b tagsg rɩɩbã wɛɛngẽ. La yaa y sã n wa lemb rɩɩbã bal la y na n bãng a sã n sɩd noom-y lame.

² D sã n karemd Biiblã la sɛb nins siglgã sẽn yiisdã, la d kelgd neb a taabã sẽn togsd a Zeova sẽn maan bõn-sõma nins n kõ-bã, tõe n sõng-d lame tɩ d bãng a Zeova sõmblmã sẽn ta zĩig ningã. La yaa tõnd mengã sã n ‘lemb’ a Zeova sõmblmã n ges la d na n sɩd bãng t’a yaa sõma hal wʋsgo. (Karm-y Yɩɩn-sõamyã 34:9.) Bɩ d ges d sẽn tõe n maan rẽ to-to. Tags-y n ges-y y sẽn na n dat n kẽes y meng zãng a Zeova tʋʋmdã pʋgẽ. La sẽn na yɩl n tõog n maan rẽ, y segd n monga y meng bũmb kẽere. Tõe tɩ yaa naoor wʋsg la y karem a Zeezi sẽn pʋlem tɩ d sã n lʋɩɩs Wẽnnaam Rĩungã taoore, a Zeova na n gesame tɩ d paam bũmb nins sẽn yaa tɩlɛ ne-dã, la y yaool nan pa yã a Zeova sẽn pids a pʋlengã y mengã zug ye. (Mat. 6:33) La y sẽn kɩs sɩd ne a Zeezi sẽn yeel bũmb ningã yĩnga, y modgame n pa sãamd ligdi, n boog y tʋʋm kẽere, la y kẽes y meng sõma a Zeova tʋʋmdã pʋgẽ. Y sẽn maand woto wã, y nee vẽeneg t’a Zeova sɩd getame tɩ d paamd bũmb nins sẽn yaa tɩlɛ ne-dã. Woto, yaa wa yãmb mengã ‘lembame,’ n bãng t’a Zeova sɩd yaa sõma.

3. Sẽn zems ne Yɩɩn-sõamyã 31:20 wã, ãnd rãmb n dɩt a Zeova sõmblmã yõodo?

³ A Zeova yaa “sõmblem soab nebã fãa yĩnga,” baa neb nins sẽn pa mi-a wã. (Yɩɩn. 145:9; Mat. 5:45) La yaa neb nins sẽn nong-a la b tũud-a ne b sũy fãa wã n paamd a barkã n tɩ  yɩɩda. (Karm-y Yɩɩn-sõamyã 31:20.) Bɩ d gom bõn-sõma kẽer a Zeova sẽn maan n kõ tõnd yelle.

4. Wãn to la a Zeova wilgd a sõmblmã ne neb nins sẽn lebgd a zo-rãmbã?

⁴ D sã n dɩk yam bũmb ning fãa d sẽn bãng a Zeova zugu, d yãta a yõodo. D sẽn wa n bãng bũmb wʋsg a Zeova zug la d nong-a wã, a sõng-d lame tɩ d zãag d mens ne bũmb nins a sẽn kisã, n pa le tagsd b yell meng ye. (Kol. 1:21) La d sẽn wa n dɩk d mens n kõ-a n deeg lisgã, a pʋd n kõo tõnd bũmb sẽn yaa sõma wʋsg n paase. Wala makre, sũur-kaset sẽn yaa sõma, la zood hakɩɩk ne-a.—1 Pɩy. 3:21.

5. Wãn to la d ne a Zeova sõmblmã koɛɛgã mooneg pʋgẽ?

⁵ D sẽn kẽes d mens koɛɛgã moonegã pʋgẽ wã tɛka, d ket n nee a Zeova sõmblmã sẽn nafd tõnd to-to wã vẽenega. Y yaa ned sẽn zoet yãnd bɩ? A Zeova nin-buiidã sʋka, wʋsgã yaa neb sẽn zoet yãnde. Tõeeme tɩ nand tɩ y lebg a Zeova Kaset soaba, y ra zɩ n tags tɩ y na n wa wẽeda ned y sẽn pa mi kʋɩlenga, n taasd a soabã Wẽnnaam koɛɛg ye. La rũndã-rũndã, yaool n yaa woto la y maand wakat fãa. Sẽn paase, a Zeova pʋd n sõng-y lame tɩ y nong koɛɛgã moonego. Y yãame me tɩ bũmb a taab la a Zeova maan n sõng yãmba. A sõng-y lame tɩ y tõogd y sũuri, ned sã n wa namsd yãmb y sẽn moond koɛɛgã yĩnga. A sõng-y lame me tɩ y tõe n tẽeg vɛrse-rãmb sẽn zemse, n sõs b zug ne ned sẽn dat n kelg koɛɛgã. A leb n kõ-y-la pãng tɩ y tõe n ket n moond koɛɛgã, baa nebã sã n pa rat n kelge.—Zer. 20:7-9.

