1. Bõe n tõe n sõng-y tɩ y nong Biiblã bãngr-goamã zãmsgo?

 SAAM-BIIG a ye sẽn yaa bi-bɩɩg t’a yʋʋr boondẽ t’a Bɛn yeelame: “Mam nonga Biiblã bãngr-goamã zãmsg wʋsgo.” Yaa woto ne yãmb me bɩ, bɩ yãmb getame tɩ Biiblã bãngr-goamã võor wʋmb yaa toogo? Tõe tɩ y getame meng tɩ Biiblã bãngr-goamã zãmsg wata ne yam-yiisgu. La y sã n bao n bãng bũmb ning sẽn kɩt t’a Zeova kɩt tɩ b paas bãngr-goam Biiblã pʋgẽ wã, y tõe n toeema yam.

2. Bõe yell la d na n gom sõs-kãngã pʋgẽ?

² Sõs-kãngã pʋgẽ, d pa na n gom bũmb ning sẽn kɩt tɩ d segd n zãms Biiblã bãngr-goamã yell bal ye. D na n yãa d sẽn tõe n zãms-b to-to wã me. Rẽ poore d na n goma a Dãniyɛll sebrã bãngr-goam a yiib yelle, la d ges b sẽn tõe n sõng-d to-to rũndã-rũndã, d sã n wʋm b võore.

3. D sã n dat n wʋm Biiblã bãngr-goamã võore bõe la d segd n maane?

³ D sã n dat n wʋm Biiblã bãngr-goamã võore, d segd n kosa sõngre. D rɩk makre. Mams-y y sẽn na n togd sore, n dabd zĩig y sẽn pa mi, tɩ y zoa sẽn mi zĩigã sõma yãagd yãmba. A mii y sẽn taẽ, la sor fãa sẽn dabdẽ. Yaa vẽeneg tɩ y sũur na n yɩɩ noog y zoa wã sẽn sak n yãag-yã. A Zeova yaa wa zo-kãng sẽn sõngd yãmbã. A mii bũmb ning sẽn wat beoogã sõma. Rẽnd sẽn na yɩl n wʋm Biiblã bãngr-goamã võore, d segd n sika d meng n kos a Zeova sõngre.—Dãn. 2:28; 2 Pɩy. 1:19, 20.

4. Bõe yĩng t’a Zeova kɩt tɩ b gʋls bãngr-goam Biiblã pʋgẽ? (Zeremi 29:11) (Ges-y fotã me.)

⁴ A Zeova yaa wa roagd sẽn nong a kamb sẽn dat tɩ b beoog vɩɩmã yɩ neerã. (Karm-y Zeremi 29:11.) La a Zeova yaa toor ne ninsaalbã. A tõe n togsa sẽn wat beoogã tɩ zems kɛpɩ. A kɩtame tɩ b gʋls bãngr-goam Biiblã  pʋgẽ, n na n sõng tõnd tɩ d bãng bõn-kãsems sẽn na n maane, nand tɩ b maane. (Eza. 46:10) Biiblã bãngr-goamã yaa kũun d saasẽ Ba wã sẽn kõ-d ne nonglem. La bõe la d tõe n maan n kɩs sɩd tɩ Biiblã sẽn pĩnd n togs bũmb ninsã sɩd na n pidsame?

5. Yam-bʋg la bi-bɩɩg tõe n dɩk a Mags kibarã pʋgẽ?

⁵ Lekollẽ wã, kom-bɩɩs nins sẽn yaa a Zeova Kaset rãmbã wae n bee ne neb sẽn pa nand Biiblã wʋsgo, wall sẽn pʋd n pa nand-a ye. B no-goamã ne b manesmã tõe n kɩtame t’a Zeova Kaset soab sẽn yaa bi-bɩɩg wa maand sãmbs ne a sẽn tẽed bũmb ninsã. D gom bũmb ning sẽn paam saam-biig a ye yʋʋr sẽn boond t’a Mags yelle. A yeelame: “Mam sẽn wa n be lekollã, m wa n yik n sãmbda m roagdbã sã n zãmsd-m-la sɩdã, la sã n sɩd yaa Wẽnnaam n vẽneg tɩ b gʋls Biiblã.” Bõe la a roagdbã maan-yã? Ad a sẽn yeele: “B pa yik b sũur ne maam, baa m sẽn da mi tɩ rẽ pa noom-bã.” A Mags roagdbã tũnuga ne Biiblã n leok a sogsgã. A Mags me maana bũmbu. A yeelame: “Mam zãmsa Biiblã bãngr-goamã m toore, la m da gomd rẽ yell ne kom-bɩɩs a taaba.” Wãn to la rẽ naf a Magse? A yeelame: “Rẽ poore, mam kɩsa sɩd tɩ yaa Wẽnnaam n vẽneg tɩ b gʋls Biiblã!”

