1-2. Bõe yĩng tɩ d naagd n maand Tẽegrã yʋʋmd fãa?

 YAA sẽn kolg yʋʋm tus a yi la woto, a Zeezi sẽn kõ a vɩɩmã tɩ yɩ maoong tɩ d tõe n wa paam vɩɩm sẽn ka sɛtã. Yʋng ning b sẽn yõk a Zeezi wã, a talla bur la divẽ n maan bũmb maaneg sẽn pa toogo, la a yeel a karen-biisã tɩ b maand woto n tẽegd a kũumã yelle.—1 Kor. 11:23-26.

² Tõnd sakd n maanda a Zeezi sẽn yeel tɩ d maanã, bala d nong-a-la wʋsgo. (Zã 14:15) Yʋʋmd fãa, Tẽegrã daar sã n wa kolgdẽ, la Tẽegrã loogr poore, d pʋʋsda a Zeova la d bʋgsd a Zeezi kũumã sẽn nafd ãdem-biisã to-to wã zugu, n wilg tɩ d sũur nooma ne a Zeezi sẽn maan bũmb ning n kõ-dã. D wɩngda ne koɛɛgã moonego, n boond nebã sẽn na yɩl tɩ b wa naag-d n maan Tẽegrã sẽn tar yõod wʋsgã. Yaa vẽeneg me tɩ d yãka yam n pa na n bas tɩ bũmb baa fʋɩ gɩdg-d tɩ d pa naag n maan Tẽegrã ye.

3. Bõe yell la d na n gom sõs-kãngã pʋgẽ?

³ Sõs-kãngã pʋgẽ, d na n yãa bũmb a tãab a Zeova nin-buiidã sẽn modgd n maand a Zeezi kũumã tẽegrã sasa. 1) D maanda Tẽegrã tɩ zemsd ne a Zeezi sẽn yeel tɩ b maand to-to wã. 2) D boonda nebã sẽn na yɩl tɩ b wa naage, 3) d maanda d sẽn tõe fãa n na n naag n maane, baa pa nana ne-do.

4. Yʋʋmd fãa, Tẽegrã sõsg sasa bõe la d bãngda, la bõe yĩng tɩ d pa get rẽ wa reem yelle? (Luk 22:19, 20)

⁴ Yʋʋmd fãa, Tẽegrã sasa d kelgda sõsg sẽn tik Biiblã zugu, sẽn sõngd tõnd tɩ d paamd sogsg kẽer leoore. D  bãngda bũmb ning sẽn kɩt tɩ ra yaa tɩlɛ t’a Zeezi kõ a vɩɩmã tɩ yɩ maoong ãdem-biisã yĩngã, la ned a yembr kũum sẽn tõe n dol neb wʋsg yel-wẽnã võore. B tẽegda tõnd burã la divẽ wã sẽn makd bũmb ninsi, la neb nins sẽn tar sor n tõe n yũ la b wãb rẽ Tẽegrã sasa wã. (Karm-y Luk 22:19, 20.) D leb n tagsda bark nins sẽn saagd-b n na n wa vɩɩmd tẽngã zugã sẽn na n paamã yelle. (Eza. 35:5, 6; 65:17, 21-23) D pa segd n ges bõn-kãensã wa reem yell ye. Neb milyaar-dãmb n pa wʋmd rẽ võor ye. B pa mi a Zeezi sẽn ki tɩ yɩ maoongã yõod sẽn ta zĩig ning ye. B leb n pa maand a Zeezi kũumã tẽegrã wa a sẽn yeel a karem-biisã tɩ b maand to-to wã ye. Bõe yĩng tɩ yaa woto?

