1-2. a) Bõe la goosneema-rãmb kẽer maand n namsd a Zeova nin-buiidã, la a Zeova nin-buiidã manesem yaa wãn to? b) Bõe yĩng tɩ d tõe n tall sũ-noogo, baa namsg sasa? (Gom-y sebrã pipi neng fotã me yelle.)

 MASÃ menga, dũniyã gill zugu, sẽn yɩɩd tẽns 30 pʋgẽ la b gɩdg d tũudmã wall d tʋʋm kẽere. Tẽn-kãens kẽer pʋsẽ, taoor dãmbã yõga d saam-biis la d saam-bi-pogs n kẽes bãens rotẽ. D tẽed-n-taasã maana bũmb sẽn yaa wẽng bɩ? A Zeova nifẽ, b pa maan bũmb sẽn yaa wẽng ye. B sẽn maan bal yaa Biiblã kareng la a zãmsgo, koɛɛgã moonego, la tigissã kẽnde. Sẽn paase, b zãgsame tɩ b pa na n kẽes b toog politikã yɛlẽ ye. Baa ne nams-toaagã, nin-kãensã sẽn maand sɩd ne a Zeova wã kell n talla b burkĩndã, * tɩ wilgdẽ tɩ b nonga a Zeova ne b sũy fãa. B sẽn maan woto wã, noom-b-la wʋsgo!

² Tõe tɩ y zoe n yãa fot-rãmb sẽn wilgd a Zeova Kaset rãmb b sẽn namsd b tũudmã yĩnga, tɩ baa ne rẽ bɩ b tar raoodo, tɩ b nensã be laado. B sũyã noomame, bala b miime t’a Zeova sũur nooma ne-ba, b sẽn ket n kẽnd ne burkĩndã yĩnga. (Yɩɩn. 15: 1, 2) A Zeezi yeelame: “Sũ-noog rãmb la neb nins b sẽn namsd tɩrlmã yĩngã . . . Maan-y sũ-noog la y kɩdme, yãmb keoorã sẽn be Wẽnnaam nengẽ wã sẽn yaa kãsengã yĩnga.”—Mat. 5:10-12.

3. Wa Tʋʋm 4:19, 20 sẽn yetã, b sẽn wa n namsd tẽn-tʋmdbã, b manesem yɩɩ wãna? La bõe yĩng tɩ b tall manesem a woto?

³ Namsg ning d tẽed-n-taasã sẽn paamdã yaa wa a  Zeezi tẽn-tʋmdbã sẽn paam namsg ning pipi kiris-nebã wakatẽ wã, b sẽn wa n moond koɛɛgã n gomd a Zeezi yellã. Sãnedrẽ wã bʋ-kaoodbã yeel-b-la naoor wʋsg tɩ b “ra le gom a Zeezi yʋʋrã yell” ye. (Tʋʋ. 4:18; 5:27, 28, 40) Tẽn-tʋmdbã manesem yɩɩ wãna? (Karm-y Tʋʋm 4:19, 20.) B ra miime tɩ yaa a soab ning zu-sobend sẽn ka to wã n kõ-b noore, tɩ b moon nebã la b kõ kaset Kiristã yʋʋr yĩnga. (Tʋʋ. 10:42) A Pɩyɛɛr ne a Zã goma tẽn-tʋmdbã fãa yʋʋr yĩng ne raoodo, n yeel tɩ Wẽnnaam la b na n sake, la pa bʋ-kaoodbã, la tɩ b pa na n bas a Zeezi yell goam ye. Yaa wa b sẽn yeel bʋ-kaoodbã yaa: ‘Yãmb tẽedame tɩ yãmb tara tõog n yɩɩd Wẽnnaam la?’

4. Wa Tʋʋm 5:27-29 sẽn yetã, mak-sõng bʋg la tẽn-tʋmdbã kõ kiris-neb hakɩɩkã, la wãn to la d tõe n dɩk b togs-n-taare?

⁴ Rẽ tɛka, kiris-neb hakɩɩkã tũuda tẽn-tʋmdbã mak-sõngã. Bãmb me getame tɩ “Wẽnnaam n yaa naab ning tõnd sẽn segd n sakã, pa ninsaalbã ye.” (Karm-y Tʋʋm 5:27-29.) Tẽn-tʋmdbã sẽn sak a Zeova tɩ b pãb-bã poore, b yii Sãnedrẽ wã taoor n loog ne “sũ-noogo, bala, b paamame tɩ b nams-b a Zeezi yʋʋrã yĩnga.” La b kell n moona koɛɛgã n pa bas ye!—Tʋʋ. 5:40-42.

