1-2. a) Sẽn yɩɩd fãa, yaa wakat bʋg la d tẽegd d ned sẽn maan kaalem yelle? b) Yʋng ning b sẽn yõk a Zeezi wã, bõe la a yeel a karen-biisã tɩ b maandẽ?

D NED sã n maan kaalem, baa kaoos yʋʋm wʋsgo, d ket n tẽra a yelle. Sẽn yɩɩd fãa d tẽegda a yelle, daar ning a sẽn maan kaalmã sã n wa ta.

² Yʋʋmd fãa, d naagda neb milyõ-rãmb dũniyã gill zug n tẽeg ned a ye d sẽn nong wʋsg kũum yelle. Yaa a Zeezi Kirist. (1 Pɩy. 1:8) D naagda taab n tẽeg a soab ning sẽn kõ a vɩɩmã tɩ yɩ maoong n fãag tõnd ne yel-wẽndã la kũumã yelle. (Mat. 20:28) Sɩd me, a Zeezi ratame t’a karen-biisã tẽegd a kũumã yelle. Yʋng ning b sẽn yõk-a wã, a wilga bũmb d sẽn tog n maand n tẽegd a kũumã yelle. A yeelame yaa: “Maand-y woto n tẽegd mam yelle.”—Luk 22:19.

3. Bõe yell la d na n gom sõs-kãngã pʋgẽ?

³ Neb nins sẽn maand a Zeezi kũumã tẽegrã sʋka, neb sõor bilf bal n saagdẽ n na n tɩ vɩɩmd saasẽ. La neb milyõ-rãmb sẽn saagd n na n wa vɩɩmd wakat sẽn kõn sa tẽngã zug me n naagd n maandẽ. Sõs-kãngã pʋgẽ, d na n yãa bʋʋm nins sẽn kɩt tɩ sul a yiibã neb fãa naagd n maand Tẽegrã yʋʋmd fãa wã. D leb n na n yãa nafa nins d sẽn paamde, d sẽn naagd n maand Tẽegrã. Bɩ d reng n ges bʋʋm kẽer sẽn kɩt tɩ sẽn paam-b vʋʋsem sõng zaeebã naagd n maand Tẽegrã.

4. Bõe yĩng tɩ sẽn paam-b zaeebã wãbd burã la b yũud divẽ wã Tẽegrã sasa?

⁴ Yʋʋmd fãa, sẽn paam-b zaeebã naagdame n maand Tẽegrã, n wãbd burã la b yũud divẽ wã. Bõe yĩng tɩ b sẽn  wãbd burã la b yũud divẽ wã yaa bũmb sẽn zemse? Sẽn na yɩl n paam sok-kãngã leoore, bɩ d ges a Zeezi sẽn maan bũmb ning yʋng ning b sẽn yõk-a wã. Yɩɩ Pakã rɩɩb poor la a Zeezi lugl b sẽn boond a soab rũndã-rũndã tɩ Soaalã zaabr dɩɩbã. Yaa wakat kãng la a rɩk bur ne divẽ n kõ a tẽn-tʋmdb nins sẽn kell n maan sɩd ne-a wã, n yeel tɩ b reeg n wãb la b yũ. A Zeezi goma kaool a yiib yell ne-ba. Yaa kaool-paalgã, ne Rĩungã kaoolã. * (Luk 22:19, 20, 28-30) Kaool-kãensã paka sore, t’a tẽn-tʋmdb 11 wã, n paas neb sõor bilf bal na n paam n kẽng saasẽ n tɩ yɩ rĩm-dãmb la maan-kʋʋdba. (Vẽn. 5:10; 14:1) Yaa sẽn paam-b zaeeb n ket tẽngã zugu, n naag kaool-kãensã a yiibã pʋgẽ wã bal n tõe n wãb burã la b yũ divẽ wã Tẽegrã sasa.