5. A Zeezi tẽn-tʋmdbã fãa la bal kũum poore, neb kẽer sɩngame n maand a Zeezi kũumã tẽegr wãn to?

⁵ A Zeezi tẽn-tʋmdbã fãa la bal kũum poore, tigingã neb kẽer n lebg sɩdã kɩɩsdba. (Mat. 13:24-27, 37-39) B ra zãmsda nebã “zãms-golemse, n dat tɩ karen-biisã lak n pʋg bãmba.” (Tʋʋ. 20:29, 30) Wala makre, b ra yetame tɩ Kiristã pa kõ a meng vugr wakat fãa yĩng sẽn na yɩl n tʋk neb wʋsg yel-wẽnã, wa Biiblã sẽn yetã ye. B ra yetame me tɩ Kiristã segd n kõo a vɩɩmã n yɩlem naoor wʋsgo. (Ebre. 9:27, 28) Rũndã-rũndã, neb kẽer tẽeda zãmsg a woto sẽn yaa ziri wã. B kẽnda wẽn-dotẽ semen fãa, wakat ninga daar fãa, n deegd kominiyõ b sẽn boond tɩ Kiristã yĩngã, n yet tɩ b maanda a Zeezi Kirist kũumã tẽegre. b Tũudum kẽer yẽ pa maand a Zeezi kũumã tẽegr semen fãa wall daar fãa ye. La b pa wʋmd a Zeezi sẽn ki tɩ yɩ maoongã võor sõma ye. Neb kẽer sokda b mens yaa: ‘A Zeezi kũumã sɩd tõe n kɩtame tɩ m paam m yel-wẽnã sugr sɩda?’ Bõe yĩng tɩ b sokd b mens woto? Bala b tẽeda neb nins sẽn yet t’a Zeezi kũumã pa tõe n kɩt tɩ d paam d yel-wẽnã sugrã. Kiris-neb hakɩɩkã sõngda nebã tɩ b bãngd a Zeezi sẽn ki tɩ yɩ maoongã võore, la b sẽn segd n maan a kũumã tẽegrã to-to.

6. Yʋʋmd 1872, neb sull sẽn da zãmsd Biiblã bãnga bõe?

⁶ Yʋʋmd 1872, neb sull n naag taab n sɩng Biiblã zãmsgo, tɩ b taoor lʋɩtã ra yaa a Charles Taze Russell. B baoome n na n bãng a Zeezi sẽn ki tɩ yɩ maoongã yõod sẽn ta zĩig ninga, la d sẽn segd n maand a kũumã tẽegr to-to. Yʋʋmd 1872, rẽ tɩ b zãmsa Biiblã n bãng t’a Zeezi sẽn kõ a vɩɩmã tɩ yɩ maoongã yaa ninsaalbã fãa yĩnga. B pa solg bũmb nins b sẽn bãngã sẽn na yɩl tɩ nebã ra bãng ye. B pʋd n yiisa b sẽn bãng bũmb ninsã sɛb toor-toor pʋsẽ, sẽn na yɩl n sõng nebã tɩ b bãng rẽ. Tao-tao bala, b sɩngame n maand Kiristã kũumã tẽegr vugr yʋʋmd fãa, wa pipi kiris-nebã sẽn da maandã.

7. Wãn to la a Charles Russell ne a poorẽ dãmbã sẽn maan vaeesg Biiblã pʋgẽ n bãng bũmb ninsã nafd tõnd rũndã-rũndã?

⁷ Rũndã-rũndã, d rɩta nin-kãensã sẽn dɩk yʋʋm wʋsg n vaees Biiblã n bãng bũmb ninsã yõodo. Wãn to? Ne a Zeova sõngre, d bãnga sɩdã a Zeezi sẽn ki tɩ yɩ maoongã wɛɛngẽ, la rẽ sẽn na n naf ãdem-biisã to-to wã. (1 Zã 2:1, 2) D bãngame me tɩ Biiblã wilgame tɩ neb kẽer n na n tɩ vɩɩmd saasẽ n pa tõe n le ki, la tɩ neb milyõ-rãmb me n na n wa paam  n vɩɩmd tẽngã zug wakat sẽn kõn sa. D sẽn mi t’a Zeova nonga tõnd wʋsgo, la d mi a Zeezi kũumã sẽn yɩ maoongã sẽn nafd tõnd to-to wã kɩtame tɩ d maneg n nong a Zeova. (1 Pɩy. 3:18; 1 Zã 4:9) Tõnd me maanda wa a Charles Russell ne a poorẽ dãmbã, n boond nebã tɩ b wat n naagd tõnd n maand a Zeezi kũumã tẽegrã, tɩ zemsd ne a Zeezi sẽn dat tɩ d maand rẽ to-to wã.