5. Sogs-bʋs leoor la d segd n bao n bãnge?

⁵ Tẽn-tʋmdbã mak-sõngã kɩtdame tɩ d sokd d mens sogs-kẽere. Wala makre, wãn to la b sẽn yãk yam n na n sak Wẽnnaam n yɩɩd ninsaalbã, ne Biiblã sẽn kõ noor tɩ d “sak nanambsã” tũud taaba? (Rom. 13:1) Wãn to la d tõe n “sakd nanambsã ne pãn-soaadbã” wa tẽn-tʋmd a Poll sẽn yeelã, la d ket n sakd Wẽnnaam sẽn yaa d naab sẽn ka to wã?—Tɩt 3:1.

6. a) “Nanambsã” yell b sẽn gomd Rom dãmb 13:1 wã yaa ãnd dãmba, la d manesem segd n yɩɩ wãn ne-ba? b) Bõe la d tõe n yeel dũniyã nanambsã naamã wɛɛngẽ?

⁶ Karm-y Rom dãmb 13:1. Vɛrse-kãngã pʋgẽ, “nanambsã” yell b sẽn gomdã yaa ninsaalbã taoor dãmb sẽn tar pãng n dɩt naam b taabã zugã. Kiris-nebã segd n saka  nin-kãensã. Bala, b kɩtdame tɩ nebã ra maand zũnd-zãnde, la b sakd noy nins goosneema wã sẽn yiisdã. Wakat ning menga, b sõngda a Zeova nin-buiidã. (Vẽn. 12:16) Rẽ n so tɩ Biiblã yet tõnd tɩ d segd n yaooda lampo-rãmbã, fadgã, n zoet-b la d waoogd-ba. (Rom. 13:7) La goosneema-kãensã sẽn tar tõogã yaa a Zeova sẽn bas-b tɩ b rɩt naamã yĩnga. A Zeezi wilga rẽ vẽenega, Rom guvɛrneer a Põns Pilat sẽn wa n kaood a bʋʋdã. A Pilat sẽn wa n yeel a Zeezi tɩ yẽ tõe n kõo noor tɩ b bas-a wall b kʋ-a wã, a Zeezi leok-a lame yaa: “Yãmb da pa na n tall tõog baa bilf mam zugu, Wẽnnaam sã n da pa kõ yãmb ye.” (Zã 19:11) Wala a Pilate, dũniyã nanambsã la politikã taoor dãmb naam tara koaka.

7. Wakat bʋg la d pa segd n sak nanambsã, la bõe la b segd n bãnge?

⁷ Kiris-nebã sakda goosneema-rãmbã noy nins fãa sẽn pa kɩɩsd Wẽnnaam noyã. La b sã n wa yeel tɩ d maan bũmb Wẽnnaam sẽn kisi, wall n gɩdg tõnd tɩ d ra maan bũmb Wẽnnaam sẽn dat tɩ d maane, d pa sakd ye. Wala makre, b tõe n wa yeela kom-bɩɩs tɩ b kẽ sodaarã n zab b tẽngã yĩnga. * B tõeeme me n gɩdg Biiblã d sẽn yiisã, la d sɛbã sẽn tik Biiblã zugã, la b yeel tɩ d ra le moon koɛɛgã, la d ra le tigimd taab me ye. La nanambsã sẽn tʋmd ne b naamã tɩ pa sõma wã, wala makre, n namsd Kiristã karen-biisã, Wẽnnaam na n wa kaoo b bʋʋdo. A Zeova nee b sẽn maandã!—Koɛ. 5:8.

