Kʋm ned rat n yeelame tɩ f ning f meng a zĩigẽ, n tõog n wʋm toog wall zu-loɛɛg sẽn namsd-a to-to. Logtor a ye yʋʋr sẽn boond t’a Rick Hansonn yeelame tɩ bee d zɩɩmẽ wã.

TAGS-Y N GES-Y: Bõe yĩng tɩ yaa ninsaalbã n tõe n kʋm b taabã n tɩ yɩɩda? Biiblã wilgdame tɩ yaa Wẽnnaam sẽn naan ninsaal n wõneg a mengã. (Sɩngre 1:26) Woto rat n yeelame tɩ d tõe n dɩka Wẽnnaam togs-n-taare, n bɩɩsd a zʋgdã sẽn yaa sõma zãngã. Dẽnd ned sã n kʋm a to nimbãaneg n sõng-a, yaa a Zeova sẽn yaa a Naandã togs-n-taar la a rɩk-yã.—Yel-bũnã 14:31.

Wẽnnaam kʋmda tõnd nimbãanega. D sã n namsdẽ, pa noom-a ye. Wala makre, Israyɛll nebã sẽn yɩ yembs Ezipt tẽngã n nams wʋsgo, n leb n tɩ zĩnd we-raoogẽ wã n nams yʋʋm 40, Wẽnnaam yãa b namsgã fãa, tɩ ra sãamd a sũuri. Ad Biiblã sẽn yeele: “Bãmb yel-pakrã fãa pʋga, rag n yaa yel-pakr yẽnda me yĩnga.” (Ezayi 63:9) Wẽnnaam pa yã b nimbãanegã bal ye. A reeg n wʋmda b toogã. Ad a sẽn yeele: “Mam mii toog ning sẽn tar bãmbã.” (Yikri 3:7) A leb n yeelame yaa: “Ned sã n sɩɩs yãmba, yaa wa a sẽn tuk mam nifu!” (Zakari 2:12) Ned sã n maan tɩ d sũur sãame, reegd n sãama Wẽnnaam me sũuri.

Biiblã yetame tɩ baa d sẽn mi n ningd d meng taale, n tagsdẽ tɩ d pa tog ne Wẽnnaam nimbãan-zoeerã, d segd n basa d yam tɩ “Wẽnnaam yɩɩda tõnd sũyã, la b mii bũmb fãa.” (1 Zã 3:19, 20) Wẽnnaam mii tõnd sõma n yɩɩd tõnd mengã. A mii tõnd yɛlã sõma, d tagsa wã, la sẽn be d sũurẽ wã fãa. A kʋmda tõnd nimbãanega.

Ad Biiblã sẽn yete:

• “Yãmb sã n boole, Sẽn-Ka-Saab na n leokame. Yãmb sã n bool n kos sõngre, b yetame: ‘Ad maam!’”—EZAYI 58:9.

• “Sẽn-Ka-Saab yetame: ‘Mam mii saagr ning m sẽn saagd yãmb yĩnga. Ka saagr sẽn na n wa ne toog yãmb zug ye, yaa vɩ-bãan saagre, sẽn na n yɩlẽ tɩ y beoog yɩ neere, la tɩ y paam tẽeb pidsgu. Dẽ, yãmb na n boola maam la y pʋʋs maam, la m na n leok-y lame.’”—ZEREMI 29:11, 12.

• “Bɩ y kok m nintãmã y ko-waoogẽ. Mam nintãmã yell ka gʋls yãmb sebrẽ wã sɩda?”—YƖƖN-SÕAMYÃ 56:9.

Tõnd sẽn mi tɩ Wẽnnaam kʋmda tõndã tõe n sõng-d lame tɩ d tõog n mao ne zu-loeesã bɩ? N-ye. A Mariya kibarã wilgda rẽ. Ad a sẽn yeele:

“Mam yʋʋm 18 bi-ribl n nams ne kãnsɛɛr yʋʋm a yiibu, n wa baas n maan kaalem. Sũ-sãangã loog-m-la hal tɩ m da getẽ tɩ vɩɩmã yaa toogo, la tɩ bũmb ning sẽn paam-mã yaa kɛgre. M sũurã ra puuda ne a Zeova, a sẽn pa sõng-a t’a paam laafɩ wã!

“Yʋʋm a yoob poore, saam-bi-poak sẽn yaa m zoa, n da nong-m la a kʋmd m nimbãaneg n maag a yĩng n kelg-ma, tɩ m togs-a sẽn be m sũurẽ wã fãa. M yeel-a lame meng tɩ m getame t’a Zeova pa nong-m ye. M goma na maan lɛɛr-dãmba, t’a sĩnd n kelgd-m bala. Rẽ poore, a lebs n togsa Biiblã vɛrse a ye sẽn keng m raoodo. Yaa 1 Zã 3:19, 20 wã sẽn yet tɩ ‘Wẽnnaam yɩɩda tõnd sũyã, la a mii bũmb fãa’ wã. A wilg-m lame t’a Zeova wʋmda tõnd toogã.

“Ne rẽ fãa, ra yaa toog ne-m tɩ m bas sũ-toogã! La m wa n karmã Yɩɩn-sõamyã 94:19 wã. Be, b yeelame: ‘Yɛl wʋsg sã n wa n be m pʋgẽ n namsd-ma, yãmb sẽn belsd maamã kõt-m-la sũ-noogo.’ Kell n yaa wa b gʋlsa gom-kãnga mam yĩnga! Tarẽ-n-tarẽ, m wa n neeme tɩ m sẽn paam n gomd m toogã yell ne a Zeova, n miẽ t’a kelgd-m lame la a wʋmd m yɛlã võorã kõt-m-la sũ-noog wʋsgo.”

Hakɩɩka, d sẽn mi tɩ Wẽnnaam wʋmda d yɛlã võore, la t’a kʋmd-d lame wã sɩd belsd-d-la wʋsgo! La sã n yaa rẽ, bõe yĩng tɩ ãdem-biisã yaa n namsd woto? Rẽ yĩnga yaa Wẽnnaam n sɩbgd tõnd d yel-wẽn yĩng bɩ? Wẽnnaam na n wa kɩtame tɩ namsg buud fãa sa bɩ? D na n leoka sogs-kãensã sõss nins sẽn pʋgdã pʋgẽ.