1-2. Zu-loe-bʋs la a Zeova Kaset rãmb wʋsg maood ne?

TƲM-TƲMD a Poll sagla a Tɩmote la kiris-nebã fãa tɩ b modg n moon koe-noogã sõma. (2 Tɩm. 4:5) Rẽ n so tɩ d tũud a Poll saglgã n maand d sẽn tõe fãa a Zeova tũubã pʋgẽ. La wakat ninga pa nana ye. Yaa tɩlɛ ne d saam-biis wʋsg tɩ b tall raood meng-meng n tõog n moon koɛɛgã. (2 Tɩm. 4:2) Wala makre, tags-y d saam-biis nins sẽn be tẽns b sẽn gɩdg d tũudmã tʋʋm kẽere, wall a zãngã yelle. B ket n moonda koɛɛgã, baa b sẽn mi tɩ b tõe n kẽes-b-la bãens roogã.

² A Zeova nin-buiidã maooda ne zu-loees toɛy-toɛy sẽn tõe n koms b raoodo. Wala makre, b wʋsg segd n tʋma lɛɛr-dãmb wʋsgo, sẽn na yɩl n ges b zagsã rãmb yelle. B tʋllame n moon koɛɛgã n paase, la semennã baasgẽ tɩ b yaame. Kẽer pa le tõe n moon koɛɛgã wʋsgo, b sẽn bẽed bãag sẽn tõt saab yĩnga, wall b yʋʋmã sẽn vẽsg yĩnga. Sãnda me tagsdame tɩ b ka yõod a Zeova nifẽ, tɩ namsd-b wakat fãa. Saam-bi-poak a ye yʋʋr sẽn boond t’a Maari * yeelame: “M sũur sã n wa sãame, m tog n maoo wʋsg sẽn na n yɩl n tõog n bas m tags-kɛgã, hal tɩ woto namsd-m wʋsgo. M wat n ningda m meng taale, rẽ sẽn kɩtd tɩ m pa le tar sẽk la pãng n tõe n moon koɛɛgã wʋsgã yĩnga.”

3. Bõe yell la d na n gom sõs-kãngã pʋgẽ?

³ Baa ne yɛlã sẽn yaa to-to fãa, a Zeova tõe n kõ-d-la pãng tɩ d tõog n mao ne d zu-loeesã, n ket n maand d sẽn tõe fãa n tũud-a. Nand tɩ d gom a Zeova sẽn sõngd tõnd to-to wã yelle, bɩ d ges a sẽn kõ a Poll la a Tɩmote pãng to-to tɩ b tõog n moon koɛɛgã, baa ne zu-loeesã.

4. Zu-loe-bʋs la a Poll mao ne?

⁴ A Poll maoo ne zu-loees wʋsgo. Sẽn yɩɩd fãa, a ra rata a Zeova sõngre, b sẽn wa n pãb-a, n lob-a kug la b kẽes-a bãens roogã. (2 Kor. 11:23-25) A Poll mengã sak n deegame tɩ wakat ninga a ra segd n maoo ne tags-kɛga. (Rom. 7:18, 19, 24) A ra maooda ne bãag sẽn yaa wa “gõaag yĩngã pʋgẽ,” n da rat ne a sũur fãa tɩ Wẽnnaam kɩt tɩ sa.—2 Kor. 12:7, 8.

5. Bõe la a Poll tõog n maane, baa ne zu-loees nins a sẽn da maood ne wã?

⁵ A Zeova kõo a Poll pãng t’a kell n moon koɛɛgã, baa ne zu-loees nins fãa a sẽn da maood ne wã. Tags-y n ges-y a Poll sẽn tõog n tʋm tʋʋm ninsã. B sẽn wa n kẽes-a roog Rom tɩ sodaag gũud-a t’a pa tõe n yi wã, a kell n taasa neb wʋsg koe-noogã ne yẽesem, baa goosneemã nebã. Sẽn paase, a taasa rĩmã gũudb wʋsg koɛɛgã, la neb nins fãa sẽn da wat n get-a wã. (Tʋʋ. 28:30, 31; Fili. 1:13) Wakat kãng me, Wẽnnaam vẽnega a Poll t’a gʋls lɛta a yiib sẽn ket n nafd kiris-neb hakɩɩkã hal ne rũndã menga. A Poll mak-sõngã kenga Rom tigingã neb tẽebo, hal tɩ saam-biisã paam raood n da “togsd Wẽnnaam goamã wʋsg n pa yɛɛsdẽ ye.” (Fili. 1:14) Baa ne a Poll sẽn da pa tõe n maan a sẽn datã fãa wã, a ra maanda a sẽn tõe. La rẽ “kɩtame tɩ koe-noogã paam pãnga.”—Fili. 1:12.