6. Wãn to la a Zeova sẽn sõngd tõnd tɩ d paamd minim koɛɛgã mooneg pʋgẽ wã wilgdẽ t’a yaa sõmblem soaba?

⁶ A Zeova leb n kɩtame tɩ d bãng t’a yaa sõmblem soaba, a sẽn sõngd tõnd tɩ d paamd minim koɛɛgã mooneg pʋgẽ wã yĩnga. (Zã 6:45) Kiris-nebã vɩɩm la b tʋʋmã tigsg sasa, b wilgda tõnd d sẽn tõe n tɩʋʋs sõsg to-to, tɩ d tõe n tũ rẽ d sã n wa moond koɛɛgã. Sã n yaa pipi la woto d sẽn dat n mak bõn-paalle, d tõe n maanda rabeem bilfu. La d sã n sɩd mak n gese, d yãta vẽeneg tɩ womda biisi. Tigissã la tigs-kãsemsã sasa me, b sagenda tõnd tɩ d mak manesem-paal d sẽn zɩ n tũnug ne n moon koɛɛgã. D tõe n maanda rabeem, la d sã n sɩd make, a Zeova na n ninga barka. Bɩ d ges a Zeova sẽn na n ning-d bark to-to, d sã n tũnug ne manesem-paal n na n moond koɛɛgã wa d sẽn tõe, baa ne d yɛlã sẽn yaa to-to wã. Rẽ poore, d na n yãa bũmb kẽer d sẽn tõe n maane, n paas d koe-moonegã.

7. D sã n modg sẽn na yɩl n paam n moon koɛɛgã sõma n paase, bark-bʋs la d paamda?

⁷ D manegd n paama zood sõma ne a Zeova: D gom kãsem-soab a ye yʋʋr sẽn boond t’a Sãmwɛll * yelle. Yẽ ne a pagã bee Kolõmbi, n yaa so-pakdb b tigingã pʋgẽ. La b ra ratame n yik n tɩ sõng tiging sẽn dat sõngre, n paam n moon koɛɛgã sõma n paase. La sẽn na yɩl n tõog n maan dẽ, b ra segd n sak n monga b mens bũmb kẽere. Ad a Sãmwɛll sẽn yeele: “D tũu Matiye 6:33 sẽn yet bũmb ningã, n bas n pa le raad bũmb sẽn pa tɩlɛ ne-d ye. La yaa d sẽn da segd n bas d roogã n loogã n yɩ toog n yɩɩda. Roogã ra kell n zemsa kɛpɩ ne tõndo. Rẽ me, d ra pa le tar samd roogã zug ye.” B sẽn yik n kẽng tiging a to pʋgẽ wã, b mikame tɩ b pa le baood ligd wʋsg wa pĩndã n na n vɩɩmd ye. A Sãmwɛll paasame: “D yãa a Zeova sẽn wilgd tõnd sore, la a  leokd d pʋʋsgã. D nee bũmb wʋsg sẽn wilgd t’a Zeova sũur nooma ne-do, la t’a nong-d lame, hal tɩ d sũur zɩ n yɩ noog woto ye.” Yãmb me tõe n maana bũmb n paam n moon koɛɛgã sõma n paas bɩ? Sã n yaa woto, y tõe n kɩsa sɩd tɩ y na n maneg n paama a Zeova zoodo, la t’a na n gesame tɩ y paam bũmb nins sẽn yaa tɩlɛ ne-yã.—Yɩɩn. 18:26.

