1. Pag sã n wa baood rao n na n kẽ kãadem, bõe la a segd n sok a menga?

KIRIS-NEBÃ fãa segd n sakda a Zeezi sẽn zems zãngã zu-sobendo. La pag sẽn yaa kiris-ned sã n kẽ kãadem, a segd n sakda a sɩdã sẽn pa zems zãngã zu-sobendo. La woto tõeeme n pa yɩ nana ye. Rẽ n so t’a sã n wa baood ned n na n kẽ kãadem, a segd n soka a meng yaa: ‘Bõe n wilgd tɩ saam-bi-kãngã na n yɩɩ zak soab sẽn zãad a zak sõma? A lʋɩɩsda a Zeova tũudmã tʋʋm taoor a vɩɩmã pʋgẽ bɩ? A sã n pa maand woto, bõe n wilgd tɩ d kãadmã poore, a na n yɩɩ zak soab sẽn get a zakã rãmb tẽeb yell sõma?’ La yaa vẽeneg tɩ saam-bi-poakã leb n segd n soka a meng yaa: ‘Zʋg-sõma bʋs la m tara, tɩ tõe n sõng tɩ d kãadmã yɩ noogo? Mam yaa sũ-mar soaba, la ned sẽn yaa kõat bɩ? Mam tara zood sõma ne a Zeova bɩ?’ (Koɛ. 4:9, 12) Sũ-noog ning pag sẽn na n paam a kãadmã pʋgẽ wã bee ne a sẽn na n yãk yam n maan bũmb nins nand t’a kẽ kãadmã.

2. Bõe yell la d na n gom sõs-kãngã pʋgẽ?

² Saam-bi-pogs milyõ-rãmb n kõt mak-sõngo, n sakd b sɩdbã. B segda ne pẽgre. D sũur noomame, d sẽn tũud a Zeova ne saam-bi-pogs-kãensã sẽn maand sɩd ne-a wã. Sõs-kãngã pʋgẽ, d na n leoka sogsg a tãabo: 1) Zu-loe-bʋs la pagbã segd sakrã wɛɛngẽ? 2) Bõe yĩng tɩ pag segd n yãk yam n sakd a sɩda? 3) Yam-bʋg la pagb la pʋg-sɩdb nins sẽn yaa kiris-nebã tõe n dɩke, a Zeezi, a Abigayill la a Maari sẽn yaa a Zeezi ma wã mak-sõngã pʋgẽ?

3. Bõe yĩng tɩ sẽn kẽ-b kãadmã segd zu-loeese?

³ Kãadmã yaa kũun sẽn zems zãnga, Wẽnnaam sẽn kõ-do. La ninsaalbã pa zems zãng ye. (1 Zã 1:8) Rẽ n so tɩ Wẽnnaam Gomdã wilgdẽ tɩ sẽn kẽ-b kãadmã na n paama “zu-loees wʋsgo.” (1 Kor. 7:28) D gom zu-loees a wãn pag sẽn tõe n paam yelle.

4. Bõe yĩng tɩ pag tõe n wa tagsdẽ t’a sã n sakd a sɩda, yaa paoogr ne yẽ mengã?

⁴ Pag ning wubr yĩnga, a tõe n tagsdame t’a sẽn segd n sak a sɩdã yaa bũmb sẽn paoogd yẽ. Saam-bi-poak a ye sẽn be Etazĩni yeelame: “B sẽn wub maam zĩig ningã, b ra yeta pagbã wakat fãa tɩ bũmb fãa pʋgẽ, b segd n yɩɩ wa rapã. La m miime t’a Zeova kõo sɩdbã zu-sobendo, la a yeel tɩ pagbã segd n sulg n saka b sɩdbã. Pagbã me segda ne waoogre. La yɩl n tall tagsg sẽn zems zu-sobendã wɛɛngẽ pa nana wakat fãa ye.”

