Karemdbã sogsgo
‘Pag’ ning yell b sẽn gomd Ezayi 60:1 pʋgẽ wã yaa ãnda, la wãn to la a “yik” n kɩt t’a “vẽenemã yãge”?
Ezayi 60:1 wã yetame: “Paga, yik n kɩt tɩ f vẽenemã yãge. Bala fo vẽenemã waame. A Zeova ziirã yãgda fo zugu.” Ezayi sak 60 wilgdame tɩ ‘pagã’ yaa Siyõ, bɩ Zerizalɛm sẽn da yaa Zida na-tẽng wakat kãngã. (Eza. 60:14; 62:1, 2) Zerizalɛm tẽngã makda Israyɛll nin-buiidã. A Ezayi sẽn yeel bũmb ningã kɩtame tɩ d tõe n sok d meng sogsg a yiibu: Pipi, wakat-bʋg la Zerizalɛm “yik” n kɩt t’a vẽenemã yãge? Yiibu, a Ezayi sẽn yeel bũmb ningã paamda pidsg a to sẽn yaa kãseng rũndã-rũndã bɩ?
Wakat-bʋg la Zerizalɛm “yik” n kɩt t’a vẽenemã yãge, la wãn to la a maan rẽ? Zerizalɛm ne a wẽnd-doogã ra lebga ra-boogo, Zʋɩf-rãmbã sẽn wa n kẽng yembd Babilon n tɩ kaoos yʋʋm 70 wã sasa. La Meed ne Pɛrs-rãmbã sẽn wa n zab ne Babilon n tõogã poore, Israyɛll neb nins fãa sẽn da be Babilon soolmẽ wã paama sor n na n leb b ba-yirã, n le tɩ sɩng a Zeova tũubu. (Ɛsd. 1:1-4) Yʋʋmd 537 sẽn deng a Zeezi rogmã tɛka, Zʋɩf-rãmbã buud 12 kellã leba Zerizalɛm n na n le tɩ sɩng a Zeova tũubu. (Eza. 60:4) B sɩnga maand maaneg n kõt a Zeova, n maand tigã, la b sɩng wẽnd-doogã meeb me. (Ɛsd. 3:1-4, 7-11; 6:16-22) A Zeova ziirã le sɩnga yãgb Zerizalɛm zugu, rat n yeel t’a nin-buiidã zugu. B lebga wa vẽenem, buud nins sẽn da pa tũud a Zeova wã yĩnga.
A Ezayi sẽn togs bũmb ningã paama pidsg wakat kãnga, la pa zãng ye. Israyɛll nebã fãa la bal pa kell n tũ a Zeova ye. (Nee. 13:27; Mal. 1:6-8; 2:13, 14; Mat. 15:7-9) Kaoosg zugẽ, b pa sak n tẽ Mesi wã sẽn yaa a Zeezi Kiristã meng ye. (Mat. 27:1, 2) La yʋʋmd 70 wã, b wa n sãama Zerizalɛm ne a wẽnd-doogã naoor a yiib-n-soaba.
A Zeova ra pĩnd n togsame tɩ na n yɩɩ woto. (Dãn. 9:24-27) Yaa vẽeneg t’a Zeova raabã ra pa a Ezayi bãngr-goam nins sẽn be Ezayi sebrã sak 60 pʋgẽ, n gomd tũudum hakɩɩkã lebs n luglã yellã pids Zerizalɛm zug zãng ye.
A Ezayi goamã paamda pidsg sẽn yaa kãseng rũndã-rũndã bɩ? N-ye, a pidsda pag a to zugu, la pa pag sɩd-sɩd ye. Yaa “yĩngr Zerizalɛmmã.” Tẽn-tʋmd a Poll goma a yell n yeel yaa: “Yẽ n yaa tõnd ma.” (Gal. 4:26) Yĩngr Zerizalɛmmã yaa Wẽnnaam siglgã babg ning sẽn be saasẽ wã, rat n yeel tɩ malɛgsã sẽn maand sɩd ne-a wã. A kambã yaa a Zeezi, n paas kiris-neb 144000 sẽn paam vʋʋsem sõngã zaeeb n saagd n na n tɩ vɩɩmd saasẽ wa a Pollã. Kiris-neb nins sẽn paam vʋʋsem sõngã zaeebã yaa “buud sẽn yaa sõngo,” b sẽn boond tɩ “Wẽnnaam Israyɛllã.”—1 Pɩy. 2:9; Gal. 6:16.
Wãn to la yĩngr Zerizalɛmmã “yik” n kɩt t’a “vẽenemã yãge”? Yaa ne kiris-neb nins sẽn paam vʋʋsem sõngã zaeeb n be tẽngã zug n yaa a kambã maasem. D ges bũmb ning sẽn paam-ba, tɩ zems ne bũmb ning b sẽn da pĩnd n togs tɩ be Ezayi sebrã sak 60 pʋgẽ wã.
