1. Rũndã-rũndã, bõe yĩng tɩ neb wʋsg pa kɩs Biiblã sɩda?

 RŨNDÃ-RŨNDÃ, neb wʋsg namsda pʋ-peelem sẽn pa le be wã yĩnga. B pa mi b sẽn tõe n kɩs a soab sɩd ye. B sokda b mens neb nins b sẽn nandã sã n sɩd rata b neere. Wala makre, politikã taoor dãmba, siãnsã bãngdb la rakãag-rãmbã. Sẽn paase, b pa nand tũudum taoor dãmb nins sẽn yet tɩ b yaa kiris-nebã ye. Rẽ n so tɩ b pa nand Biiblã sẽn yaa sebr ning nin-kãens sẽn yet tɩ b tũuda a goamã ye.

2. Sã n yaa ne Yɩɩn-sõamyã 119:160, d tõe n kɩsa sɩd ne bõe?

² Tõnd sẽn yaa a Zeova Kaset rãmbã, d kɩsa sɩd t’a yaa ‘sɩdã Wẽnnaam’ la t’a rata d neer wakat fãa. (Yɩɩn. 31:6; Eza. 48:17) D miime tɩ d tõe n basa d yam ne bũmb nins d sẽn karemd Biiblã pʋgẽ wã. D kɩsa sɩd tɩ Wẽnnaam “gomdã halhaalã yaa sɩda.” b (Yɩɩn. 119:160, MN) D saka Biibl-mit a ye sẽn yeel bũmb ningã. A yeelame: “Ziri baa bilf pa be bũmb Wẽnnaam sẽn yeel pʋgẽ ye. A sẽn yeel fãa pa tõe n pa pids ye. Wẽn-tũudbã tõe n kɩsa sɩd ne bũmb a sẽn yeele, bala b kɩsa Wẽnnaam ning sẽn togs bõn-kãngã sɩda.”

3. Bõe yell la d na n gom sõs-kãngã pʋgẽ?

³ Wãn to la d tõe n sõng neb a taabã tɩ b kɩs sɩd ne Wẽnnaam Gomdã wa tõndo? Bɩ d gom bũmb a tãab sẽn kɩt tɩ d tõe n kɩs Biiblã sɩdã yelle. Yaa a goamã sẽn yaa takɩ wã, a bãngr-goamã sẽn pidsdã, la a sẽn tõe n toeem ned vɩɩmã.

4. Bõe yĩng tɩ neb kẽer maand sãmbs ne Biiblã goamã?

⁴ Wẽnnaam a Zeova vẽnega na maan rap pis-naas sẽn  yaa wẽn-sakdb tɩ b gʋls Biiblã sɛba. La nin-kãens sẽn gʋls sɛb nins pipi wã baa a ye pa le be ye. Biiblã sɛb nins sẽn gʋls ne nus tɩ be rũndã-rũndã wã yaa nin-kãens sẽn gʋlsã la neb ges n lebs n gʋls n yɩlme. Rẽ kɩtame tɩ neb kẽer maand sãmbse, n sokd b mens bũmb nins sẽn be Biiblã pʋgẽ rũndã-rũndã wã sã n sɩd zemsa ne b sẽn gʋls sɩngrẽ wã. Yãmb zoe n soka y meng bũmb ning sẽn kɩt tɩ y tõe n kɩs sɩd ne Biiblã sẽn yetã bɩ?

5. Wãn to la sẽn da get-b Biiblã sɛb nins sẽn da gʋls ne Ebre wã n lebsd n gʋlsdẽ wã ra tʋmda? (Ges-y sebrã pipi neng fotã.)

⁵ Sẽn na yɩl tɩ Biiblã goamã ra meneme, a Zeova yeela a nebã tɩ b ges-a n lebs n gʋlse. A yeela Israyɛll rĩm-dãmbã tɩ b ned kam fãa ges Tõogã sebr n lebs n gʋls a meng yĩnga, la a yãk Levi buudã neb tɩ b zãms nin-buiidã Tõogã. (Tõo. 17:18; 31:24-26; Nee. 8:7) Zʋɩf-rãmbã sẽn yi yembd Babilon n lebg n wa wã poore, neb tʋʋm sẽn yaa ges sɛb n lebs n gʋls n ges Biiblã sɛb nins sẽn da gʋls ne Ebre wã, n lebs n gʋls bãmb wʋsgo. (Ɛsd. 7:6, MN, notã) Nin-kãensã ra maanda gũusg b tʋʋmdã pʋgẽ. Kaoosg zugẽ, gʋlsdbã wa n sõta gom-biisã, la hal baa gʋls-biisã menga, sẽn na yɩl n kɩs sɩd tɩ b gʋlsa fãa kɛpɩ. Baa ne rẽ, b sẽn yaa neb sẽn pa zems zãngã yĩnga, b tudga yel-bõones pʋgẽ. La b sẽn ges n gʋls sɛb wʋsgã yĩnga, Biibl-mitbã wa n tõog n bãnga zĩis nins b sẽn tudgã. Wãn to?