8. A Ivan ne a pag a Viktoria sẽn yeel bũmb ningã sõngda tõnd tɩ d bãng bõe?

⁸ D paamda sũ-noog koɛɛgã mooneg pʋgẽ: D gom saam-biig a Ivan ne a pag a Viktoria yelle. B yaa so-pakdb n be Kirgizistã. B modgame n pa gĩd b vɩɩmã ne bũmb wʋsgo, sẽn na yɩl n paam n sõng ne tʋʋmd ning fãa. Wala makre, n sõngd n met siglgã roto. Ad a Ivan sẽn yeele: “B sẽn da kõ tõnd tʋʋmd ning fãa, d ra tʋmda ne d sũy fãa. Baa d sẽn da mi n sig tʋʋm tɩ yaa yaamsã, d da tara sũur pʋgẽ bãane, la sũ-noogo, d sẽn mi tɩ d rɩka d pãngã fãa n kẽes Rĩungã tʋʋmd pʋgẽ wã yĩnga. D sũy leb n da noomame, bala d paama zo-rãmb wʋsgo, la d paam me n maan bũmb toor-toor sẽn kõ-d sũ-noogo.”—Mark 10:29, 30.

9. Bõe la saam-bi-poak sẽn tar zu-loe-kɛgems maan-yã, sẽn na n yɩl n tõog n moon koɛɛgã n paase, la rẽ woma bi-bʋse?

⁹ D paamda sũ-noog a Zeova tʋʋmdã pʋgẽ, baa d sã n maooda ne zu-loe-kɛgemse. D gom saam-bi-poak a Miirɛ sẽn be Afirik tẽng a ye wã yelle. A yaa pʋg-kõore, t’a yʋʋmã me vẽsge. A ra yaa logtore. La a sẽn loog retrɛtã, a lebga so-pakda. A tara bãag sẽn namsd-a wʋsgo, sẽn kɩt t’a pa tõe n kẽn wʋsg ye. Lɛɛr a yembr bal la a tõe n moon zak-zak moonegã sasa. La sã n yaa ne perzãntoaarã, a tõe n moona lɛɛr-dãmb wʋsgo. A tara lebg-n-tɩ-ges rãmb la Biibl karen-biis wʋsgo. Kẽer yaa ne telefõnnã la a sõsd ne-ba. Bõe n kɩt t’a Miirɛ rat n maan a sẽn tõe fãa a Zeova tʋʋmdã pʋgẽ? Ad a sẽn yeele: “Yaa m sẽn nong a Zeova la Zeezi Kirist ne m sũur fãa wã yĩnga. M nong n pʋʋsda a Zeova n kot-a t’a sõng-m tɩ m tõog n maan m sẽn tõe fãa a tʋʋmdã pʋgẽ.”—Mat. 22:36, 37.

10. Wa 1 Pɩyɛɛr 5:10 sẽn wilgdã, neb nins sẽn modgd n na n paam n tʋm a Zeova tʋʋmdã wʋsgã paamda bõe a nengẽ?

¹⁰ A Zeova sõngda tõnd tɩ d paamd minim: Saam-biig a Keni sẽn yaa so-pakd n be Moriisã bãngame tɩ woto sɩd yaa sɩda. A sẽn wa n bãng sɩdã, a basa inivɛrsite wã karengo, n deeg lisgu, n lebg wakat fãa so-pakda. A yeelame: “No-rɛɛs a Ezayi ra yeela a Zeova tɩ ‘ad maam! Tʋm-y maam!’ Mam modgdame n na n maan wa yẽ.” (Eza. 6:8) A Keni sõngame n me siglgã rot wʋsgo, la a sõng me n lebg sɛb sẽn tik Biiblã zug a buud-gomdã pʋgẽ. A paasame: “M paamame tɩ b sõng-m tɩ m paam minim, sẽn na yɩl n tõog n tʋm tʋʋm nins fãa b sẽn kõ-mã.” La pa tʋʋmdã sẽn tʋmd to-to wã bal la a zãms ye. A paasame: “M bãnga m pãn-tõogã tɛka, la zʋg-sõma nins m sẽn segd n bɩɩs n lebg a Zeova tʋm-tʋmd sẽn ta a yam.” (Karm-y 1 Pɩyɛɛr 5:10.) Yãmb me tõe n sigla y yɛlã sõma, sẽn na yɩl t’a Zeova sõng-y tɩ y paam minim n paas n tõe n tʋm tʋʋm wʋsg a tũudmã pʋgẽ.