6. Y sã n maanda sãmbse bõe la y segd n maane, la bõe yĩnga?

⁶ Yãmb me sã n maanda sãmbs wa a Mags Biiblã goamã wɛɛngẽ, y pa tog n ning y meng taal ye. La y segd n maana bũmb rẽ wɛɛngẽ. Sãmbs yaa wa tẽngempiisim. Tẽngempiisim sã n kẽ bõn-sõng tɩ y sĩnd n getẽ, a tõe n wãb-a-la bilf-bilf n sãam-a. Sẽn na yɩl n yiis sãmbs sẽn tõe n sãam y tẽebã y sũurẽ wã, bɩ y sok y meng yaa: ‘Mam tẽeda Biiblã sẽn yet bũmb ning beoog-daarã wɛɛngẽ wã bɩ?’ Y sã n pa kɩs sɩd ne rẽ, y segd n zãmsa Biiblã bãngr-goam nins sẽn zoe n pidsã. Wãn to la y tõe n maan dẽ?

7. Mak-sõng-bʋg la a Dãniyɛll kõ bãngr-goamã zãmsg wɛɛngẽ? (Dãniyɛll 12:10) (Ges-y fotã me.)

⁷ A Dãniyɛll kõo mak-sõng bãngr-goamã zãmsg wɛɛngẽ. Yaa bʋʋm-tɩrg yĩng n kɩt t’a zãms bãngr-goamã. A ra rat n bãnga sɩdã. A Dãniyɛll ra yaa sik-m-meng soab me, n miẽ t’a Zeova sõngda neb nins sẽn mi-a la b tũud a noyã sẽn yaa tɩrsã, tɩ b wʋmd bãngr-goamã võore. (Dãn. 2:27, 28; karm-y Dãniyɛll 12:10.) A Dãniyɛll wilgame t’a yaa sik-m-meng soaba, n da teeg a Zeova t’a sõng-a. (Dãn. 2:18) A ra maagda a yĩng n zãmsdẽ me. A maana vaeesg Biiblã sɛb nins sẽn da be wakat kãngã pʋgẽ. (Zer. 25:11, 12; Dãn. 9:2) Wãn to la y tõe n dɩk a Dãniyɛll togs-n-taare?

8. Bõe yĩng tɩ neb kẽer pa rat n tẽ tɩ Biiblã bãngr-goam pidsdame, la bõe la d segd n maane?

⁸ Bao-y n bãng-y bũmb ning sẽn kɩt tɩ y zãmsd bãngr-goamã. Yaa y sẽn dat n bãng sɩdã ne y sũur fãa yĩng bɩ? Sã n yaa rẽ, a Zeova na n sõng-y lame. (Zã 4:23, 24; 14:16, 17) Bõe me n tõe n kɩt tɩ ned zãms bãngr-goamã? Neb kẽer zãmsda  bãngr-goamã sẽn na yɩl n paam bũmb n tik n wilg tɩ pa Wẽnnaam n vẽneg tɩ b gʋls Biiblã ye. B yetame tɩ Biiblã sã n pa yit Wẽnnaam nengẽ, rẽnd b tõe n yãkda sẽn yaa sõma la sẽn yaa wẽng b toore. La d segd n zãmsa bãngr-goamã bʋʋm-tɩrg yĩnga. Sẽn paase, sẽn na yɩl n wʋm bãngr-goam võore, d segd n bɩɩsa zʋg-sõng sẽn tar yõod wʋsgo.