6. B maana wãn n bãng zĩis nins sẽn da get-b Biiblã sɛb n lebsd n gʋlsdẽ wã sẽn tudgã?

⁶ Rũndã-rũndã, Biibl-mitbã tara b sẽn tõe n maan to-to, n bãng sẽn ges-b Biiblã sɛb n lebs n gʋlsã sẽn tudg zĩis ninsã. D rɩk makr ne b sẽn na n yãk neb koabg tɩ b ges seb-yɛng n lebs n gʋlse. B nin-yɛng gʋlsame n tudg zĩig ninga. Bũmb a ye d sẽn tõe n maan n bãng zĩig ning a sẽn tudgã, yaa d sẽn na n dɩk a sẽn gʋlsã n mak ne a taabã sẽn gʋlsã. Woto me, Biibl-mitbã sẽn dɩk Biiblã sɛbã sẽn da gʋls ne nusã n mak ne taabã, b bãnga zĩis nins seb-gʋlsdbã sẽn tudgã.

7. Bõe n wilgd tɩ sẽn da get-b Biiblã sɛb n lebsd n gʋlsdẽ wã maana gũusg wʋsgo?

⁷ Neb nins sẽn da get Biiblã sɛb n lebsd n gʋlsdẽ wã modga wʋsgo, sẽn na yɩl n gʋls-a t’a zems kɛpɩ. Ad makr sẽn wilgd rẽ. Biiblã babg ning b sẽn da gʋls ne Ebre wã sebr ning d sẽn da tar tɩ yaa kʋdr n yɩɩd yaa Leningrad kodɛgsã. B gʋls-a-la yʋʋmd 1008 wall 1009 wã. Sẽn nan pa kaoose, b yãa Biiblã sɛb tõr wall a babs kẽer b sẽn da gʋls ne nusi. Yaa sɛb b sẽn gʋls na maan yʋʋm tusr sẽn deng Leningrad kodɛgsã. Neb kẽer tõe n tagsdame tɩ b sẽn ges seb-kãens n lebs n gʋls naoor wʋsg yʋʋm tusr pʋgẽ wã, bũmb ning sẽn be Leningrad kodɛgsã pʋgẽ wã na n yɩɩ toor wʋsg ne seb-kʋd-kãense. La pa woto ye. Biibl-mitbã sẽn dɩk Biiblã seb-kʋd nins b sẽn yã wã n mak ne b sẽn da tar a soabã, b mikame tɩ gom-biis kẽer bal n toeem bilfu, la tɩ Biiblã goamã võor meng pa toeem ye.

8. D sã n dɩk Biiblã babg ning b sẽn da gʋls ne Gɛrkã sɛb nins b sẽn gʋls ne nusã n mak ne sɛb a taabã b sẽn gʋls pĩnd wẽndẽ wã, bõe la d tõe n yeele?

⁸ Pipi kiris-nebã me rɩka neb nins sẽn da get Biiblã babg ning b sẽn da gʋls ne Ebre wã n lebsd n gʋlsdẽ wã togs-n-taare. B ra geta Biiblã babg ning b sẽn da gʋls ne Gɛrkã sɛb 27 wã, n maagd b yĩng n lebsd n gʋlsdẽ. Yaa rẽ la b ra karemd b tigissã sasa, la b tar n moond koɛɛgã. Biibl-mit a yembr rɩka Biiblã babg ning b sẽn da gʋls  ne Gɛrkã sɛb nins b sẽn gʋls ne nusã sẽn be rũndã-rũndã wã, n mak ne sɛb a taab b sẽn gʋls pipi kiris-nebã wakatẽ wã, n yeel tɩ “Biiblã babg ning b sẽn da gʋls ne Gɛrkã sɛb nins b sẽn gʋls ne nusã sõor yɩɩda sɛb a taabã.” A paasame tɩ “seb-kãens fãa la bal yaa b tõrã.” Sebr a yembr (Anatomy of the New Testament) yeelame tɩ “d sã n karemd Biiblã sɛb nins b sẽn da gʋls ne Gɛrkã b sẽn lebg tɩ yaa sõma wã, d tõe n kɩsa sɩd tɩ d sẽn karemd bũmb ningã zemsa ne gʋlsdbã sẽn yeelã.”