5. Bõe la sẽn paam-b zaeebã mi b saagrã wɛɛngẽ?

⁵ Bʋʋm a to me n kɩt tɩ sẽn paam-b zaeebã naagd n maand Tẽegrã. Yaa tɩ kɩtdame tɩ b paam n tags bũmb ning b sẽn saagd n na n wa paamã yelle. A Zeova kɩtame tɩ b saagd n na n wa tɩ vɩɩmd saasẽ, n pa le tõe n ki tɩ b gomd yĩng põogr ye. Sɩd me, b na n tɩ naaga a Zeezi Kirist ne neb 144 000 sʋk neb nins sẽn zoe n be saasẽ wã n dɩ naam. La sẽn yɩɩd fãa, b na n paam n yãa a Zeova mengã. (1 Kor. 15:51-53; 1 Zã 3:2) B mii vẽeneg t’a Zeova yãk-b lame tɩ b na n kẽng saasẽ. La sẽn na n yɩl n paam n kẽng saasẽ wã, b segd n kell n saka a Zeova n tãag b kũum. (2 Tɩm. 4:7, 8) Sẽn paam-b zaeebã sã n tagsd b sẽn saagd n na n tɩ vɩɩmd saasẽ wã yelle, kõt-b-la sũ-no-kãsenga. (Tɩt 2:13) La yaa wãn to yẽ ne piis a taabã? (Zã 10:16) Bõe n kɩt tɩ bãmb me naagd n maand Tẽegrã?

6. Bõe yĩng tɩ piis a taabã naagd n maand Tẽegrã yʋʋmd fãa?

⁶ Piis a taabã naagd n maanda Tẽegrã. B pa wãbd burã, b pa yũud divẽ wã me ye. La b sũur nooma b sẽn paam n naagd n maandẽ wã. Yɩɩ yʋʋmd 1938 wã la b bool sẽn saagd-b n na n wa vɩɩmd tẽngã zug wakat sẽn kõn sa wã tɩ b na n naagd n maand Tẽegrã yʋʋmd fãa. Yʋʋmd 1938, tʋʋlg kiuug pipi daar Gũusg Gasgã pʋgẽ, b yeelame yaa: “Segdame tɩ piis a taabã naagd n maand Tẽegrã, n get rẽ sẽn maand to-to wã. . . . Segd n yɩɩ sũ-noog wakat ne bãmb me. La pʋd n yaa woto.” Wa neb b sẽn bool kãadem kibsẽ sẽn maand sũ-noog ne rẽ wã, piis a taabã me sũy noomame, b sẽn paam n naagd n maand Tẽegrã.

7. Bõe yĩng tɩ piis a taabã gũud ne b sũy fãa n na n kelg Tẽegrã sõsga?

⁷ Piis a taabã me tagsda bũmb ning b sẽn saagd n na n paamã yelle. B gũuda Tẽegrã sõsgã ne b sũy fãa n na n kelge. Bala sõsgã sasa, b wilgda Kiristã ne a na-rɩt-n-taas 144000 sẽn na n maan bũmb nins n kõ wẽn-sakdbã, b naamã sẽn na n kaoos yʋʋm tusrã sasa. Neb nins sẽn na n tɩ rɩ naam saasẽ wã na n sõnga b Rĩm a Zeezi Kiristi, n kɩt tɩ tẽngã gill lebg arzãna, la b sõng wẽn-sakdbã tɩ b wa lebg neb sẽn zems zãnga. Neb milyõ-rãmbã sẽn naagd n maand Tẽegrã sã n tags Biiblã bãngr-goam kẽer sẽn na n wa paam pidsgã yelle, kõt-b-la sũ-noog meng-menga. Wala makre, Biiblã sẽn pĩnd n togs bũmb ning tɩ be Ezayi 35:5, 6, ne 65:21-23, la Vẽnegr 21:3, 4. B sã n  mams b yamẽ, n ne bãmb ne neb nins b sẽn nongã sẽn be dũni-paalgã pʋgẽ, b sẽn saagd n na n wa paam bũmb ningã manegd n lebga vẽeneg b yamẽ, la b rat me n ket n maand b sẽn tõe fãa n da wa bas a Zeova tũub ye.—Mat. 24:13; Gal. 6:9.

8. Bõe me n kɩt tɩ piis a taabã naagd n maand Tẽegrã?

⁸ Bʋʋm a to me n kɩt tɩ piis a taabã naagd n maand Tẽegrã. Yaa b sẽn dat n wilg tɩ b nonga sẽn paam-b zaeebã, la b teel-bã yĩnga. Wẽnnaam Gomdã ra pĩnd n togsame tɩ zems-n-taar hakɩɩk n na n zĩnd sẽn paam-b zaeebã ne sẽn saagd-b n na n wa vɩɩmd wakat sẽn kõn sa tẽngã zugã sʋka. Wãn to? D gom bũmb a wãn yelle.