5. Tags-kɛg-bʋs la rap kẽer tar pagbã wɛɛngẽ?

⁵ La pag ning tõeeme n wa kẽ kãadem ne rao sẽn tagsd tɩ pagbã yõod pa ta rapã ye. Saam-bi-poak a ye sẽn be Amerikdisiid yeelame: “Tõnd babgẽ wã, rapã n dengd n dɩ, tɩ pagbã yaool n wa rɩ. Kom-pugli wã tʋʋm yaa seglgo, la teedã pɛgbo. La kom-dibli wã yaa b ma-rãmbã la b tãopã n talld rɩɩbã n tɩ kõt-bã. B yet-b lame tɩ yaa bãmb la zakã soaadba.” Saam-bi-poak a ye sẽn be Aazi me yeelame: “Tõnd buudã gomd pʋgẽ, gomd n be n wilgdẽ tɩ pa tɩlɛ tɩ pag tall yam, bɩ n tall minim la bãngr ye. B tʋʋmd yaa zakã pʋgẽ tʋʋmã fãa. La b pa tar sor me n na n togs b sẽn tagsd b sɩdbã taoor ye.” Rao sẽn tar tagsg a woto sẽn pa tik Biiblã pa wilgd t’a nonga a pagã ye. A pʋd n kɩtdame t’a pagã vɩɩm lebg toogo, a pa rɩkd a Zeezi togs-n-taar me, leb n yaa manesem sẽn pa noom a Zeova.—Efɛ. 5:28, 29; 1 Pɩy. 3:7.

6. Bõe la pagbã segd n maane, sẽn na yɩl n tall zood sõma ne a Zeova?

⁶ Sõsg ning sẽn loogã pʋgẽ, d yãame t’a Zeova ratame tɩ sɩdb nins sẽn yaa kiris-nebã sõngd b zakã rãmb tɩ b tẽebã pãng paasdẽ, n ges tɩ b paam sũ-noogo, la bũmb nins sẽn yaa tɩlɛ ne b vɩɩmã. (1 Tɩm. 5:8) Baa ne saam-bi-pogs nins sẽn kẽ kãadmã sẽn tar tʋʋm wʋsgã, b segd n yãta sẽk daar fãa n karemd Wẽnnaam Gomdã, n bʋgsdẽ la b pʋʋsd a Zeova ne b sũur fãa me. La woto tõeeme n pa yɩ nana ye. Pagbã tara tʋʋm wʋsgo. Woto tõe n kɩtame tɩ b tagsdẽ tɩ b pa tar sẽk la pãng n na n maan bõn-kãens fãa ye. La yaool n tara yõod wʋsg tɩ b bao sẽk n maand rẽ. Bõe yĩnga? Bala a Zeova ratame tɩ tõnd ned kam fãa kell n modg n tall zood sõma ne yẽ.—Tʋʋ. 17:27.

7. Bõe n tõe n kɩt tɩ yɩ nana ne pag t’a tõog n tʋm tʋʋm nins a Zeova sẽn bobl-a wã?

⁷ Yaa sɩd tɩ pag segd n modga wʋsgo, sẽn na yɩl n sulgd a meng n sakd a sɩdã sẽn pa zems zãngã zu-sobendo. La yaa a sã n tõog n wʋm a Zeova sẽn dat t’a yɩ sakdã võore, la a sak n tũ rẽ, la na n yɩ nana ne-a t’a tõog n tʋmd tʋʋm nins a Zeova sẽn bobl-a zakã pʋgẽ wã.

8. Sẽn zems ne Efɛɛz rãmb 5:22-24, bõe yĩng tɩ pag sẽn yaa kiris-ned segd n yãk yam n sakd a sɩdã zu-sobendo?

⁸ Pag sẽn yaa kiris-ned segd n yãka yam n sakd a sɩdã zu-sobendo, bala yaa woto la a Zeova rat t’a maane. (Karm-y Efɛɛz rãmb 5:22-24.) A segd n kɩsa a saasẽ Ba  wã sɩda, n miẽ t’a Zeova sẽn nong-a wã yĩnga, a pa na n kos-a t’a maan bũmb sẽn pa na n naf-a ye.—Tõo. 6:24; 1 Zã 5:3.

9. Saam-bi-poak sã n sakd a sɩdã zu-sobendo, a nafa wã yaa bõe?

⁹ Dũniyã nebã pirsda pagbã tɩ b kɩɩsd a Zeova noyã, la b kɩtdẽ tɩ b getẽ tɩ zu-sobendã sakrã yaa bũmb sẽn paoogd-ba. Yaa vẽeneg tɩ sẽn dat-b tɩ nebã tall tagsa a woto buudã pa mi tõnd Wẽnnaamã sẽn yaa nonglem soabã ye. A Zeova pa na n tol n kõ pagbã sẽn yaa a kom-pugli a sẽn nand wʋsgã noor sẽn na n paoog-b ye. Saam-bi-poak sã n modgdẽ n tʋmd tʋʋmd ning a Zeova sẽn bobl-a wã, sõngdame tɩ laafɩ zĩnd a zakã pʋgẽ. (Yɩɩn. 119:165) Woto nafda a sɩdã, yẽ mengã, la b kambã.

