1. Yʋʋmd 2023 yʋʋmd-yʋʋmd tigsgã sasa, bõe la d bãng-yã?

 YƲƲMD 2023 yʋʋmd-yʋʋmd tigsgã sasa, a b maneg n bilg-d-la bũmb kẽer d sẽn tẽede, la b taas-d koees d koe-moonegã wɛɛngẽ hal tɩ d sũur yɩ noogo. Wala makre, d bãngame tɩ baa Babilon-kãsengã sãoong poore, neb kẽer tõe n paama weer n wa naag a Zeova nin-buiidã. D bãngame me tɩ yʋʋmd 2023 sɩpaolg kiuugã tɛka, pa na n le yɩ tɩlɛ tɩ d kõ rapoor n wilg bũmb nins fãa d sẽn maan koe-moonegã sasa wã ye. B sẽn toeem woto wã kɩtame tɩ koɛɛgã mooneg pa le yaa tʋʋm-yãgdem wa pĩndã bɩ? Ayo!

2. Beoog sẽn vẽeg fãa, bõe yĩng tɩ koɛɛgã mooneg lebgd tʋʋm-yãgdem n paasdẽ? (Mark 13:10)

² Beoog sẽn vẽeg fãa, koɛɛgã mooneg lebgda tʋʋm-yãgdem n paasdẽ. Bõe yĩnga? Bala wakatã lebgda pẽdga. D ges a Zeezi sẽn pĩnd n togs bũmb ning koɛɛgã mooneg sẽn na n yɩ to-to yaoolem wakatã pʋgẽ wã. (Karm-y Mark 13:10.) A Matiye yeelame t’a Zeezi paasame tɩ koe-noogã segd n moona dũniyã tɛk fãa, tɩ “saabã” yaool n ta. (Mat. 24:14) Yaa a Sʋɩtãan dũniyã tõr saab yell la b sẽn gomd ka wã. A Zeova yãka bũmb nins sẽn na n maan ka la bilfã sẽn na n yɩ ‘daar ning la lɛɛr ningã.’ (Mat. 24:36; 25:13; Tʋʋ. 1:7) Beoog sẽn vẽeg fãa, wakat kãng tara kolgre. (Rom. 13:11) D segd n kell n moona koɛɛgã hal tɩ saabã ta.

3. Bõe n kɩt tɩ d moond koe-noogã?

³ Ad sokr sẽn tar yõod tɩ d fãa sẽn segd n bao a leoorã:  Bõe yĩng tɩ d moond koe-noogã? Koɛɛg-koɛɛga, yaa nonglem yĩnga. D sã n wa moond koɛɛgã, d wilgdame tɩ d nonga koe-noogã, tɩ d nonga nebã, la sẽn yɩɩd fãa, tɩ d nonga a Zeova la a yʋʋrã. Bɩ d gom bõn-kãens yell ball-balle.

D MOONDA KOƐƐGÃ D SẼN NONG KOE-NOOGÃ YĨNGA

4. D sã n wʋm koe-noogo, d manesem yaa wãna?

⁴ Yãmb ket n tẽra y manesem sẽn yɩ to-to y sẽn wa n wʋm koe-noog bɩ? Wala makre, y wʋmame tɩ y zakã ned n paam bi-pɛɛlga, wall y paama tʋʋmd y sẽn sɩng n dat ne y sũur fãa. Yaa vẽeneg tɩ y sũur yɩɩ noog wʋsgo, hal tɩ y ra togsd y zakã rãmb la y zo-rãmbã. Y manesem yɩɩ woto y sẽn wa n wʋm Rĩungã koe-noogã sẽn yaa koe-noog ning sẽn ka to wã bɩ?

5. Y manesem yɩɩ wãn y sẽn wa n bãng bũmb kẽer sẽn be Wẽnnaam Gomdã pʋgẽ wã? (Ges-y fot-rãmbã me.)

⁵ Tẽeg-y y manesem sẽ yɩ to-to, y sẽn wa n bãng bũmb kẽer sẽn be Wẽnnaam Gomdã pʋgẽ wã. Wala makre, y sẽn wa n bãng tɩ y Ba sẽn be saasẽ wã nonga yãmba, t’a ratame tɩ y naag a zakã rãmbã, t’a pʋlmame t’a na n kɩtame tɩ namsgã la toogã sa, tɩ y neb nins sẽn maan kaalmã tõe n wa vʋʋga dũni-paalgã pʋgẽ tɩ y paam taabã. (Mark 10:29, 30; Zã 5:28, 29; Rom. 8:38, 39; Vẽn. 21:3, 4) Y sẽn bãng rẽ wã yɩ-y-la noog wʋsgo. (Luk 24:32) Y nonga bũmb nins y sẽn bãngã hal n dat n togs nebã fãa bõn-kãense!—Ges-y Zeremi 20:9.