6. Wa 2 Korẽnt rãmb 12:9, 10 sẽn yetã, bõe n sõng a Poll t’a tõog n kell n moon koɛɛgã?

⁶ A Poll bãngame t’a sẽn tõog n maan bũmb nins fãa a Zeova tũubã pʋgẽ wã yaa a Zeova n sõng-a, la pa yɩ ne yẽ meng pãng ye. A sak n deegame tɩ ‘yaa pãn-komsem pʋgẽ la a paamd Wẽnnaam pãngã tɩ pidi.’ (Karm-y 2 Korẽnt rãmb 12:9, 10.) A Zeova tũnuga ne a vʋʋsem sõngã n kõ a Poll pãng t’a tõog n kell n moon koɛɛgã sõma, baa ne b sẽn nams-a wã, b sẽn kẽes-a bãens roogã, la zu-loees a taab a sẽn mao ne wã.

7. Zu-loe-bʋs la a Tɩmote ra segd n mao ne sẽn na yɩl n kell n tʋm a tʋʋmdã sõma?

⁷ A Poll tũud-n-taag a Tɩmote sẽn da yaa bi-bɩɩgã me ra segd n teega Wẽnnaam pãngã, n tõog n moon koɛɛgã. A yãaga a Poll tɩ b tog soay n zãag zĩiga, n moon koɛɛgã la b keng saam-biisã raoodo. Sẽn paase, a Poll tʋma a Tɩmote t’a gilg n kaag tigimsã, la a keng saam-biisã raoodo.  (1 Kor. 4:17) Tõe t’a Tɩmote tagsame t’a pa tar minim tɩ sek ye. Tõe tɩ yaa rẽ n kɩt t’a Poll yeel-a yaa: “Ra bas tɩ ned baa a ye paoog foom f sẽn yaa bi-bɩɩgã yĩng ye.” (1 Tɩm. 4:12) Sẽn paase, wakat kãnga, a Tɩmote ra tara a meng yĩn-gõaaga, a sẽn da “wae n lʋɩt bãasã yĩnga.” (1 Tɩm. 5:23) A Tɩmote ra miime t’a Zeova vʋʋsem sõngã sẽn yaa pãn-kãsengã na n kõ-a-la keelem t’a tõog n tʋm a tʋʋmdã, la a sõng a saam-biisã.—2 Tɩm. 1:7.

8. Bõe la a Zeova tũnugd ne n kõt a nin-buiidã pãng rũndã-rũndã?

⁸ Rũndã-rũndã, a Zeova kõta a nin-buiidã “pãng ning sẽn yɩɩd ninsaal rẽndã,” tɩ b ket n tũud-a ne b sũy fãa. (2 Kor. 4:7) Bɩ d ges bũmb a naas a Zeova sẽn tũnugd ne n kõt tõnd pãnga, la a sõngd tõnd tɩ d ket n sakd-a ne d sũy fãa. Yaa pʋʋsgã, Biiblã, d tẽed-n-taasã, la koɛɛgã moonego.