9. Bõe la bãngr-gomd ning sẽn be Zakari 8:23 yeta, tɩ wilgd piis a taabã tagsg sẽn yaa a soab ne sẽn paam-b zaeebã?

⁹ Karm-y Zakari 8:23. Bãngr-gom-kãngã wilgda piis a taabã tagsg sẽn yaa a soab ne sẽn paam-b zaeebã, hal tɩ be yamleoog wʋsgo. B sẽn yeel tɩ “Zʋɩf” la “yãmbã” bilgda sull a ye neba. Yaa sẽn paam-b vʋʋsem sõngã zaeeb n ket tẽngã zugã. (Rom. 2:28, 29) “Neb sẽn gomd goam buud toor-toor pʋgẽ neb piigã” makda piis a taabã. B sẽn yeel tɩ b “na n gãda Zʋɩf a yembr fãa fuug noorã” wilgdame tɩ b na n kell n naaga sẽn paam-b zaeeb n ket tẽngã zugã ne b sũy fãa, tũudum hakɩɩkã pʋgẽ. Rẽ n so tɩ piis a taabã naagd sẽn paam-b zaeebã n maand Tẽegrã, tɩ wilgd tɩ b nong-b lame la b teend-b ne b sũy fãa.

10. Bõe la a Zeova maan sẽn na yɩl n pids bãngr-gomd ning sẽn be Ezekɩyɛll 37:15-19, la 24 ne 25 wã?

¹⁰ Karm-y Ezekɩyɛll 37:15-19, 24, 25. Sẽn paam-b zaeebã ne piis a taabã naagda taab n tʋmd ne yam a yembre, tɩ wilgdẽ t’a Zeova pidsda bãngr-gom-kãnga. Bãngr-gomdã pʋgẽ, b goma raad a yiib yelle. “Zʋʋda” (buud ning pʋgẽ b sẽn da yãkd Israyɛll rĩm-dãmbã) raoogã makda sẽn saagd-b n na n tɩ vɩɩmd saasẽ wã, tɩ “Efrayim” raoogã makd sẽn saagd-b n na n wa vɩɩmd wakat sẽn kõn sa tẽngã zugã. * A Zeova wilgame t’a na n lagma sul a yiibã taaba, tɩ b lebg “raoog a yembre.” Woto wilgdame tɩ b na n naaga taab yam a yembre, n tũud a Zeezi Kirist sẽn yaa b Rĩmã. Yʋʋmd fãa, sẽn paam-b zaeebã ne piis a taabã naagda taab n maand Tẽegrã, n pa getẽ tɩ welgr bee b sʋk ye. B getame tɩ b fãa yaa “yãgr a yembre,” n tar “pe-kɩɩm-yɛnga.”—Zã 10:16.

11. Sẽn yɩɩd fãa, bõe la “piis” nins yell b sẽn gomd Matiye 25:31-36, 40 maand n sõngd Kirist ba-biisã?

¹¹ Karm-y Matiye 25:31-36, 40. “Piis” nins yell a Zeezi sẽn gomã makda nin-tɩrs nins sẽn vɩ dũniyã saab wakate, n saagdẽ n na n wa vɩɩmd wakat sẽn kõn sa tẽngã zugã, rat n yeel tɩ piis a taabã. Bũmb wʋsg la b maand n teend Kiristã ba-biis nins sẽn ket tẽngã zugã. Sẽn yɩɩd fãa b sõngd-b lame n tʋmd tʋʋm-kãseng ning Kiristã sẽn kõ-bã, sẽn yaa moon koɛɛgã dũniyã gill zug la sõng nebã tɩ b lebg a Zeezi karen-biisã.—Mat. 24:14; 28:19, 20.

12-13. Bõe la piis a taabã maand n sõngd Kirist ba-biisã?