8. Welgr bʋg n be nanambsã ne Wẽnnaam sẽn ka to wã sʋkã, la bõe yĩng tɩ tar yõod tɩ d bãng rẽ?

⁸ “Nanambsã” tõe n tũnuga ne b naamã n maand bõn-sõma, la b tar tõog nin-buiidã zugu. La pa rat n yeel tɩ b naamã zemsa zãng wall pa tar koak ye. Naab n be n zems zãnga, t’a naamã yɩɩd nanambsã fãa naam. Yaa Wẽnnaam a Zeova. Biiblã zĩis wʋsgo, b yeelame t’a Zeova yaa Wẽnnaam sẽn ka to.—Dãn. 7:18, 22, 25, 27.

9. Bõe la Wẽnnaam vẽneg no-rɛɛs a Dãniyɛll t’a yã?

⁹ Wẽnnaam vẽnega no-rɛɛs a Dãniyɛll t’a yã bũmb toor-toor sẽn wilgd t’a Zeova naamã yɩɩda nanambs a taabã fãa naam. Pipi a Dãniyɛll yãa we-rũm-bɛd a naas sẽn makd dũni gill pãn-soaadb sẽn dɩ naam pĩndã, la sẽn dɩt naam rũndã-rũndã. Wala makre Babilon, Meed ne Pɛrs, Gɛrs, Rom la Etazĩni ne Gãrãnd Bertayn sẽn naag taab n yaa pãn-soaad rũndã-rũndã wã. (Dãn. 7:1-3, 17) Rẽ poore, a Dãniyɛll yãa Wẽnnaam a Zeova sẽn zao a naam geerã zug saasẽ n na n kao bʋʋdo. (Dãn. 7:9, 10) No-rɛɛsã sẽn yã bũmb ning rẽ poorã yaa keoogre, rũndã-rũndã nanambsã yĩnga.

10. Sẽn zems ne Dãniyɛll 7:13, 14, 27, ãnd dãmb la a Zeova yãk tɩ b na n dɩ naam tẽngã zugu, la woto wilgda tõnd bõe a Zeova zugu?

¹⁰ Karm-y Dãniyɛll 7:13, 14, 27. Wẽnnaam deega goosneema-rãmbã naamã ne b pãngã n kõ neb a taab sẽn tog ne naam, la sẽn tar pãng n yɩɩda. Yaa ãnd dãmba? A kõo naamã ned sẽn “wẽnd ninsaala,” rat n yeel t’a Zeezi Kiristi, la ‘Wẽnnaam sẽn ka to nin-sõamyã’ wã, rat n yeel tɩ neb 144000, tɩ b na n dɩ naam “wakat sẽn kõn sa.” (Dãn. 7:18) Vẽenega, a Zeova n yaa ‘Wẽnnaam sẽn ka to.’ Yẽ a ye bal n tar tõog n tõe n maan woto.

11. Bõe me la a Dãniyɛll yeel tɩ wilgdẽ t’a Zeova tara tõog nanambs a taabã zugu?

 ¹¹ Bũmb ning a Dãniyɛll sẽn yã vẽnegrã pʋgẽ wã zemsa ne bũmb ning a sẽn da yeel sɩngrẽ wã. A yeelame yaa: “Saasẽ Wẽnnaamã” “n kõt rĩm-dãmb naam, bãmb n sikd rĩm-dãmb b naamẽ.” A paasame: ‘Wẽnnaam sẽn ka to wã n so ninsaalbã rĩungã fãa, bãmb kõt-a-la b sũur sẽn noom ne a soaba.’ (Dãn. 2:19-21; 4:14) Rẽ yĩnga, a Zeova zoe n kõo neb naam wall a sik neb b naamẽ bɩ? N-ye!