9. Wãn to la pʋʋsgã tõe n sõng-do?

⁹ D paamda pãng ne pʋʋsgã maasem: Efɛɛz rãmb 6:18 wã pʋgẽ, a Poll sagla tõnd tɩ d pʋʋs Wẽnnaam “sasa buud fãa.” Wẽnnaam na n kelga d pʋʋsgã, n kõ-d pãnga. Saam-biig a Zoni sẽn be Bolivi wã yãa a Zeova sẽn sõng-a to-to, a sẽn wa n paam zu-loe-kɛgems sẽn pʋgl taabã. A pagã ne a roagdbã fãa wa n naaga taab n bẽed bã-kɛgenga. Ra yaa toog wʋsg ne a Zoni t’a tõog n ges b tãabã fãa yelle. A ma wã wa n maana kaalem, la kaoosa wʋsg t’a pagã ne a ba wã na n yaool n paam laafɩ. A Zoni tẽega rẽ yell n yeel yaa: “Sẽn wa n pa nana ne maam baa bilfã, bũmb ning sẽn da sõngd maam wakat fãa, yaa m sẽn da pelgd m pʋg n pʋʋsd a Zeova wã.” A Zeova kõo a Zoni pãng t’a tõog toogo. A Ronald sẽn yaa kãsem-soab n be Bolivi wã me wa n bãngame t’a ma bẽeda kãnsɛɛre. Kiuug a ye poore, a ma wã maana kaalem. Bõe n sõng a Ronald t’a tõog toogo? Ad a sẽn yeele: “M sã n da pʋʋsd a Zeova, m pelgda m pʋg n togs-a sẽn be m sũurẽ wã fãa. M miime t’a wʋmda m yɛlã võor sõma n yɩɩd ned buud fãa, baa mam mengã.” Wakat ninga zu-loeesã mi n lim-d lame, hal tɩ d pa mi d sẽn na n pʋʋs a Zeova n togs-a bũmb ning ye. La a Zeova ratame tɩ d pʋʋs-a, baa sã n yaa toog ne-d tɩ d togs-a d tagsgo, la d wilg-a sẽn be d sũurẽ wã.—Rom. 8:26, 27.

10. Wa b sẽn wilg Ebre-rãmb 4:12, d sã n karemd Biiblã la d bʋgsd d sẽn karmã zugu, bõe yĩng tɩ rẽ tar yõod wʋsgo?

¹⁰ D paamda pãng ne Biiblã maasem: A Poll paama pãng la belsg ne Gʋls-sõamyã maasem. Tõnd me tõe n paama woto. (Rom. 15:4) D sã n karemd Wẽnnaam Gomdã la d bʋgsd a zugu, a Zeova tõe n tũnuga ne a vʋʋsem sõngã n kɩt tɩ d bãng d sẽn karemd bũmb ningã sẽn tõe n sõng-d to-to vẽenega. (Karm-y Ebre-rãmb 4:12.) Ronald ning yell d sẽn zoe n gomã yeelame: “M sũur noomame, m sẽn tõog n yãk wakat n karemd Biiblã yʋng fãa wã. M maagda m yĩng n bʋgs a Zeova zʋg-sõma wã zugu, la a sẽn maan bũmb nins tɩ wilgdẽ t’a nonga a nin-buiidã. Woto sõngda maam tɩ m le paam pãnga.”

11. Wãn to la Biiblã sõng saam-bi-poak a ye, a sɩdã sẽn wa n maan kaalmã?

¹¹ D sã n bʋgsd Wẽnnaam Gomdã zugu, sõngda tõnd tɩ d tall yam-sõng d zu-loeesã wɛɛngẽ. D ges Biiblã sẽn sõng saam-bi-poak a ye to-to, a sɩdã sẽn wa n maan kaalmã. Kãsem-soab a ye n wilg-a t’a sã n karem a Zoob sebrã, a na n bãnga bũmb wʋsg sẽn na n sɩd sõng-a. A sẽn  wa karemdẽ wã, sɩngrẽ wã a ra ningda a Zoob taal a sẽn tall tags-kɛgã yĩnga. A ra keoogda a Zoob a sũurẽ, n yetẽ yaa: “Zoob! Da tagsd f zu-loeesã yell bal ye!” La rẽ poore, a wa n bãngame tɩ yẽ me talla a Zoob yel-manesmã buudu. Woto sõng-a lame t’a rems a tagsgã, la sõng-a t’a kell n tõog toogo, a sɩdã kaalmã poore.