¹² Yʋʋmd fãa, Tẽegrã daar sã n wa ket semen a wãna, piis a taabã sõngda Kiristã ba-biisã n pʋɩ sɛb dũniyã gill zugu, n na n bool nebã tɩ b wa naag-b n maan Tẽegrã. (Ges-y zĩ-gũbrã: “Yãmb segenda y meng  Tẽegrã yĩng bɩ?”) B sõngdame me n ges tɩ b tõog n maan Tẽegrã tigimsã fãa pʋsẽ dũniyã gill zugu, baa tigims nins pʋsẽ neb sẽn paam vʋʋsem sõngã zaeeb sẽn ka be. Piis a taabã sũy noomame, b sẽn paam n maand woto fãa n teend Kirist ba-biisã. B miime t’a Zeezi getame tɩ bũmb nins fãa b sẽn maand n sõngd a ba-biisã sẽn paam zaeebã, yaa yẽ mengã la b maand n sõngdẽ.—Mat. 25:37-40.

¹³ D saagdame n na n tɩ vɩɩmd saasẽ tɩ yaa tẽngã zug me, bõe me n kɩt tɩ d fãa naagd n maand Tẽegrã?

14. Bõe la a Zeova ne a Zeezi maan n wilg tɩ b nong-d-la hal wʋsgo?

¹⁴D sũur nooma ne a Zeova la Zeezi sẽn maan bũmb ning n wilg tɩ b nong-d lame wã. A Zeova maana bũmb toor-toor n wilg t’a nong-d lame. La bũmb a ye la a maan tɩ yaa kãseng n yɩɩda. Yaa a sẽn tʋm a Bi-ribl sẽn ka to wã t’a wa nams la a ki tõnd yĩngã. (Zã 3:16) A Zeezi me wilgame t’a nonga tõnd hal wʋsgo, a sẽn sak n kõ a vɩɩmã tõnd yĩngã. (Zã 15:13) D pa tol n tõe n yao n dol a Zeova ne a Zeezi, bũmb ning b sẽn maan n wilg tɩ b nong-d lame wã yĩng ye. La d tõe n wilga ne d sẽn vɩ to-to daar fãa wã, tɩ d sũur nooma ne b sẽn maan bũmb ning tõnd yĩngã. (Kol. 3:15) Sẽn paase, d naagd n maanda Tẽegrã, sẽn na yɩl n tẽeg b sẽn wilg to-to tɩ b nong-d lame wã, la d wilg tɩ tõnd me nong-b lame.

15. Bõe yĩng tɩ sẽn paam-b zaeebã ne piis a taabã fãa sũy yaa noog ne a Zeezi kũumã sẽn yɩ yaoodã?

¹⁵D sũur nooma ne a Zeezi kũumã sẽn yɩ yaood sẽn na n fãag ãdem-biisã. (Mat. 20:28) Sẽn paam-b zaeebã sũur noom wʋsg ne a Zeezi kũumã sẽn yɩ yaoodã. Bala, kɩtame tɩ b saagdẽ n na n tɩ vɩɩmd saasẽ. B sẽn tẽed Kirist kũumã sẽn yɩ maoongã yĩnga, a Zeova geelg-b-la wa nin-tɩrse, n boond-b t’a kamba. (Rom. 5:1; 8:15-17, 23) Piis a taabã me sũy nooma wʋsgo, a Zeezi kũumã sẽn yɩ yaoodã. B sẽn tẽed Kirist kũumã sẽn yɩ maoongã yĩnga, b tara yʋ-noog Wẽnnaam taoore, n tõe n tũ-a, la b saagdẽ me n na n wa “põs to-kãsengã sasa.” (Vẽn. 7:13-15) Bũmb a ye sẽn paam-b zaeebã ne piis a taabã sẽn tõe n maan n wilg tɩ b sũy nooma ne Kirist kũumã sẽn yɩ yaoodã, yaa b sẽn na n naagd n maand Tẽegrã yʋʋmd fãa.

16. Bõe me n kɩt tɩ d naagd n maand Tẽegrã?

¹⁶ Bʋʋm a to me sẽn kɩt tɩ d naagd n maand Tẽegrã yaa d sẽn dat n sak a Zeezi noorã yĩnga. Yaa saasẽ la d saagdẽ n na n tɩ vɩɩmd tɩ yaa tẽngã zug me, d tũuda noor ning a Zeezi sẽn kõ wã ne d sũur fãa. Yʋng ning a sẽn wilg d sẽn segd n tẽegd a kũumã yell to-to wã, a yeelame: “Maand-y woto n tẽegd mam yelle.”—1 Kor. 11:23, 24.