9. Sã n yaa ne Ezayi 40:8 wã, bõe la d tõe n yeel Biiblã koɛɛgã wɛɛngẽ?

⁹ Yʋʋm kobs pʋsẽ, neb wʋsg n maag b yĩng n ges Biiblã sɛbã n lebs n gʋlse. Rẽ n so tɩ rũndã-rũndã, d tõe n paam Biibl sẽn zems kɛpɩ n karme. c D miime tɩ yaa a Zeova n kogl koɛɛg ning a sẽn taas nin-buiidã t’a ra toeem ye. (Karm-y Ezayi 40:8.) La neb kẽer tõe n yeelame tɩ b sẽn kogl Biiblã goamã t’a pa toeemã pa sek d na yeel tɩ yaa Wẽnnaam n vẽneg tɩ b gʋls-a ye. Bɩ d ges kaset a wãn sẽn wilgd tɩ Biiblã yaa Wẽnnaam n vẽneg tɩ b gʋlse.

10. Togs-y bãngr-gomd sẽn pidsi, tɩ wilgdẽ tɩ 2 Pɩyɛɛr 1:21 goamã yaa sɩda. (Ges-y fot-rãmbã.)

¹⁰ Biiblã tara bãngr-goam wʋsg sẽn pidsi. Kẽer pidsa yʋʋm kobs b sẽn togs-bã poore. Kʋdemdã yɛl wilgdame tɩ bãngr-gom-kãens sɩd pidsame. Rẽ pa ling tõnd ye. Bala d miime tɩ yaa a Zeova n togs Biiblã bãngr-goamã. (Karm-y 2 Pɩyɛɛr 1:21.) D gom bãngr-gomd ning sẽn gomd pĩnd wẽndẽ Babilon sãoongã yelle. Yʋʋm kobs-yopoe la zak sẽn deng a Zeezi rogmã, Wẽnnaam vẽnega no-rɛɛs a Ezayi t’a pĩnd n togs tɩ b na n deega Babilon tẽngã sẽn da tar pãng wakat kãngã. A togsame tɩ ned ning sẽn na n deeg tẽngã yʋʋr la a Sirus. A leb n wilga b sẽn na n maan to-to n deeg tẽngã vẽenega. (Eza. 44:27–45:2) Sẽn paase, a Ezayi togsame tɩ Babilon na n  wa sãama zãnga, n lebg raboogo. (Eza. 13:19, 20) Yɩɩ woto bal kɛpɩ. Meed-rãmbã ne Pɛrs-rãmbã tõoga Babilon yʋʋmd 539 sẽn deng a Zeezi rogmã. Rũndã-rũndã, Babilon sẽn da yaa tẽn-kãsengã lebga raboogo.—Ges-y Vɩɩmd-y wakat sẽn kõn sa! sebrã sak a 3, nimero a 5 wã video ning gom-zug sẽn yaa: Biiblã ra pĩnd n togsa Babilon sãoongã.

11. Wilg-y Dãniyɛll 2:41-43 goamã sẽn pidsd to-to rũndã-rũndã.

¹¹ Pa pĩnd wẽndẽ wã bal la Biiblã bãngr-goam pids ye. D nee bãngr-goam sẽn pidsd rũndã-rũndã me. D ges a Dãniyɛll sẽn pĩnd n togs bũmb ning Gãrãnd Bertayn ne Etazĩni sẽn naag taab n yaa dũni gill pãn-soaadã wɛɛngẽ wã sẽn pidsd to-to. (Karm-y Dãniyɛll 2:41-43.) Bãngr-gomdã wilgame tɩ dũni gill pãn-soaad-kãngã sẽn yaa tẽns a yiibã pʋɩ-sʋk na n ‘talla pãng’ wa kutu, tɩ pʋɩ-sʋk a to wã yɩ wa yagdo, n ‘pa tar pãng’ ye. Rũndã-rũndã, d neeme tɩ sɩd yaa woto. Gãrãnd Bertayn ne Etazĩni wilgame tɩ b tara pãng wa kutu, bala b tõoga dũni gill zab a yiibã, la b ket n tar pãng wʋsg sodaarã wɛɛngẽ. La b nin-buiidã sẽn lugl sigls sẽn maood ninsaalbã dʋrwa-rãmb yĩnga, tʋm-tʋmdbã sõngr la tẽnsã soog-m-meng yĩngã kɩtame tɩ b pãngã booge. Sẽn nan pa kaoose, politikã yel-mit a yembr yeelame: “Dũniyã gill zugu, tẽns nins sẽn yidg la sẽn basd b nin-buiidã tɩ b yãkd b nanambsã sʋka, tẽng kae t’a nin-buiidã kɩɩsd taab politikã wɛɛngẽ n ta Etazĩni nin-buiidã ye.” Sã n yaa ne Gãrãnd Bertayn sẽn naag n yaa dũni gill pãn-soaadã, yʋʋma noorã, nebã kɩɩsda taab wʋsg manesem ning b tẽngã sẽn segd n tall ne Iniyõ eropeyɛnnã tẽnsã wɛɛngẽ. Kɩɩs-taabã kɩtame tɩ yaa toog tɩ Gãrãnd Bertayn ne Etazĩni sẽn naag taab n yaa dũni gill pãn-soaadã maan b sẽn date.

