1. Bõe yĩng t’a Zeezi kos a Zeova t’a gũ a karen-biisã?

YƲNG ning sẽn deng a Zeezi kũumã, a ra tagsda zu-loees nins fãa a karen-biisã sẽn na n paamã yelle. A sẽn da nong a karen-biisã yĩnga, a pʋʋsa a Ba wã n kos-a t’a gũ-b “wẽng soabã yĩnga.” (Zã 17:14, 15) A Zeezi ra miime t’a sã n leb saasẽ, a Sʋɩtãan na n ket n zabda ne ned ning fãa sẽn na n dat n tũ a Zeova. Vẽenega, a Zeova nin-buiidã ra na n data koglgo.

2. Bõe yĩng tɩ d tõe n kɩs sɩd t’a Zeova na n deega d pʋʋsgã?

² A Zeova leoka a Bi-ribl a Zeezi pʋʋsgã, a sẽn nong-a wã yĩnga. D sã n modg n na n ta a Zeova yam, a na n nonga tõnd me, la a kelg pʋʋsg nins d sẽn pʋʋsd n kot sõngr la koglgã. A Zeova sẽn yaa Zak-soab sẽn get a zak rãmb yell neerã, a na n kell n gesa a kambã yell ne nonglem. Rẽnda yɩ woto, sã n pa rẽ na n sãama a yʋʋre.

3. Bõe yĩng tɩ d rat a Zeova koglg rũndã-rũndã?

³ Yaa masã la d rat a Zeova koglg n yɩɩda. B riga a Sʋɩtãan t’a yi saasẽ n sig tẽngã zugu, “t’a sũ-puugrã yaa kãsenga.” (Vẽn. 12:12) A maana a sẽn na maaneg n kɩt tɩ neb kẽer namsd tõnd d tẽebã yĩnga, n tagsdẽ tɩ b ‘tʋmda Wẽnnaam tʋʋmde.’ (Zã 16:2) Neb a taab sẽn pa tẽed Wẽnnaam namsda tõndo, d sẽn pa maand wa dũniyã nebã yĩnga. La sẽn yaa to-to fãa, d pa zoet rabeem ye. Bõe yĩnga? Bala Wẽnnaam Gomdã yetame: “Zu-soabã yaa sɩd soaba. B na n paasa yãmb pãnga, la b kogl yãmb ne wẽng soabã.” (2 Tes. 3:3) Wãn to la a Zeova kogend tõndo? D ges manesem a yiib a sẽn maand n kogend tõndo.

4. Sẽn zems ne Efɛɛz rãmb 6:13-17 wã, bõe la a Zeova kõ tõnd n na n kogl-do?

⁴ A Zeova kõo tõnd zab-teed sẽn tõe n kogl-d t’a Sʋɩtãan ra tõog-d ye. (Karm-y Efɛɛz rãmb 6:13-17.) Zab-te-kãens tara pãng n tõe n tõog bɛ wã. Zab-teedã tõe n kogla tõndo, la yaa d sẽn na n bob b fãa n da yãk-b ye. Zab-teoog fãa makda bõe? Bɩ d gom b yell ball-balle.

5. Sɩdã sẽbdgã yaa bõe, la bõe yĩng tɩ d segd n sẽbg-a?

⁵ Sɩdã sẽbdgã makda sɩdã sẽn be Wẽnnaam Gomdã sẽn yaa Biiblã pʋgẽ wã. Bõe yĩng tɩ d segd n sẽbg sẽbdg-kãngã? Yaa a Sʋɩtãan sẽn yaa “ziri wã ba” wã yĩnga. (Zã 8:44) Yʋʋm tusa la woto a sẽn sɩng a ziri wã yagbo, n “tudgd dũniyã fãa.” (Vẽn. 12:9) La sɩdã sẽn be Biiblã pʋgẽ wã kogenda tõnd t’a Sʋɩtãan pa tõe n belg-d ye. Wãn to la d sẽbgd sɩdã sẽbdgã? Yaa d sã n baood n bãngd sɩdã a Zeova zugu, n tũud-a “ne sɩɩga la ne sɩda,” la d maand pʋ-peelem bũmb fãa pʋgẽ.—Zã 4:24; Efɛ. 4:25; Ebre. 13:18.