9. D sã n dat n wʋm Biiblã bãngr-goam võore, yaa tɩlɛ tɩ d bɩɩs zʋg-sõng-bʋgo? Wilg-y y leoorã võore.

⁹ Tall-y sik-m-menga. A Zeova pʋlmame t’a na n sõnga sik-m-mens rãmbã. (Zak 4:6) Rẽnd sẽn na yɩl n wʋm Biiblã bãngr-goam võore, d segd n pʋʋs-a lame n kos sõngre. D segd n sak n deegame me tɩ yaa tɩlɛ tɩ d paam tʋm-tʋmd sẽn tũud sɩdã sõngre. Yaa yẽ la a Zeova tũnugd ne n kõt tõnd bũmb nins sẽn yaa tɩlɛ d tẽebã kengr yĩngã tɩ zemsd a wakate. (Luk 12:42) A Zeova pa zũnd-zãnd Wẽnnaam ye. Rẽnd d tõe n yeelame t’a sẽn tũnugd ne tʋm-tʋmd-kãng bal n sõngd tõnd tɩ d wʋmd sɩdã sẽn be a Gomdã pʋgẽ wã võorã zemsame.—1 Kor. 14:33; Efɛɛ. 4:4-6.

10. Yam-bʋg la y tõe n dɩk a Ɛstɛɛr kibarã pʋgẽ?

¹⁰ Maagd-y y yĩng n zãmsdẽ. Yãk-y bãngr-gomd y sẽn dat n wʋm a võore, n deng n maan vaeesg rẽ zugu. Yaa woto la saam-bi-poak yʋʋr sẽn boond t’a Ɛstɛɛr maan-yã. A ra rat n wʋma Biiblã bãngr-goam nins sẽn gomd Mesi wã waoong yellã võore. A yeelame: “Mam sẽn wa n tar yʋʋm 15 wã, mam sɩngame n baood kaset sẽn wilgd tɩ b sɩd gʋlsa bãngr-gom-kãens nand t’a Zeezi wa tẽngã zugu.” A karma sɛb sẽn gomd Mog-kɩɩngã seb-pĩndsã yelle, tɩ kɩt t’a bas a yam. A yeelame: “B gʋlsa seb-kãensã kẽer nand tɩ Kiristã wa tẽngã zugu. Dẽnd b bãngr-goamã segd n sɩd yita Wẽnnaam nengẽ.” A Ɛstɛɛr paasame: “Yɩɩ tɩlɛ tɩ m karem sɛb kẽer naoor wʋsg n yaool n wʋm b võore.” La a sũur nooma a sẽn modg woto wã. A sẽn maag a yĩng n zãms Biiblã bãngr-goam wʋsg poore, a yeelame: “M nee vẽeneg tɩ Biiblã goamã yaa sɩda!”

11. Bõe yĩng tɩ tar yõod tɩ d bao n bãng Biiblã goamã sã n yaa sɩda?

¹¹ D sã n yã Biiblã bãngr-goam kẽer sẽn zoe n pids to-to wã, d manegd n kɩsa a Zeova sɩda, la d bas d yam ne a sẽn wilgd-d sor to-to wã. Sẽn paase Biiblã bãngr-goam sõngd-d lame tɩ d kɩs sɩd tɩ beoog na n yɩɩ neere, baa d sã n segda zu-loees rũndã-rũndã. Bɩ d gom a Dãniyɛll bãngr-goam a yiib sẽn pidsd rũndã-rũndã yelle. D sã n wʋm bãngr-gom-kãens võore, tõe n sõng-d lame tɩ d bãngd n yãkd yam.

12. Naoã sẽn yaa ‘kut sẽn kalem ne yagdã’ makda bõe? (Dãniyɛll 2:41-43)

¹² Karm-y Dãniyɛll 2:41-43. Rĩm a Nebukadnezaar zãmsdã a Dãniyɛll sẽn bilg a võorã pʋgẽ, bõn-naandg ning rĩmã sẽn yã wã naoã yaa ‘kut sẽn kalem ne yagdo.’ D sã n mak bãngr-gom-kãng ne Dãniyɛll sebrã la Vẽnegr sebrã bãngr-goam a taaba, d tõe n yeelame tɩ naoã makda  Gãrãnd Bertayn ne Etazĩni sẽn naag taab n yaa dũni gill pãn-soaad rũndã-rũndã wã. A Dãniyɛll goma dũni gill pãn-soaad-kãng yelle, n yeel tɩ “rĩungã zĩis kẽer na n talla pãnga, tɩ zĩis sãnda pa tar pãng ye.” Bõe yĩng tɩ zĩis sãnda pa tar pãnga? Bala nin-buiidã b sẽn mak ne yagdã kɩtame t’a pa tõe n tʋm ne pãng wa kut ye. b