12. Togs-y kibar sẽn wilgd a Zeova sẽn sik rĩm-dãmb b naamẽ pĩnd wẽndẽ wã. (Ges-y fotã.)

¹² A Zeova wilga vẽeneg t’a pãngã ne a naamã yɩɩda “nanambsã.” Ad kibay a tãab sẽn wilgd rẽ: Ezɩpt rĩm a Farawõ kɩtame t’a Zeova nin-buiidã lebg a yembse, la a zãgs naoor wʋsg t’a kõn bas-b tɩ b loog ye. La a Zeova fãaga a nin-buiidã, la a kɩt t’a Farawõ bõr mog-miuugã pʋgẽ. (Yik. 14:26-28; Yɩɩn. 136:15) Daar a ye, rĩm a Bɛlsatzaar maana tigri, ‘n zẽk a meng n kɩɩs Zu-soabã sẽn be saasẽ wã,’ la a bas a Zeova waoogr n waoog a bõn-naandsã sẽn maan ne ‘wanzuri, la sãnemã.’ (Dãn. 5:22, 23) La a Zeova sika rao-kãngã sẽn da yaa wuk-m-meng soaba. Yʋn-kãnga, b kʋʋ a Bɛlsatzaar tɩ Meed-rãmbã ne Pɛrs-rãmbã reeg a rĩungã n sooge. (Dãn. 5:28, 30, 31) Palɛstine rĩm a Erood Agripa pipi soabã kɩtame tɩ b kʋ tẽn-tʋmd a Zak la b kẽes tẽn-tʋmd a Pɩyɛɛr bãens roogo, n na n wa kʋ yẽ me. La a Zeova gɩdga a Erood t’a sẽn da ratã pa tõog ye. “A Zeova malɛkã wẽ-a lame” t’a ki.—Tʋʋ. 12:1-5, 21-23.

13. Togs-y kibar sẽn wilgd a Zeova sẽn zab ne nanambs sẽn naag taab n tõog-ba.

¹³ A Zeova leb n wilgame t’a pãngã ne a naamã yɩɩda nanambs sẽn naag taaba. A sõnga Israyɛll nin-buiidã tɩ b zab n tõog Kãna rĩm-dãmb 31 sẽn naag taaba, la b tõog n deeg Kãabg tẽngã zĩis wʋsgo. (Zoz. 11:4-6, 20; 12:1, 7, 24) A Zeova leb n sõnga Israyɛll nin-buiidã tɩ b zab ne rĩm a Bɛn-hadaad ne Siri nanambs 32 sẽn naag taab n tõog-ba.—1 Rĩm. 20:1, 26-29.

14-15. a) Bõe la rĩm a Nebukatnedzaar la rĩm a Daryuus yeel a Zeova naamã wɛɛngẽ? b) Bõe la yɩɩn-gʋlsdã yeel a Zeova la a nin-buiidã wɛɛngẽ?

¹⁴ Naoor wʋsgo, a Zeova wilgame t’a  yaa Wẽnnaam sẽn ka to. Babilon rĩm a Nebukatnedzaar sẽn wa n wuk a meng n gom a pãngã la a ziirã yellã, la a pa sak n deeg t’a Zeova n tog ne waoogrã, Wẽnnaam kɩtame t’a lebg gãeenga. A yamã sẽn wa n lebg n wa wã, a pẽga sẽn ka to wã, la a sak n deeg t’a Zeova n dɩt “naam zamaan woo zamaane.” A paasame tɩ “ned ka be n tar pãng n tõe n kɩɩs bãmb b naamẽ wã ye.” (Dãn. 4: 27, 30-32) A Dãniyɛll kell n talla a burkĩndã, baa ne b sẽn wa n dat t’a kɩɩs Wẽnnaamã. La a Zeova fãag-a-la gɩgma bokẽ. Rẽ kɩtame t’a Daryuus yiis noor n yeel yaa: “Bɩ nebã fãa zoe a Dãniyɛll Wẽnnaamã la b waoog-ba. Bala, bãmb yaa Wẽnnaam sẽn vɩ, la bãmb paada wakat sẽn kõn sa. Bãmb soolem kõn tol n sãam ye, la bãmb naamã ka tar sɛɛb ye.”—Dãn. 6:8-11, 20-23, 27, 28.

¹⁵ Yɩɩn-gʋlsdã yeelame: “Sẽn-Ka-Saab n tõe n kɩt tɩ nebã saagr lʋɩ vɩʋʋgẽ, bãmb n gɩdgd ninsaalbã sẽn dat n maan bũmb ninsã.” A paasame: “Bark bee soolem ning sẽn tar Sẽn-Ka-Saab tɩ yaa a Wẽnnaamã zugu! Bark bee Sẽn-Ka-Saab sẽn yãk neb nins tɩ b yaa b rẽndã zutu.” (Yɩɩn. 33:10, 12) Dẽnd d tara bʋʋm n na n kell n maan sɩd ne a Zeova!

