A Maari ne a sɩd a Zã a sẽn be tẽng ningã pʋgẽ, b tõe n paama sãamb sẽn yi Filipin n wa tʋmd beenẽ n moon koɛɛgã nana-nana. Koronavirisã bã-loangdgã sasa, a Maari tõog n sɩnga Biiblã zãmsg ne neb sẽn be b tẽngã pʋgẽ la tẽns a taab pʋsẽ me. A maana wãn n tõog n maan dẽ?

A Maari ra nong n sokda a Biibl karen-biisã yaa: “Yãmb mii ned a to sẽn dat n zãms Biiblã bɩ?” B sã n leok tɩ n-ye, a yet tɩ b lame t’a nongẽ lame tɩ b gom a yell ne-a. Y sã n sok Biibl karen-biig woto, tõe n woma bi-sõma. Bõe yĩnga? Yaa tɩ neb nins sẽn nong Wẽnnaam Gomdã wae n gomda b sẽn zãmsd bũmb ninsã yell ne b zakã rãmb la b zo-rãmba. A Maari sẽn da wae n sokd woto wã woma bi-bʋse?

A Zasmin sẽn da yaa a Maari Biibl karen-biigã goma a yell ne neb a naas tɩ bãmb me sɩng Biiblã zãmsgo. B sʋkã ned a ye yʋʋr sẽn boond t’a Kiristin ra nonga Biiblã zãmsg wʋsgo. Rẽ n so t’a kos a Maari t’a zãmsd-a naoor a yiib semen fãa. A Maari sẽn sok a Kiristin a sã n mii ned a to sẽn dat n zãms Biiblã, a leokame yaa: “N-ye. M na n goma yãmb yell ne m zo-rãmbã.” Semen a wãn pʋgẽ, a Kiristin goma a Maari yell ne neb a naas tɩ bãmb me sak n na n zãms Biiblã. Rẽ poore, a Kiristin goma a Maari yell ne a zo-rãmb a taaba, tɩ bãmb me gom ne neb a taaba.

A Kiristin ra ratame me t’a zakã neb sẽn be Filipinnã zãms Biiblã. Rẽ n so t’a gom rẽ yell ne a bi-pugl a Ãndreya. A Ãndreya ra tẽedame t’a Zeova Kaset rãmbã yaa tũudum-paalle, tɩ b pa tẽed a Zeezi la tɩ yaa Kãab-kʋdgã bal la b karemda. La pipi zãmsgã poor bala a tags-kɛgã fãa saame. Zãmsgã wakate a wae n yetame: “Sẽn mik tɩ yaa Biiblã n yeelã, segd n yaa sɩda.”

A Ãndreya wa n goma a Maari yell ne a zo-rãmb a yiib la a tʋmd-n-taaga, tɩ bãmb me sɩng Biiblã zãmsgo. Sẽn paase, a Ãndreya pʋgdb a ye sẽn yaa zoang t’a yʋʋr boondẽ t’a Ãnzela n da mi n kelgd Biiblã zãmsg sasa t’a Maari pa miẽ ye. Daar a ye, a kosa a Ãndreya t’a yeela a Maari tɩ yẽ me rat n zãmsa Biiblã. A Ãnzela sũur da nooma wʋsg ne bũmb nins a sẽn zãmsdã. Kiuug a ye pʋgẽ bala a rɩka vɛrse-rãmb wʋsg ne zugu, n dat tɩ b zãmsd naoor a naas semen fãa. Ne a Ãndreya sõngre, a Ãnzela maanda tigissã ne videokõnferãns maasem n pa vaandẽ ye.

A Maari wa n bãngame tɩ zãmsgã sasa, a Kiristin sɩd a Zozuwe bee yambẽ. Rẽ n so t’a yeel-a t’a sã n data a tõe n wa naag n zãmsame. T’a Zozuwe yeel yaa: “M na n kelgdame bala, la m pa rat tɩ y sok-m sokr ye. Y sã n sok-m sokre,  m na n yik n loogame.” Sẽn wa n na n ta minit a nu wã t’a soka sogsg n yɩɩd a Kiristindi, n dat tɩ b zãms yẽ me Biiblã.

A Maari sẽn wae n sokd a Biibl karen-biisã b sã n mii ned sẽn dat n zãms Biiblã kɩtame t’a paam Biibl karen-biis wʋsgo. A kosa a teed-n-taas tɩ b zãms Biiblã ne kẽere. Yaa neb pisi la nii sẽn yit tẽns a naas pʋsẽ n sak n na n zãms Biiblã ne a Maari.

A Zasmin sẽn yaa pipi Biibl karen-biig ning yell d sẽn gomã reega lisg yʋʋmd 2021 tʋʋl-nif kiuugã pʋgẽ. A Kiristin reega lisg yʋʋmd 2022 sig-noy kiuugã pʋgẽ, n lebg n leb Filipin n tɩ bʋʋg a zakã rãmba. A Maari Biibl karen-biis a yiib sẽn yaa a Kiristin n gom b yell ne-a me n deeg lisgu. A Ãnzela reega lisg kiis a wãn a Kiristin lisgã poore, n yaa wakat fãa so-pakd rũndã-rũndã. A Kiristin sɩd a Zozuwe ne b bi-pugl a Ãndreya n paas Biibl karen-biis a taab modgd n tũuda bũmb nins b sẽn zãmsdã.

A Zeezi wakatẽ wã la a tẽn-tʋmdbã wakatẽ, koe-noogã piuuga tao-tao zags rãmb la zo-rãmb sʋka. (Zã 1:41, 42a; Tʋʋ. 10:24, 27, 48; 16:25-33) Y tõe n soka y Biibl karen-biisã la neb a taab sẽn dat n bãng n paas yaa: “Yãmb mii ned a to sẽn dat n zãms Biiblã bɩ?” Y sã n sok sok-kãngã d ned kam fãa sẽn tõe n sokã, tõe tɩ yãmb me paam n sɩng Biiblã zãmsg ne neb wʋsgo.