8. Bõe la a Zeova nin-buiidã maan-yã, sẽn na yɩl n bool nebã tɩ b wa naag n maan a Zeezi kũumã tẽegre? (Ges-y fotã.)

⁸ A Zeova nin-buiidã sẽn sɩng n boond neb a taabã tɩ b naagd-b n maand Tẽegrã pa rũndã ye. Yʋʋmd 1881 sɩngrẽ, b yiisa koees Gũusg Gasgã pʋgẽ n yeel tɩ saam-biisã la saam-bi-pogsã sẽn be Etazĩni wã tigim taab saam-biig a ye zakẽ Alezeni sẽn be Pensilvani wã, n maan a Zeezi kũumã tẽegre. Rẽ poore, b wa n kɩtame tɩ tiging fãa neb tigimd taab n maand Tẽegrã. Yʋʋmd 1940 tʋʋlg kiuugã, b yeela koe-moondbã tɩ b tõe n boola ned ning fãa sẽn dat t’a wa naag n maan Tẽegrã. Yʋʋmd 1960, Betɛllã sɩngame n yiisd sɛb n kõt tigimsã, sẽn na yɩl tɩ b tall n bool nebã tɩ b wa Tẽegrã. Rẽ tɛk n tãag masã, sɛb milyaar-dãmb la d pʋɩ n bool nebã. Bõe yĩng tɩ d maand d sẽn tõe fãa n boond nebã sẽn na yɩl tɩ wa Tẽegrã?

9-10. D sẽn modgd n boond nebã sẽn na yɩl tɩ b wa Tẽegrã, ãnd dãmb me la rẽ nafda? (Zã 3:16)

⁹ Bũmb a to me n kɩt tɩ d boond nebã tɩ b wat n naagd n maand a Zeezi kũumã tẽegrã. Yaa sẽn na yɩl n sõng-b tɩ b bãng bũmb ning a Zeova ne a Zeezi sẽn maan kõ-d fãa wã. (Karm-y Zã 3:16) D  saagdame tɩ bũmb ning b sẽn na n wʋm la b yã Tẽegrã sasa wã na n kɩtame tɩ b rat n bãng bũmb a taab n paas a Zeova zugu, la b wa lebg a Kaset rãmba. La neb a taab me la Tẽegrã nafda.

¹⁰ D boonda neb nins me sẽn pa le wat tigissã, tɩ b naagd n maand Tẽegrã. Yaa sẽn na yɩl n tẽeg-b tɩ Wẽnnaam ket n nong-b lame. Wʋsg sakd n wata Tẽegrã, tɩ d sã n yã-ba, bɩ d sũur noom wʋsgo. B sã n wa, b tẽegda b sẽn da tũud a Zeova to-to pĩndã, hal tɩ b sũur noomẽ. Yɩɩ woto ne saam-bi-poak a ye yʋʋr sẽn boond t’a Monik. c Yɩɩ koronaviriisã bã-longdgã sasa la a lebg n sɩng koɛɛgã moonego. A naagame n maan yʋʋmd 2021 Tẽegrã. Rẽ poore, a yeelame yaa: “Tẽegrã sɩd yɩɩ toor zall ne maam. M paam n moona nebã, n bool-b sẽn na yɩl tɩ b wa Tẽegrã. M sẽn da maan woto daar taa yʋʋm 20. M maana m sẽn tõe fãa n bool nebã sẽn na yɩl tɩ b wa Tẽegrã, bala m sũur nooma wʋsgo, a Zeova ne a Zeezi sẽn maan bũmb ning n kõ maamã yĩnga.” (Yɩɩn. 103:1-4) Nebã sakd n wata Tẽegrã tɩ b pa wat me, d ket n boond-b lame n miẽ t’a Zeova sũur noma ne d modgrã.