6. Tɩrlem gãntikã makda bõe, la bõe yĩng tɩ d segd n yeelg-a?

⁶ Tɩrlem gãntikã makda a Zeova noyã sẽn yaa tɩrsã. Bõe yĩng tɩ d segd n yeelg gãntikã? Wa gãntik sẽn kogend sodaag sũur tɩ b pa tõe n kõs-a wã, tɩrlem gãntikã me kogenda d sũurã, rat n yeel tɩ d sẽn sɩd yaa ned ningã, sẽn na yɩl tɩ bõn-wẽns nins sẽn be dũni-kãngã pʋgẽ wã ra wa kʋɩɩb-d ye. (Yel. 4:23) A Zeova ratame tɩ d nong-a la d tũ-a ne d sũurã fãa. (Mat. 22:36, 37) A Sʋɩtãan maandame n dat tɩ d nong dũniyã bũmb nins a Zeova sẽn kisã, tɩ rẽ wa kɩt tɩ d pa tõe n tũ a Zeova ne d sũur fãa ye. (Zak 4:4; 1 Zã 2:15, 16) Rẽ sã n pa tõoge, a na n nams-d lame, sẽn na yɩl tɩ d maan bũmb sẽn pa tat a Zeova yam.

7. Wãn to la d yeelgd tɩrlem gãntikã?

⁷ D yeelgda tɩrlem gãntikã, d sã n sakd noy nins a Zeova sẽn gãneg sõmbã la wẽngã wɛɛngẽ wã, la d tũud no-kãense. (Yɩɩn. 97:10) Neb kẽer tõe n tagsdame t’a Zeova noyã yaa dem-deme. D sã n yaool n bas Biiblã noyã tũub d vɩɩmã pʋgẽ, d na n yɩɩ wa sodaag sẽn yeeg a gãntikã zabr wakate, a sẽn get tɩ zɩsame wã yĩnga. Woto sɩd yaa yalemdo! Ne neb nins sẽn nong a Zeova wã, a noyã sakr “pa toog ye.” Pʋd n fãagda b yõyã.—1 Zã 5:3.

8. B sẽn yeel tɩ d wid laafɩ koe-noogã d naoẽ wã võor yaa bõe?

⁸ A Poll leb n yeelame tɩ d wid laafɩ koe-noogã d naoẽ, n segl n sa n na n moone. Rat n yeel tɩ wakat fãa, d segd n segla d mens n sa n na n moon Rĩungã koe-noogã. D sã n taasd nebã Biiblã koɛɛgã, tõnd mengã tẽebã pãng paasdame. D sẽn ne a Zeova nin-buiidã sẽn be dũniyã gill zug n baood segb buud toor-toor n moond koe-noogã sɩd kengda raoodo. Wala makre, b sã n wa be b tʋʋm zĩigẽ, lekollẽ, leebg zĩisẽ, b sã n wa moond zak-zaka, b sã n wa tɩ raad teedo, b sã n tɩ kaagd b roagdb sẽn pa tũud a Zeova, b sã n wa sõsd ne b mitinsi, la baa b sã n wa be b zakẽ n pa tõe n yi. D sã n bas koɛɛgã mooneg rabeem yĩnga, d na n yɩɩ wa sodaag sẽn piid a neooda zabr wakate. A naoã tõe n pogla nana-nana. B tõe n paam-a-la faag-faag n pogl bɩ n kʋ-a, a leb n pa na n tõog n tũ a taoor soabã noy sõma ye.

9. Bõe yĩng tɩ d segd n zã d tẽebã gãong sẽn yaa yalengã?

⁹ Tẽebã gãong sẽn yaa yalengã makda  tẽeb ning d sẽn tar ne a Zeova wã. D kɩsa sɩd t’a na n pidsa bũmb nins fãa a sẽn pʋlmã. Tẽebã sõngda tõnd tɩ d “kok wẽng soabã pɛɛmã fãa sẽn wit bugmã.” Bõe yĩng tɩ d segd n zã gãongã sẽn yaa yalengã? Bala sõngda tõnd tɩ sɩdã-kɩɩsdbã sẽn yet bũmb ningã ra belg-do, leb n sõngda tõnd tɩ d ra koms raoodo, nebã sã n sãbsd tõnd d tũudmã yĩnga. D sã n pa tar tẽebo, d pa na n paam pãng n yals kãn-kãe, neb a taab sã n wa rat tɩ d kɩɩs a Zeova noyã ye. La wakat ning fãa d sẽn tõog n yals kãn-kãe tẽebã pʋgẽ d tʋʋmã zĩigẽ wall lekollẽ wã, wilgdame tɩ d gãda d gãongã kãn-kãe. (1 Pɩy. 3:15) Sẽn yaa wakat ning fãa la d zãgs tʋʋmd sẽn yaood sõma n tõe n kɩt tɩ d pa le tõe n tũ a Zeova wa raasenkamã, rat n yeelame tɩ d gãda d gãongã kan-kãe. (Ebre. 13:5, 6) D sã n ket n tũud a Zeova baa b sã n wa namsd tõnd d tũudmã yĩnga, d gãongã kogenda tõndo.—1 Tes. 2:2.