6. A Ernest ne a Rose kibarã wilgd-y la bõe?

⁶ D gom saam-biig a ye yʋʋr sẽn boond t’a Ernest b yelle. A ba wã maana kaalem a sẽn wa n tar yʋʋm piiga. A Ernest yeelame: “M da sokda m meng a sã n kẽnga saasẽ, bɩ a kii woto bal tɩ sa?  M sã n da yã biig sẽn be ne a ba, m sũurã manegd n sãamame.” A Ernest ra mii n kẽnga yaadẽ wã, n tɩ yĩgimd a Ba wã yaoogã taoor n pʋʋs n yeel yaa: “Wẽnnaam, m bõos tɩ y wilg-m m ba wã sẽn beẽ.” Yʋʋm 17 a ba wã kũum poore, b kãaba a Ernest Biibl zãmsgo, t’a sak zĩig pʋgẽ. A sẽn bãng tɩ sẽn ki-bã yaa wa b gõeeme n pa mi baa fʋɩ wã, la tɩ Biiblã pʋlmame tɩ b na n wa vʋʋgame wã, a sũur yɩɩ noog wʋsgo. (Koɛ. 9:5, 10; Tʋʋ. 24:15) A yaa n paama sogsg nins sẽn da namsd-a wã leoore. A Ernest sũur da nooma wʋsg ne bũmb nins a sẽn bãng Biiblã pʋgẽ wã. A pag a Rose naag-a lame n zãms Biiblã. Yẽ me ra nonga Rĩungã koɛɛgã. B reega lisg yʋʋmd 1978 wã. B moona neb nins b sẽn kĩ ne wã, b zo-rãmbã, la neb a taabã bũmb nins b sẽn bãngã ne yẽesem. Rẽ kɩtame t’a Ernest ne a Rose tõog n sõng neb 70 la zak tɩ b reeg lisgu.

7. D sã n nong sɩdã sẽn be Biiblã pʋgẽ wã, bõe la d na n dat n maane? (Luk 6:45)

⁷ Vẽenega, d sã n nong sɩdã sẽn be Biiblã pʋgẽ wã, d pa tõe n pa moon koɛɛgã ye. (Karm-y Luk 6:45.) D tagsda wa a Zeezi karen-biisã. B yeelame yaa: “Tõnd pa tõe n bas n pa gom bũmb nins tõnd sẽn yã la d wʋmã yell ye.” (Tʋʋ. 4:20) D nonga sɩdã, hal n dat n taas-a neb wʋsg wa d sẽn tõe tɛka.

D MOONDA KOƐƐGÃ D SẼN NONG NEBÃ YĨNGA

8. Bõe n kɩt tɩ d rat n taas neb a taabã koe-noogã? (Ges-y zĩ-gũbrã: “ Nong-y nebã: Sõng-y-b tɩ b lebg a Zeezi karen-biisi.”) (Ges-y fotã me.)

⁸ D nonga nebã wa a Zeova ne a Bi-riblã. (Yel. 8:31; Zã 3:16) D zoeta neb nins sẽn “pa mi Wẽnnaam” la sẽn “pa tẽed manegrã” nimbãaneg wʋsgo. (Efɛɛ. 2:12) B sẽn tar zu-loees wʋsgã tõe n kɩtame tɩ b getẽ tɩ yaa wa b bee bog-zulung pʋga. La tõnd tara bũmb sẽn wõnd wĩir n tõe n tak-b n yiisi. Yaa Wẽnnaam Rĩungã koe-noogã. D sẽn nong neb a woto la d zoet b nimbãanega kɩtame tɩ d maand d sẽn tõe fãa n taasd-b koe-noogã. B sã n wʋm koe-noogã, tõe n kɩtame tɩ b tẽed manegre, tõe n sõng-b lame tɩ b paam sũ-noog masã menga, la kɩt tɩ b tõe n wa paam “vɩɩm hakɩɩkã,” rat n yeel tɩ vɩɩm sẽn kõn sa Wẽnnaam dũni-paalgã pʋgẽ.—1 Tɩm. 6:19.