12. Wãn to la a Zeova tũnugd ne d tẽed-n-taasã n kõt-d pãnga?

¹² D paamda pãng ne d tẽed-n-taasã tũud-n-taarã maasem: A Zeova tũnugda ne d tẽed-n-taasã me n kõt-d pãnga. A Poll ra rata ne a sũur fãa n yã a tẽed-n-taasã, sẽn na yɩl ‘tɩ ned kam fãa tẽeb keng a to raoodo.’ (Rom. 1:11, 12) Maari ning yell d sẽn zoe n gomã sũur noomame, a sã n wa be ne a tẽed-n-taasã. Ad a sẽn yeele: “Saam-biis la saam-bi-pogs sẽn da pa mi m zu-loeesã tiir meng la a Zeova tũnug ne n sõng maam. B togsa maam goam sẽn kengd raoodo, bɩ n gʋls goam sẽn kengd raood sebr zug n tool-ma. Rẽ kell n zemsa ne m sẽn da ratã bal kɛpɩ. M sã n paam n sõs ne saam-bi-pogs sẽn maood ne m zu-loeesã buudu, la m bãng b sẽn maand to-to, sõngd-m-la wʋsgo. Sẽn paase, kãsem-dãmbã kɩtame tɩ m ne vẽeneg tɩ m tara yõod tigingã pʋgẽ.”

13. Tigissã sasa, wãn to la d tõe n keng taab raoodo?

¹³ Yaa tigissã sasa la d tõe n paam n keng taab raood n tɩ yɩɩda. Tigissã sasa, y tõe n wilga y tẽed-n-taasã tɩ y nong-b lame, la tɩ y sũur nooma ne b sẽn maand bũmb ninsã. Woto na n kenga b raoodo. Wala makre, daar a ye, nand tɩ tigsgã sɩnge, kãsem-soab a ye yʋʋr sẽn boond t’a Pɩyɛɛr yeela saam-bi-poak sẽn yaa a yembr n wubd a kamb yaa: “M sã n yã-f tigissã sasa fãa, m sũur nooma wʋsgo. Wakat fãa, fo getame tɩ f kamb a yoobã maneg b mens sõma, n segl b mens me n kõt leoor tigissã sasa.” Saam-bi-poakã sũur yɩɩ noogo, hal t’a nintãmã ra yɩlsdẽ. A leokame yaa: “Hakɩɩka, fo gomdã kẽe maam wʋsgo. Kell n yaa woto bal la m da rat n wʋm rũndã.”

14. Wãn to la koɛɛgã mooneg sõngd tõndo?

¹⁴ D paamda pãng ne koɛɛgã mooneg maasem: D sã n wilgd nebã Biiblã sẽn yetã, b sakd n kelgame tɩ b pa sakd n kelg me, d sũur yaa noogo. (Yel. 11:25) Saam-bi-poak a ye yʋʋr sẽn boond t’a Ɛstesi sɩd yãame tɩ koɛɛgã mooneg kõta pãnga. B sẽn wa n yiis a zakã ned tigingã pʋgẽ wã, a sũur sãama wʋsgo, t’a ra sokd a meng wakat fãa yaa: “Rẽ yĩnga, m da pa tõe n maan bũmb n sõng-a n paas sɩda?” A ra tara rẽ yell tagsg wakat fãa. Bõe n sõng-a t’a tõog n mao ne a yɩɩrã? Yaa koɛɛgã moonego. A sã n da wa moond koɛɛgã, yaa neb nins a sẽn da taasd koɛɛgã sẽn dat sõngrã yell la a tagsd n yɩɩda. A yeelame: “Sasa kãnga, a Zeova sõnga maam tɩ m paam Biibl karen-biig sẽn da tũud bũmb nins a sẽn zãmsdã. Woto kenga m raood wʋsgo. Sɩd-sɩdã, bũmb ning sẽn sõng maam n tɩ yɩɩd yaa koɛɛgã moonego.”

