ZÃMSGÃ YĨNGA 6
YƖƖLL 18 Bark pʋʋsgo, Kiris maoongã yĩnga
A Zeova sẽn kõt tõnd d yel-wẽnã sugrã noom-d-la wʋsgo
“Wẽnnaam nonga dũniyã hal wʋsgo, n kõ a Bi-ribl-yendã.”—ZÃ 3:16.
D SẼN NA N BÃNGE
D na n yãa bũmb nins a Zeova sẽn maan sẽn na yɩl tɩ d paam d yel-wẽnã sugrã. Rẽ na n kɩtame tɩ d sũur maneg n yɩ noog ne a Zeova sẽn kõt d yel-wẽnã sugrã.
1-2. Bõe yĩng tɩ d tõe n yeel tɩ ãdem-biisã yɛl yaa wa bi-bɩɩg ning yell d sẽn gom sull a ye wã pʋgẽ wã?
MAMS-Y n ges-y bi-bɩɩg sẽn tar roagdb sẽn yaa arzɛk rãmbã tɩ yel-beed paam-ba. Daar a ye, a roagdbã maana agsɩdã n ki. Bi-bɩɩgã sũur sãama wʋsgo, la yel-beedã pa tek woto ye. Bi-bɩɩgã wa n bãngame t’a roagdbã sãama b arzɛkã hal n kẽ sam wʋsgo. A roagdbã pa bas-a ne bũmb ye. B bas-a-la ne sam bala, tɩ samã rãmb pẽdgd-a t’a yao zĩig pʋgẽ. A pa tol n tõe n yao samã n sɛ ye.
2 Bũmb kẽer wɛɛngẽ, d yaa wa bi-bɩɩgã. D yaab a Ãdem ne a Awa ra zemsa zãnga, n da be arzãnã pʋgẽ. (Sɩng. 1:27; 2:7-9) B ra tõe n vɩɩmda ne sũ-noog wakat sẽn kõn sa. La yɛlã tiig n toeemame. A Ãdem ne a Awa maana yel-wẽnde, t’a Zeova rig-b n yiis arzãnã pʋgẽ. Kɩtame me tɩ b bõn vɩɩm sẽn kõn sa wã. Yaa bõe la b bas ne b kambã la b yagensã? Ad Biiblã sẽn yete: “Yaa woto la yel-wẽndã tũ ne rao a yembr [a Ãdem] n kẽ dũni wã, tɩ kũum tũ ne yel-wẽndã n wa, tɩ kũum ta nebã fãa, b fãa sẽn maan yel-wẽnã yĩnga.” (Rom. 5:12) A Ãdem ne a Awa sẽn beegã yĩnga, tõnd fãa lebga yel-wẽn-maandb la kiidba. Yel-wẽndã d sẽn dogd ne wã yaa wa samd tõnd ned baa a ye sẽn pa tõe n yao ye.—Yɩɩn. 49:8.
3. Bõe yĩng tɩ b rɩk d yel-wẽnã n mak ne “sama”?
3 A Zeezi rɩka yel-wẽnã n mak ne “sama.” (Mat. 6:12; Luk 11:4, not-rãmbã) D sã n maan yel-wẽnde, yaa wa d sẽn tar a Zeova samde. A Zeova ra tõe n kɩtame tɩ d yao d yel-wẽnã yĩnga. A Zeova sã n da pa maan bũmb sẽn na yɩl tɩ d paam d yel-wẽnã sugri, ra na n yɩɩ d sã n ki bal la d yaood sam-kãnga.—Rom. 6:7, 23.
4. a) Bõe n da na n paam yel-wẽn-maandbã fãa, b sã n da pa paam sõngre? (Yɩɩn-sõamyã 49:7-9) b) Biiblã pʋgẽ b sã n gomd “yel-wẽnd” yelle, a võorã yaa bõe? (Ges-y zĩ-gũbrã: “ Yel-wẽnde.”)
4 D tõe n le paama bũmb nins a Ãdem ne a Awa sẽn bõnã bɩ? Tõeeme, la pa ne d mengã tõog ye. (Karm-y Yɩɩn-sõamyã 49:7-9.) Sã n da pa tũ ne sõngre, d pa tõe n saagd n na n wa vɩɩmd wakat sẽn kõn sa, wall tɩ sẽn ki-bã na n vʋʋgame ye. D ra na n kiida wa rũmsã bala. Bala, b pa naan-b tɩ b vɩɩmd wakat sẽn kõn sa, tɩ kɩt tɩ b pa saagdẽ tɩ b na n wa vʋʋg-b lame ye.—Koɛ. 3:19; 2 Pɩy. 2:12.