9. Bõe la d yet nebã yɛl nins sẽn watã wɛɛngẽ, la bõe yĩnga? (Ezekɩyɛll 33:7, 8)

⁹ D sẽn nong nebã me kɩtame tɩ d rat n togs-b tɩ dũni-kãngã saabã ta n saame.  (Karm-y Ezekɩyɛll 33:7, 8.) D zoeta d taabã nimbãanega, la d zoet d zakã neb nins sẽn nan pa tũud a Zeova wã me nimbãanega. Neb wʋsg vɩɩ woto bal n pa mi tɩ to-kãseng n wat ye. “A buud zɩ n zĩnd hal dũniyã sɩngr n tãag masã, la a buud kõn le zĩnd me ye.” (Mat. 24:21) D rat n sõng-b lame tɩ b bãng bũmb nins sẽn na n maan wakat kãng sẽn yaa bʋʋdã kaoob wakatã. Pipi, b na n sãama ziri tũudmã. Rẽ poore, b na n sãama a Sʋɩtãan dũniyã tõr Armagedõ zabrã sasa. (Vẽn. 16:14, 16; 17:16, 17; 19:11, 19, 20) D pʋʋsdame n kotẽ tɩ neb wʋsg kelg tõnd sẽn moondã, n wa naag tõnd tũudum hakɩɩkã pʋgẽ rũndã-rũndã. La neb n pa kelgd tõnd koɛɛgã, baa d zakã neb kẽere. Bõe n na n paam nin-kãense?

10. Bõe yĩng tɩ koɛɛgã mooneg maneg n yaa tʋʋm-yãgdem?

¹⁰ Sõsg ning sẽn loogã pʋgẽ, d yãame tɩ tõe tɩ neb kẽer sã n yã Babilon-kãsengã sãoongo, b na n toeema yam t’a Zeova fãag-ba. Dẽnd yaa masã meng la koɛɛgã mooneg maneg n lebg tʋʋm-yãgdem n yɩɩda. Ad bũmb sẽn wilgd rẽ: Yaa d sẽn yet-b bũmb ning rũndã-rũndã wã la b tõe n wa tẽeg wakat kãnga. (Ges-y Ezekɩyɛll 33:33.) Tõe tɩ b na n tẽega bũmb ning d sẽn da yet-bã, tɩ kɩt tɩ b wa naag tõnd tũudum hakɩɩkã pʋgẽ tɩ nan pa kẽ n bõog ye. Tõe tɩ neb kẽer sẽn pa kelgd tõnd rũndã-rũndã na n toeema yam Babilon-kãsengã sãoong sẽn na n yɩ wa tẽn-digimdgã poore, wa bãens-roog gũudã sẽn da be Filipã sẽn toeem yam “tẽn-digimd-kãsengã” poorã.—Tʋʋ. 16:25-34.

D MOONDA KOƐƐGÃ D SẼN NONG A ZEOVA LA A YƲƲRÃ YĨNGA

11. Wãn to la d tõe n kõ a Zeova ziiri, waoogr la pãnga? (Vẽnegre 4:11) (Ges-y fot-rãmbã me.)

¹¹ Bʋʋm-kãseng ning sẽn kɩt tɩ d moond koɛɛgã yaa d sẽn nong a Zeova la a yʋʋrã sẽn yaa sõngã. D miime tɩ koɛɛgã mooneg yaa bũmb d sẽn tõe n tũnug ne n pẽg Wẽnnaam ning d sẽn nongã. (Karm-y Vẽnegr 4:11.) D kɩsa sɩd ne d sũur fãa tɩ tõnd Wẽnnaam a Zeova zemsame tɩ sẽn maand-b sɩd ne-a wã kõ-a ziir la waoogr la pãnga. D sã n wilgd d taabã kaset nins sẽn wilgd tɩ yaa Wẽnnaam “n naan bũmb fãa,” la tɩ yaa yẽ maasem yĩng la d sẽn vɩ wã, d kõt-a-la ziir la waoogre. D sã n kẽesd d paoongã la d sẽkã koɛɛgã mooneg pʋgẽ, n moond d pãng fãa wa d sẽn tõe tɛka, d kõta Wẽnnaam pãnga, rat n yeel tɩ  d pãngã. (Mat. 6:33; Luk 13:24; Kolo. 3:23) Koɛɛg-koɛɛga, d nong n gomdã Wẽnnaam ning d sẽn nongã yelle. D tʋllame me n togs nebã Wẽnnaam yʋʋrã, la d wilg-b a sẽn yaa Wẽnnaam ning buudã. Bõe yĩnga?