10. Yam-bʋg la d tõe n dɩk saam-bi-poak a Karoll sẽn yeel bũmb ningã pʋgẽ?

¹⁰ Pag sẽn sulgd a meng n sakd a sɩda, baa ne a sẽn pa zems zãngã wilgdame t’a nonga a Zeova, soab ning sẽn lugl zu-sobendã, la t’a waoogd-a lame. Saam-bi-poak a Karoll sẽn be Amerikdisiidã yeelame: “M miime tɩ m sɩdã tudgdame. M leb n miime t’a sã n wa tudgi, mam manesem sẽn yaa to-to ne-a wã wilgda m sã n nanda zood ning m sẽn tar ne a Zeova wã. Rẽ wã, m modgdame n sulgd m meng n sakd-a, bala m dat n taa m saasẽ Ba wã yam.”

11. Bõe n sõngd saam-bi-poak a ye t’a sakd n kõt sugri, la yam-bʋg la d tõe n dɩk a sẽn yeelã pʋgẽ?

¹¹ Tõe n yɩɩ toog tɩ pag waoogd a sɩd la a sakd-a, a sã n tagsdẽ t’a sɩdã toog kae ne a sẽn maand yɩɩr ne bũmb ninsã ye. Ges-y saam-bi-poak a ye sẽn maande, sã n wa yaa woto. Ad a sẽn yeele: “M modgdame n pa yikd m sũur ye. M tẽegdame tɩ d fãa tudgdame. M daab yaa m kõ sugri, wa a Zeova sẽn maandã. M sã n sak n kõ sugri, m le paamda sũur pʋgẽ bãane.” (Yɩɩn. 86:5) Pag sã n yaa sug-kõata, yaa nana ne-a t’a tõogd n sulgd a meng n sakd a sɩdã.

12. Kiba-bʋs la d tõe n yã Biiblã pʋgẽ?

¹² Neb kẽer tõe n tagsdame tɩ ned sã n yaa sakda, a yaa rabɛɛma. La woto pa sɩd  ye. Kibay wʋsg n be Biiblã pʋgẽ, n gomd neb sẽn da yaa sakdb yelle, la b ra tar raoodo. D ges yam ning d sẽn tõe n dɩk a Zeezi, a Abigayill la a Maari mak-sõngã pʋgẽ.

13. Bõe yĩng t’a Zeezi sulgd a meng n sakd a Zeova? Wilg-y y leoorã võore.

¹³ A Zeezi sakda a Zeova, la sãmbg kae tɩ pa a sẽn pa tar yam bɩ minim yĩng ye. Rẽnda ned yɩ yam-kãseng soaba, n tõog n zãms neb bũmb nana-nana la vẽeneg wa a Zeezi sẽn maanã. (Zã 7:45, 46) A Zeova miime t’a Zeezi tara minim hal tɩ seke, tɩ rẽ kɩt t’a sak t’a Zeezi naag-a n tʋme, a sẽn wa n naand bũmb nins sẽn be saasẽ la tẽngã zugã. (Yel. 8:30; Ebre. 1:2-4) A Zeezi vʋʋgrã tɛka, a Zeova kõ-a-la ‘noor t’a na n ges bũmb fãa yell saasẽ la tẽngã zugu.’ (Mat. 28:18) Baa ne a Zeezi sẽn tar minim wʋsgã, a ket n kota a Zeova sõngre. Bõe yĩnga? Bala a nonga a Ba wã.—Zã 14:31.

14. Yam-bʋg la pʋg-sɩdbã tõe n dɩk a) a Zeova sẽn get pagbã to-to wã wɛɛngẽ? b) Yel-bũn sak 31 wã sẽn yet bũmb ningã pʋgẽ?

¹⁴ Pʋg-sɩdbã sẽn tõe n dɩk yam ninga: A Zeova sẽn naan pag t’a segd n sulg a meng n sak a sɩdã, pa pagã yõod sẽn pa ta a sɩdã yĩng ye. A Zeova mengã wilga rẽ vẽenega, a sẽn yãk pagb n naag rap tɩ b na n tɩ naag a Zeezi n dɩ naam saasẽ wã. (Gal. 3:26-29) A Zeova sẽn kõ a Bi-riblã zu-sobendã, a wilg-a lame t’a kɩs-a-la sɩda. Woto me, rao sẽn tar yam na n kõta a pagã sor t’a tõe n yãk yam n maand bũmb kẽere. Wẽnnaam Gomdã bilgda pʋg-sõng sẽn yaa to-to wã, n yetẽ t’a geta a zak rãmb yelle, t’a raada pʋʋg la a get a yelle, la t’a mii leebg sõma. (Karm-y Yel-bũn 31:15, 16, 18.) A pa yamba, n pa tar sor n togsd a tagsg ye. A sɩdã pʋd n kɩs-a-la sɩda, n sakd n kelgd a sẽn yetã. (Karm-y Yel-bũn 31:11, 26, 27.) Rao sã n waoogd a pag woto, pagã na n sulgd n sakd-a-la ne sũ-noogo.