13. Bãngr-gom-kãngã sõnga tõnd tɩ d bãng bõe?

¹³ A Dãniyɛll sẽn bilg bõn-naandgã to-to wã, sẽn yɩɩd fãa, a sẽn bilg bõn-naandgã naoã to-to wã tõe n sõnga tõnd tɩ d bãng bũmb wʋsg sẽn tar yõodo. Pipi, Gãrãnd Bertayn ne Etazĩni sẽn naag taab n yaa dũni gill pãn-soaadã wilgame t’a tara pãnga. Wala makre, Gãrãnd Bertayn ne Etazĩni naaga tẽns nins sẽn tõog dũni gill pipi zabrã la yiib-n-soabã. La dũni gill pãn-soaad-kãng nin-buiidã sẽn wẽneg n zabd taab la b zabd ne goosneema wã booga a pãngã, n na n ket n boogd a pãngã. Yiibu, Gãrãnd Bertayn ne Etazĩni sẽn naag taab n yaa dũni gill pãn-soaadã n na n yɩ yaoolem pãn-soaad sẽn na n dɩ naam nand tɩ Wẽnnaam Rĩungã wa sãam ninsaalbã goosneema-rãmbã fãa. Baa ne tẽns a taab sẽn mi n zabd ne Gãrãnd Bertayn la Etazĩni wã, b pa na n tõog n ledg-b n lebg dũni gill pãn-soaad ye. D mii rẽ, bala “kugrã” sẽn makd Wẽnnaam Rĩungã na n wãa bõn-naandgã naoã sẽn makd Gãrãnd Bertayn la Etazĩni sẽn naag taabã.—Dãn. 2:34, 35, 44, 45.

14. D sã n wʋm bãngr-gomd ning sẽn gomd naoã sẽn maan ne kut la yagdã võore, wãn to la tõe n sõngd-d tɩ d bãngd n yãkd yam?

¹⁴ Yãmb kɩsa sɩd t’a Dãniyɛll bãngr-gomdã sẽn gomd naoã sẽn maan ne kut la yagd yellã pidsdame bɩ? Sã n yaa woto, y sẽn vɩ to-to wã segd n wilgda rẽ. Y pa na n baood arzɛgs wʋsg dũni-kãngã pʋgẽ, bala y miime tɩ ka la bilfu b na n sãam-a lame. (Luk 12:16-21; 1 Zã 2:15-17) Y sã n wʋm bãngr-gom-kãngã võore, na n sõng-y lame me tɩ y neẽ tɩ koɛɛgã moonegã la nebã zãmsgã tara yõod wʋsgo. (Mat. 6:33; 28:18-20) Y sã n zãms bãngr-gom-kãngã poor bɩ y sok y meng yaa: ‘Mam yam-yãkr toor-toorã wilgdame tɩ m kɩsa sɩd tɩ ka la bilfu, Wẽnnaam Rĩungã na n sãama ninsaalbã goosneema-rãmbã fãa bɩ?’

15. Rũndã-rũndã, ãnda n yaa “rɩtg rĩmã” la “goabg rĩmã”? (Dãniyɛll 11:40)

¹⁵ Karm-y Dãniyɛll 11:40. Dãniyɛll sak 11 wã pʋgẽ, b gomda rĩm-dãmb a yiib bɩ politik pãn-soaadb a yiib yelle, n wilg tɩ b zabda taab n dat n soog dũniyã. D sã n dɩk bãngr-gom-kãng n mak ne Biiblã bãngr-goam a taaba, d tõe n yeelame tɩ “rɩtg rĩmã” yaa Risi ne a poorẽ dãmbã, tɩ “goabg rĩmã” yaa Gãrãnd Bertayn ne Etazĩni sẽn naag taab n yaa dũni gill pãn-soaadã. c

16. Zu-loe-bʋs la d tẽed-n-taas nins sẽn be “rɩtg rĩmã” soolmẽ wã segda?

¹⁶ “Rɩtg rĩmã” namsda Wẽnnaam nin-buiidã sẽn be a soolmẽ wã b tũudmã yĩnga. B pãba a Zeova Kaset rãmb kẽere, n kẽes-b bãens roog b tũudmã yĩnga. “Rɩtg rĩmã” sẽn maand bũmb ninsã pa kẽesd d tẽed-n-taasã rabeem ye. Pʋd n paasda b tẽebã pãnga. Bõe yĩnga? Bala d tẽed-n-taasã miime tɩ b sẽn namsd Wẽnnaam nin-buiidã pidsda bãngr-goam  a Dãniyɛll sẽn togse. d (Dãn. 11:41) D sẽn mi rẽ wã tõe n sõnga tõnd tɩ d tẽebã pãng paase, la d kell n maan sɩd ne a Zeova.

