Gom-bil ning b sẽn lebg Dũni-paalgã lebgr pʋgẽ tɩ “saarã” tõe n yɩɩ bõn-zombds buud toor-toore. (Tʋʋ. 8:28, 29, 38) La wõnda saar ning pʋgẽ Etiyopi nin-naabã sẽn da be wã yaa bedre, n yɩɩd zabr saar wall saar b sẽn tar n zoet n wagsd taaba. Ad bũmb a wãn sẽn kɩt tɩ d yet woto:

Etiyopi raoã ra yaa nin-naaba, n togd so-woko. A ra yaa “nin-naab a ye sẽn yaa Etiyopi rĩm-poak a Kãndas tʋm-tʋmd-kãsenga. Yẽ n da get a paoongã fãa yelle.” (Tʋʋ. 8:27) Pĩnd wẽndẽ Etiyopi wã soolmã yaa rũndã-rũndã Sudã wã n paas Ezɩpt goabg babgã. Baa sẽn wõnd pa yɩ saar-yɛng la raoã kẽ a so-toakã tõrã, a segd n zãa teed wʋsgo, so-toakã sẽn yɩ wokã yĩnga. Pipi kiris-nebã wakatẽ wã, bõn-zombds nins b sẽn da tar n dɩkd nebã kẽer da tara nao a naase, tɩ b lud a zugẽ wã. Sebr a ye sẽn gomd Tʋʋm sebrã yell pʋgẽ, b yeelame tɩ saar a woto buud tõe n dɩka teed wʋsgo, t’a pʋgẽ zĩndg bee yamleoogo, la tɩ b tõe n tall-a lame n tog so-woko.

A Filip sẽn wa n yã Etiyopi raoã t’a ra karemda sebre. Kibarã wilgame t’a “Filip wudgame n kolge, n wʋm [Etiyopi nin-naabã] sẽn zẽk a koɛɛg n karemd no-rɛɛs a Ezayi sebrã.” (Tʋʋ. 8:30) B pa maan saar nins b sẽn da tar n togd soayã tɩ b tõe n kẽn tʋʋll-tʋʋll ye. Saarã sẽn da kẽnd maasg-maasgã kɩtame tɩ Etiyopi nin-naabã ra tõe n karemdẽ, la kɩt me t’a Filip tõog n wudg n paam-a.

Etiyopi raoã “bõosa a Filip t’a rʋ n zĩnd ne-a.” (Tʋʋ. 8:31) Saar nins b sẽn da tar n zoet n wagsd taabã pʋsẽ, sẽn wẽnd-a wã yasa yĩngri. La saar b sẽn da tar n togd sor pʋgẽ, zĩig ra bee sẽn sek a Filip ne nin-naabã na zĩndi.

Bũmb ning Tʋʋm sak a 8 wã la kʋdemdã sɛb sẽn wilgã kɩtame tɩ yʋʋmã noorã, b sã n na n wilg Etiyopi nin-naabã tõnd sɛbã pʋsẽ, b maand-a lame t’a zĩ saar sẽn yaa bedr n yɩɩd zabr saar wall saar b sẽn tar n zoet n wagsd taab pʋgẽ.