5. Bõe la d Ba sẽn nong-dã maan n na n sõng-d ne d yel-wẽndã samdã? (Ges-y fotã.)
5 D lebg n tẽeg bi-bɩɩg ning yell d sẽn gom sɩngrẽ wã. Rakãagr sã n wa yeel t’a na n yaoo a samã fãa, a manesem na n yɩɩ wãna? Sãmbg sẽn kae, a sũur na n yɩɩ noog wʋsgo. A na n saka sõngrã. Woto me, d Ba a Zeova sẽn nong-dã kõ-d-la kũun sẽn dond yel-wẽndã d yaab a Ãdem sẽn wa ne wã. A Zeezi goma rẽ yell n yeel yaa: “Wẽnnaam nonga dũniyã hal wʋsgo, n kõ a Bi-ribl-yendã sẽn na yɩl tɩ ned ning fãa sẽn tẽed yẽ ra sãame, la a wa paam vɩɩm sẽn ka sɛtã.” (Zã 3:16) Sẽn paase, kũun-kãng kɩtame tɩ d tõe n lebg a Zeova zo-rãmba.
A Zeezi moona koe-noogã n gom a Zeova sẽn tikd yẽ maoongã zug n kõt yel-wẽnã sugrã yelle. (Zã 3:16) Rẽ poore, a sak n kõo a vɩɩmã tɩ yɩ maoongo (Ges-y sull a 5)
6. Bõe yell la d na n gom sõs-kãngã pʋgẽ, la bõe yĩnga?
6 Bõe la d tõe n maan n paam n dɩ a Zeova kũun sẽn ka to wã sẽn kɩt tɩ d tõe n paam d yel-wẽnã sugrã yõodo? Sẽn na yɩl n leok sok-kãngã, d na n goma bũmb a wãn yelle, la d bao n wʋm b võore. Wala makre, maneg f yell ne Wẽnnaam, paasgo, yao n dole, yao n fãage, la paam tɩ b yeel tɩ f yaa tɩrga. D sã n bʋgs bõn-kãensã võorã zugu, d sũur na n maneg n yɩɩ noog ne bũmb ning a Zeova sẽn maan sẽn na yɩl tɩ d paam d yel-wẽnã sugrã.
A ZEOVA RAABÃ YAA D MANEG D YELLÃ NE-A
7. a) Bõe me la a Ãdem ne a Awa bõn-yã? b) D sẽn yaa a Ãdem ne a Awa yagensã, yaa tɩlɛ tɩ d maan bõe? (Rom dãmbã 5:10, 11)
7 A Ãdem ne a Awa pa kong vɩɩm sẽn kõn sa wã bal ye. B sãama bãmb ne b Ba a Zeova zoodã me. Sɩngrẽ wã, a Ãdem ne a Awa ra naaga Wẽnnaam zakã rãmba. (Luk 3:38) La b sẽn kɩɩs a Zeova wã tɛka, a yiis-b-la a zakã rãmb sʋk nand tɩ b paam kamba. (Sɩng. 3:23, 24; 4:1) D sẽn yaa b yagensã yĩnga, yaa tɩlɛ tɩ d maneg d yellã ne a Zeova. (Karm-y Rom dãmb 5:10, 11.) Rat n yeelame tɩ d segd n baoo a zoodo. Sebr a yembr wilgame tɩ Gɛrk gom-bil ning b sẽn lebg tɩ “maneg f yell ne” wã tõe n dat n yeelame tɩ “yõg zood ne f bɛya.” Sẽn be yamleoogã yaa tɩ yaa a Zeova n yɩ pipi n maan bũmb sẽn na yɩl tɩ d tõog n paam a zoodo. Bõe la a maan-yã?