11. Bõe la Kooredisiid saam-bi-pogs maan-yã sẽn na yɩl n tõog n moond koɛɛgã, la rẽ woma bi-bʋse? (Ges-y sebrã pipi neng fotã.)

¹¹ Baa neb nins sẽn tũud a Zeova na maan yʋʋm wʋsgã baoodame tɩ b sõng-ba, tɩ b tõog n tũnug ne manesem-paal n moond koɛɛgã. Koronavirisã bã-longdgã sasa, Kooredisiid tiging a ye kãsem-dãmb yeelame: “Neb kẽer da tagsdame tɩ b laafɩ wã sẽn pa waoogã yĩnga, b ra pa le tõe n naag n moon koɛɛgã ye. La masã,  yaa ne videokõnferãns la b tũnugd ne n taasd nebã koɛɛgã. Saam-bi-pogs a tãab sẽn tar yʋʋm 80 la zak zãmsa b sẽn tõe n maan dẽ to-to ne ordinatɛɛr maasem. La masã, b moonda koɛɛgã daar fãa la bala.” (Yɩɩn. 92:15, 16) Yãmb me ratame n paam n moon koɛɛgã n paase, n lemb n ges n bãng a Zeova sõmblmã sẽn ta zĩig ning bɩ? Bɩ d ges bũmb kẽer y sẽn tõe n maan tɩ sõng-yã.

12. Bõe la a Zeova pʋlem neb nins sẽn teeg-a wã?

¹² Kell-y n teeg-y a Zeova: A pʋlmame t’a na n ning-d-la barka, d sã n teeg-a la d maand d sẽn tõe fãa a tʋʋmdã pʋgẽ. (Mal. 3:10) Saam-bi-poak a ye yʋʋr sẽn boond t’a Fabiola n be Kolõmbi yãa a Zeova sẽn pids a pʋlen-kãngã yẽ zugu. A lisgã reegr poor bala, a ra rat n lebga wakat fãa so-pakda. La a sɩdã ne a kamb a tãabã fãa ra teega ligd ning a sẽn da tʋmd n paamdẽ wã. A sẽn wa n ta retrɛtã, a pʋʋsa a Zeova ne a sũur fãa n kos sõngre. A yeelame: “Yɩl n wa paam tɩ b sɩng f pãnsiyõ wã ligd kũuni, kaoosda wʋsgo. La mam yẽ nengẽ yɩɩ kiuug a ye poor bal la m sɩng m pãnsiyõ wã ligd reegre. Sɩd yɩɩ yel-solemde!” Kiuug a yiib poore, a lebga so-pakda. Masã, a tara yʋʋm 70 la zaka. La yaa sẽn yɩɩd yʋʋm 20 la woto a sẽn ket n yaa so-pakda. A tõog n sõnga neb a nii tɩ b wa reeg lisgu. Ad a sẽn yeele: “Baa ne m sẽn mi n ka laafɩ wã, a Zeova sõngda maam daar fãa tɩ m ket n yaa so-pakda.”

13-14. Bõe la d tõe n maan tɩ sõng-d tɩ d teeg a Zeova, la d modg n tʋm a tʋʋmdã n paase?

 ¹³ Rɩk-y neb nins sẽn teeg a Zeova wã togs-n-taare: Biiblã tara kibay sẽn gomd neb sẽn tʋm a Zeova tʋʋmdã ne b sũy fãa yelle. B wʋsg yɩɩ b sẽn maan bũmb n wilg tɩ b teega a Zeova wã poor la b yaool n paam t’a ning-b barka. Wala makre, yɩɩ a Abrahaam sẽn sak n yi n bas a yirã “baa a sẽn da pa mi a sẽn dabdẽ wã” poor la a Zeova ning-a barka. (Ebre. 11:8) Yɩɩ a Zakoob sẽn mao ne malɛkã poor la a yaool n paam a Zeova barkã. (Sɩng. 32:25-31) Israyɛll nebã sẽn wa n dat n kẽ kãabg tẽngẽ wã, yɩɩ maan-kʋʋdbã sẽn tabg Zʋrdẽ kʋɩlgã poor la nin-buiidã tõog n pasg kʋɩlgã.—Zoz. 3:14-16.