12. Biiblã bãngr-goamã kɩtame tɩ d kɩs sɩd ne bõe?

¹² Biiblã bãngr-goam wʋsg sẽn zoe n pidsã kɩtame tɩ d bas d yam tɩ bũmb nins Wẽnnaam sẽn pʋlem tɩ watame wã na n pidsame. D tagsg yaa wa yɩɩn-gʋlsdã. A pʋʋsa a Zeova n yeel yaa: “Mam namsdame n baood yãmb fãagrã, la mam gũuda yãmb goamã ne tẽebo.” (Yɩɩn. 119:81) Ne Biiblã maasem, a Zeova pʋlma tõnd tɩ d ‘beoog vɩɩmã na n yɩɩ neere, la tɩ d na n paama tẽeb pidsgu.’ (Zer. 29:11) D pa teeg ninsaal n saagdẽ tɩ beoog na n yɩɩ neer ye. Yaa a Zeova pʋlemsã n kɩt tɩ d tẽed rẽ. Bɩ d kell n wɩng ne Biiblã bãngr-goamã zãmsgo, n maneg n kɩs sɩd ne Wẽnnaam Gomdã.

13. Sã n yaa ne Yɩɩn-sõamyã 119:66, 138 sẽn yetã, bõe n wilgd tɩ d tõe n kɩsa sɩd ne Biiblã?

¹³ Bũmb a to sẽn kɩt tɩ d tõe n kɩs sɩd ne Biiblã, yaa tɩ neb nins sẽn tũud a saglsã nafda wʋsgo. (Karm-y Yɩɩn-sõamyã 119:66, 138.) Wala makre, pagb ne b sɩdb n da pa zemsd taaba, hal n da rat n kao b kãadmã. La masã, b zemsda taab n tar sũ-noogo, b sẽn tũud Biiblã saglsã yĩnga. B kambã me sũy noomame, b sẽn paam tɩ b roagdbã yaa kiris-neba, n get b yell sõma la b nong-bã.—Efɛ. 5:22-29.

14. Togs-y kibar sẽn wilgd tɩ ned sã n tũud Biiblã saglse, tõe n toeem-a lame t’a lebg nin-sõngo.

¹⁴ Baa neb sẽn da yaa bi-be-kãas tũu Biiblã saglsã tɩ sõng-b tɩ b toeem fasɩ. D ges Biiblã saglsã sẽn sõng rao a ye sẽn da be bãens roogẽ t’a yʋʋr boondẽ t’a Zak. d A ra yaa bi-be-maasre, tɩ nebã ra getẽ tɩ  neb nins b sẽn kao bʋʋd n yeel tɩ b segda ne kũumã sʋka, yẽ wẽnem n yɩɩda. La daar a yembre, a Zak tɩ zĩndame n kelg neb sẽn da zãmsd Biiblã. Saam-biis nins sẽn lʋɩ taoor zãmsgã sasa wã manesmã sẽn da yaa sõma wã yɩ-a-la noog wʋsgo, tɩ yẽ me sak n na n zãms Biiblã. A sẽn da tũud Biiblã saglsã kɩtame t’a vɩɩmã la a manesmã toeem bilf-bilf n wa lebg sõma. A Zak wa n paama sor n lebg koe-moond sẽn nan pa reeg lisgu, la a wa reeg lisgu. A moona neb nins sẽn da be bãensã roogẽ ne-a wã Wẽnnaam Rĩungã koɛɛgã ne yẽesem, la a sõng sẽn ta neb a naas tɩ b bãng sɩdã. A Zak kʋʋbã daar sẽn ta wã t’a toeema fasɩ. A avoka a yembr yeelame yaa: “A Zak pa le yaa ned ning m sẽn bãng na maan yʋʋm pisi masã wã ye. A Zeova Kaset rãmbã zãmsgã toeema a vɩɩmã.” Baa b sẽn kʋ a Zakã, a kibarã wilgda vẽeneg tɩ d tõe n kɩsa sɩd ne Wẽnnaam Gomdã, la t’a tara pãng n tõe n toeem ned t’a lebg nin-sõngo.—Eza. 11:6-9.