15. Yam-bʋg la pagbã tõe n dɩk a Zeezi mak-sõngã pʋgẽ?

¹⁵ Pagbã sẽn tõe n dɩk yam ninga: Baa ne a Zeezi sẽn tõog n maan bõn-kãsemsã, a pa tags t’a Zeova zu-sobendã sakr yaa paoogr ne-a ye. (1 Kor. 15:28; Fili. 2:5, 6) Woto me, pag sẽn tũud a Zeezi mak-sõngã pa na n tags t’a sã n sakd a sɩdã zu-sobendo, yaa paoogr ne-a ye. A na n teenda a sɩdã, la pa a sẽn nong-a wã yĩng bal ye. Sẽn yɩɩd fãa, yaa a sẽn nong a Zeova la a waoogd-a wã yĩnga.

16. Wa 1 Sãmwɛll 25:3, 23-28 sẽn wilgdã, yel-bʋg la a Abigayill welg-yã? (Ges-y sebrã pipi neng fotã.)

¹⁶ A Abigayill sɩdã yʋʋr da yaa a Naball. A ra yaa rat-m-ye soaba, wuk-m-meng soaba, la ned sẽn pa mi a zaamẽ. Baa ne rẽ, a Abigayill pa tags t’a sã n kao a kãadmã n são ye. A ra tõe n sĩndame, n bas t’a Davɩɩd ne a rapã kʋ a sɩdã. La a pa maan woto ye. A pʋd n maana a sẽn na n maanega, n kogl a Naball ne a zakã neb sẽn da yaa wʋsgã. Mams-y n ges-y a Abigayill sẽn tall raood ninga, n tõog n yals sodaas 400 sẽn da tar zab-teed taoore, n gom ne a Davɩɩd ne waoogre, tɩ kɩt t’a toeem yamã. A sakame meng n na n deeg a sɩdã tʋʋm-wẽnsã taale. (Karm-y 1 Sãmwɛll 25:3, 23-28.) A Davɩɩd sak n deega vẽeneg t’a Zeova tũnuga ne pʋg-kãngã sẽn tar daoodã n na n kõ-a saglgã, tɩ sõng-a t’a ra beeg beeg-kãseng ye.

17. Yam-bʋg la pʋg-sɩdbã tõe n dɩk a Abigayill ne a Davɩɩd kibarã pʋgẽ?

¹⁷ Pʋg-sɩdbã sẽn tõe n dɩk yam ninga:  A Abigayill ra yaa pag sẽn tar yam. A Davɩɩd bãnga yam n sɩd kelg-a. Rẽ kɩtame t’a pa kʋ neb sẽn pa tar taal zaalem ye. Woto me, pʋg-sɩd sẽn tar yam sã n dat n yãk yam yell sẽn tar yõod wʋsg pʋgẽ, a na n deng n kelga a pagã tagsg neere. Tõe t’a pagã tagsgã na n sõng-a lame, t’a ra wa yãk yam n maan bũmb sẽn pa yam tʋʋmd ye.

18. Yam-bʋg la pagbã tõe n dɩk a Abigayill mak-sõngã pʋgẽ?

¹⁸ Pagbã sẽn tõe n dɩk yam ninga: Pag sã n nong a Zeova la a waoogd-a, a manesmã tõe n nafa a zakã rãmb wʋsgo. Baa a sɩdã sã n pa tũud a Zeova, bɩ a sã n pa tũud a noyã, a pa na n tũnug ne manesem sẽn kɩɩsd Wẽnnaam Gomdã n kao a kãadmã ye. A pʋd n na n waoogda a sɩdã la a sakd-a. A na n modgame n sõng a sɩdã t’a bãng a Zeova. (1 Pɩy. 3:1, 2) La baa a mak-sõngã sã n pa kɩt t’a sɩdã lebg wẽn-sakda, a Zeova sũur nooma ne-a, a sẽn sulgd n sakd a sɩdã, la a maand sɩd ne a Zeova wã.