15. Yam-bʋg la y tõe n dɩk a Maari goamã pʋgẽ?

¹⁵ Neb kẽer yɛl sẽn yaa to-to wã kɩtame tɩ b tagsdẽ tɩ b pa tõe n moon koɛɛgã wʋsg ye. Yãmb me sã n tagsda woto, bɩ y tẽeg t’a Zeova sũur noomame, y sã n maand y sẽn tõe tɛka. D leb n gom a Maari yelle. A sẽn wa n yik n kẽng zĩig b sẽn gomd buud-gom-zẽngã, a ra getame t’a pa tar yõod wʋsg tigingã pʋgẽ ye. Ad a sẽn yelle: “Mam sẽn da tõe n maan bal yaa m leok koɛɛg-koɛɛg tigissã sasa, bɩ n karem vɛrse, wall m kõ ned seb-vãoog koɛɛgã mooneg sasa.” A sẽn da get neb a taabã  sẽn gomd buud-gomdã sõma tɩ yẽ yaool n pa tõe wã, a tagsame t’a pa tar minim tɩ sek ye. La a wa n demsa a tagsgã. A wa n bãngame t’a Zeova tõe n tũnuga ne-a n maan bũmb wʋsgo, baa ne a sẽn pa wʋmd buud-gomdã sõma wã. A yeelame: “Biiblã goamã sẽn fãagd yõyã võor wʋmb yaa nana, la toeemd nebã vɩɩm.”

16. Bõe n tõe n sõng neb nins sẽn be zakẽ n pa tõe n yi bãag yĩngã tɩ b le paam pãnga?

¹⁶ Baa bãag sã n kɩtame tɩ d pa tõe n yi n moon koɛɛgã, a Zeova sũur nooma ne-do, bala a miime tɩ d tʋlla ne d sũur fãa n moone. A tõe n kɩtame tɩ d paam segb n taas koɛɛgã neb nins sẽn wat n get d yellã, wall logtoɛɛmbã. D sã n mak bũmb nins d sẽn da maand pĩndã ne bũmb nins d sẽn maand masã wã, tõe n komsa d raoodo. D sã n ne a Zeova sẽn sõngd-d to-to wã, na n kɩtame tɩ d tõog toog zu-loɛɛg buud fãa pʋgẽ ne sũ-noogo.

17. Sẽn zems ne Koɛɛg soab 11:6, bõe yĩng tɩ d segd n ket n moond koɛɛgã, baa sã n wõnda pa womd biisi?

¹⁷ Sɩdã bõn-buud nins d sẽn bʋdã sʋka, d pa tõe n bãng bʋg n na n yi hal n wa bɩ ye. (Karm-y Koɛɛg soab 11:6.) Wala makre, saam-bi poak a Barbara sẽn tar yʋʋm 80 la zakã tũnugda ne telefõn la lɛta-rãmb n moond koɛɛgã wakat fãa. A lɛtr a yembr pʋgẽ, a naaga yʋʋmd 2014 tʋʋlg kiuug pipi daar Gũusg Gasgã. Sõsg ning gom-zug sẽn yaa “Bõe la Wẽnnaam maan yãmb yĩnga?” bee Gũusg Gasg kãng pʋgẽ. A toola lɛtrã pag a ye ne a sɩd sẽn da pa le yaa a Zeova Kaset rãmba, n pa bãng ye. Pagã ne a sɩdã karma Gũusg Gasgã n yɩlme. A sɩdã yeelame tɩ ra yaa wa a Zeova ra gomda ne-b vẽeneg-vẽenega. B wa n le sɩnga tigissã kẽnde. Rẽ tɩ b sẽn bas a Zeova tũub yɩɩda yʋʋm 27. B wa n maneg n le sɩnga a Zeova tũubu. A Barbara sẽn bãng t’a lɛtrã woma biisã, a sũur yɩɩ noog wʋsgo, hal tɩ keng a raoodo.

18. Bõe la d tõe n maan n paam tɩ Wẽnnaam kõ-d pãnga?

¹⁸ A Zeova tũnugda ne bũmb toor-toor n kõt tõnd pãng wʋsgo. D sã n dɩt bõn-kãensã yõodo, rat n yeel tɩ pʋʋsgã, Biiblã, d tẽed-n-taasã tũud-n-taarã, la koɛɛgã moonegã, d wilgdame tɩ d kɩsa sɩd t’a Zeova tõe n sõnga tõndo, la t’a sɩd rat n sõng-d lame. Woto yĩnga, bɩ d modg n teeg d saasẽ Ba wã wakat fãa, soab ning sẽn tʋll “n sõng neb nins sẽn tũud bãmb ne b sũur fãa wã.”—2 Kib. 16:9.