15. Wãn to la a Zeova Kaset rãmbã sẽn tũud Biiblã saglsã kɩt tɩ b yaa toor ne neb a taabã? (Ges-y fotã.)

¹⁵ A Zeova nin-buiidã zemsda taaba, b sẽn tũud Biiblã saglsã yĩnga. (Zã 13:35; 1 Kor. 1:10) Laafɩ la zems-n-taar sẽn be d sʋkã yaa bõn-kãsenga, bala dũniyã neb welsa taab poliltikã wɛɛngẽ, la b buudã ne b tarmã sẽn yaa toor-toorã yĩnga. Bi-bɩɩg a ye yʋʋr sẽn boond t’a Zã gũus n gesa a Zeova nin-buiidã sẽn zemsd taab to-to wã, hal tɩ yɩ-a noogo. A roga Afirik tẽng a ye pʋgẽ. Zabr n wa n yik tẽngẽ wã t’a tɩ kẽ sodaare, la kaoosg zugẽ, a zoe n kẽnga tẽn-yak a ye pʋgẽ. Be, a sõsa ne a Zeova Kaset rãmbã. A Zã yeelame: “Mam bãngame tɩ tũudum hakɩɩkã neb pa kẽesd b toog politik yɛlẽ, la tɩ welsg pa be b sʋk ye. B nonga taaba.” A paasame: “Mam da rɩka m meng n kõ n na n zab n kogl tẽnga. La m sẽn bãng sɩdã sẽn be Biiblã pʋgẽ wã, m yãka yam n dɩk m meng n kõ a Zeova.” A Zã toeema fasɩ. A pa le  zabd ne tẽns a taab la buud a taab neb ye. Masã, a taasda ned buud fãa koɛɛg ning sẽn be Biiblã pʋgẽ wã sẽn kɩtd tɩ neb zemsd taabã. Biiblã saglsã sẽn tõe n sõng buud toɛy-toɛy neb tɩ b toeem woto wã yaa kaset tɩ d tõe n kɩsa sɩd ne Wẽnnaam Gomdã.

16. Bõe yĩng tɩ tar yõod tɩ d maneg n kɩs sɩd ne Wẽnnaam Gomdã?

¹⁶ Dũniyã sẽn tar sãoong n dabdã, na n wa yɩɩ toog tɩ d kɩs sɩd ne bũmb ning Biiblã sẽn yetã. Neb kẽer tõe n wa rat n kɩtame tɩ d yamã yuusi. Wala makre b tõe n wa ratame tɩ d maand sãmbs ne Biiblã goamã sã n yaa sɩda, wall a Zeova sã n yãka tʋm-tʋmd sẽn tũud sɩdã sẽn na yɩl t’a ges a nin-buiidã yell rũndã-rũndã. La d sã n kɩs sɩd t’a Zeova Gomdã yaa sɩd wakat fãa, d tẽebã sã n wa paam makr a woto buudu, d na n tõog n yalsa kãn-kãe. D na n ‘yãka yam n sak [a Zeova] noyã wakat fãa, n tãag d kũum.’ (Yɩɩn. 119:112, MN) D pa na n “tol n zoe yãnd” n pa rat n gom sɩdã yell ne neb a taabã, la d sagl-b tɩ b tũ Biiblã saglsã ye. (Yɩɩn. 119:46) Sẽn paase, d na n tõoga toog ne sũ-mar la ne sũ-noog zu-loe-kɛgems taoore, wala makre, b sã n wa namsd tõnd d tẽebã yĩnga.—Kol. 1:11; Yɩɩn. 119:143, 157.

17. Bõe yell la d yʋʋmdã vɛrse wã na n tẽeg-do?

¹⁷ D sũy yaa noog wʋsgo, d sẽn paam t’a Zeova sõng-d tɩ d bãng sɩdã! Sɩdã kɩtame tɩ d yam gãe bãane, la a sõngd tõnd tɩ d mi d sẽn segd n zã d meng to-to dũni-kãngã nebã sẽn vɩ yaar la b pa mi b sẽn maandgã sʋka. A kɩtame tɩ d saagdẽ tɩ Wẽnnaam Rĩungã maasem yĩnga, beoog na n yɩɩ neere. Bɩ yʋʋmd 2023 vɛrse wã sõng-d tɩ d kell n kɩs sɩd tɩ Wẽnnaam Gomdã tõre, rat n yeel t’a halhaalã yaa sɩda!—Yɩɩn. 119:160.