11. D sẽn modgd n boond nebã tɩ b wat Tẽegrã, wãn to la a Zeova ningd d modgrã barka? (Aaze 2:7)

¹¹ D sẽn modgd n boond nebã sẽn na yɩl tɩ b wa tẽegrã, a Zeova ningda barka. Yʋʋmd 2021 wã, baa ne bã-longdgã sẽn kɩt tɩ d ra pa tõe n tigim taabã, sẽn ta neb milyõ 21 la neb tus kobs 367 le neb 603 n naag n maan Tẽegrã. Sõorã yɩɩda a Zeova Kaset rãmbã fãa sõor naoor a yiibu. La pa sõorã la a Zeova get ye. Yaa d ned kam fãa modgrã la a geta. (Luk 15:7; 1 Tɩm. 2:3, 4) D tõe n basa d yam tɩ d sẽn modgd n boond nebã tɩ b wat Tẽegrã, a Zeova tũnugda ne rẽ n sõngd tõnd tɩ d paamd sũ-tɩrs rãmbã.—Karm-y Aaze 2:7.

12. Boẽ n tõe kɩt tɩ yɩ toog tɩ d naag n maan Tẽegrã? (Ges-y fotã.)

¹² A Zeezi pĩnd n togsame tɩ yaoolem wakatã, d na n maoo ne zu-loees buud toor-toore. Wala makre, tɩ d zakã rãmb wall neb a taab na n namsa tõnd d tũudmã yĩnga, tɩ zaba, bã-longds la yɛl a taab na n zĩndame. (Mat. 10:36; Mark 13:9; Luk 21:10, 11) Yel-kãensã mi n kɩtame tɩ yɩl n naag n maan a Zeezi kũumã tẽegr pa nana ye. Bõe la d tẽed-n-taas kẽer maan n tõog n mao ne zu-loe-kãensã, la bõe la a Zeova maan n sõng-ba?

13. Wãn to la a Zeova ning a Artem barka, a sẽn modg n maan Tẽegrã baa ne a sẽn da be bãens roogã?

¹³ Bãens roogo. D tẽed-n-taas nins b sẽn kẽes bãens roog b tũudmã yĩngã maanda b sẽn tõe fãa n maand a Zeezi kũumã tẽegrã. D gom saam-biig a ye yʋʋr sẽn boond t’a Artem yelle. Yʋʋmd 2020 Tẽegrã sẽn wa n ket tɩ semenne, b pag-a-la bãens roog sẽn yaa sẽk wʋsg pʋgẽ. B ra yaa hal bãmb b nu n be ro-sẽkã pʋgẽ. Baa ne a sẽn da be bãens roogã, a tõog n paama bũmb n dɩk n mams wa bur la divẽ Tẽegrã sasa. A segla a meng n na n wɛgs sõsgã a mengã yĩnga. La a sẽn da be ne neb nins roogã pʋgẽ wã ra yũuda sɩgaare, la b gomd gom-põaasa. Bõe la a maan-yã? A kos-b lame n ges b sã n tõe n basa sɩgaarã yũub la gom-põaasã lɛɛr a yembr  pʋgẽ bala. La b sakame n pa na n yũ sɩgaar la b gom gom-põaasa, a sã n wa wɛgsd sõsgã. Woto linga a Artem. Ad a sẽn yeele: “Mam yãka yam n na n gom Tẽegrã yell ne-ba.” Baa b sẽn yeel tɩ b pa na n kelg sõsgã, b sẽn yã a Artem sẽn maag a yĩng n maand Tẽegrã, la b sẽn da wʋmd a sẽn da yet bũmb ninsã kɩtame tɩ b sok-a sogsg wʋsg rẽ poore.