A ZEOVA MAANA PAASGO
8. Bõe la a Zeova maan n pak sor tɩ zood le tõe n zĩnd yẽ ne ninsaalbã sʋka?
8 Paasgã yaa bũmb a Zeova sẽn kõ sor tɩ b tõe n maan tɩ zood le zĩnd yẽ ne ninsaalbã sẽn yaa yel-wẽn-maandbã sʋka. A paka sor tɩ b tõe n dɩk bũmb n tek ne bũmb a to sẽn zem-a. Woto, d tõe n le paama bũmb sẽn menem wall sẽn sãame. Biiblã babg ning b sẽn da gʋls ne Gɛrkã gomda “maoong sẽn kɩtd tɩ ned tõe n maneg a yell ne Wẽnnaam” yelle. (Rom. 3:25, notã) Maoong a woto kɩtdame tɩ laafɩ zĩnd ned ne Wẽnnaam sʋka, t’a lebg Wẽnnaam zoa, wall a kell n yɩ a zoa.
9. Bõe la a Zeova ra maan tɩ Israyɛll nebã tõe n paam b yel-wẽnã sugri?
9 A Zeova ra paka sor tɩ Israyɛll nebã tõe n paam b yel-wẽnã sugri, la b kell n yɩ a zo-rãmba. Israyɛll nebã ra segd n maana tigr sẽn yaa zall yʋʋmd fãa. B ra boonda daar-n-kãng tɩ Paasg daare. Baraare, maan-kʋʋdb kãsmã ra segd n kʋʋ rũms n maan maoong nin-buiidã yĩnga. Yaa vẽeneg tɩ rũmsã maandã ra pa tõe n yẽes ned baa a ye yel-wẽn zãng ye. Bala rũng pa zem ninsaal ye. La Israyɛll neb nins sẽn da tekd yam n kot sugrã sã n da maan maand nins a Zeova sẽn yeel tɩ b maanã, a ra sakd n kõt-b-la sugri. (Ebre. 10:1-4) Maandã b sẽn da maand Paasg daar fãa wã n paas maand a taabã ra tẽegda Israyɛll nebã tɩ b yaa yel-wẽn-maandba, la tɩ ra yaa tɩlɛ tɩ b paam bũmb sẽn yɩɩd rẽ sẽn na yɩl n lud b yel-wẽnã zãng-zãnga.
10. Bõe la a Zeova maan sẽn na yɩl tɩ d paam d yel-wẽnã sugr wakat fãa yĩnga?
10 Bõe la a Zeova maan sẽn na yɩl tɩ ninsaalbã tõe n paam b yel-wẽnã sugr wakat fãa yĩnga? A kɩtame t’a Bi-ribl-nongrã “kõ a meng vugr wakat fãa yĩng sẽn na yɩl n tʋk neb wʋsg yel-wẽna.” (Ebre. 9:28) A Zeezi “kõo a vɩɩmã tɩ yɩ yaood neb wʋsg yĩnga.” (Mat. 20:28) B sẽn yeel t’a Zeezi “kõo a vɩɩmã tɩ yɩ yaoodã” rat n yeelame tɩ bõe?
A ZEEZI KÕO A VƖƖMÃ TƖ YƖ YAOODO
11. a) Sã n yaa ne Biiblã, bõe yĩng tɩ ra yaa tɩlɛ tɩ b yao yaoodo? b) Nin-bʋg buud bal n da tõe n yao yaoodã?
11 Biiblã pʋgẽ, b wilgame t’a Zeova yãka yam n na n yao yaood sẽn na yɩl tɩ d paam d yel-wẽnã sugri, la d le paam a zoodo. Yaa bõe la Wẽnnaam ra segd n yao tɩ ninsaalbã lebs n paam bũmb nins a Ãdem sẽn bõnã? Tẽeg-y t’a Ãdem ne a Awa bõna b vɩɩmã sẽn da zems zãngã, la b sẽn da paam n tõe n vɩɩmd wakat sẽn kõn sa wã. Rẽnd yaoodã ra segd zema bũmb nins b sẽn bõnã. (1 Tɩm. 2:6) Yaa rao sẽn yaa kãsem bal n da tõe n yao yaoodã. Sẽn paase a ra segd n yɩɩ ned sẽn zems zãnga, ned sẽn tõe n vɩɩmd wakat sẽn kõn sa tẽngã zugu, la ned sẽn na n sak n kõ vɩ-kãng tɩ yɩ maoong tõnd yĩnga. Nin-kãng vɩɩmã ra na n ledga vɩɩm ning d sẽn bõnã.
