NEB wʋsg miime tɩ b ra kaa a Zeezi ra-luk zug nin-wẽns a yiib sʋka. (Matiye 27:35-38) Neb kẽer yeelame tɩ b sẽn yeel tɩ b manega a Zeezi kũumã n tɩ mum yaoogẽ wã pa sɩd ye.—Mark 15:42-46.

Neb kẽer tagsdame tɩ b sã n da ka ned ra-luk zugu, a soabã pa tõe n paam yaoog ye. Bõe la b ra maand a soabã kũumã? Kiba-kɩt a ye yʋʋr sẽn boond t’a Ariel Sabar goma bũmb ning sẽn kɩt tɩ nebã tẽed woto wã yell sebr a ye pʋgẽ (Smithsonian) n yeel yaa: “Yaa bi-beesã la b ra kaad ra-luk zugu. La bãngdb kẽer yeelame tɩ ra pa tar daar tɩ Rom nebã sak tɩ b mum ned a woto sẽn ka barkã yaoog pʋgẽ ye. Rom nebã raab ra yaa bi-beesã paam yãnde. Rẽ n so tɩ b ra basd bi-beesã kũ-rãmb ra-luksã zutu, sẽn na yɩl tɩ we-rumsã wa rɩ. Rẽ poore, b wat n wʋka b kõabã n tɩ naag ne kũ-rãmb a taab n bus yaadẽ wã.”

Tẽn-vaeesdbã yãa bũmb sẽn wilgd tɩ pa yɩ woto ne Zʋɩf-rãmb kẽer b sẽn da ka ra-luk zug ye. Yʋʋmd 1968 wã, b buka rao b sẽn da ka ra-luk zug kõaba. Yɩɩ pipi kiris-nebã wakatẽ la b mum-a. Yaa Zʋɩf-rãmbã yaad a ye sẽn da pẽ Zerizalɛm. Raoã kõabã ra bee bũmb sẽn wõnd kees pʋgẽ. Nao-kãsenkãar kõbr n da be kõabã sʋka. B ra kaa raoã nao-kãsenkãarã ne poẽnt sẽn zems sãntimetr piig la a ye la pʋɩ-sʋk ra-peok zugu. A Sabar yeelame tɩ kõbrã yaa rao a ye yʋʋr sẽn boond t’a Yehokanan nao-kãsenkãar kõbre, la tɩ yɩɩ kaset sẽn wilgd tɩ Evãnzil-rãmbã sẽn yet t’a Zeezi paama yaoogã tog n yaa sɩda. Dẽnd a Yehokanan nao-kãsenkãarã kõbr yaa kaset sẽn wilgd t’a Zeezi wakatẽ wã, Rom nebã ra kõta sor tɩ b tõe n mum ned b sẽn da ka ra-luk zug yaoogẽ.

A Yehokanan nao-kãsenkãarã kõbr b sẽn yã wã kɩtame tɩ neb kẽer ket n wẽed no-koɛɛm b sẽn ka a Zeezi to-to wã wɛɛngẽ. La bũmb sẽn be bal yaa tɩ bi-bees kẽer b sẽn da ka ra-luk zug paamame tɩ b mum-b yaoogẽ, la b pa naag-b ne kũ-rãmb wʋsg n bus ye. Dẽnd d tõe n sak n deegame tɩ Biiblã sẽn yet tɩ b manega a Zeezi kũumã n tɩ mum yaoogẽ wã yaa sɩda. Tẽn-vaeesdbã sẽn yã bũmb ningã sɩd wilgda rẽ.

Sẽn yɩɩd fãa, a Zeova ra pĩnd n togsame tɩ b na n naaga a Zeezi kũumã ne rakãag-rãmb n mumi. La ned pa tõe tɩ Wẽnnaam gomd pa paam pidsg ye.—Eza. 53:9; 55:11.