14. Baa ne koronaviriisã bã-longdgã, a Zeova nin-buiidã maana wãn n tõog n maan Tẽegrã?

¹⁴ Koronaviriisã bã-longdgã. A sẽn wa n sɩngã, a Zeova nin-buiidã ra pa le tõe n tigimd taab n maand Tẽegrã ye. La woto pa kɩt tɩ b pa tõog n maan Tẽegrã ye. d Tigims nins sẽn da tar ẽntɛrnetã maana Tẽegrã ne videokõnferãns maasem. La d tẽed-n-taas milyõ-rãmb sẽn da pa tar ẽntɛrnetã yẽ maana wãna? Tẽns kẽer pʋsẽ, b yiisa Tẽegrã sõsgã teleẽ wã wall radio wã pʋgẽ. Sẽn paase, filiyal-dãmbã gesame tɩ b lebg Tẽegrã sõsgã buud-goam kobs-nu la zaka, sẽn na yɩl tɩ sẽn be-b zĩ-zãrgẽ wã paam n kelge. Saam-biis  a taab me sõngame tɩ sõssã ta neb nins sẽn da pa tõe n paamã.

15. A Suzan kibarã wilgda yãmb bõe?

¹⁵ D zakã neb sã n namsd tõnd d tũudmã yĩnga. Ne neb kẽere, yaa b zakã rãmb sẽn namsd-b b tũudmã yĩngã n kɩt tɩ yaa toog ne-b tɩ b naag n maan Tẽegrã. Yɩɩ woto ne Biibl karen-biig a ye yʋʋr sẽn boond t’a Suzan. Yʋʋmd 2021 Tẽegrã ket tɩ beoogo, a yeela a Biibl karen-saambã t’a zakã rãmb sẽn namsd-a a tũudmã yĩngã, a pa na n tõog n wa Tẽegrã ye. A Biibl karen-saambã karma Luk 22:44. Rẽ poore, a maaga a yĩng n sõng-a t’a bãng tɩ d sã n wa maood ne zu-loeese, d segd n dɩka a Zeezi togs-n-taar n pʋʋs a Zeova n bas yɛlã ne-a, la d kɩs-a sɩd zãng-zãnga. Vẽkembeoogã sẽn yɩ Tẽegrã daarã, a Suzan baoo bur ne divẽ, la a ges daarã vɛrse b sẽn wɛgs n ning jw.org pʋgẽ wã. Daar-n-kãng zaabre, a kẽe a ro-gãagẽ wã n konɛkt ne telefõn n naag n maan Tẽegrã. Rẽ poore, a gʋlsa a Biibl karen-saambã mesaaz n yeel yaa: “Fo kenga m raood wʋsg zaamẽ. M maana m sẽn tõe fãa sẽn na yɩl n naag n maan Tẽegrã, la a Zeova sõng-m lame. M ka noor n pʋʋsd bark ye.” Yãmb sã n maooda ne yell a woto buudu, y pa tagsd t’a Zeova tõe n sõnga yãmb me sɩda?

16. D sã n modg n naag n maan Tẽegrã, bõe yĩng tɩ d tõe n kɩs sɩd t’a Zeova na n ninga d modgrã barka? (Rom dãmbã 8:31, 32)

¹⁶ D sẽn modgd n naagd n maand a Zeezi kũumã tẽegrã, a Zeova sũur nooma wʋsgo. D tõe n basa d yam t’a na n ning-d-la barka, d sã n wilg tɩ d sũur nooma ne bũmb ning a sẽn maan n kõ-dã. (Karm-y Rom dãmb 8:31, 32.) Bɩ d maan d sẽn tõe fãa n naag n maan Tẽegrã sẽn watã, la d modg me n maan bũmb wʋsg a Zeova yĩnga, Tẽegrã sã n wa kolgdẽ, la Tẽegrã loogr poore.