16. “To-kãsengã” wɛɛngẽ, d tõe n basa yam ne bõe, la bõe yĩnga? (Ges-y fotã.)

¹⁶ D yãa bũmb nins a Zeova sẽn maan pĩnd wẽndẽ wã. Dẽnd bõe n na n maan ka la bilfu? D tõe n basa d yam t’a Zeova na n fãaga neb nins sẽn maand sɩd ne-a wã “to-kãsengã” sẽn watã sasa. (Mat. 24:21; Dãn. 12:1) Goog sen yit Magoogã sẽn yaa tẽns sẽn naag taabã sã n wa zabd ne neb nins sẽn maand sɩd ne a Zeova wã, a Zeova na n fãaga a nin-buiidã. Baa ne sẽn na n yɩ Nasiyõzĩni wã tẽns 193 sẽn na n naag taabã, b pa na n tõog n zab ne Wẽnnaam sẽn ka to wã la a saasẽ tãb-biisã n tõog ye! A Zeova yeelame:  “Mam na n wilga m kãosengã ne m pʋ-peelmã, la m kɩt tɩ buud wʋsg bãng maam. Woto, bãmb na n bãngame tɩ mam yaa Sẽn-Ka-Saabo.”—Eze. 38:14-16, 23; Yɩɩn. 46:11.

17. Biiblã yetame tɩ bõe n na n paam tẽngã rĩm-dãmbã, la bark bʋg neb nins sẽn maand sɩd ne a Zeova wã na n paame?

¹⁷ A Goog sã n wa zabd ne Wẽnnaam nin-buiidã, Armagedõ zabrã na n sɩngame. La a Zeova na n saama “dũniyã gill rĩm-dãmba.” (Vẽn. 16:14, 16; 19:19-21) “Yaa nin-tɩrsã n na n vɩɩmd dũni zugu, la yaa burkĩmbã n na n pa be n vɩɩmde.”—Yel. 2:21.

18. Bõe la kiris-neb hakɩɩkã wʋsg sak n maane, la bõe yĩnga? (Dãniyɛll 3:28)

¹⁸ Hal pĩnd n tãag masã, kiris-neb hakɩɩkã wʋsg sak n bõna bũmb wʋsgo, hal n gẽneg b yõor menga, b sẽn nong a Zeova sẽn yaa b naab sẽn ka to wã yĩnga. B yãka yam n na n kell n maan sɩd ne a Zeova. B yaa wa Ebre neb a tãabã sẽn kell n maan sɩd ne Wẽnnaam sẽn ka to wã, t’a fãag-b wʋng sẽn wɩng wʋsgã pʋgẽ wã.—Karm-y Dãniyɛll 3:28.

19. A Zeova na n tika bõe zug n kao a nin-buiidã bʋʋdo, la bõe la d segd n maan masã menga?

¹⁹ Yɩɩn-gʋlsd a Davɩɩd wilgame tɩ tara yõod wʋsg tɩ d kell n tall d burkĩndã. Ad a sẽn yeele: “Sẽn-Ka-Saabo, yãmb n kaood soolem toɛy-toɛyã neb bʋʋdo, Sẽn-Ka-Saabo, bʋ-y mam bʋʋd wa sẽn zems mam tɩrlmã, la wa sẽn zems mam burkĩndã.” (Yɩɩn.7:9) A leb n yeelame yaa: “Bɩ burkĩndlim la tɩrlem gũ maam.” (Yɩɩn. 25:21) Bũmb ning sẽn tar yõod d vɩɩmã pʋgẽ n tɩ yɩɩdã yaa d kell n maan sɩd ne a Zeova, baa sẽn wa n yaa a soaba. D sã n maan woto, d tõe n yeela wa yɩɩn-gʋlsdã. Ad a sẽn yeele: “Bark bee neb nins sẽn kẽnd ne burkĩndã . . . wa sẽn zems Sẽn-Ka-Saab tõogã” zugu.—Yɩɩn. 119:1.