Kiris-neb nins sẽn paam vʋʋsem sõng zaeebã ra segd n yikame, bala ra yaa wa b bee lik pʋgẽ, sɩdã kɩɩsdb sẽn da lebg wʋsg tẽn-tʋmdbã kũum poorã yĩnga. (Mat. 13:37-43) Ra yaa wa b lebga Babilon-kãsengã sẽn makd ziri tũudmã fãa sẽn naag taabã yembse. B kell n yɩɩ b yembs n tãag ‘dũniyã saab’ wakate. Wakat kãng sɩnga yʋʋmd 1914. (Mat. 13:39, 40) Rẽ poor bilfu, yʋʋmd 1919 wã b yii yembdã pʋgẽ. La tao-tao bala b sɩnga Wẽnnaam Rĩungã koe-noogã moonego, tɩ yaa wa b sẽn kɩtdẽ tɩ b vẽenemã yãgda. a Yʋʋmã noorã, buud toɛy-toɛyã fãa neb wata vẽenem-kãng pʋgẽ, baa Wẽnnaam Israyɛllã kellã, rat n yeel tɩ “rĩm-dãmb” nins yell b sẽn gomd Ezayi 60:3 pʋgẽ wã.—Vẽn. 5:9, 10.
Ka la bilfu, kiris-neb nins sẽn paam vʋʋsem sõng zaeebã vẽenem na n maneg n yãgame n yɩɩg pĩndã. Bõe yĩng tɩ d yet woto? Bala b sã n wa maan kaalem, b na n tɩ naaga “Zerizalɛm-paalgã,” bɩ Kiristã pʋg-paalã. Neb 144000 na n naag-a lame n dɩ naam la b yɩ maan-kʋʋdba.—Vẽn. 14:1; 21:1, 2, 24; 22:3-5.
Zerizalɛm-paalgã na n maana bũmb sẽn tar yõod wʋsg Ezayi 60:1 bãngr-gomdã pidsg pʋgẽ. (Ges-y Ezayi 60:1, 3, 5, 11, 19, 20 la Vẽnegr 21:2, 9-11, 22-26.) Wa pĩnd wẽndẽ Israyɛll naamã yẽgr sẽn da be Zerizalɛmmã, Zerizalɛm-paalgã ne Kiristã n na n yɩ dũni-paalgã goosneema. Wãn to la Zerizalɛm-paalgã “yit Wẽnnaam nengẽ saasẽ n sigda”? A na n tʋma tʋʋm buud toor-toor tẽngã zugu. Wẽn-sakdbã sẽn yit buud toɛy-toɛyã fãa pʋsẽ wã “na n kẽna a vẽenemã maasem yĩnga.” B na n paama b mens ne yel-wẽndã la kũumã. (Vẽn. 21:3, 4, 24) Woto na n kɩtame tɩ ‘bũmb fãa lebs n manege,’ wa a Ezayi ne no-rɛɛsdb a taab sẽn da pĩnd n togsã. (Tʋʋ. 3:21) Yaa Kirist sẽn lebg Rĩmã tɛk la bũmb fãa lebs n manegã wakat sɩng-yã, n na n tall n tɩ tãag Kirist yʋʋm tusr naamã baasgẽ.
a Ezekɩyɛll 37:1-14 ne Vẽnegr 11:7-12 me gomda sẽn paam-b vʋʋsem sõng zaeebã sẽn da na n yi Babilon-kãsengã yembdẽ yʋʋmd 1919 wã yelle. A Ezekɩyɛll ra pĩnd n togsame tɩ kiris-neb nins fãa sẽn paam vʋʋsem sõng zaeebã na n zĩnda yembdẽ n kaoose, n yaool n wa paam b mense. Bãngr-gomd ning sẽn be Vẽnegr sebrã pʋgẽ wã gomda sẽn paam-b vʋʋsem sõng zaeebã sul-bil sẽn na n lʋɩ a Zeova nin-buiidã taoor yelle. B ra maan-b-la pãng n kẽes-b bãens roogo, tɩ kɩt tɩ b ra pa le tõe n paam n tʋm a Zeova tʋʋmdã ye. La pa yã n kaoos la b yi bãensã roogẽ, n le kẽng taoor ne a tʋʋmdã ye. Yʋʋmd 1919 wã tɛka, b yãk-b lame tɩ b yaa “tʋm-tʋmd sẽn tũud sɩd la sẽn tar yamã.”—Mat. 24:45; ges-y Le culte pur de Jéhovah enfin rétabli ! sebrã, seb-neng 118 wã.