12. Bõe yĩng t’a Zeezi ra tõe n yao yaoodã?
12 D ges bũmb a tã sẽn wilgd t’a Zeezi ra tõe n yaoo yaoodã: A ra zemsa zãnga. “A pa tol n maan yel-wẽnd” ye. (1 Pɩy. 2:22) Rẽ kɩtame t’a ra tõe n vɩɩmd tẽngã zug wakat sẽn kõn sa yĩnga. A sakame n na n ki, n kõ a vɩɩmã tõnd yĩnga. (Ebre. 10:9, 10) A Zeezi sẽn da zems zãngã, a ra yaa wa pipi rao a Ãdem sẽn da yaa to-to nand t’a maan yel-wẽndã. (1 Kor. 15:45) Rẽnd a Zeezi sẽn ki tõnd yĩngã, a yaoo yaood sẽn zems kɛpɩ tɩ d tõe n le paam bũmb nins a Ãdem sẽn bõnã. (Rom. 5:19) Woto, a Zeezi lebga “yaoolem Ãdmã.” Pa tɩlɛ tɩ ned a to sẽn zems zãng le wa yao bũmb nins a Ãdem sẽn bõnã yĩng ye. A Zeezi kii “vugr wakat fãa yĩnga.”—Ebre. 7:27; 10:12.
13. Welg-bʋg n be paasgã ne yaoodã sʋka?
13 Welg-bʋg n be paasgã ne yaoodã sʋka? Paasgã yaa bũmb ning Wẽnnaam sẽn maan sẽn na yɩl tɩ zood le zĩnd yẽ ne ninsaalbã sʋkã. Yaoodã yaa bũmb ning sẽn kɩt tɩ b tõe n maan paasg ninsaalbã sẽn yaa yel-wẽn-maandbã yĩngã. A Zeezi zɩɩmã sẽn yaa sõng wʋsgã sẽn daag tõnd yĩngã makda yao-kãnga.—Efɛɛ. 1:7; Ebre. 9:14.
A ZEOVA FÃAGA TÕNDO, LA A YEEL TƖ D YAA TƖRSE
14. Bõe yell la d na n gom masã, la bõe yĩnga?
14 Wãn to la paasgã nafd tõndo? Biiblã tũnuga ne goam buud toor-toor n na n wilg rẽ sẽn nafd tõnd to-to wã. Baa gom-kãens võorã sẽn wõnd taabã, b fãa wilgda paasgã sẽn pakd sor tɩ d tõe n paam a Zeova sugrã sẽn nafd tõnd to-to. D sã n bao n bãng gomd fãa võor sõma, na n sõng-d lame tɩ d yã rẽ sẽn tõe n naf tõnd mengã to-to.
15-16. a) Biiblã pʋgẽ b sẽn yeel tɩ “yao n fãagã” rat n yeelame tɩ bõe? b) Wãn to la rẽ nafd tõndo?
15 Biiblã yeelame t’a Zeezi sẽn kõ a vɩɩmã tɩ yɩ maoongã yĩnga, a yaoome n fãag tõndo, bɩ a kɩtame tɩ d paam d mense. Tẽn-tʋmd a Pɩyɛɛr goma rẽ yell n yeel yaa: “Yãmb miime tɩ pa ne bõn-sãamds wala wanzuri bɩ sãnem la b fãag [Gɛrk, “yao n fãag”] yãmb ne manesem ning sẽn pa tar yõodã y yaab-rãmbã sẽn zãms yãmbã ye. La yɩɩ ne zɩɩm sẽn tar yõod wʋsgo, wa pe-bil sẽn pa tar zang la rẽok zɩɩm, rat n yeel tɩ ne Kiristã zɩɩmã.”—1 Pɩy. 1:18, 19, notã.
16 A Zeezi sẽn ki tɩ yɩ maoongã kɩtame tɩ d tõe n paam d meng ne yel-wẽndã la kũumã sẽn namsd tõndã. (Rom. 5:21) Yaa vẽeneg tɩ d sũur nooma wʋsg ne a Zeova la a Zeezi, d sẽn paam tɩ b fãag-d ne a Zeezi vɩɩmã bɩ a zɩɩmã sẽn tar yõod wʋsgã yĩngã.—1 Kor. 15:22.
17-18. a) B sã n yeel tɩ ned yaa tɩrga rat n yeelame tɩ bõe? b) A Zeova sã n yeel tɩ d yaa tɩrga, wãn to la rẽ nafd tõndo?