19. Wakat bʋg la pag pa na n sulg n sak a sɩda?

¹⁹ La pag sẽn yaa kiris-ned sɩd sã n yeel-a t’a maan bũmb sẽn kɩɩsd Biiblã noyã, a pa na n sak ye. Tags-y n ges-y wala saam-bi-poak sɩd sẽn pa a Zeova Kaset soab sẽn na n yeel-a t’a yag ziri, t’a zu wall a maan bũmb sẽn kɩɩsd Wẽnnaam Gomdã. Yaa Wẽnnaam a Zeova la kiris-nebã fãa, baa saam-bi-pogs nins sẽn kẽ kãadmã, segd n sak pipi. B sã n yeel saam-bi-poak t’a kɩɩs Biiblã noyã, a segd n zãgsame, la a tall raood la bʋgsem, n wilg bũmb ning sẽn kɩt t’a zãgsã.—Tʋʋ. 5:29.

20. Bõe n wilgd t’a Maari ra tara zood sõma ne a Zeova?

²⁰ A Maari ra tara zood sõma ne a Zeova. Yaa vẽeneg t’a ra mii Gʋls-sõamyã sõma. A sẽn wa n sõsd ne a Elizabɛt sẽn yaa a Zãmbatiis ma wã, a lebg n togsa Biiblã babg ning b sẽn da gʋls ne Ebre wã vɛrse-rãmb sẽn yɩɩd bãmb 20. (Luk 1:46-55) Tags-y n ges-y-yã: Baa ne a Maari sẽn da na n wa lebg a Zozɛf pagã, pa ne a Zozɛf la a Zeova  malɛkã reng n vẽneg a meng ye. Yaa a Maari la malɛkã gom ne, n yeel-a t’a na n doga Wẽnnaam Bi-ribla. (Luk 1:26-33) A Zeova ra mii a Maari hal sõma, n da kɩs sɩd t’a na n nonga a Bi-riblã, la a ges a yell sõma. La sãmbg kae t’a Maari kell n talla zood sõma ne a Zeova, baa a Zeezi sẽn wa n ki, n vʋʋg n leb saasẽ wã poore.—Tʋʋ. 1:14.

21. Yam-bʋg la pʋg-sɩdbã tõe n dɩk a Maari kibarã pʋgẽ?

²¹ Pʋg-sɩdbã sẽn tõe n dɩk yam ninga: Pʋg-sɩd sẽn tar yam maanda sũ-noogo, a pagã sã n mi Gʋls-sõamyã sõma. A pa maand rabeem, bɩ n tagsdẽ t’a pagã rat n deega a zu-sobendã n soog ye. A bãngdame tɩ saam-bi-poak sã n mi Biiblã noyã sõma, tõe n nafa a zakã rãmb wʋsgo. Baa pag sã n karmame n zãag n yɩɩd a sɩda, yaa raoã n segd n lʋɩ taoor zak pʋgẽ Biiblã zãmsgã, la tũudmã tʋʋm a taabã pʋgẽ.—Efɛ. 6:4.

22. Yam-bʋg la pagbã tõe n dɩk a Maari kibarã pʋgẽ?

²² Pagbã sẽn tõe n dɩk yam ninga: Pag segd n sulgda a meng n sakd a sɩda, la yaa yẽ mengã n segd n modg t’a tẽebã pãng paasdẽ. (Gal. 6:5) Sẽn na yɩl n maan woto, a segd n baoo sẽk n zãmsd Biiblã a toore, la a bʋgsdẽ. Woto na n sõng-a lame t’a ket n nong a Zeova la a waoogd-a. A leb n na n paama sũ-noogo, a sẽn sulgd n sakd a sɩdã yĩnga.

23. Pag sã n sulgd a meng n sakd a sɩda, wãn to la rẽ nafd yẽ menga, a zakã rãmba, la tigingã?

²³ Pagb nins sẽn kelld n sulgd b mens n sakd b sɩdbã b sẽn nong a Zeova wã yĩngã paamda sũ-noogo, n yɩɩd b rãmb nins sẽn zãgsd zu-sobend ning a Zeova sẽn lugl zakã pʋgẽ wã. B kõta kom-bɩɩsã la kom-pugli wã mak-sõngo. (Tɩt 2:3-5) B kɩtdame tɩ vɩɩmã be yamleoog zakã pʋgẽ, la tigingã pʋgẽ me. Rũndã-rũndã, sẽn tũud-b a Zeova wã sʋka, pagbã sõor n yɩɩda. (Yɩɩn. 68:12) D yaa pag tɩ d yaa raoa, tõnd ned kam fãa tara tʋʋmd sẽn tar yõod tigingã pʋgẽ. Sõsg ning sẽn pʋgdã pʋgẽ, d na n yãa ned kam fãa sẽn tõe n tʋm a tʋʋmdã to-to tɩ yɩ sõma.