10. Fãagr kut pʋglã makda bõe, la bõe yĩng tɩ d segd n fõgn-a?

¹⁰ Fãagrã kut pʋglã makda saagr ning sẽn yit a Zeova nengẽ wã. Yaa d sẽn saagd t’a na n fãag-d-la ne kũumã, la  t’a na n keoo neb nins fãa sẽn maand a raabã. (1 Tes. 5:8; 1 Tɩm. 4:10; Tɩt 1:1, 2) Wa kut pugl meng-meng sẽn kogend sodaag zugã, d sẽn saagd n na n wa paam fãagrã kogenda d tagsa wã. Wãn to? Saag-kãng sõngda tõnd tɩ d tagsd Wẽnnaam pʋlemsã yell n yɩɩda, la d kell n tall yam-sõng d zu-loeesã wɛɛngẽ. Wãn to la d fõgend kut pʋglã? Yaa d sã n modg tɩ d tagsa wã zems ne Wẽnnaam dẽndã. Wala makre, d pa tik d saagrã arzɛgsã sẽn satã zug ye. Yaa Wẽnnaam zugu.—Yɩɩn. 26:2; 104:34; 1 Tɩm. 6:17.

11. Vʋʋsem sõngã sʋʋgã makda bõe, la wãn to la d tʋmd ne sʋ-kãnga?

¹¹ Vʋʋsem sõng sʋʋgã makda Wẽnnaam Gomdã sẽn yaa Biiblã. A tara pãng wʋsg n tõe n vẽneg ziri buud fãa, la a yiis nebã ziri tũudmã zãmsg la minim-wẽnsã yembd pʋgẽ. (2 Kor. 10:4, 5; 2 Tɩm. 3:16, 17; Ebre. 4:12) D sẽn zãmsd Biiblã d toorã, la ne zãmsg ning a Zeova siglgã sẽn kõt tõndã maasem, d bãngd n tʋma ne sʋ-kãng sõma. (2 Tɩm. 2:15) Zab-teed nins a Zeova sẽn kõt tõndã sẽn yãk b toogo, a leb n kõta tõnd bũmb a to sẽn tar pãng wʋsg n tõe n kogl-do. Bõn-kãng yaa bõe?

12. Bõe me n yaa tɩlɛ ne-do, la bõe yĩnga?

¹² Sodaag sẽn tar minim miime tɩ yẽ a yembr pa tõe n zab ne tã-bi-kʋʋng n tõog ye. Yaa tɩlɛ t’a paam a soda-taasã sõngre. Woto me, tõnd d yembr pa tõe n zab ne a Sʋɩtãan ne a poorẽ dãmbã n tõog ye. Yaa tɩlɛ tɩ d paam d tẽed-n-taasã sõngre. A Zeova kɩtame tɩ d tar saam-biis dũniyã gill zugu. B bee tõnd sõngr yĩnga.—1 Pɩy. 2:17.

13. Wa Ebre-rãmb 10:24, 25 sẽn wilgdã, tigissã kẽnd yõod yaa bõe?

¹³ Bũmb a ye d sẽn tõe n maan n paam sõngr yaa d sẽn na n kẽnd tigissã. (Karm-y Ebre-rãmb 10:24, 25.) D sã n wa koms raoodo, wa sẽn yaa to-to ne d fãa wakat ningã, tigissã kengda d pɛlga. Leoor nins d tẽed-n-taasã sẽn kõt ne b sũy fãa wã kengda d raoodo. Sõss nins sẽn tik Biiblã zugã b sẽn wɛgsdã, la mak-n-wilg toor-toorã kɩtdame tɩ d rat n ket n wɩngd ne a Zeova tũubu. D sẽn sõsd ne taab d tigissẽ wã me kengda d raoodo. (1 Tes. 5:14) Yaa segb d sẽn paam n tõe n sõng d taabã tɩ kõ-d sũ-noogo. (Tʋʋ. 20:35; Rom. 1:11, 12) Tigissã leb n sõngda tõnd bũmb a taab wɛɛngẽ. Sõngda tõnd tɩ d paamd minim zabrã pʋgẽ, rat n yeel tɩ d tõe n moona koɛɛgã sõma la d zãms nebã Biiblã. Wala makre, d bãngda d sẽn tõe n tʋm ne d koe-moonegã tʋʋm-teed to-to tɩ yãk nenga. Rẽ wã, segend-y y mens sõma tigissã yĩnga. Tigsg sasa me bɩ y kelg neere. Tigsgã poor bɩ y tũ zãmsg ning y sẽn paamã. Woto, y na n lebga ‘Kirist Zeezi soda-sõngo.’—2 Tɩm. 2:3.