12. Koe-moonegã sasa, bõe la d tõe n maan n waoog a Zeova yʋʋrã?

¹² D sẽn nong a Zeova wã kɩtame tɩ d rat n sõng t’a yʋʋrã paam waoogre. (Mat. 6:9) D rat n wilga neb a taabã tɩ bũmb nins a Sʋɩtãan sẽn yet a Zeova zugã yaa ziri fasɩ. (Sɩng. 3:1-5; Zoob 2:4; Zã 8:44) D sã n wa moond koɛɛgã, d raabã yaa d gom n teel a Zeova, la d sõng nebã tɩ b bãng a sẽn yaa Wẽnnaam ning buudã. D rat n sõnga nebã tɩ b bãng tɩ Wẽnnaam yaa nonglem, t’a rɩta a naamã ne tɩrlem, la tɩ ka la bilfu, a Rĩungã na n kɩtame tɩ namsg buud fãa sa, la a kɩt tɩ ãdem-biisã vɩɩmd laafɩ la sũ-noog pʋgẽ. (Yɩɩn. 37:10, 11, 29; 1 Zã 4:8) D sã n sõng nebã tɩ b bãng bõn-kãensã a Zeova zugu, d kɩtdame t’a yʋʋrã paamd waoogre. Rẽ kõt-d-la sũ-noog me, bala d neeme tɩ d maanda bũmb nins d sẽn segd n maane, d sẽn yaa a Zeova Kaset rãmbã yĩnga. Bõe yĩng tɩ d yet woto?

13. Bõe yĩng tɩ d sẽn paam n yaa a Zeova Kaset rãmbã yaa zu-zẽkre? (Ezayi 43:10-12)

¹³ A Zeova yãka tõnd tɩ d yaa a “kaset rãmba.” (Karm-y Ezayi 43:10-12.) Siglgã taoor lʋɩtb Sull yeela b lɛtr a ye pʋgẽ yaa: “D sẽn paam t’a Zeova boond tõnd t’a Kaset rãmbã yaa zu-zẽkr sẽn ka to.” c Bõe yĩnga? D rɩk makre. Yãmb sã n dat ned sẽn na n yɩ y kaset soab bʋ-kaoodb taoore, y na n yãka ned y sẽn mi la y sẽn kɩs sɩda, ned sẽn tar yʋ-noogo, tɩ  neb a taabã na n tẽ a goamã. A Zeova sẽn yãk tõnd tɩ d yaa a Kaset rãmbã, a wilgame t’a mii tõnd sõma, la t’a kɩsa sɩd tɩ d na n kõo kaset n wilg tɩ yaa yẽ a ye bal n yaa Wẽnnaam sɩd-sɩdã. D sũur yaa noog wʋsg d sẽn paam n yaa a Kaset rãmbã, hal n tũnugd ne segb buud fãa d sẽn paam n wilgd nebã a yʋʋrã, la d wilgd-b t’a Sʋɩtãan sẽn yet bũmb nins a Zeova zugã yaa ziri. D sã n maand woto, d wilgdame tɩ d miime tɩ d sẽn paam n yaa a Zeova Kaset rãmbã sɩd yaa zu-zẽkre.—Yɩɩn. 83:18; Rom. 10:13-15.

D NA N KELL N MOONA KOƐƐGÃ HAL TƖ SAABÃ TA

14. Tõe tɩ bõe n na n maan ka la bilf tɩ noom-do?

¹⁴ Bũmb toor-toor sẽn noogd sũur n na n maan ka la bilfu. Ne a Zeova sõngre, d saagdame tɩ neb wʋsg na n saka sɩdã nand tɩ to-kãsengã sɩnge. Bũmb a to me n noom-d wʋsgo. D bãngame tɩ baa to-kãsengã sẽn na n yɩ toog ning buud sẽn zɩ n zĩnd ninsaalbã sẽn be tẽngã zugã tɛk sasa wã, tõe tɩ neb n na n yi n bas a Sʋɩtãan dũniyã n wa naag tõnd tũudum hakɩɩkã pʋgẽ.—Tʋʋ. 13:48.

15-16. Bõe la d na n kell n maane, la hal n tãag dabʋre?

¹⁵ La nananda d tara tʋʋmd d sẽn segd n tʋme. Yaa tʋʋmd d sẽn pa na n le wa tʋme. D segd n moona Wẽnnaam Rĩungã koe-noogã dũniyã gill zugu. La d segd n gomda bʋ-kaoorã sẽn watã yell me. Nebã segd n bãngame tɩ dũni-kãngã saabã kolgda tao-tao. Dẽ, wakat kãng sã n wa ta b na n bãngame tɩ koɛɛg ning tõnd sẽn da moondã yita a Zeova nengẽ.—Eze. 38:23.

¹⁶ Sẽn yaa woto wã, bõe la d segd n yãk yam n maane? D sẽn nong koe-noogã yĩnga, d sẽn nong nebã, la sẽn yɩɩd fãa d sẽn nong a Zeova la a yʋʋrã yĩnga, d na n kell n moona koɛɛgã ne yẽesem, n miẽ tɩ yaa tʋʋm-yãgdem, hal t’a Zeova wa yeel tɩ “sekame!”