¹⁴ Rũndã-rũndã me, a Zeova Kaset rãmb n teeg a Zeova n tõog n tʋm a tʋʋmdã wʋsg n paase, tɩ d tõe n dɩk b togs-n-taare. Wala makre, saam-biig a Peyitõn ne a pag a Diyana nong n karemda kibay sẽn gomd d tẽed-n-taas sẽn modg n kẽes b toog sõma koɛɛgã mooneg pʋgẽ yelle. Wala makre, sõss nins sẽn nong n yit t’a gom-zugã yaa: “B tɩ tʋmda ne yamleoogo.” * Ad a Peyitõn sẽn yeele: “Tõnd sã n wa karemd kiba-kãensã buudã, yaa wa d sẽn zĩ n get ned sẽn dɩt rɩ-noogo. D sẽn da tar karengã, tʋʋmdã yamleoogã kẽ-d lame, tɩ d rat n ‘lemb n ges n bãng t’a Zeova yaa sõma.’” Tarẽ-n-tarẽ, a Peyitõn ne a Diyana wa n yikame, n tɩ moond koɛɛgã zĩig b sẽn dat koe-moondb n paase. Yãmb me karemda sõs-kãensã bɩ? Yãmb gesa video nins gom-zut sẽn yaa: Prédication dans des régions isolées: Australie, ne Prédication dans des régions isolées: Irlande sẽn be jw.org pʋgẽ wã bɩ? Bõn-kãensã fãa tõe n sõng-y lame tɩ y bãng y sẽn na n maan to-to n paam n moon koɛɛgã sõma n paase.

15. Wãn to la tũud-n-ta-sõma tõe n naf-do?

¹⁵ Bao-y tũud-n-ta-sõma: D sã n nong n be ne neb sẽn nong n dɩt rɩɩb tõnd sẽn zɩ n dɩ, d wat n dat n lembame n gese. Woto me, d sã n nong n be ne neb sẽn lʋɩɩs a Zeova taoor b vɩɩmã pʋgẽ, d na n baooda d sẽn tõe n maan n tõog n tʋm a Zeova tʋʋmdã sõma n paase. A Kẽnt ne a pag a Veronik yãame tɩ sɩd yaa sɩda. A Kẽnt yeelame: “D zo-rãmbã, la d zakã rãmb ra nong n yeta tõnd tɩ d bao n tʋm Wẽnnaam tʋʋmdã buk toor-toorã. D yãame tɩ d sẽn nong n be ne neb sẽn lʋɩɩs Rĩungã tʋʋmdã taoorã, d tõog n maka bõn-paal n gese.” Masã, a Kẽnt ne a pag a Veronik lebga zall so-pakdba, n be Sɛrbi.

16. Wa a Zeezi sẽn wilg a yel-bũnd ning sẽn be Luk 12:16-21 pʋgẽ wã, bõe yĩng tɩ d segd n sak n mong d mens bũmb kẽere?

¹⁶ Sak-y n mong-y y mens bũmb kẽer a Zeova yĩnga: Pa tɩlɛ tɩ d bas bũmb nins fãa sẽn noom tõndã, sẽn na n yɩl n ta a Zeova yam ye. (Koɛ. 5:18, 19) D sã n yãk yam n pa na n tʋm wʋsg a Zeova tʋʋmdã pʋgẽ, d sẽn pa rat n bas bũmb d sẽn nong yĩnga, d na n yɩɩ wa rao ning yell a Zeezi sẽn gom a yel-bũndã pʋgẽ wã. Raoã tʋmame n paam bũmb wʋsgo, la a ra maanda a toog kae ne Wẽnnaam. (Karm-y Luk 12:16-21.) Saam-biig a ye yʋʋr sẽn boond t’a Kirsiyã sẽn be Fãrensã yeelame: “M da getame tɩ m pa rɩkd m sẽkã la m pãngã fãa n tũud a Zeova, la m get m zakã rãmb yell sõma ye.” Yẽ ne a pagã yãka yam n na n lebg so-pakdba. La sẽn na yɩl n tõog n maan dẽ, b ra segd n basa b nug-tʋʋmã. B baoo tʋʋm-bil sẽn yaa rot yẽesgo, n na n tõog n ges b mens yelle, la b modgdẽ me n sekd b mens ne ligd bilfã b sẽn da paamdã. B sẽn yãk yam n bas bũmb kẽer n lebg so- pakdbã, b paama sũ-noog bɩ? Ad a Kirsiyã sẽn yeele: “Koɛɛgã mooneg nooma tõnd wʋsg masã n yɩɩd pĩndã. D sẽn ne tɩ d Biibl karen-biisã la d lebg-n-tɩ-ges rãmbã bãngda bũmb wʋsg a Zeova zugã noom-d lame.”