14. Bõe me la a Zeova maand n sõngd tõndo?

¹⁴ D leb n paamame tɩ malɛgs tus ka tɛk sẽn tar pãng wʋsg sõngd tõndo. Tags-y n ges-y malɛk a yembr bal sẽn tõe n maan bũmb ninga! (Eza. 37:36) Masã, tags-y n ges-y malɛgs tã-bi-kʋʋng sẽn tõe n maan bũmb ninga. Ninsaal bɩ zĩn baa a ye pa tõe n yals a Zeova tãb-biisã sẽn tar pãng wʋsgã taoor ye. A Zeova yaa pãng sẽn ka to soaba. Dẽnd a sã n be ne baa yaa tõnd d yembr bala, d pãngã yɩɩda d bɛɛbã hal zĩig sẽn zãre, baa b sõorã sẽn zem to-to. (Bʋ. 6:16) D tõe n kɩsa sɩd ne  rẽ! Ning-y rẽ y yamẽ, y tʋmd-n-taaga, y karen-bi-taaga, wall y roagd sẽn pa tũud a Zeova sã n wa yeel bɩ n maan bũmb sẽn tõe n koms y raoodo. Tẽeg-y tɩ y pa y yembr zab-kãngã pʋgẽ ye. Yaa a Zeova noy la y tũuda.

15. Sẽn zems ne Ezayi 54:15, 17 wã, bõe yĩng tɩ Wẽnnaam nin-buiidã pa na n tol n bas koɛɛgã moonego?

¹⁵ Dũniyã a Sʋɩtãan sẽn so wã kisa tõnd bũmb toor-toor yĩnga. Wala makre, d pa kẽesd d toog politikã pʋgẽ baa bilfu, d leb n pa kẽesd d mens zab pʋsẽ ye. D moonda Wẽnnaam yʋʋrã, n wilgdẽ tɩ yaa a Rĩungã bal n na n wa ne laafɩ la bãane, la d sakd a noyã sẽn yaa tɩrsã. D wilgdame tɩ dũni-kãngã naabã yaa ziri-n-be-ned meng-menga, la nin-kʋʋda. (Zã 8:44) D moondame n togsd nebã t’a Sʋɩtãan dũniyã sãoong ta n saame. Baa ne rẽ, a Sʋɩtãan ne a poorẽ dãmbã kõn tol n tõog tɩ d bas koɛɛgã mooneg ye. D pʋd n na n tũnuga ne segb la bũmb nins fãa d sẽn tarã, n ket n pẽgd a Zeova. Baa ne a Sʋɩtãan sẽn tar pãng wʋsgã, a pa tõog tɩ d pa moon Rĩungã koɛɛgã dũniyã gill zug ye. Yaa a Zeova sẽn kogend tõndã yĩng bal n kɩt tɩ d tõogd n maand woto.—Karm-y Ezayi 54:15, 17.

16. Bõe la a Zeova na n maan n fãag a nin-buiidã to-kãsengã sasa?

¹⁶ Bõe n na n maan ka la bilfu? To-kãsengã sasa, a Zeova na n tũnuga ne manesem kãsems a yiib n fãag tõndo. Pipi, a sã n wa kɩt tɩ dũniyã rĩm-dãmbã na n sãam Babilon kãsengã sẽn yaa ziri tũudmã fãa sẽn naag taabã, a na n fãaga sẽn maand-b sɩd ne-a wã. (Vẽn. 17:16-18; 18:2, 4) Rẽ poore, a sã n wa na n sãam a Sʋɩtãan dũniyã sigls a taabã fãa sẽn ketã Armagedõ, a na n fãaga a nin-buiidã.—Vẽn. 7:9, 10; 16:14, 16.

17. D sã n kell n tall zood sõma ne a Zeova, wãn to la na n naf-do?

¹⁷ D sã n kell n tall zood sõma ne a Zeova, bũmb kae a Sʋɩtãan sẽn tõe n maan n sãam d wakat fãa yĩng ye. Pʋd n yaa yẽ la b na n sãam wakat fãa yĩnga. (Rom. 16:20) Rẽ wã, bɩ y yeelg zab-teed nins fãa Wẽnnaam sẽn kõt yãmbã n da yãk-b ye. Da bao-y n na n zab zabrã y yembr ye. Teeg-y y tẽed-n-taasã, la y tũud a Zeova noyã. Woto, y tõe n kɩsa sɩd tɩ y saasẽ Ba wã sẽn nong yãmbã na n paas-y-la pãnga, la a kogl-yã.—Eza. 41:10.