17 Biiblã pʋgẽ b sã n yeel tɩ ned yaa tɩrga, rat n yeelame tɩ b basa a soab taale, la tɩ b yẽesa a yel-wẽnã. A Zeova sẽn maand woto wã, pa rat n yeel t’a kɩɩsda a noyã sẽn yaa tɩrsã ye. A sẽn yeel tɩ d yaa tɩrsã pa rat n yeel tɩ d segda ne rẽ, bɩ a getame tɩ yel-wẽnd pa wẽng ye. La a Zeova sẽn sak n na n kõ-d sugrã, yaa d sẽn tẽed bũmb ning yẽ ne a Zeezi sẽn maane, t’a Zeezi yao yaoodã sẽn na yɩl n fãag-dã.—Rom. 3:24; Gal. 2:16.
18 Wãn to la rẽ nafd tõndo? Neb nins b sẽn yãk tɩ b na n tɩ rɩ naam ne a Zeezi saasẽ wã zoe n paamame tɩ b yeel tɩ b yaa tɩrse, n yaa Wẽnnaam kamba. (Tɩt 3:7; 1 Zã 3:1) B paamame tɩ b kõ-b b yel-wẽnã sugri. Yaa wa b zɩ n maan yel-wẽnde, tɩ Wẽnnaam getẽ tɩ b zemsa ne Rĩungã pʋgẽ kõom. (Rom. 8:1, 2, 30) Neb nins sẽn saagd n na n wa vɩɩmd tẽngã zugã paamame tɩ b yeel tɩ b yaa tɩrse, n yaa Wẽnnaam zo-rãmba, la b paam me tɩ b kõ-b b yel-wẽnã sugri. (Zak 2:21-23) Kʋʋn-kãsengã sẽn na n põs Armagedõ zabrã sasa wã tõeeme n pa tol n ki ye. (Zã 11:26) “Nin-tɩrsã ne sẽn pa-b nin-tɩrs” nins sẽn ki wã na n vʋʋgame. (Tʋʋ. 24:15; Zã 5:28, 29) Wẽn-sakdbã fãa sẽn be tẽngã zugã na n wa “paama Wẽnnaam kambã lohormã sẽn be ziirã.” (Rom. 8:21) D gũuda wakat ning d sẽn na n paam n manegd d yellã zãng-zãng ne d Ba a Zeova wã ne yãgbo.
19. Bõe yĩng tɩ d tõe n yeel tɩ d yɛlã toeemame n lebg sõma? (Ges-y zĩ-gũbrã me: “ A võorã ne tõndo.”)
19 Bi-bɩɩg ning yell d sẽn gom sɩngrẽ wã bõna bũmb fãa, tɩ b le bas-a ne sam-kẽeng a sẽn pa tol n tõe n yao ye. Sɩda, tõnd me yɛlã ra yaa woto. La a Zeova sõng-d lame. A Zeova sẽn maan bũmb tɩ d tõe n paam d yel-wẽnã sugrã, la a kɩt t’a Zeezi wa ki tɩ yɩ maoongã kɩtame tɩ d yɛlã toeeme. D sẽn tẽed a Zeezi Kiristã kɩtame tɩ d tõe n paam tɩ b fãag-d ne yel-wẽndã la kũumã. B tõeeme me n bas d yel-wẽnã taale, tɩ yaa wa d zɩ n maan yel-wẽnd ye. Sẽn yɩɩd fãa, masã menga, d tõe n paam n lebga d saasẽ Ba a Zeova sẽn nong-dã zo-rãmba.
20. Yaa bõe yell la d na n gom sõsg ning sẽn pʋgdã pʋgẽ?
20 D sã n bʋgsd bũmb nins a Zeova ne a Zeezi sẽn maan n kõ-dã zugu, d sũur yaa noog wʋsgo. (2 Kor. 5:15) Sã n da pa tũ ne b sõngre, d ra pa na n tar saagr baa bilf ye! La wãn to la a Zeova sẽn kõt-d sugrã sɩd nafd d ned kam fãa yembr-yembre? D na n goma rẽ yell sõsg ning sẽn pʋgdã pʋgẽ.
YƖƖLL 10 D pẽg tõnd Wẽnnaam a Zeova