17. Bõe n sõng saam-bi-poak a ye t’a tõog n tũnug ne manesem-paall n taas nebã koɛɛgã?

¹⁷ Tũnugd-y ne manesem-paal n moond koɛɛgã: (Tʋʋ. 17:16, 17; 20:20, 21) Koronavirisã bã-longdgã sasa, yɩɩ tɩlɛ tɩ saam-bi-poak a Sirley sẽn yaa so-pakd n be Etazĩni wã toeem a sẽn moond koɛɛgã to-to wã. Sɩngrẽ wã, a ra yɛɛsdame n pa rat n tũnugd ne telefõnnã n taasd nebã koɛɛgã ye. La a sẽn paam zãmsg rẽ wɛɛngẽ tigims sull yel-getã kaagr sasa wã, a sɩngame masã n tũnugd ne telefõnnã n taasd nebã koɛɛgã wakat fãa. Ad a sẽn yeele: “Sɩngrẽ wã, mam da maanda rabeem, la masã sɩd noom-m lame. D paamda neb wʋsg n taasd koɛɛgã, n yɩɩd d sẽn wa n moond zak-zakã.”

18. Bũmb sã n wa kɩt tɩ lebg toog tɩ d tõog n moon koɛɛgã sõma n paase, bõe n tõe n sõng-do?

¹⁸ Yãk-y y sẽn dat n maane, la y modg n maan rẽ: D sã n wa tar zu-loeese, d pʋʋsda a Zeova n kos sõngre, la d maag d yĩng n tags n ges d sẽn na n maanega. (Yel. 3:21) D gom saam-poak a Soniya sẽn yaa so-pakd n be Eropã yelle. A naaga sull sẽn moond koɛɛgã ne Rumani buud-gomdã. A yeelame: “Mam nong n gʋlsda m sẽn yãk yam n dat n maan bũmb ninsã sebr zugu, n bĩng zĩig sẽn tõe n yãt-a nana-nana. Mam taablã zugu, m maana desẽ sẽn wilgd sor sẽn wa n welg zĩis a yiibu, tɩ sor fãa ne a sẽn teesdẽ. M sã n wa rat n yãk yam n maan bũmbu, m geta sorã sẽn welg a yiib zĩig ningã, la m tags n gese so-bʋg zug la m yam-yãkrã na n tall maam n teese.” A Soniya modgda wakat fãa n ket n tar yam-sõng a zu-loeesã wɛɛngẽ. A paasame: “M sã n wa be yell ning taoore, m tõe n ges-a-la wa lalg sẽn gɩdg maam tɩ m pa tõe n looge, wall põ m sẽn tõe n tũ n ta m sẽn datẽ wã. Bee ne maam.”

19. Bõe la d segd n yãk yam n maane?

¹⁹ Bũmb toor-toor la a Zeova maand n ningd tõnd barka. D sã n maand d sẽn tõe fãa sẽn na yɩl t’a yʋʋrã paam waoogre, d wilgd-a lame tɩ d sũur nooma wʋsgo, a sẽn ningd-d barkã yĩnga. (Ebre. 13:15) Wala makre, d tõe n modgame n tũnug ne manesem-paal n moon koɛɛgã sõma n paase. Na n kɩtame tɩ d paam a Zeova barkã n paase. Daar fãa, bɩ d baood d sẽn tõe n maane, n ‘lemb n ges n bãng t’a Zeova sɩd yaa sõma.’ Woto, tõnd me tõe n yeela wa a Zeezi yaa: “Mam dɩɩb yaa m maan sẽn tʋm-a maamã raabo, la m baas b tʋʋmdã.”—Zã 4:34.