17. Wãn to la Tẽegrã sõngd tõnd tɩ d paasd tõnd ne a Zeova zoodã?

¹⁷Paasda tõnd ne a Zeova zoodã. (Zak 4:8) Wa d sẽn yã wã, Tẽegrã kɩtame tɩ d paam n tags a Zeova sẽn kɩt tɩ d saagd n na n wa paam bũmb ninsã yelle, la d paam me n bʋgs bũmb ning a sẽn maane, tɩ wilgdẽ t’a nong-d-la hal wʋsgã zugu. (Zer. 29:11; 1 Zã 4:8-10) D sã n tags d sẽn saagd n na n wa paam bũmb nins ka la bilfã, n paas Wẽnnaam sẽn nong tõnd ne nonglem-kãsengã yelle, kɩtdame tɩ d maneg n nong a Zeova, tɩ tõnd ne yẽ zoodã pãng me paasdẽ.—Rom. 8:38, 39.

18. D sã n bʋgs a Zeezi mak-sõngã zugu, kɩtdame tɩ d rat n maan bõe?

 ¹⁸Sõng-da tõnd tɩ d rɩkd a Zeezi togs-n-taare. (1 Pɩy. 2:21) Tẽegrã sã n wa ket rasem a wãna, d karemda Biiblã kibay sẽn gomd a Zeezi sẽn maan bũmb nins a kũumã sẽn wa n ket semen a wãnã, kibay sẽn gomd a kũumã yelle, la a vʋʋgrã me yelle. Tẽegrã daar zaabre, sõsgã b sẽn wɛgsdã tẽegda tõnd t’a Zeezi nong-d lame. (Efɛ. 5:2; 1 Zã 3:16) D sã n karem kibay sẽn gomd a Zeezi mak-sõngã yell la d bʋgs a zugu, sõngda tõnd tɩ d rat n kell n kẽn “wa bãmb sẽn kẽn to-to wã.”—1 Zã 2:6.

19. Wãn to la d tõe n kell n pa Wẽnnaam nonglmã pʋgẽ?

¹⁹Sõngda tõnd tɩ d rat n kell n pa Wẽnnaam nonglmã pʋgẽ. (Ziid 20, 21) D paada Wẽnnaam nonglmã pʋgẽ, d sã n maand d sẽn tõe fãa n sakd-a, n waoogd a yʋʋrã, la d noogd a sũuri. (Yel. 27:11; Mat. 6:9; 1 Zã 5:3) D sẽn maand Tẽegrã sõngd-d lame tɩ d maneg n dat tɩ d sẽn vɩ to-to daar ne a to fãa wã tat a Zeova yam, tɩ yaa wa d sẽn yet a Zeova yaa: ‘Mam dat n paa fo nonglmã pʋgẽ wakat fãa yĩnga!’

20. Togs-y bʋʋm nins sẽn kɩt tɩ d naagd n maand Tẽegrã.

²⁰ D saagdame n na n tɩ vɩɩmd saasẽ wakat sẽn kõn sa tɩ yaa tẽngã zug me, d tara bʋʋm wʋsg sẽn sek d na naagd n maand Tẽegrã. Yʋʋmd fãa, d sã n wa tigim taab Tẽegrã daare, d tẽegda ned d sẽn nong wʋsg kũum yelle. Yaa a Zeezi Kiristi. Sẽn yɩɩd fãa, d tẽegda bõn-kãseng ning a Zeova sẽn maan n wilg t’a nonga tõnd hal wʋsgã yelle. Yaa a sẽn tʋm a Bi-riblã t’a wa ki tɩ yɩ maoong tõnd yĩngã. Roanda, d na n maana a Zeezi kũumã tẽegr tʋʋl-nif rasem 15, sẽn yaa arzũm daarã. D nonga a Zeova ne a Bi-riblã. Rẽ n so t’a Zeezi kũumã tẽegr daare, d getame tɩ d sẽn na n modg n naag n maanã yõod yɩɩda bũmba fãa.