17. Zu-loe-bʋs la Wẽnnaam nin-buiidã segd “goabg rĩmã” soolmẽ wã?

¹⁷ Pĩndã, “goabg rĩmã” me namsa a Zeova nin-buiidã b tũudmã yĩnga. Wala makre, yʋʋmd 1900 wã loogr poor bilfu, b kẽesa d tẽed-n-taas wʋsg bãens roogo, b sẽn zãgs tɩ b kõn kẽes b toog politikã yɛlẽ wã yĩnga. B leb n diga a Zeova Kaset rãmb kamb b lekol-dãmbẽ, b sẽn pa rat n kẽes b toog politikã yɛlẽ wã yĩnga. La yʋʋmã noorã, a Zeova Kaset rãmb nins sẽn be “goabg rĩmã” soolmẽ wã paamda makr buud toor-toor sẽn kɩtd tɩ yaa toog ne-b tɩ b kell n zĩnd Wẽnnaam Rĩungã poorẽ. Wala makre, naamã baoob sasa, kiris-ned tõe n wa rat n teela politik sull ninga, wall ned sẽn baood naamã. Baa ne a sẽn pa na n tɩ votã, a tõe n wa tagsdame tɩ politik sull ning sãoo a to. La d sã n pa rat n kẽes d toog  politikã yɛlẽ, d segd n gũusa ne d sẽn maand bũmb ninsã, la ne d tagsa wã me.—Zã 15:18, 19; 18:36.

18. D manesem yaa wãn ne rĩm-dãmb a yiibã sẽn zabd taabã? (Ges-y fotã me.)

¹⁸ Neb nins sẽn pa tẽed Biiblã bãngr-goamã sã n ne “rɩtg rĩmã” la “goabg rĩmã” sẽn ‘tãad taab wa rũmsã,’ b tõe n maanda yɩɩr wʋsgo. (Dãn. 11:40, notã.) Rĩm-kãensã a yiibã fãa tara zab-te-wẽns sẽn tõe n sãam bõn-vɩɩsã fãa gill sẽn be tẽngã zugã. La d miime t’a Zeova pa na n bas tɩ yɩ woto ye. (Eza. 45:18) Rẽ n so tɩ “rɩtg rĩmã” ne “goabg rĩmã” sẽn zabd taabã pa kẽesd tõnd rabeem ye. Pʋd n paasda d tẽebã pãnga. Wilgdame tɩ dũni-kãngã saabã ta n saame.

19. Bõe la d segd n sak n deeg Biiblã bãngr-goamã wɛɛngẽ?

¹⁹ D pa mi Biiblã bãngr-goam kẽer sẽn na n pids to-to ye. Baa no-rɛɛs a Dãniyɛll ra pa wʋmd bũmb nins fãa a sẽn gʋlsã võor ye. (Dãn. 12:8, 9) La d sã n pa wʋmd bãngr-gomd sẽn na n pids to-to wã võore, pa rat n yeel t’a pa na n pids ye. D tõe n kɩsa sɩd t’a Zeova na n vẽneg-d-la bũmb ning d sẽn segd n bãngã a wakat takɩ, wa a sẽn maan to-to pĩndã.—Amos 3:7.

20. Biiblã bãngr-gom-bʋs n na n pids ka la bilfu, la bõe la d segd n ket n maandẽ?

²⁰ Ka la bilfu, b na n yeelame tɩ “laafɩ la bãane!” (1 Tes. 5:3) Rẽ poore, dũniyã politikã pãn-soaadbã na n wẽneg n zaba ne ziri tũudmã, n menes-a. (Vẽn. 17:16, 17) Rẽ loogr poore, b na n zaba ne Wẽnnaam nin-buiidã. (Eze. 38:18, 19) Bõn-kãensã na n kɩtame tɩ Armagedõ sẽn yaa yaoolem zabrã sɩnge. (Vẽn. 16:14, 16) D tõe n kɩsa sɩd tɩ bõn-kãensã fãa na n maana ka la bilfu. La nananda, bɩ d ket n wilgd d saasẽ Ba wã sẽn nong-dã tɩ d sũur nooma ne a sẽn kɩt tɩ b gʋls bãngr-goamã, n baood n wʋmd b võor la d sõngd neb a taabã tɩ bãmb me wʋmd b võore.